Luka 2
2
1LOMBA yenzepo pa masiku ŵala lenzepo tetulo la Kaisari Augusto lakuti charo chonse chonkalamo ŵantu chilembewe. 2Uku ni kulembewa kotatika apo peenze Kureniyo mmbili wa Suriya. 3Ŵonse echiyolilembesya, ali wonse ku munzi wake mwine. 4Naye Yosefe soti efuma mGalilaya, mmunzi wa Nazarete, echiya ku Yudaya, ku munzi wa Davide woitiwa Betelehemu, pakuti enze wa chiŵanza na luko lwa Davide, 5kuyolilembesya pamo na Mariya, etaniliwa naye, penze wokuzya vumo. 6Lomba yenzepo pamene penze palapa zisilizika nsiku zyovyala kwake. 7Naye evyala mwana wa mwanalume wondola wake; emvunga mnyula nomlalika molyera ng'ombe, pemwenzeve malo ŵaŵo mng'anda ya alwendo.
8Enzepo achiŵeta a mbelele pa charo chamene chila enzonkala ku sanga nolindilila mkusi waŵo usiku. 9Nipo malaika wa Asikuru epanama paŵo, na mchinzi wa Asikuru wiŵasakatira: naŵo eyopa kwene kantu. 10Naye malaika eŵanenera, Msayopa; pakuti ŵonani, numleterani makani aweme a chimwemwe chikuru chiti chiŵe ku ŵantu ŵonse: 11pakuti wamvyalikwilani lero mmunzi wa Davide Mpuzumushi, ni Kristo Asikuru. 12Ichi ni chiziŵikwilo kwanu, chakuti mkafwane lucheche luvungiwa mnyula nolala molyera ng'ombe. 13Nipo kovurumukizya wenze pamo na malaika uyo winji wa liumba la kumulu, wenzomlumba Mlungu na kuti,
14Mchinzi nauŵe kwa Mlungu kumulu,
Na pano pansi intendere mu ŵantu ŵakutemwa naŵo.
15Lomba yenzepo pechifumapo malaika paŵo knya kumulu achiŵeta euzyana umo na muyake, Tiyeni lomba ku Betelehemu, tikaŵone ichi chachitika chamene chatiziŵisya Asikuru. 16Naŵo ŵechiza maluŵilo efwanga Mariya na Yosefe, na lucheche lilelele mmulimba. 17Akaŵone eziŵisya ŵantu lizu lalaŵiriwa kwaŵo la mwana uyu. 18Naŵo ŵonse echimvwa ezizwa pa ivyo vinenewa kwaŵo na achiŵeta. 19Sembe Mariya enzosunga malizu ŵonse aŵa, kwalukanalukana mu mtima mwake. 20Achiŵeta naŵo ewererako kumchinzika nomlumba Mlungu kwa vyonse vyechimvwa noviŵona, nga ni umo mkwinenewera kwaŵo.
21Lomba zikasile nsiku zisano na zitatu zyomsirimula, emteya zina lake YESU, lamene liteyewa teti na malaika ula pakaliye nomitiwa mvumo.
22Apo akasile masiku ŵowamyiwa kwaŵo kwa mlingo wa dango la Musa, echiza naye ku Yerusalemi kumleta kwa Asikuru 23(nga ni mkwilembewera mdango la Asikuru, Mwanalume ali wonse ofuma mvumo azochishiwa mtuŵa kwa Asikuru), 24notira nsembe umo mkwinenewera mdango la Asikuru, Uswa umo kano vikanda viŵiri. 25Lomba ŵonani, enzemo muntu mu Yerusalemi zina lake Simeoni; uyu enze wolungama nolambila, enzololera mamyalaliko a Israeli: na Mzimu Mtuŵa enze pali yeve. 26Kwivundululiwa kwake na Mzimu Mtuŵa kuti sati aŵone imfwa pakaliyomuŵona Kristo wa Asikuru. 27Eloŵa mwa Mzimu mchipupilo: nipo ekavyala kamwana Yesu peloŵa nako, kuti achite nako kwa msango wa dango, 28pamene apo ekayangatila nomchinzika Mlungu kuti,
29Munifumyamo lomba kapolo wanu, Asikuru,
Pa mtendere mwa lizu lanu;
30Pakuti menso ŵangu aulola upuzumushi wanu,
31Ula umuŵikira futira pa menso pa ŵantu ŵonse;
32Mwenje wosanikira Mitundu,
Na mchinzi wa liumba lanu Israeli.
33Lomba awisi na anyina enzozizwa na ivi vinenewa vyake; 34naye Simeoni eŵashukisya nomnenera Mariya anyina, Ŵona, aka kaikiwa kwa kuwa nouka kwa anyinji mwa Israeli, na kuŵa chiziŵikwilo chosushiwa; 35inde, na chinkalammanja chize chipuzye moyo wako wamwine, kuti malingililo a mmitima inyinji ivundululiwe. 36Lomba enzepo mwanakazi Anna, muŵirizi, mwana wa Fanweli, wa mtundu wa Asheri (enze wokota ngako, enze na mulume vyaka visano na viŵiri chitatikile undola wake, 37naye enze wofwilwa vyaka makumi asano na atatu na mpuzyo vine). Uyu ntenzofuma mchipupilo, enzolambila nolitana vyakulya nopapatira usiku na mzuŵa. 38Ezako pa nsita yamene ila empa Mlungu chiŵongo, nolaŵira zya yeve kwa ŵala ŵonse enzololera kununuliwa kwa Yerusalemi. 39Naŵo akasilizye vyonse vyenze mwa dango la Asikuru ewererako ku Galilaya, ku munzi waŵo Nazarete.
40Lomba kamwana kekula, kekosa nozula nzeru: na chawanzi cha Mlungu chenze pali keve.
41Naŵo emvyala enzekuya chaka na chaka ku Yerusalemi pa siku likuru la pasaka. 42Naye apo penze wa vyaka kumi na viŵiri ŵeyako ŵeve umo muwenzele msango wa siku lila likuru; 43naŵo akasile masiku ŵake, penzowerera, mlumbwana ula Yesu esalila kuvuli mu Yerusalemi; na emvyala aliyoziŵe. 44Polinga kuti ali mchikunka epitilila msinzo wa nsiku imo, nipo emsakasaka mwa akwaŵo na mwa anansi ŵaŵo: 45naŵo pakaliyomfwanga ewererako ku Yerusalemi kumpapima. 46Lomba yenzepo, akapitepo masiku atatu, emfwanga mchipupilo enzenkezi pakati pa asambizi kuŵamvwa noŵakonsha makonsho: 47naŵo ŵonse omumvwa ezuzuka na mano ŵake na mayasuko ŵake. 48Akamuŵone ezizwa: na anyina emnenera, Mwanawe, ni chinji pawatichitira teti? ŵona, auso na neo tenzokusaka kolanguluka. 49Yeve enena naŵo, Nga syani pemwenzonisaka? simwiziŵa kansi kuti nakupimpilila vya Ŵata ŵangu? 50Ŵeve aliyoziŵa lizu lyechinena naŵo. 51Nipo eima naŵo pamo, echiza ku Nazarete, elinasya kuli ŵeve: na anyina enzosungave malizu aŵa ŵonse mu mtima mwake.
52Yesu naye enzokula nzeru na msinku, na pa chisomo kwa Mlungu na ku ŵantu.
Currently Selected:
Luka 2: MA23
Označeno
Deli
Kopiraj
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.