मरकुस 9
9
1फेर यीसू बानै केयो, “थारै मू कीं लोग मरण ऊं पेलां परमेसर गो काम जरूर देखैगा झिको परधान गै रूप में आपगी ऊंची ताकत ऊं करण आळो है।”
यीसू गो रूप बदळणो
(मत्ती 17:1-13; लूका 9:28-36)
2इंगै छ दिन गै बाद यीसू पतरस याकूब अर यूहना नै सागै लेगे ऊंचै प्हाड़ पर गेयो जठै बे चारूं एकला हा चेला गी आंख्या गै सामणै यीसू गो रूप बदळग्यो। 3अर बिंगा गाबा चमकण लागग्या अर बोळा धोळा होग्या अर इता धोळा होग्या जिता सारी दुनिया में कोई बी गाबा धोळा कोनी कर सकै है 4चेला एलियाह अर मूसा नै बी चाणचकै देख्यो अर बे यीसू गै सागै बात करण लागरया हा। 5पतरस यीसू नै केयो, “म्हारो अठै रेणो आच्छो होवैगो ईंखातर म्हे तीन तंबु बणावां एक थारै खातर एक मूसा खातर अर एक एलियाह खातर।” 6तीनूं चेला भोत डरग्या हा। पतरस केयो क्यूंकै बिनै ठा कोनी हो कै बिनै के केणो है।
7फेर एक बादळ उठयो अर बानै घेर लियो बादळ मूं परमेसर गी बोली सुणीजी ओ मेरो बेटो है इंयु मैं प्रेम करूं हूं इंगी बाता नै ध्यान ऊं सुणो अर मानो। 8जद चाणचकै चेला नै यीसू गै सिवा कोई कोनी दिख्यो।
9जिंयाई बे प्हाड़ ऊं नीचै उतरा बिं टेम यीसू बानै हुकम देगे केयो, “थे झिको कीं देख्यो है इंगै बारै में परमेसर गी ओर ऊं आयो, माणस गो बेटो मरण गै बाद दुबारै जींवंतो होण तांई किनैई ना बताईयो।”
10आ बात चेला किनैई कोनी बतायी पण आपस में बाता करण लागरया कै दुसर जींवंतो किंया हो'सी। 11फेर चेला पूछयो, “यहुदी नेम सिखाण आळा क्यूं केवै है कै मसी गै आण ऊं पेलां एलियाह जरूर आवैगो।”
12यीसू उतर दियो, “ओ सच्च है कै एलियाह पेलां आवैगो अर लोगां नै परमेसर गी इच्छा गै अनुसार जीणो सिखावैगो। पण ईं बात पर बी ध्यान दैयो कै सासतर में लिखेड़ो है कै परमेसर गी ओर ऊं आएड़ो माणस परमेसर गी मरजी गै अनुसार भोत दुख उठावैगो अर लोग बिनै तुछ जाणैगा।” 13मैं थानै बताऊ हूं कै, “एलियाह आ'ग्यो है अर जिंया पेलां ई पवितर सासतर में बिंगै बारै में लिख्यो है लोगां आपगी इच्छा गै अनुसार बिनै सतायो।”
ओपरी भरेड़ै छोरै नै ठीक करणो
(मत्ती 17:14-21; लूका 9:37-43)
14जद बे नीचै दूसरां चेला कनै आया तो बां देख्यो कै बांगै कानी चारूंमेर एक मोटी भीड़ है अर यहुदी नेम सिखाण आळा बांगै सागै बेंस करण लागरया है। 15जिंयाई लोगां यीसू नै देख्यो तो बानै अचंभो होयो अर प्रणाम करण खातर बिं कानी भाज पड़या। 16यीसू पूछयो, “थे कीं बात ऊं चेला गै सागै बेंस करण लागरया हो।”
