Mâk 3
3
Yesù ə zəŋi taw kə Wù lìy ù kə də nə̀ pfə̀ kə ukwe kiy
(Matìyò 12.9-14; Lukâs 6.6-11)
1Abù a ntsuk fə̀liy fiy, Yesù ə kàm zù tsìy nyi fwuli yə̀ a ndàw dzəŋə kə ghě Dzû, wù lìy wìy kə də̀ sòʼò awo nə̀ pfə̀ kə ukwe kiy. 2Aghee Falàsî àliy yiy ghu kə bee tsə̂ Yesù nə̀ ù zaʼ kòʼ tsə lâŋ kə̀liy kiy tə̀ ghu kwi we. Ghu tsə̀ŋə̀ lia kə ŋwò ani kòʼ nə̀ Yesù kì zəŋi taw ŋwòə wù wə̀ a ntsuk fə̀ zwaa fiy ə̀. 3Yesù ə dzày yə̀ â wù wə̀ ukwe u we wiy kə pfə doʼò nə̀, “Təmi kə idoŋ anə səkə aghè àdzə̀m.” 4Yesù ə bəb tsə â àghě ghà yə̀ a ghu nə, “Lâŋ kə ŋgàŋ kìy bɛmə nə̀ ŋgà zəŋi kìə̀ a ntsuk fə̀ zwaa fiy ə? A kpe ani zəŋi iyiə ìdzoŋə̀ yìy a ntsuk fə̀ zwaa fiy, moo à kpe ani zəŋi ì bɛbə yiy ə? À də̌ ani bii fyi wù zii a ntsuk fə̀ zwaa fiy moo à də̌ ni byɛbi màʼa ə?” Ghu tàʼà kə̀ kwuni bəlì iyiə ìliy â we.
5Fòŋ ə̀ Yesù kə ŋə̀m kə anə yiə yə u kə liay tsîy yə̂ nəniy aghee ghà yə̀ ate. Fòŋ ə ŋge fwabi sòʼò we, aŋwòə ghu kə ŋge kwu ukwəli u təfòŋ. U dzày yə̀ â wù wə̀ a we nə, “Nìay fyi yə̀ ukwe yiə̀ wìy.” Wù wə̀ ə nìày fyi yə̀ sòʼò ukwe. Ukwe u wû wə̀ ə təmi dzwàb fyi yə̀ nə̀ u mə taw. 6Aghee Falàsî yǐy dyiaŋi sàlì fyi ŋwò awote, zù kway yə̀ àghù yə̀ ghu kə taʼa nə̀ Helòd, ghu zù byay tsə sòʼò dzəd yə ghu də ani wiy màʼà Yesù ate.
Ŋwàâ kə ghù kìy kə bè a kə̀lə̀ Yesù anə iŋwù i Galìlî
7Yesù ə ŋwò zù nə̀ tsə̀təndii tə we tiy a kə̀lə̀ ìŋwù i Galìlî, ŋwàâ kə ghù kǐy tə̀ŋì yə̀ sòʼò adzəmə̀ we. Ghu kə ŋwò bə̀ a mbwòʼ ə̀ Galìlî, àliy yiy ə ŋwò bə̀ a mbwòʼ ə̀ Dzùdiyà, 8àliy yiy ŋwò bə̀ anə inaʼ i Yèlusalèm, àliy yiy ŋwò bə̀ a mbwòʼ ə̀ Idumìyà, àliy yiy ə ŋwò bə̀ sòʼò a mbwòʼ yə̀ ì dòʼò dàŋ fyi yə̂ nəniy anə yiə yə dzwì Dzudàn də. Àliy yiy kə ŋwò bə̀ sòʼò a kə̀lə̀ ìnaʼ i Taylè nə̀ ìnaʼ i Sidòn yìy. Aghû yə̀ àdzə̀m kə fyi bə̀, aŋwòə ghu kə zuw tsə ayiə yə Yesù kə zəŋə nəniy. 9Yəə aghê sî ŋge dûw nəniy, Yesù ə dzày yə̀ awò tsə̀təndii tə we tiy nə̀ ghu nîy na bə̀ ìghe nə̀ mfə̀n kìy, kəə aghê nì fwuə bə̂ dzə̂ azoŋə̀ ighe. 10À kə də̌ nə̀ ù mə zəŋi taw ndə̀mə̀ àghù anə dzàŋ tə ghu, aghê àdzaŋə tsə̀ŋə̀ də̀mə̀ bə̀ kə ŋwò ani lyɛbi mwàm yə̀ kə we tə̀ ghu taw kə. 11Aghû yə̀ nsìy mə̀bɛbə̀ mìy də anə iwè ighu, bəə ghu kôʼ tsə nəniy Yesù, ghu bvə̀ə̀ bə̀ a mbvə̀d, bvəʼə tsə̀ mə̀mbòŋ. Ghu dzìy tsə nə̀ “Wò də̌ Wà Kə̀zə̀!”
