Mashora 27
27
Paulo eenda Roma
1Naasa kyeeri lulevavasyo lusaami ngalava lweende Italia, vakavika Paulo ando amwi na vafungwa vengyi maakony a nshilyi umwi avaangwaa Yulio, wa itorito lya Augusto. 2Lukasaama ngalaveny ya Adramitio yekudesye yeenda fika miriny ya mbai ya yeeve ya Asia, lukapooka kyaaro, Aristariko nndu wa Makedonia aukye Tesalonike keenda neese. 3Elyi lya ndesi lukafika Sidoni. Yulio katannya Paulo fya isarya kanninga muumu wa yeenda kwa vambuya vakwe, naambo nafurukanyo-fo. 4Lukauka-u lukaenda lukafika Kipro, naambo lukwiise uraato, mashika ngyuraato tekee ta finya. 5Kyeeri lweera yeeve taari ya Kilikia na Pamfilia, lukafika Mira muri wa Likia, 6Nafo nshilyi ulya kakooya-u ngalava ya Aleksandiria, iikudesye yeenda Italia, kalusaamisa-fo. 7Lukeenda kyaaro eki waarya ando a mikonu miingyi lukafikya Nido kwa tamba nnu, mashika elyi uraato lwekeelusindika lukeera kwasinde ya Krete kufii na Salmoni. 8Lukaira-u na ngatara deny, mbaa mbaa ya yeeve, lukashekooya ando avaangwaa, “Shashio Shisha.” Kufii na yoo kwiiyo muri uvangwaa Lasea.
9Na llya kyeeri kiingyi kyemmiira, na kyaaro kikava kya yeerese nnu, mashika na mikonu yekootoya yemmaa iira, Paulo kavaikimba, 10Kavavia, “Nyira vomi, shilollye sheelyi kyaaro eki kishetiraa ngapo na irekyo mfindo fiingyi, nshi ya masaa na ngalava-da-fo, kyaindi na ya muu weru-da. 11Kyaindi Nshilyi ulya kaaranya nniini wa ngalava na muni wa vayo ngota filya Paulo aleamba. 12Na kimmba muri ulya wa alya yeeveny kulore wekevaa ikaa kyeeri kya mbeo, veengyi vakauta makusaro vauke-u veende Foinike, kwakooya kyiivaa, vandekaa-fo kyeeri kya mbeo, nato mmuri wa Krete usumanu na taari ya sinde-nkwaany na ndoo-nkwaany.”
Uraato Uniini
13Na llya uraato lwa sinde lulepooka kyaangu, nawo vakakusara mmbo kivaa shaasa llya vekundye, vakakwiipoo na ngalava vakaira Krete yo kufii na mbai ya yeeve. 14Numa kyaangu lukasha uraato lwa finya, sha kitita-si, nalo luvangwaa Eurakilo. 15Kyeeri ngalava iletamba, ilakiidimise ikuna uraato, lukaikureeya ikakunwa ni uraato. 16Kyeeri luleira uviny kufii na kiuruka kidu kivaangwaa Kauda lukaidima kwa tamba yaashwa ngalava. 17Vekiidima iyaashwa, vakafinga ngalava kwa iita fiwoye efo kwasi ya vayo nawo elyi veetiri weerei valashetammbya efo kwasi-kwa Sitri, vakara naambo ngalava ikunwa ni uraato. 18Kimmba lukekapwa nnu ni kivivita ekyo kya uraato, elyi lya ndesi vakapooka yeerya mario a ngalava efo mureny. 19Elyi lya nkonu wa kararu vakeerya naakwa ni fiiya fya ngalava efo mureny wo veni. 20Nta nkyeere nta nyinyiri mfilelolyo-fo, ando a mikonu na uraato lwa finya lukalukapa, lukauta pa ya iturunya. 21Na llya venkaa kyaasha valalya shoonga, Paulo kasalala yoo nnang'ani yaawo, kavavia, “Vomi, mmbo kyesumani kukooye mmbo muleshaaranya mure mulauka Krete nkonu ulya, neeni mwewona ngatara yei na efi mwanreta-fo. 22Ulaalu a shimuningeny makusaro. Kaariseny ngoo tany, mashika nkwiifo nta nndu umwi waany arekaa-fo, llyo kuuta ngalava sheni. 23Shamashika kio eki kya inu, nsu wa Iruva yeu yeny shikee wakwe, nawe mmbwe nkemwiindya, mmbo alesalala kufii neeny, 24kashivia, ‘Kulairyee-fo Paulo, nkuti kundesalala mmbee ya Kaisari, na lyingyi lola, Iruva mmbo ankuniinga vandu yeva woose kukee nawo kyaarony.’ 25Naasany, vomi, kaareny, mashika shikusirye na Iruva, sheelyi fyoose mmbo fishevaa indo shaasa shilevio. 26Kyaindi lyo nkuti lufwallyo mbai ya kiuruka kimwi.”
