Mashora 21
21
Kyaaro kya Paulo kya Yerusalemu
1Kyeeri lulemaa ilakana nawo neesama ngalava, lukafika Kosi, neelyi lya ndesi lukafika Rodo na kuukau lukafika Patara, 2lukawonisa-u ngalava yekeenda Foinike lukasaama neepoka kyaaro. 3Lukalollyo Kipro lyo lukaira yo woko umuso: Lukeenda lukafika Shamu yoo Tiro. Mashika yoo ng'u ngalava yeeru isheolotwaa mario iriye. 4Lwikimaa ilollya vakiloshyony lukakaa-u ando a mikonu mfungare, nawo vakavia Paulo vaorwa ni Mumuyo Mweele naleende Yerusalemu. 5Kyeeri lulemaa mikonu ilya lukaukau lukakwengya, na vandu woose ando amwi na vaka vawo na vana vawo, vakalwiimya fika kipoo ya muri, lukafirya ndi mbai ya yeeve lukatereva, 6lwikimaa ilakana lukasaama ngalaveny, nawo vakawuya kwawo.
7Lwikimaa kyaaro kyeru luuka Tiro lukafika Tolemai, lukeedikira siri neekaa kwawo nkonu umwi. 8Elyi lya ndesi lukauka-fo lukandefika Kaisaria, lukaanga kyeny kwa Filipo, mwiamba Nrumi ya Nsia, umwi wa valya mfungare, lukakaa kwakwe. 9Nndu yeu mmbo etiri vana va kika vaana valandemanya nndu ndumi, vekee veawuya fisuku. 10Naasa kyeeri lulekaa-u mikonu miingyi, nkisuku umwi avaangwaa Agabo kasoka auka Uyuda. 11Ekilukooya kaipoo nkanda wa Paulo kakufinga we muni marende na maako, kaamba, “Mumuyo Mweele aamba ule, ‘Indi niindo Vayuda va Yerusalemu vashefingaa nndu yeu muni nkanda yeu, nawo mmbo vashemmbikaa maakony a vandu va masanga.’ ” 12Naasa kyeeri luleita indo, yese na vandu va ando yoo lukamwiima nalasaame na Yerusalemu. 13Nalyo Paulo karouwa, “Nkyokiro mukeetana, iiya na ishiwaa nrima? Mashika, yeny na mbony ta ifingwa, mmbo shikudeesye naakwa ni iwaawa efo Yerusalemu kimaruma kya irina lya Nndumi Yesu.” 14Kyeeri alelema kilya lulemmbia, lukamalallya, lukaamba, “Ikunda lya Nndumi lyitanyike.” 15Numa ya mikonu yei lukaipoo fiiya fyeru lukasaama yeenda Yerusalemu. 16Vakiloshyony maata va Kaisaria vakeenda veryani neese, vakaipoo na Mnason, ni nndu wa Kipro, ni nndu wa kiloshyo wa kasha na mmbwe yeto lushekaa kwakwe.
