Mâk 2
2
Yesù ə zəŋi taw kə wù ùlìy wìy ù kə pfə doʼò bə̂dkə̀bə̂d
(Matìyò 9.1-8; Lukâs 5.17-26)
1Abù ntsukə tsîy tsə ìnsə̀ki kə ghii Yesù dzwoŋi zû nəniy a Kàpanùm, aghee zuw tsə nə̀ ù mə bù a ndaw. 2Ndə̀mə̀ àghè ə bù lwe tsə a ndaw, anə yiə yə bwôʼ kə̀ tsəə kə ntiə kiy kə kàm wày, ghu lwe fyi dyaŋi yə̀ anə ufə̀b u ndaw. Yesù ə nìʼà yə̀ ntwùm ə̀ Kə̀zə̀ awò ghu. 3Iŋə̀mə̀ àliy yiy à kyàʼì bòʼò bù nə̀ wù lìy anə kəmbuŋ nə̀ ù mə pfə dòʼò bə̂dkə̀bə̂d, ghu bù nə̀ we awò Yesù. 4Aghû yə̀ ə də̀m kè ani nìy zù nə̀ wù wə̀ akə̀lə̀ Yesù, aŋwòə aghê kə ŋge lwe dòʼò ŋwò. Ghu kwoʼ kə anə tuw kə ndaw bwòʼ tsə kəbwôʼ anə fòʼò lòʼo kə Yesù kə də nəniy ate, nyoʼo nyəli nyi tswi tsə we anə mbuŋ anə səkə Yesù. 5Abù Yesù kòʼ tsə ndzòʼò ìbɛmə yə ghu kwu nəniy, u dzày yə̀ awò wù wə̀ ù kə pfə doʼò bə̂dkə̀bə̂d nə̀ “Mə mə nìyzə̀ bɛb tiə̀ tìy a wa, nam.”
6Aghê àtyi dee ulàŋ àliy yiy ghu kə də nəniy awote, ghu bəbə anə fòŋ tə ghu nə̀ 7“Wù wə̀ sì yî ŋgamə dzày tsə nə̀ìndiə? Ù mòʼò kə nə̀ ghe də Kəzə̀. À də̀ kə Kəzə̀ kə nîyzə̂ bɛb tiy.”
8A də̌ nə̀ Yesù maa kəli zì bə̀ àyiə yə ghu kə moʼò nəniy anə təfòŋ, U bəb yə̀ a ghu nə, “Gha moʼò nə̀ìndiə ndzòʼò àyiə yiy? 9À bvay tsìy fyi ani dzày yə̀ awò wù wə̀ ù pfə doʼò bə̂dkə̀bə̂d a we nə̀, Zə̀kìy mə nìyzə̀ bɛb tiə̀ tìy moo à bvay tsìy fyi ani dzày tsə a we nə, ŋwòə kə idoŋ, wò nîy kə mbuŋ yiə̀, wò kaʼ yə̂ ani bwìy ə?” 10“Mə ki dê bə̂ â ghà nə̀ Wà Wù kwu ŋwô daʼa kiy fəə anə mbyi, ani nìyzə̀ bɛb tə ghù.” U dyaŋi dzày yə̀ awò wù wə̀ ù kə pfə dòʼò bə̂dkə̀bə̂d nə̀, 11“Mə dzîy bə̀ â wò, ŋwòə kə idoŋ, wò nîy kə mbuŋ yiə̀, wò ŋwô zû a ndaw.”
12Wù wə̀ ə dyaŋi ŋwò təmi kə idoŋ, nìy kə mbuŋ kə we, ŋwò fyi yə̀ nə̀ aghê àdzə̀m ə̀ koʼò yə̀ ŋwò. Adzwə ŋge zwum ghu. Ghu nyə̀ ùkali awò Zə̀kìy dzìy tsə nə̀, “A kamə kə̀ kôʼkôʼ dzə̂ ndzòʼò àyiə yə.”