12Yesù ə sə̀ŋì kə̀tswuŋi â nsìy mə̀bɛbə̀ mə̀ nə̀ kəə ghu kə kàmə̀ dzìy nyə̀ fyiə wù wə̀ ghe də̀ nəniy we.
Yesù ə sày kə aghê àvəm nə̀ àghè àbè nə̀ ghu ki dzwumə we
(Matìyò 10.1-4; Lukâs 6.12-16)
13Abù Yesù kwoʼ kə anə udoŋ ùliy wiy, u twoŋə kə aghû yə̀ ù liə nəniy, ghu zù sòʼò a kə̀lə̀ we. 14U tyay fyi bə̀ aghè àvəm nə̀ ghè àbè kwe tsə azəd ə ghu nə̀ à də̀ Aghee ntwùm ə̀ ighe, nə̀ ghu ki də nə̀ ighè. Ghu ki bwiy nə̀ we tə̀ ù ki twumə fyiə nə̀ ghu zû naʼà ntwùm ə̀ Kə̀zə̀ 15U nyə̀ sòʼò ghu nə̀ daʼa kiy ani dzwùm fyi nsìy mə̀bɛbə̀ mìy.
16À yù də̀ azəd ə aghě kəfàʼ a ghà yə̀ ù kə sây kə nəniy; Simùn (Yesù kə kwee yə̂ ìzəd ìtyaʼa yiy nə̀ à də̀ Pità). 17Dzɛ̂m nə̀ àzə̀ we ghu tyoŋə nà də Dzwan awa Zebedì Yesù ə kwe na yə̀ ìzəd i ghu nə̀ à də̀ Bòànàge, (i myiŋə̀ nəniy awa iwe ì fənə yiy) 18Andùlù nə̀ Filîp nə̀ Bàtùlùmiyà, nə̀ Matìyò, nə̀ Tomàs, nə̀ Dzɛ̂m wà Afayòs, nə̀ Tàdìyà, nə̀ Simùn wè ìghǎ, 19nə̀ Dzudàs Ìsə̀kalòt wə̀ ù kə kâm dòʼò tsə tsə̀m ə̀ Yesù fè fyi yə̀ we.
Ghu dzìy nə̀ Yesù də̀ Bezebù
(Matìyò 12.22-32; Lukâs 11.14-23; 12.10)
20Yesù ə kàm zù dzwoŋi a ndàw we, ŋwàâ kə ghù kìy ə lwe bə̀ sòʼò. Yesù nə̀ tsə̀təndii tə we tiy kə̀ kâm kəli dzə̂ soŋə fiy ani nyi 21Abù isəd i ndaw i Yesù yìy zuw tsə nəniy, ghu ŋwò yə̀ ani zù nìy ŋwò zù dzwoŋi nə̀ we a ndàw ghu. Aŋwòə aghê kə dzìy nə̀, “Tuw kə we kiy mə zəə fyi.”
