Luka 11
11
1Kyasia eekee andu alive katerevia-fo Iṛuva. Ammarisia mwanalosho umwi wamwi kamwia: Nndumi, tiloshe neese itereva Iṛuva, sheeli na Yohane andelosha vanalosho vamwi. 2Kavaia: Mukatereva Iṛuva numbueń kuri: Wui Nde, irina lyafo liindio̱. Umangi lwafo lushe. 3Kutiniinge nnu shoonga teru ta itisindisa. 4Kutitie na sile ta mareko eru, sheeli neese tikee itia valya vantirekio̱. Kutatiotoṛie tiwe nreyoń.
5Yesu kavaia: Eeifoo nndu eeworee ndoo yamwi. Kaenda kwamwi kio isomukoń karikari kamwia: Ndoo yakwa, nakutereva nnu kutu kushaakue mambumbu araru a mangolo a indeniinga mwini wakwa ashishea alli kio ki da arie kyaaṛo kyamwi. Nań natuṛa kindo kya inniinga. 7A mulla ini? Naare nndu ulya wa numba amwaṛuaa? Amwiaa: Kwashaatara! Numba yammaa iraywa na vana vakwa vammaa ilala. Nkimakii ikwimboo nkuniinge ndi. 8Amwaṛuaa kuro? Wode. Namuia: Na akwaa atakwimboo anniinge, lla ili eekee ndoo yamwi, akwimboo buṛu anniinge foose fintinye, fulya antereva nnu kutu. 9Na akwaa nniń namuiań: Tereveń amu muniingwaa. Ruyeń amu mukooyaa. Kabekabeń yoondi amu muruywaa! 10Fulya ulya woose akee itereva aniingwaa. Na ulya akee iṛuya akooyaa. Na ulya akee ikabakaba yoondi aruywaa. 11A ini kunu kwanu mwana amakii itereva ndee imbumbu lya mangolo na ndee anniinge songoṛo ya iwe? Ana antereve ikunga na ndee anniinge shoka andu a ikunga? 12Ana antereve ngosho ya nguku na ndee anniinge nguluva andu a ngosho? 13Kyasiań kwakooya ini, mukee varekwa, mwishi iniinga vana vanu findo fisha, nkilanya se Nde yanu wa iṛuvewu aniingaa valya vakee intereva Mumuyo wamwi Nsongori?
14Nkonu umwi Yesu eekee yumbuta mumuyo nkasha uwore nndu ateeshi irera. Na mumuyo ulya nkasha ili wamwuka, Uyo nndu ulya eemakii irera. Na isyamu lia likaṛiika. 15Na kiindi kyawo vakanumbua: Ni ito nnini wa mimuyo mikasha, mBelisebuli, yye anniingie finya ya yumbuta mimuyo yo mikasha. 16Na vengi vakakunda avaoruse kiringisio kinini kya kiiṛuvewu veemweleliaa. 17Nae kamanya makusaṛo awo kavaia: Umangi loose lukankwava lo weni na weni, Uyo luvaa nrabu. Na numba ikankufukya kavili iwaa. 18Na akwaa nSatana kwakooya akwava kakukaba ye muni, a umangi lwamwi naare lusalalaań? Ili mwanumbua, mfinya ya Beelisebuli naumbuta nayo mimuyo ii mikasha. 19Kwakooya niń nkee yumbuta mimuyo mikasha kwa finya ya Beelisebuli, a vana vanu vaiumbutaa kwa finya ya i? Kyasia iwo wwo vamurambuaa. 20Kake kwakooya ni nni wa Iṛuva naumbuta nato mimuyo mikasha, kyasiań na umangi lwa Iṛuva lwammaa imulikia. 21Ili shaamba iwore fiya famwi na iringa nafo numba yamwi, masaa woose awore akaa na kibua. 22Kake kashewa nshaamba ingi inkilie finya ikakabana nae na iwinga, insokaa fiya filya famwi foose afikusurie na ifiavia vandu vamwi. 23Nndu atakee wa taari yakwa nkituva kyakwa. Na ulya atakee isaṅiṛia andu emwi nań akee inyanyata.
24Na mumuyo ito nkasha ukamuuka nndu wiraa kundo kuumu kutawore mura wiṛuyaa andu a iimuya. Ukantuṛa, ukanumbua: Nuuyaa kyeń kwakwa ifo nuukie. 25Ili umaa yuya, ukakooya numba yamaangatwa na isongosio̱ 26Lia eni ukaenda ukandesha uriani na mimuyo ingi mfungare ikee mikasha kita to. Nayo ikaaka numba ilya ikakaa-fo. Na mboni ta ifurumia ta nndu to tivaa shikasha kita tilya ta mbele.
27Kyasia ili eereraa kuro, nka umwi wa ifo isyamuń karosa ununga lwamwi kamwia: Ngoma simi ilya indekwira na mavele alya andekwosa. 28Nae kanumbua: Nkya dede valya vakee va ngoma vvalya vaaranyaa kirero kya Iṛuva na ikiwara vakakiwara.
