Luka 1
1
1PAKUTI anyinji elikatizya kulongosola nolemba vintu vila visilizika muli seo, 2nga ni umo mwechitipera ŵala ŵenze ntoni na atumiki a lizu chitatikile pa chiyambi, 3kwaniwamila nane soti, pakuti nikonkolola vyonse kosaluvya kuyambila potatika, kumlemberani mvukonkelana, mwe Teofilo ŵozila; 4kuti moziŵisya kosakaika malizu ŵala emwiyeruzyiwa naŵo na pakanwa.
5ENZEPO pa masiku a Herode, mfumu ya Yudaya, wansembe ngana zina lake Zakariya, wa chiŵanza cha Abiya: enze na mwanakazi wa mwa ŵana a Arone, na zina lake ni Elizabeti. 6Naŵo ŵonse aŵiri ŵenze ŵolungama pa menso pa Mlungu noyendayenda mmatetulo ŵonse na madango a Asikuru kosaifya. 7Naŵo ŵenzeve mwana, pakuti Elizabeti enze chumba, naŵo ŵonse ŵenze ŵokota.
8Lomba yenzepo kuti penzochita mulimo wonsembe pa menso pa Mlungu peyenze nsita yopokerana ya chiŵanza chake, 9umo muwenzele msango wa mulimo wonsembe, mlondola wimponera kuti aloŵe mchipupilo cha Asikuru noshoka vyonunkila. 10Winji wonse wa ŵantu wenzolomba panja pa nsita ya vyonunkila. 11Nipo emuŵonekera malaika wa Asikuru, enzepeneme dera la kwanja kwendi la popupila vyonunkila. 12Naye Zakariya emwazika mtima pechiŵona, na mwezo wimponera. 13Sembe malaika wa Asikuru emuuzya, Usayopa, Zakariya: pakuti mapapatiro ŵako omvwika, na mkazi wako Elizabeti azakuvyalire mwana wa mwanalume, nawe uzomteye zina lake Yohana. 14Uzoŵe na nseko na chimwemwe, na anyinji azatemwe povyalikwa kwake. 15Pakuti azaŵe mkuru pa menso pa Asikuru, sati amwe mvinyu na chokolwesya; naye azazule Mzimu Mtuŵa chitatikile mvumo mwa anyina. 16Anyinji a ŵana a Israeli azaŵayarusyire kwa Asikuru Mlungu waŵo. 17Naye azamtangulile mu mzimu na mpamvu ya Eriya, kuiyarusyira mitima ya ausu waŵo ku ŵana, na asimvwa kuti ayende mnzeru zya ŵolungama; kumuŵikilatu Asikuru mtundu wowamizyiwira kaŵera. 18Naye Zakariya enena na malaika, Nichiziŵe tyani ichi? panili mkote na mkazi wangu ni wokota. 19Malaika eyasuka emnenera, Ne nine Gabriyeli nupanama pa menso pa Mlungu; natumiwa kulaŵira nawe nokuletera makani aŵa aweme. 20Ŵona, uŵe cherere wosakumolaŵira mpaka siku lila liviti vize vichitike ivi, pakuti uliyozomere malizu ŵangu, amene ati asilizike pa nsita yake. 21Ŵantu enzomlindila Zakariya, naŵo ezizwa pechichelwa mchipupilo. 22Lomba akafume yeve sekumolaŵira naŵo: naŵo eziŵa kuti waŵona mensompenya mchipupilo: naye ekoselela eŵacheula nonkala cherere. 23Nipo yenzepo apo akasile masiku otumiki wake eima echiya kwake.
24Lomba akasile masiku aŵa Elizabeti mkazi wake emita vumo, naye elifisa myezi isano echiti, 25Asikuru enichitira teti mmasiku ŵechiniloleramo, kufumyapo nsoni zyangu ku ŵantu.
26Lomba pa mwezi wakasano na umo etumiwa malaika Gabriyeli na Mlungu ku munzi wa mGalilaya zina lake Nazarete, 27ku virgo wotaniliwa na mwanalume zina lake Yosefe, wa chiŵanza cha Davide; na zina lake virgo ni Mariya. 28Eloŵa mwake nonena, Timuŵoneni, mweo mwa chisomo, Asikuru ali namwe pamo. 29Sembe yeve evukuma mtima ngako pa lizu ili, nolingalinga zya malonje aŵa ni vinji. 30Lomba malaika enena naye, Msayopa, Mariya: pamwachitika wa chisomo kwa Mlungu. 31Ŵonani, mze mmite mvumo lanu novyala mwana mwanalume, nomteya zina lake YESU. 32Azaŵe mkuru noitiwa Mwana wa Ula wa Kumulu ngako: na Asikuru Mlungu azampe chilimba cha awisi Davide: 33naye azaŵe mfumu pa chiŵanza cha Yakobo maŵeromaŵero, nofumu wake uzoŵe wosasila. 34Mariya enena na malaika, Ichi chiŵe syani, panisaziŵa mwanalume? 35Malaika eyasuka emuuzya, Mzimu Mtuŵa amzileni, na mpamvu ya Ula wa Kumulu ngako imsitikeni: tetyo soti uyo ati azavyalikwe azaitiwe wozila, Mwana wa Mlungu. 36Ŵonani, Elizabeti mkwanu naye soti ana vamo la mwana mwanalume pokota kwake: uyu ni mwezi wakasano na umo kuli yeve enzoitiwa chumba. 37Pakuti palive lizu lofumila kwa Mlungu liti losoŵa mpamvu. 38Naye Mariya echiti, Ŵonani, chituntulu cha Asikuru; nakuniŵere nga ni mmwanenera. Nipo malaika eimako kwake.