22Aghê àtyi dee u làŋ wə̀ ghu kə ŋwô bə̂ a Yèlusalèm mee nə̀, “Satàn, Bezebù, dòŋ kə nsìy mə̀bɛbə̀ mìy muə azoŋə̀ we, nyə̀ we nə̀ daʼa kiy ani kwà dzwùm fyi nsìy mə̀bɛbə̀ mìy azoŋə̀ àghè.”
23Yesù ə twoŋə tsə ghu, kaʼ tsə ani dzày fə̀ zə̀zə̌ nə̀ “Satàn ŋwà kwùnə̀ mə̀yiə nə̀ Satàn ə? 24Abu inaʼ ìliy yiy dzâw doʼò nəniy anə məŋkaʼa, ŋwà kwùnə̀ anə iwè, inaʼ i ghè yə̀ kì way dzə ani təmi. 25Bəə isəd i ndaw yiy dzâw doʼò nəniy ŋwà anə iwè, i kî səàlə̀ dyòʼò ŋwò. 26À də̀ ighəd abu Satàn kàmə̀ ŋwà kwunə nəniy nə̀ isaʼ i we yiy nə̀ ù dzàw dòʼò ŋwò, isaʼ i we yiy way ani kàm təmi dzə̀, i kî bvə̀ ŋwò i mây soʼò.
27Wù lìy wày dzə ani zù tsìy nyi kwoʼ yə̀ a ndàw wù wə̀ ù kwu nəniy daʼa kiy ù bii ŋwò fyi bə̀ ùfyiə, à mày kə nə̀ ù zù kwi kwù na tsə wù kə̀daʼa ù ghè wə̀, ù ki də ani nìy ŋwò mà kə ufyiə u we ùdzə̀m.
28Mə ndzəmə̀ dzìy bə̀ ŋwò â ghà nə̀, Zə̀kìy də ŋwô ani nìyzə̀ àyiə àbɛbə àdzə̀m aghê zəŋə nəniy nə̀ àyiə àbɛbə yə aghê dzîy nəniy. 29Ghu nî kwuni nìyzə̀ kòʼ wày ibɛb yə wù dzìy nəniy azoŋə̀ Zwàykə̀zwekiy, aŋwòə ibɛb i ghà yə̀ Zə̀kìy way dzə ani nìyzə̀ kòʼ. I kwu mfəm yə ì dòʼò təŋ nəniy.” 30(Yesù kə àyiə yə̀ dzìy aŋwòə aghê àliy yiy kə dzìy nə̀, “Ù kwu nsìy mə̀bɛbə̀ mìy anə uwè.”)
Zə̂ Yesù nə̀ Àwizə ə Yesù yìy
(Matìyò 12.46-50; Lukâs 8.19-21)
31Zə̂ Yesù nə̀ àwizə ə Yesù yìy ə bù ani bù kòʼ we, ghu bù təmi dòʼò tsə a bee anə ufə̀b u ndaw. Ghu twum tsə wù lìy nə̀ ù twoŋə nyə̀ fyi bə̀ Yesù awò ghu. 32Ŋwàâ kə̀ kə kə dzɛmì doʼò akə̀lə̀ Yesù, ghu dzày yə̀ awò Yesù a we nə̀, “Zə̂ yiə̀, nə̀ àwizə̂ yiə̀ də bee, ghu liə ani kòʼ wò.”
33Yesù ə bəb tsə a ghu nə, “Zə̂ wam də ndiə, awizə̂ yamə də nə̀ ndìə̀?” 34U dyaŋi liay tsìy yə̀ àghù yə̀ ghu kə də akə̀lə̀ we, dzày tsə nə̀, “Kòʼo, zə̂ wam wə fəə nə̀ awizə̂ yamə! 35Abu à də kə ndiə ù zəŋə nəniy ayiə yə Zə̀kìy liə nəniy ù ki də̀ zə̂ wam nə̀ àwizə̂ yamə.”
Currently Selected:
Mâk 3: isu
Označeno
Deli
Kopiraj
Want to have your highlights saved across all your devices? Sign up or sign in
© CABTAL 2023