Varome 1
1
1Ni yeny Paulo shikee ishinga lya Kristo Yesu, shilevaangwa shive nrumi, neesauwau shaambe mbony shisha ta Iruva; 2tilya Iruva alemmaa ivikya kyaasa na kana ka vakisuku vakwe efo Mareiyony Meele. 3Nto mbony ta mwana wakwe, ekee wa ngata ya mwiili alewonika efo ufyariny lwa Davidi. 4Nawe kasheorwa paa na wiidimi sheelyi we ni Mwana wa Iruva, ngata ya Mumuyo Mweele, na iruka lya vafu, mmbwe Yesu Kristo Nndumi weeru. 5Na efo kwakwe lukawarya isarya na usu naambo vandu va masanga vakooye ikunyiisya efo kikusiryony kyeendwa ni irina lyakwe, 6elyo kimaruma kya vayo yeni mulevikwa vasauwe va Yesu Kristo. 7Kwany yeni moose mukee Rome, mukunndyo ni Iruva, mukee vavaange naambo muve veele. Isarya lyimukae na ufoo luukye kwa Iruva Nde weeru, na kwa Nndumi weeru Yesu Kristo.
Kyaanu kwa Iruva
8Kya mbee mmbo shaana Iruva wakwa kwi Yesu Kristo kimaruma kyany, yeni moose mashika elyi kikusiryo kyany kikee ivambiswa ulaniny koose. 9Shamashika Iruva yeu shikemwindya na nrima wakwa kwi Nrumi shisha ya Mwana wakwe, we ni nkureeki wakwa eeshi shaasa shilakeemanda imusenda, 10mikonu myoose efo fiterewony fyakwa. Shiiterevaa naambo shishe kwany uviny, kwakoya Iruva akunda ishiidimisya kyaarony ekyi kyakwa. 11Mashika mmbo shilangye nnu imulollya, naambo nkooye imwaavya simbo ta nrima, naambo mukooye itumariswa. 12Llyo iviiryana muu yeny na yeni, wo nndu na kikusiryo kya yeto ungyi, kyany na kyakwa. 13Vanavama vakwa nshikundye mure mulamanya sheelyi nkeengyi shelangye isha kwany lyo shalemmyo-da fika ulaalu, naambo shimuwonisye ndunda na yeni shaasa shilevewonisya neewo va masanga engyi. 14Mmbo shitiri sye kwa Vagriki na kwa yewo valakee Vagriki. Shitiri sye kwa yewo va urango na kwa yewo valatiri urango. 15Kimmba niindo, yeny mmbo kishikooye shaambe Nrumi ya Nsia naakwa nkwany yeni mukee Roma.
Finya ya Irero lya Iruva
16Mashika nshishiiryaa Nrumi ya Iruva ya Nsia sony-fo, mashika nnyo wiidimi lwa Iruva lushendee ukiro, kwa wo umwi akusirye-u, kwa Muyuda mbele na kwa Mgriki-da. 17Mashika usumanu lwa Iruva lwallollyo paa nnang'ani ya vayo, kikusiryo na kikusiryo. Shaasa kikee kireiye, “Yeto wa usumanu nkikusiryo kyintiryaa-u na muu.”
Weesi lwa Ulyamari
18Mashika unyafi lwa Iruva lwammaa ilollyo paa luuka iruveeu lushe uwe ya uravi loose lwa nndu wa vandu yeto aora uravi kweemina dede yeyo. 19Mbony ta Iruva mmbo tikoorye paa neemanyika kwa woose, mashika Iruva mmbo alevasukuya. 20Mashika mbony takwe tilya tilandelollyo uka yuumbwa lya ulana ulaalu tallollyo, neemanyika efo mashoreny akwe, nkyo wiidimi lwakwe na ngata yakwe ya iva Iruva, naambo numa valashelollya-u kindo kyeekuuta. 21Mashika le, kyeeri kilya valemanya Iruva mmbaleng'anisa sheelyi mmbwe Iruva nta imwaana-fo. Lyo mmbo valerekya efo uretiny, na mirima yeyo yaawo ya utondo ikawoywa niirema. 22Vekusaraa mmbo vakee varango, ate llyo varung'ana mmwasi. 23Vakatavasha itumbe lya Iruva nalatiri ilyamarika na fwana ya nndu wa vandu akee wa ifwa, na ya ndeye na ya mafisi na ya efyo fikurufwaa si. 24Kimaruma kya efyo Iruva kavara efo langony ta mirima yaawo, valatye findo fya ukirinda, kutani veengye miili yawo usutu wo veni na veni. 25Ni llya valealasha dede ya Iruva na wongo, vakafiirya fyuumbe ndi neefiindya ando a Muumbi yeto akeerumishwa llung'anu. Amen. 26Naasa Iruva kavara vasore lango tawo ta usutu, kutani na vaka vaalasha ngata ilya ya mbee nevika-u ngata ilakee ilya ya mbee. 27Na womi nawo naakiwo, vakara ikaa na vaka shaasa kyekai, vakatusana wo veni na veni, womi vakatana findo filakwaani nawo, vakakuwonisya itaiyo wo veni kisumani na uravi lwawo. 28Na kimmba valelema ikaa na Iruva efo umanyony lwawo, Iruva mmbo alevareeya valatye urango lwawo yelo lulavaa, vatani findo filavasumannyi. 29Mmbo veeshwe uravi lwa wo ngata, uravi na lango na weesi, mmbo veeshwe ukasha, uwai, uriingyi, ulembi; vandu va mirima mikasha, veamba fyesuta vengyi, 30vevikya ureeree, mmbo vasuuye Iruva, vatiri ulyang'a vekushopa, vekung'anisa, vesongosia fya wongo, valashiindyaa vamika vawo, 31valatiri umanyo, vefisha fyaasa, valakundye vandu vawo, valalyilyaa vengyi. 32Nawo vammaa imanya ngapo ya usumanu ya Iruva, kyeyaamba vetana efyo mmbo vasumanyo ni ufu, mmbo vakeetana indo, nta nshi indo-da fo, mmbo vakeeyirikyana na yewo vetana indo.
Currently Selected:
Varome 1: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.