39Lomba Mariya eima mmasiku ŵala echiya maluŵilo ku charo cha milundu, ku munzi wa mu Yudaya, 40noloŵa mng'anda ya Zakariya nomlonjera Elizabeti. 41Nipo yenzepo Elizabeti akamvwe malonje a Mariya na mwana uyo elumpalumpa mvumo mwake; na Elizabeti ezula Mzimu Mtuŵa; 42naye etumpula lizu na muŵila ukuru echiti, Nimwe mwa shuko mwa anakazi, na cha shuko ni chotwala cha vumo lanu. 43Nga ichi chafuma kuni kuli neo chakuti anyina a Asikuru ŵangu anizila? 44Pakuti ŵonani, lizu lolonjera kwanu likaloŵe mmatu mwangu mwana walumpalumpa na chimwemwe mvumo mwangu. 45Wa shuko ni yeve emvwila; pakuti vize visilizike ivyo vinenewa kwake na Asikuru. 46Naye Mariya echiti,
Moyo wangu umlumba Asikuru,
47Na mzimu wangu usangalala pa Mlungu Mpuzumushi wangu.
48Chikomo oulola utonto wa muzya wake:
Pakuti ŵonani, chitatikile lero maluko ŵonse azoniita mwine wa shuko.
49Chikomo mwine wa mpamvu onichitira vikuru;
Na zina lake ni lozila.
50Lusungu lwake liri ku maluko na maluko
Kwa aŵo omuyopa.
51Ochita mpamvu na kwanja kwake;
Oŵamwazya ŵolilumba pa malingililo a mmitima yaŵo.
52Oŵawisya mafumu pa vilimba vyaŵo,
Noŵaimya aŵo okavuka.
53Oŵakutisya na viweme anjala;
Noŵafumyapo asambazi na manja atyala.
54Omuyavya Israeli mlumbwana wake,
Kuti aŵokumbuka lusungu
55Kwa Abrahamu na mbuto yake vyaka vyosasila (Umo mwechinenera amausu wasu).
56Naye Mariya enkala pamo naye nga ni myezi itatu nowererako ku ng'anda kwake.
57Lomba nsita ya Elizabeti ifwikila yovyala mwana, epapa mwana mwanalume. 58Naŵo enekwaŵo na akwaŵo echimvwa kuti Asikuru ekuzya chitinti chake pali yeve; naŵo esangalala naye. 59Nipo yenzepo pa siku lakasano na katatu echizomsirimula mwana, esakomteya Zakariya, mwa zina la awisi. 60Anyina eyasuka echiti, Nte teti; lomba ateyewe Yohana. 61Emuuzya, Paliye mnekwanu ana zina ili. 62Nipo echeuzya awisi amteye ŵani. 63Naye esenga cholemberapo nolemba kuti, Zina lake ni Yohana. 64Naŵo ŵonse ezizwa. Na pakanwa pake pezuliwa lomba pano, na lulimi lwake lwimanguluka, naye elaŵira nomlumba Mlungu. 65Lomba mwezo wenze pali ŵonse ŵomangizyana naŵo: na malizu aŵa ŵonse emvwika mcharo chonse cha milundu cha Yudaya. 66Ŵonse eŵamvwa eŵasunga mmitima yaŵo echiti, Nga mwana uyu aŵe wosyani? Pakuti kwanja kwa Asikuru kwenze naye pamo.
67Awisi Zakariya ezula Mzimu Mtuŵa nolosya na kuti,
68Nalumbiwe Asikuru, Mlungu wa Israeli;
Pakuti oŵazila na kwachitira ŵantu ŵake mbombola,
69Noimya nsengo yotipuzumusya
Mumsumba mwa Davide mlumbwana wake
70(Umo mwechinenera pakanwa pa aŵirizi ŵake ŵozila ŵonkala chitatikile popoza vyaro vyonse),
71Upuzumushi pa tupondo twasu na pa manja a ŵonse otitinka;
72Kwachitira lusungu amausu wasu,
Nokumbuka mapangano ŵake ŵozila;
73Njazi yechilapizya kwa Abrahamu ausu wasu,
74Yakuti atipe seo patupuzumuka pa manja a tupondo twasu
Kumtumikila paliye mwezo,
75Ponkala atuŵa na pochita vyolungama pa menso pake nsiku zyasu zyonse.
76Inde nawe, mwanawe, uzoitiwe muŵirizi wa Ula wa Kumulu ngako:
Pakuti uzotangulile pa menso pa Asikuru, ukaziwamizye njira zyake;
77Kwaziŵisya maumba ŵake upuzumushi
Polekelewa kwa viipa vyaŵo,
78Chikomo cha mtima wa lusungu wa Mlungu wasu,
Kuchutizila chingwengwengwe cha kumulu,
79Kwavunikira aŵo onkala pa mfinzi na pa chimfule cha imfwa;
Notanguzya malwayo ŵasu ku njira ya mtendere.
80Lomba mwana ekula ekosa mu mzimu, enze mmalambo mpaka siku loŵoneshewa kwake kwa Israeli.
Currently Selected:
Luka 1: MA23
Označeno
Deli
Kopiraj
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.