Yəsù ə twoŋə tsə Levì
(Matìyò 9.9-13; Lukâs 5.27-32)
13Yesù ə zù dzwoŋi fəli akə̀lə̀ ìŋwù i Galìlî. Ŋwàâ kə ghù kìy ə tyìŋə̀ bə̀ a kə̀lə̀ we, u kaʼ yə̀ ani tyi dè àyiə â ghu. 14Abù ù bwìy yə̂ nəniy, u zù kòʼ tsə Levì wà Afayòs ù kə khii ŋwàʼà kə̀tsuwkiy, ù kə də a ndàw ì khî ŋwàʼà kə̀tsuw kiy, Yesù mee a we nə, “Dzwùmi bə̀ miə.” Levì ə ŋwò kə, dzwùmì yə̀ we.
15Abù nə̀ ìnyinkwubì tìy, Yesù ə nyiə fwumə nə̀ tsə̀təndii tə we tiy a ndàw Levì. Ndə̀mə̀ àghè à khii ŋwàʼà kə̀tsuwkiy nə̀ àghè bɛbə yiy dzwùmì yə̀ Yesù a lòʼo kə̀ nyiə kiy, Yesù ə kaʼ yə̀ ani nyi fumi nə̀ ghu. 16Yəə aghê àtyi dee ulàŋ u Musî yə̀, ghu kə də soʼo aghee Falàsî yìy, ghu kòʼ tsə Yesù nyiə fwumə nə̀ àghè bɛbə yiy nə̀ àghè khii ŋwàʼà kə̀tsuw kiy, ghu bəb yə̀ â tsə̀təndii tə Yesù tìy nə̀ “A də̌ kìə̀ ù nyiə fwumə nə̀ àghè àbɛbə yiy nə̀ àghù yə̀ ghu khii ŋwaʼa kə̀tsuw kiy ə?”
17Yesù ə zuw ayiə yə ghu kə dzîy nəniy, u bə̀li yə̀ nə̀ “À kwu dzə̀ way aghê à taw yiy ani zù tə̀ wù ùtiə byaŋi ghu, à kwuni kwu a ghê dzaŋə ani zù tə̀ wù ùtiə byaŋi ghu. Mə kə̀ bû dzə̂ ani bù fày fyi bə̀ àghù yə̀ ghu də nəniy tsitsi anə sə k-a-zə̀, mə kwuni bù ani bù fày fyi aghê àbɛbə yiy.”
Ibəb kwùmə̀ yə̀ nə̀ àyiə à bamə idzwə yiy
(Matìyò 9.14-17; Lukâs 5.33-39)
18Abù soŋə fə̀ liy fiy, tsə̀təndii tə Dzwan wə ù kə nyìə̀ nəniy mwi m-à-zə̀ mìy nə̀ tə aghě Falàsî yìy kə bamə adzwə, aghê àliy yiy bù kaʼ ani bəb awò Yesù a we nə, “À də kìə̀ tsə̀təndii tə Dzwan wə ù nyiə̀ mwi m-à-zə̀ mìy nə̀ tə Falàsî tìy bamə nəniy adzwə yiy, tə tiə̀ tìy də kwuni bamə way ə?”
19Yesù ə bəb yə̀ a ghu nə, “Aghû yə̀ ghu nâm bə̂ ghu a lòʼo kə inyi kə̀ niiy iwè kìy, ghu də mə̀yə ani bamə adzwə awote nə̀ ghu də fwumi nə̀ ùŋəmə̀ wə̀ ù dziy nîy wìyəŋi yə? Ghu way dzə ani kaʼ yə̀ ani bam adzwə nə̀ ŋə̀mə̀ wìyəŋi wə̀ də fwumi nə̀ ghu.” 20Ntsuk fiy kwunə bè ŋwò ghu ki nîy ŋwô kə nə̀ ùŋəmə̀ wə̀ ù dziy nîy wiyəŋi akə̀lə̀ ghu, aghee we yiy ki bamə yə adzwə anə sòŋə fə ghà fə̀.
