Mashora 20
20
Paulo awuya Makedonia na Ugriki
1Ntiri ulya kyeeri ulemanda, Paulo karuma vakiloshyony vandevaangwa, ekimaa ivavavasa, kavavia nakwafo. Naasa kakwiipoo-fo neende Makedonia. 2Ekimaa iira taari yeto nevaviirya muu na marero meengyi, kaafukya Ugriki. 3Ekimaa ikaafo ando a miiri iraru, Vayuda vensaryaa, eekundye yeenda Shamu eeshiraa mureny; karumbwa nawuye eshiraa Makedonia. 4Vandu yeva vakeenda nawe, mmbo Sopatro Mbeyoya, mwana wa Piro, na Aristariko na Sekundo, vandu vaukye Tesalonike; na Gayo nndu wa Derbe, na Timoteo na Tikiko na Trofimu wo ni vandu va Asia. 5Lyo vandu yewo vemmaa isongwa vakandeluvereya Troa. 6Yese lukasaama ngalava lukeenda numa ya mikonu ya mikate ilatiri ntarang'o, lukauka Filipi, lukavakooya Troa, kyaaro kya mikonu iraanu lukakaa-fo mikonu mfungare.
Ikwaanannya na Vakristo va Troa lya ifurummya
7Naasany nkonu wa mbee weepooka mfungare, lwikusanyirye lulye kilaayo, Paulo kavaongoya mbony, ekusarye elyi lya ndesi neende kyaaro, lyo keengera irera kafika kio nnang'ani. 8Nafo kweefo taa shiingyi kulya ghorofeny lwekai. 9Nsoro umwi evaangwa Eutiko, mmbo ekee yoo idirisheny karengeya karovyo nrwe, kawa ooka ghorofeny kararu kasherorowa ammaa ifwa. 10Paulo kaoloka, kammboya, kankulyingilya, kaamba, “Muleereve-fo nyira, mashika muu wakwe useeri-fo nnang'ani yakwe.” 11Kawuya isaama-se na uwe, kalya shoonga keengera irera nawo fika nraasi, llyo keendany. 12Vakeende nsoro ulya eifo na muu vakawuiyo mmuu kindo kilavaa yaamba.
13Lyo yese lukasongwa yeenda ngalaveny, lukandefika Aso, yese lwiishi mmbo lundeipoony Paulo, ate we mmbo anrummbwa yeenda na marende. 14Kyeeri alelufikya alya Aso, lukansaamisa lukandefika Mitilene. 15Lukauka yoo na elyi lya ndesi lukashefika yoo kwiduvani na Kio; elyi lya ndesi se lukaafukya Samo, lukakaa Trogilio, suku ya kaana lukafika Mileto. 16Mashika elyi Paulo ekundye ifika Efeso na ngalava, naambo nalashekeeyo nnu efo Asia, nnyeli ekeyaangusya, naambo nandesumana na nkonu wa Pentekoste kyikammidimika.
Paulo alakana na Vamiku wa Siri Efeso
17Uka yoo Mileto Paulo karuma vandu Efeso, kavaanga vamiku va siri. 18Vekisha kavavia,
“Yeni muveni mwiishi uka nkonu wa mbee llya shilesha yaa Asia,
shaasa shekee kwany mikonu myoose,
19shiirunndyaa Nndumi shikunyiisye nnu, na misoru, na fyeeso yefyo fyoose fileshikooya kimaruma kya Vayuda. 20Nshilekwiisa shara shilavaongoya irero elyo yoose lyiveekyaa-fo, lyo shava mwivalosha paa, mmba kwi mmba. 21Shikureekya Vayuda na Vagriki naambo vaindukye Iruva, na iirikya Nndumi weeru Yesu Kristo. 22Llyo ulaalu, loleny, yeny mmbo nkeipoo kyaaro sheende Yerusalemu, shikeemfinge kunu nriminy, shilamanyaa findo fisheshikooyaa kulya. 23Llyo Mumuyo Mweele mmbo akee ishikureekya muri kwi muri eshambaa sheelyi ifingwa na ngatara tikee mbee yakwa. 24Llyo nta nshikusarye sheelyi muu wakwa utiri mbusha deny kwakwafo sha imaa kyaaro kyakwa na urundi llwa shilevaangyo ni Nndumi, ikureekya Nrumi ya Nsia ya Isarya lya Iruva.”
25“Ulaalu loleny, yeni moose shilemoongoya mbony ta umangyi lwa Iruva, kyeeri shileenda efo neefo, mmukishilolyaa-se kisangufo. 26Naasany mmbo nkee mukureekya moose nkonu yeu wa inu, sheelyi shitiri mbese na samu ya nndu moose-fo. 27Mashika nshilera shilamoongoya mbony ta ikunda lya Iruva-fo. 28Kwiiseny muveni, na ironda elyo nalyo, elyo Iruva alemuvika nnang'ani ya vayo naambo muve velyisalallya, naambo mwidimi iisa siri ya Iruva, yeyo aleyuura na samu yakwe muni. 29Shiishi deny sheelyi kyeeri yeny shimaa yuuka yaa, mafite a ngoroshony mmbo ashangaa-u, are alasarya ironda lyany. 30Na lyingise nnang'ani yaany muweni vashekwiipoo vandu vashambaa fyelemba vashoommwa na vakiloshyony yewo vavasore wo. 31Kyasiany laleny shoovi mwimanya ando a myaaka yei iraru, kio na nsanyiny nshilera shilaikyimba wo nndu na misoru-fo.”
32“Naasany ulaalu shamurambikya efo kwa Iruva, na kwa isarya lya irero lyakwe, yelyo lyishidimaa imuringa nemuniinga ding'u ando amwi na woose yewo vakee vailyise. 33Nshilelanga fesa nta saabu, nta masara a nndu-fo. 34Neeni mwiishi mukamanya maako yaa akwa mmbo alerundya filya fishitinnyi na fya valya shekee nawo. 35Yefo findony fyoose mmbo shilemoora sheelyi mukarunda mashora indi mmbo mushiidimaa yeekya vafwafwa, neekumbwa marero a Nndumi Yesu, shaasa aleamba, ‘Ni kyeni yuuta ngota iwarya.’ ” 36Kyeeri alemaa irera indo kafiirya ndi, katereva ando amwi nawo woose. 37Vakaiya deny woose, vakakulyingillya Paulo singony, vakammiminda, 38llyo verovyo nnu nriminy kimaruma kya irero llya alevavia mbakillolyaa-se kisangu-fo. Vakamwiimya vakamfita ngalaveny.
Currently Selected:
Mashora 20: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.