Paulo eenda iidikira Yakobo
17Lukifika Yerusalemu vakiloshyony vakaluwarya na nsia. 18Elyi lya ndesi Paulo kaanga kwa Yakobo eriani neese, na vamiku woose veiyo. 19Lwikimaa ivaidikira, kavavia wo kindo wo kindo Iruva aletanya vandu va masanga efo urundiny lwakwe. 20Kyeeri valemaiita indo vakaarafuma Iruva, vakammbia, “Mwanama weeru, kulollye shaasa Vayuda yewo valemwaluka vakee fiku fiingyi, kyaindi woose mmbo vatirwa nkififi nnu kimaruma kya uvavaso lwa Mose. 21Nawo mmbo valemmaa ivio mbony tafo, sheelyi mmbo kukeelosha Vayuda woose yewo vakee efo masangeny engyi ilakana na Mose, kwiivaviaa valarini vana vawo-fo, nta valasore mirumwa ya Kiyuda-fo. 22Nkyoki ekyo? Nkuti vashitaa shelyi kusheye kunu. 23Naasa tanany shaasa lukuviaa. Yaa kweru kwiiyo vandu vaana vavikye kyaasa na Iruva. 24Ipoo vandu yewo, kukwiilyise nawo, kuvataiye naambo vaute mirwe yaawo, naambo vandu woose vamanyi mbony toose tilya valeita kyafo nshi indo tikaifo, kyaindi yewe kumuni mmbo kukeenda ninsha neesora uvavaso. 25Kya mbony ta vandu va masanga valya valealuka, lulereiya barwa ya yoora uteteri lweru wo vakwiise ilya findo fileniingyo firaso kwa maruva a wongo, na samu, na findo fikee fisasande na samu, neekwiisa utuusi.” 26Naasa Paulo kaipoo vomi valya na elyi lya ndesi kakwilyisa ando amwi nawo, numa kaanga mmba ya Iruva kaammba mbony ya imaa mikonu yeekwilyisa, kutani kiraso kisheningywaa kimaruma kya wo umwi waawo.
Paulo atirwa efo mmba ya Iruva
27Naasa kyeeri mikonu ilya mfungare ilefika kufii isya, Vayuda valya vaukye Asia vakallollya kulya mmba ya Iruva, vakasarya vandu woose, vakantira. 28Vakaongora vakaamba, Yeni vomi va Israeli lutaraminy. Yeu mbwe nndu ulya alooshaa vandu woose wo ando vafulute vandu veru na uvavaso lweru na ando yaa. Lyingyi, mmwasi yeefyo, mmbo aleata Vagriki mmba ya Iruva, katefusa ando yaa kweele. 29Mashika mmbo alelollya Trofimu, Mweefeso ando amwi nawe kulya muriny, mbwe yeto valekusara Paulo mmbo alemwaata mmba ya Iruva. 30Muri moose ukasavaa, vakakusanyirya uviny, vakatira Paulo, vakamrufwa na si, vakamuuta efo mmba ya Iruva, llya yeni myaango ikaraywa. 31Kyeeri vekeruuya shia ya imbwaa, mbony tikafikya nnini imwi wa vasikari kyeyamba Yerusalemu mmbo yammushana shoose. 32Naasa keepoo askari na vashilyi kavasora swany. Nawo elyi valollya vasikari na nshilyi waawo vakamanda ikapa Paulo. 33Naasa nshilyi yeto na vasikari kasha, kantira kavavasia nafingwa na mise ivii, kavesa, “Ni vi yeu? A nkyokyi atana?” 34Vengyi va mamwiingyi yeto vakaongora yeva indi na vengyi ekyi. Naasa alelemwa imanya kimaruma kya kyoorongye kilya, kavavasya neendwa kulya turuveny ya vasikari. 35Kyeeri Paulo alefika ando kwiyoo fitere, vasikari vakaipoo Paulo mashika a finya ya mamwiingyi ulya. 36Mashika ironda lyilya mmbo lyekeesora, vekapaa kyoorongye na yaamba, “Utau nndu yeu.”
Paulo akureeka
37Nawe kyeeri ekeendwa kulya turuveny; Paulo kavia nshilyi ulya wa vasikari, “A shitiri mumu wekuvia kindo ndesa?” Nawe kammbia, “Kwiishi Kigriki?” 38A yewe nshi Mmisri ulya mikonuny yei aleriingya vandu valya fiku fiina, vakavaangwa veewaa, kavatetera fika kasa nng'alo? 39Paulo kammbia, “Yeny ni nndu wa Kiyuda, nndu wa Tarso, muri wa Kilikia, nndu wa muriny ulakee n-du. Shakutereva shiniinga mumu shirere na vandu yeva.” 40Naasa ekinninga mumu, Paulo kasalala alya fitereny, katukya vandu valya woko. Kyeeri valemalallya sau, karera nawo na Kiebrania.
Currently Selected:
Mashora 21: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.