27Kyeeri nkonu wa ikumi na kaana ulefika, kyeeri lwekerawa efo neefo efo yeeveny ya Adria, kufika kio nnang'ani varundi va ngalaveny vakakusara sheelyii nkufii vakooye uruka wuumu. 28Vakeera kyeeso kya yeesa mura vakaonisa fyeeso makumi avii, vakeenda mmbee vakeerase fikava firaanu. 29Vakairyaa kulakooye lushefwallywa ando iwe lyikwaallye si, naasa vakavika mireiyo ya ngalava vakatereva Iruva kukye. 30Kyeeri vateteri va ngalava valekunda iisitiyou ngalava varishe, kyeeri ekyo valeolota ngalava ta mundi efo mureny kive sheelyi mmbo vakeereiya ngalava-da, 31Paulo kavia nshilyi na nsikari, “Yeva vakanra valamammya kunu ngalaveny mmushidimaa ikia-fo.” 32Naasa vaskari vakarummbwa fiwoye filya fya ngalava ilya ya mundi ikawa kulya mureny.
33Kwikee kufii kukye Paulo kavaitika valye shoonga, evavia, “Inu ni nkonu wa ikumi na kaana lwiveraa na ikootoya, mmulekomba nta kindo-fo. 34Naasa shamuutereva lyeny shoonga, mashika nkyo kishemukiraa. Nta nkwiifoo nta ufii lwumwi lwa nrweny wa umwi waany lurekaafo.” 35Ekimaa yaamba indo kaipoo nkate kaarafuma Iruva velollye woose kaufisha-fisha kapooka iulya. 36Naasa vakakya mirina woose vakalya shoonga wo veni. 37Neese lwekee ngalaveny lwefikye vandu mayana avii makumi mfungare na varinderu indi. 38Vekimaa iwuura vakaangura-se mario a ngalava, vakeera nganu efo mureny.
Ngalava yafika-fika
39Kyeeri kulekya mmbalemanya uruka llwa-fo, lyo mmbo valelollya yoo mbai ando kuvakye mundi, vakalollya nkyeni vasaleese-u ngalava vakamiidima. 40Vakeera nanga teesaleesa ngalava kwaasha, efo mureny, vakaelelisa na fiwoye fya ngalava, na soori eto tikunwaa ni uraato vakarau imwi shidu. 41Vakandefikya ando yeve ivii tikwaananyi, vakasaleesau ngalava. 42Vasikari vakakunda vafungwa vawaawa, naambo nndu nalakeleye narishe. 43Lyo nshilyi umwi eekundye ikira Paulo, kavaima valashetana shaasa vekundye, kavia valya veeshi ikeleya vapooke mbele ikweera mureny, naambo vafikye uruka uumu. 44Neewo valesaau maata vakasaama uwe ya mapoo na vengyi uwe ya findo efyo fyekee ngalaveny. Naasa indo vandu woose vakatana vafikya uruka wuumu kipwa.
Currently Selected:
Mashora 27: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.