17भीड़ मू एक आदमी उतर दियो, “हे गुरू चेला गै कनै मैं आपगो बेटो ल्यायो हूं बिंगै मा एक भूत है बिंगी बजह ऊं बो बोल कोनी सकै। 18जद बो भूत बिं पर जोर करै है अर हमलो करै है। बो बिनै जमीन पर पटक देवै है बिंगै मूं में झाग आ जावै है। बिंगो सरीर सूकतो जावै है बिंगै भूत नै काडण खातर थारै चेला नै केयो पर बे कोनी काड़ पाया।”
19यीसू केयो, “थे लोग मेरै उपर बिस्वास करो ही कोनी मैं थारै सागै भोत टेम तांई रे चुक्यो हूं अर भोत टेम ऊं सेण करतो आण लागरयो हूं फेर बी थे बिस्वास कोनी करो।” फेर यीसू छोरै नै आपगै कनै ल्याण खातर केयो। 20बे छोरै नै यीसू कनै ले आया। जद भूत यीसू नै देख्यो। छोरै नै झटका देण लागग्यो, छोरो नीचै पड़ग्यो अर कूकण लागग्यो। बिंगै मूं में झाग निकळण लागग्या।
21यीसू छोरै गै बाप नै पूछयो, “इनै कद ऊं आ तकलीफ होयी है?” बाप बतायो, “छोटै थकां गी है।”
22केई बारी भूत इनै जान ऊं मारण खातर आग अर पाणी में रेड़ दियो। जे थे कीं कर सको हो तो म्हारै उपर दया कर'गे म्हारी मदद करो।
23यीसू केयो, “मन में बेम क्यामी राखै? जे तूं कीं कर सकै?” झिका बिस्वास करै है बांगै खातर सारो कीं हो सकै है।
24जद छोरै गै बाप गिड़गिड़ागे केयो, “मैं बिस्वास करूं हूं पूरी तरियां बिस्वास करण खातर मेरी मदद करो।”
25जद यीसू देख्यो कै भीड़ भोत होण लागरी है, यीसू ओपरी नै फटकार गे केयो, “हे बेरी अर गूंगी आत्मा मैं तनै आग्या देऊ हूं ईं छोरै ऊं बारै आ अर फेर कदी दुसर इंगै मा ना बड़ी।”
26ओपरी रोळो मचाण लागगी अर छोरै नै बुरी तरियां मरोड़ गे बारै निकळगी अर छोरो बेहोस हो'ग्यो ओ देखगे केई लोग केण लाग्या कै ओ तो मर ग्यो। 27पण यीसू बिंगो हात पकड़गे उठायो अर बो खड़यो हो'ग्यो।
28जद यीसू घर गै मा आयो तो बिंगा चेला ऐकांत में बानै पूछयो, “म्हे ओपरी नै क्यूं कोनी काड सक्या।”
29यीसू उतर दियो, “ईं तरिकै गी ओपरी सिरफ परमेसर ऊं पराथना करण ऊं ई निकळै है।”
आपगी मोत गै बारै में यीसू गी दूसरी बात
(मत्ती 17:22,23; लूका 9:43-45)
30फेर यीसू अर बिंगा चेला बठूं चालगे गलील प्रान्त ऊं होगे जाण लागरया हा, यीसू चावै हो कै किनैई ठा ना लागै कै बे अठै है। 31क्यूंकै बे आपगै चेला नै कीं खास बात बताणी चावै हा, बां बानै केयो, “परमेसर कनूं आएड़ै माणस नै कीं लोग बिंगै बिरोध करण आळा गै हवालै कर देवैगा। बे बिनै जान ऊं मार देवैगा। पण तीन दिना गै बाद बो फेर जींवंतो होज्यैगो।”
32ईं बात गी चेला नै समझ कोनी आई ही पण यीसू नै पूछण ऊं डरै हा।
सारा ऊं मोटो कुण?
(मत्ती 18:1-5; लूका 9:46-48)
33फेर बे कफरनहूम उठग्या। जद बे घर में हा यीसू चेला नै पूछयो, “थे लोग रा में के बात पर बेंस करण लागरया हा?”