29Ili isyamu lya vandu lindeengeṛia ikusaṅiṛia io akai, kabooka irera eenumbuaa: Kishuku ki kya alli nkikasha, fulya kikee iṛuya myorusie. Ana nta kiniingwaa ndi kita myorusie ilya ya mwauya fisuku Yona. 30Amu sha lia Yona avia vandu va kulya Ninive myorusie, mfo kuro da na Mwana wa nndu aviaa kishuku ki myorusie. 31Na mangi ilya ya kika ya taari ya itate ikaa isalale andu emwi na vandu va kishuku ki, ili mwaandu ulya nnini ushaa, nae avaumisiaa. Fulya ye ashe auka marayoń a isanga, amu aaranye firero fa uṛango lwa Salomon. Neeni lleń te: Ia aiyo akilie Salomon. 32Na vandu va Ninive vasalalaa nkonu ulya wa mwaandu andu emwi na kishuku ki, nawo vavaumisiaa. Amu wo vailashika kiimba kya miloshie ya Yona. Neeni lleń te: Ia aiyo akilie Yona. 33Nta eefo nndu aataa taa kairwaa andu a kiṛisi ndi ana aifulutie mengetoń ndi. Kake aivanikaa kivanikoń, amu imulikie woose vaakaa numba. 34Taa ya wili ni iriso. Kyasia kwakooya iriso lyafo ni inuru, na wili wafo nato ni nnuru. Kake kwakooya iriso lyafo lyawa ikasha, na wili wafo nato uvaa llema. 35Kyasia lla langa yo ikee kari kafo, amu itave llema! 36Kyasia kwakooya wili wafo uwore langa, lingi utawore andu a llema, wili wafo uvaa na langa kutu, sheeli na taa ikee ikumulikia na langa yayo.
37Neeli eereraa kuro, Mfarisayo umwi kantereva aende kwamwi andelya shoonga. Kaaka numba kwa nndu ulya kakaa rembo shoongeń. 38Ili Mfarisayo ulya allolia eelyaa shoonga kitaare ansangya maako, kariika. 39Nndumi kamwia: Ini Vafarisayo musangyaa umbata na kyaasho kiwooṛo, kake ifo kari kanu mwishule soka na ukasha. 40Ini mukee variṅani! Uu andetana fa kiwooṛo yye se andetana na fa kinumba? 41Kyasia filya fikee kari lilień nafo vandu, Uyo foose fivaa finuru kwanu. 42Kake ushi ini Vafarisayo! Fulya ini muniingiaa kyeenga kya ikumi kya nunda na nyanya na filimu foose, kake mukaira mbaai mukatia-wo ushili usongori na ikunda Iṛuva. Ifi fivili fimuwara mutane kitaare mutiaa-wo filya fingi 43Ushi ini Vafarisayo! Fulya ini mukundie ikaa rembo fifumbiń fa mbele numbeń ta iterevia na iisanio̱ vvandu ifo singiṛeń. 44Ushi ini, fulya muvakani na mbanga ta vafu tirekekie na vandu vairaa kwa ule yayo vatatiishi. 45Kyasia nndu umwi kari kawo eekee mwaṛia wa mavavaso kaaṛua kamwia: Llosha, kwarera kuro kwatiila neese. 46Nae kanumbua: Na akwaa ni ini vaaria va mavavaso ushi neeni! Fulya murikaa vandu myaanda itafitikaa, neeni mu veni mubaanaa nta na nni wanu umwi ndi. 47Ushi ini, fulya musongosiaa mbanga ta vaauya fisuku, na vaande yanu wwo vandevawaa. 48Kyasia nkuro mukee irambua mitanie ya vaande yanu na isenywa yyo. Amu iwo wwo vandevawaa, neeni mukasongosia mbanga tawo. 49Kwa kiimba kya ikyo uṛango lwa Iṛuva lwanumbua: ”Vvarumiaa vaauya na varumi. Nawo vawaa kiindi kyawo na ivaumbuta, 50naamu usao lwa vaauya valya woose lundeiritwa kuuka isanga lintanwa luuṛwa kwa kishuku ki 51kuuka usao lwa Abeli kumande usao lwa Sakaria ulya awaywa kari ka kiraa kya ikoṛa firasio na numba ya Iṛuva. Ee namuia: Luuṛwaa kwa kishuku ki“. 52Ushi ini mukee vaaṛia va mavavaso, fulya ini mundeuta-fo ufunguo lwa irua numba ya ikooya uṛango. Neeni mu veni nta yaka, na valya vafurie yaka nafo mukavaima. 53Ansomuka-fo vaaṛia valya na Vafarisayo vakabooka imwiria ndewu shuu na imwaala na firero fiingi 54Veellayaa si, vakooye kirero kyuka kaniń kamwi, amu vandiinge nakyo.
Currently Selected:
Luka 11: RWK72
Označeno
Share
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.