21Wù lìy wày dzə ani nìy kə bə̂d kə ndzwu kə̀ fyiə kiy ù tàŋì fè tsə kəbwôʼ ate anə ndzwu tə̀ wiy tiy. Abu ù zəŋi nəniy ghii, bə̂d kə ndzwu kə̀ fyiə kə̀ kî dzwə̀nì ŋwò fyi bə̀ nə̀ mbə̀lə̀ mə̀lìy mìy anə ndzwu tə ghà tə̀, bwôʼ kə ghà kə̀ ki kâm dûw fyi fwuli yə̂. 22Wù lìy wày dzə ani nìy kə dzə̀ nlwù mə̀ fyiə̀ mìy ù kwe tsə anə tsəd kə gùw nyàm kə̀ wiy kiy ù fè na tsə. Abu ù kwe tsə nəniy, nlwù mə̀ kî saa màʼà kə tsəd kə gùw nyàm kə ghà kə̀. Nlwù mə̀ nə̀ tsəd kə gûw nyàm kə̀ kî này yə̀ an-a-nsə̀àŋì. Ghu kwu ani kwe nlwù mə̀ fyiə̀ mìy anə tsəd kə gùw nyàm#2.22 Səsə, ghu kə kwe tsə̀ mə̀nlwù anə tsəd kə gùw nyàm. Abu wò kwe tsə nəniy nlwù mə̀fyiə̀ mìy anə tsəd kə̀ wiy kiy, nìy fè na tsə, tsəd kə ghà kə də̀ ani wiy kə kə̀ fyiə kiy soʼo.
Ibəb kwùmə̀ yə̀ nə̀ ntsuk fə̀ zwaa fiy
(Matìyò 12.1-8; Lukâs 6.1-5)
23A ntsuk fə̀ zwaa fə ghě Dzû fə̀liy fiy, Yesù kə tsìy yə̀ dzəd anə iswum iliy yiy tsə̀təndii tə we tiy swà yə̀ ufyiə ùliy u də yəə àlɛ̀m anə iswum yə, fyikə tsə nə̀ àwo yiy fələ yə̀ àsə yə̀ dzələ tədzələ. 24Aghee Falàsî mee awò Yesù a we nə “Kòʼo kə ayiə yə tsə̀təndii tiə̀ tìy zəŋə ayiə yə̀ lâŋ kə inaʼ kiy twe nəniy nə̀ ghu kə zəŋi a tsuk fə̀ zwaa fiy.”
25Yesù ə bə̀lì yə̀ ghu nə̀ “Ghà kamə twoŋə kôʼ àyiə yə Devìd kə zəŋi nəniy anə sòŋə fə dzoŋ kə zabə we nə̀ àghù yə̀ ghu kə də nəniy nə̀ we ə̀?” 26Anə sòŋə fə Àbàʼità kə də wù ùlwaʼà ùnè wìy, Devìd kə zû tsìy nyi tsə a ndàw Kə̀zə̀, nìy nyi kə kəba ghu kə sâ naa awò Zə̀kìy nə̀ ghù yə̀ ghu kə də nəniy nə̀ we, də̀ ghii lâŋ kìy kə də̌ nə̀ à mày kə àghè àlwaʼa ani nyi.
27Yesù ə dzày kəd tsə a ghu nə, “Zə̀kìy kə̂ səsə kiy zwùbì tsə wù, u ndyaŋi zəŋi tsə ntsuk fə̀ zwaa fiy. Ù kə kə̀ zəŋi dzə̂ ntsuk fə̀ zwaa fiy isə, awò we ani zwùbì wù. 28Ì yû dè tsə nə̀ Wà Wù də̀ mwe ə̀ mbyi ù kwu soʼo daʼa kiy anə ntsuk fə̀ zwaa fiy.”
Currently Selected:
Mâk 2: isu
Označeno
Deli
Kopiraj
Want to have your highlights saved across all your devices? Sign up or sign in
© CABTAL 2023