34पण चेला चुप रेया क्यूंकै बां ईं बात पर बेंस करी ही कै आपणै मू मोटो कुण। 35यीसू बेठग्या अर आपगै चेला नै बुला'गे केयो, “झिको परमेसर गी नजर में सारां ऊं मोटो आदमी बणनो चावै तो बो अपणै आपनै सारां ऊं छोटो समझै अर सारां गी सेवा करै।” 36फेर बण बांगै सामै एक छोटै टाबर नै खड़यो करयो अर बिनै आपगी गोदी में लेगे केयो, 37“झिको मेरूं प्रेम करण गै कारण ईं तरियां एक छोटै टाबर गी सेवा करै है बो मानो मेरी सेवा करै है। झिका इयां मेरी सेवा करै है बे मेरी कोनी पण मेरो पिता झिकै मनै भेज्यो है मानो बिंगी सेवा करै है।”
झिको बिरोध में कोनी बो पक्स में है
(लूका 9:49,50)
38यूहना केयो, “गुरू मैं एक आदमी नै देख्यो झिको थारो नाम लेगे ओपरियां नै काडण लागरयो हो। मैं बिनै रोकयो क्यूंकै बो आपणै मू कोनी है।”
39यीसू बिनै केयो, “बिनै रोको ना। झिको मेरो नाम लेगे चमत्कार गा मोटा काम करै है बो बेगी मेरी बुराई कोनी करै। 40क्यूंकै झिको आपणै खिलाफ कोनी बो आपणै सागै है। 41मैं थानै केऊं हूं झिको बी थानै एक गिलास पाणी प्यावै है बो मनै प्यार करै है अर थे मेरै उपर बिस्वास करण आळा हो बिनै परमेसर गी बरकत जरूर मिलैगी।”
ठोकर गो कारण
(मत्ती 18:6-9; लूका 17:1,2)
42कीं किमत पर पाप करण ऊं बचो। झिको टाबरा गी तरियां मेरै पर बिस्वास करै है जे बिनै कोई ठोकर मारै है तो परमेसर बिनै भयानक सजा देवैगो। बिंगै गळ में मोटी चक्की गो पथर बांध गे समुंदर में गेर गे भयंकर मोटी सजा देवैगो। 43-44जे थारो हात थारै ऊं पाप करवावै अर थे बिनै रोक कोनी सको तो बिनै बाड दैयो। थारै खातर ओ ई आच्छो है कै थे एक हात ऊं अनंन्त जीवन पाणो आच्छो होवैगो। (नरक में किड़ा कदी कोनी मरै अर आग कदी कोनी बुझै)। 45-46जे थारो पग थारै ऊं पाप करवावै अर थे बिनै रोक कोनी सको तो बिं पग बाड दैयो। एक पग ऊं अनंन्त जीवन पाणो आच्छो होवैगो। (नरक में किड़ा कदी कोनी मरै अर ना कदी आग बूझै)। 47-48जे थारी आंख पाप करवावै तो बिनै बार काड दैयो कै दोनूं आख्या ऊं नरक में जाण ना ऊं काणो होगे परमेसर गै राज में जाणो आच्छो है, अर नरक में आग कदी कोनी बुझै ना कदी बठै किड़ा मरै।
49ईं दुनिया में हरेक जणै पर दुख तकलीफ आवै ईंखातर परमेसर गी आच्छी उळाद बणण खातर आं चिजा नै सुधार गे अपणै आपनै लायक बणाओ।
50लूण आच्छो होवै पण जे बिंगो सुआद बिगड़ ज्यै तो बो कीं काम गो कोनी रेवै। इंयाई थे अपणै आप में बो गुण बणाये राखो जिंऊं थे परमेसर गै काम आ सको अर दूसरां सागै मिल जुल गे रेवो।
Currently Selected:
मरकुस 9: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust