Mashora 28
28
Mbony Paulo alekwaanya nato kulya Malta
1Lwikimaa ikia, llyo lukamanya sheelyi kyuuruka kilya kidu ni Malta. 2Vandu va kyuruka ekyo vakalutannya mesha elanyi kyeeso. Mashika mmbo valeata muro, vakaluwarya loose, kyeendwa ni mbua yeyo yekeekapa na kya mbeo. 3Kyeeri Paulo ensanyirya ngwi, neetivika murony, ikafumafo shoka kimaruma kya muro, ikarorova efo maakony akwe. 4Vandu va alya vekilollya shoka ilya iising'ang'a yoo wokony lwa Paulo, vakaamba, “Nndu yeu ni nsavi tishi; nawe nakikava ammikya ifiiya mureny lyo usumanu llunraa nakae na muu-fo.” 5Kyaindi we kaisisikya efo murony, we muni nalaoni ukasha. 6Lyo wo mmbo valekusara nkuti nafumbe ao nawe si neefwa tiny; vekimmbikya miso deny, neelolya nkwiifoo nta kindo kyankooya, vakaalasha, vakaamba, “We ni Iruva.”
7Kufii na ando yoo kweiyo marema a mangyi wa kyuuruka ekyo, irina lyakwe ni Publio; nndu yeu kaluwarya na nrima wa ki-umbuya deny, kaluvika veny vakwe ando a mikonu iraru sele. 8Naasa ndeye wa Publio elwee etirwa ni muro na yaarisha samu. Paulo kaanga kwakwe, katereva, kamwekerya maako, nenshiisa. 9Efi fikimaa itanyika na vengyi veetiri vandu valoe kulya kiurukeny kilya vakaveende vakashiiswa. 10Nawo vakaluniinga wiindi uniini nnu, naasa kyeeri lwekesaama ngalava lweende vakaluvikya-fo na findo efyo fyelutinnyi.
Kyaaro uka Malta kufike Rome
11Kwikyisia miiri iraru lukeenda na ngalava ya Aleksandiria nayo yenkaa yoo kyuurukeny ekyo kyeeri kya mbeo; na kirinyisyo kya vayo ni “Vana va Maasa.” 12Lukandefika Sirakusa, lukakaau mikonu iraru. 13Luuka-fo lukaringitya lukandefika Regiumu; elyi lya ndesi uraato lwa sinde lukasha, neelyi lya nrondo lukandefika Puteoli. 14Efo lukakooya-fo vakiloshyony vakalutereva lukae nawo ando a mikonu mfungare; llyony lukaafukya Rome.
15Na kuuka yoo kyeeri vakiloshyony valeeta mbony teru, vakasha fika alya singira ya Apio ishelwaambya, ando kuvangwaa “Mmba Isaru ta Veny.” Paulo ekivalollya kaana Iruva deny, neewuiyo mmuu.
Paulo akee kulya muriny wa Roma
16Lwikifika Rome Paulo kaniingwa uleke lwekaa ando akwe muni lyo eeringwaa ni nsikari. 17Kwikisia mikonu iraru kavaanga vaniini va Vayuda vakwanannyi. Kyeeri valekwaananya kavavia, “Vanavama, na kikava nshiletana kindo kikasha kwa vandu, nta kindo kyefullwa mbuka ya vande veru, lyo mmbo shilevikwa maakony a Varoma shasha shikee mfinge uka kulya Yerusalemu. 18Nawo kyeeri valemaa ishivesa-vesa mmbo vekundye ishilotora, mashika nkweefo nta kimaruma kimwi yeny shiwaawa-fo. 19Kyaindi kyeeri Vayuda valesalala neeny shaitikyo ikunda mwaandu wakwa weende mmbee kwa Kaisari. Nta nshi sheelyi yeny mmbo sheetiri kindo kikasha na vandu vakwafo. 20Naasa kikeeny indo, mmbo shamuvaanga naambo musheshilollya neerera neeny; mashika mmbo shikeemfinge na mise yei kimaruma kya kikusiryo kya Israeli.” 21Valya vakammbia, “Yese llulewonisa barua titiri mbony tafo uka kulya Uyuda-fo, na nta nkwifoo wa kiloshyony alesha iluvia mbony eto-fo, ao nta irera kindo kyeesi uwe yafo-fo. 22Kyaindi ulaalu lukunndye kuluvie yewe shaasa kulollye; mashika lyo kimaruma kya ikusirya elyo mmbo tikeererwa mbony shiingyi shikasha kundo koose.”
23Naasa vekimaa ideryana nkonu, vakansheya yoo mmba yeyo eekai, vakasha nkuka wa vandu, kavaongoya waarya neekureekya umangyi lwa Iruva, evaikimbaa kya mbony ta Yesu eshipoo marero a uvavaso lwa Mose na vakisuku, apookya ngama kukafika nkwaany. 24Maata vakakusirya na filya filererwa, na maata mmbalekusirya-u-fo. 25Na kyeeri kilekoora mbakee kindo kimwi wo veni na veni, vakaenda, kyeeri Paulo alemaa irera irero elyi lyimwi nsi, shelyi “Mumuyo Mweele mmbo alerera songosiny deny llya alevia vande veru na kana ka nkisuku Isaya 26kaamba,
‘Enda kwa vandu yeva kwandevavia,
iita mushitaa lyo mmumanyaa-fo.
Na ilola mulolaa, lyo mmushitumusoo-fo;
27Shamashika mirima ya vandu yeva mmbo irung'ani
na maarwi awo mmaroo iita,
na miso awo vakaasingira.
Naambo tupu valeshelollya na miso awo,
na iita na maarwi awo.
Na iitumuso na mirima yaawo
na yaalasha mirima yaawo shivakire.’ ”
28“Kyaindi lyo kaeny mwiishi sheelyi ukiro yelu lwa Iruva mmbo lulerumwa kwa vandu va masanga. Nawo mmbo vakeiita!” [ 29Nawe ekimaa irera efyo, Vayuda vakeenda, vekuvesa-vesaa findo fingyi wo veni na veni.] 30Nawe Paulo kakaa Roma ando a myaaka ivii sele efo mmba ilya yakwe ekai kaitaiya. Kawarya-fo vandu woose yewo vekee insheya. 31Nawe kavaongoya mbony ta umangyi lwa Iruva, neelosha mbony ta Nndumi Yesu Kristo, etiri ukaari, nalakae-fo nta nndu amwiima.
Currently Selected:
Mashora 28: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.