Genesis 42
42
Ja sb'ankil jumasa ja Jose wajye b'a Egipto
1-2Yajni yab' ja Jacob ay trigo b'a Egipto ti yala yab' ja yuntikil jumasa:
—¿Jasun waxa k'u'lanex ja il ja kechan waxa k'eltala'ana b'ajexi? Aljita kab' ay b'i trigo b'a Egipto. Ta yuj k'a wax k'ana oj ajyukotik sak'an b'a mi oj chamkotik wa'ini, jel lek ka'axik ja tiwi, kax manawik jan trigo b'a oj kab'tik.
3-5Jel tsats ay ja wa'in b'a chonab' Canaani, jel jitsan ja ma' wax waj b'a Egipto wax waj sman'e ja trigo; sok ja jaw jumasa, ti wajum ja lajune smoj alijel ja Jose. Jaxa Jacobi, mi sjeka ja Benjamin oj waj soke, wax xiw lek ay jas oj ek' sb'aj. Yuj ja wax na'xi ja Benjamini smoj alijel sb'aj sok ja Jose, yuj ja junxta ja snan state'i.
6Yajni k'otye b'a Egipto ja smoj alijel jumasa ja Jose ch'ak snujts'uk sb'aje b'a sti' sat ja Jose, jel wa skisawe yuj ja ye'n mandaranum ay b'a chonab' Egipto, sok ye'n wa schono yi trigo spetsanil ja kristyano jumasa. 7-8Ja Jose, juts'in sna'a sb'aj ja sb'ankil jumasa, jaxa ye'nle'i, mi sna'awe sb'aj. Ja'yuj sje'a sb'aj ja Jose yuj ti sb'aj b'a Egipto, kalax lek sje'a ja sati, ti sjob'o yi'e'a:
—Ja we'nlexi, ¿b'a jakelexa?
Jaxa ye'nle'i, ti yalawe'a:
—Ti jakelotikon b'a Canaan, jakel jmantikon trigo.
9Ja Jose, ti jak sk'ujol ja swayich jumasa yuj ja ye'nle'i, ti yala yabye'a:
—Ja we'nlexi, ay jas jakel a k'el'ex, kechan jakel a k'el'ex b'a oj ochanik b'a oj ko'kotikon a k'ab'ex.
10Ti yala ja ye'nle'i:
—Miyuk kajwal— Ja ke'ntikoni, it b'a'yotikona oj b'ob' ka'teltayatikon, kechan jakelotikon b'a oj jmantikon trigo. 11Ja ke'ntikoni, lek ja jmodotikoni, junxta jtatikon. —Mi jas jakel jk'eltikon.
12Ti cho yala ja Jose:
—Mix k'u'ana jas waxa walawexi—. Ja we'nlexi, kechan jakel a k'el'ex b'a oj ochanik b'a oj ko'kotikon a k'ab'ex.
13Ti yalawe ja ye'nle'i:
—Ja ke'ntikoni, aytikon lajchawe ja janek' jmoj alijel jb'ajtikoni, jpetsaniltikon junxta jtatikon. Ja kijts'intikoni, ti kanel sok ja jtatikon b'a Canaan jaxa juni chamta.
14Ti cho alji yabye yuj ja Jose:
—Jach' jastal wax kala wabyexi. Ja we'nlexi, ay jas jakel a k'el'ex, 15ya'n oj kil ta mi yujni jachukuk ja jastal wax kala'a— B'a sb'i'il ja Mandaranum b'a Egipto, oj kala wabyex mi oj elanik ja il ta yuj k'a mi oj ja wi'ex jan wa wijts'inexi. 16Ya'n oj kiltik ta meran ja jas waxa walawexi: A waj junuk a wujilex a waj yi'jan ja wa wijts'inexi, jaxa tuki oj kananik lutan. Yuj k'a mixa wi'ajex jan wa wijts'inexi, yujni ay jas wa'nex jul sk'eljela. —Ja iti, wax kala wabyex b'a sb'i'il ja mandaranum b'a Egipto.
17Jach' sk'u'lan ja Jose, oxe k'ak'u ya talnajuke. 18-20Yajni ek' ja oxe k'ak'u jumasa jawi, ti yal yabye'a:
—Ja ke'n wax k'u'an ja Dyosi. Jaxa we'nlexi, meran k'a yuj lek wa modo'exi, wan k'axa k'ana ja sak'anto oj ajyaniki, k'u'lanik jastal iti: kananik junuk ja ili, jaxa tuki i'ajik och yi trigo oj yabye wa moj alijelex jumasa, ja jawi, wa'nexa chamel wa'in. Kechan wa wijts'inexi, ojni a wi'ejex jan t'ilana. Ti' oj kil tiw ta meran ja jas waxa walawexi—.
Jaxa ye'nle'i, lekni yabye ja jas alji yabye yuj ja Jose, 21Ti wax yala sb'aje ye'nle' ita'a:
—Ja smeranil ja ke'ntiki, ja wa'ntik stupjel ja jas jk'u'lantik yi ja kijts'intik Jose. Ja k'ak'u sk'anaki'tik pabor mok ka'tik stup ja smuli, jaxa ke'ntiki, mi jkisatik yi, a'nima kilatik jastal jel wa'n xiwel. Ja'yuj ja' wa'ntik stupjel ja jas jk'ulunejtiki.
22Ja'yuj ti yala ja Rubeni: —¿Mi ma kala wabyex mi lom jas xa k'u'lanex yi ja yal kerem b'a? —Jaxa we'nlexi, mini t'un a kisawex ja jas kala'a. Ja'yuj ja ya'n wa'ntik lek yi'jel wokol.
23Ja spetsanil ja jas wa'n aljel yabye yuj ja Jose, pilan ma wa'n ya'jel ek' yi'e, mi sna'awe k'inal ta yuj wax yab' sb'ej ja Jose ja jas wa'ne yaljeli. 24B'a'ya, spila sb'aj ja Jose sok ja ye'nle'i, ti och ok' leka. Tsa'an cho kumxi jan ja b'a'ye'i, ti yala a lutjuk ja Simeoni, yala a mochjuk sok kadena. 25Tsa'an, yala a b'ut'juk trigo ja sbolsa'e'i, a cho a'ji och yi'e b'a sbolsa'e ja sts'akol stupuneje soki. Cho yala a a'juk yi' swa'ele b'a oj yabye b'a b'eji. Yajni ch'ak chapxuki, 26ti ya'we skuch ja sburro'e ja sb'ankil jumasa ja Jose, ti'xa wajye'a.
27Yajni k'otye b'a oj wayuke'i, june ja ye'nle'i, sjama ja sbolsa b'a oj ya' wa'uk ja sburro, —waj yile tey ja tak'in b'a stupu kan sok ja strigo— Ja'yuj ti yal yab' ja smoj alijel jumasa: 28—Ya'we kumxuki ja jtak'ini. K'elawilex; tey b'a yoj jbolsa—
Yajni yilawe ja jastal iti, spetsanile och k'itk'unuke xiwel, ti och sjob' sb'aje'a: —¿Jasunk'a wa'n sk'u'lajel ki'tik ja Dyos b'a?—
29Yajni k'otye b'a Canaani, ti yalawe yab' ja state ja jas ch'ak ek' yujile'i. Ti yalawe'a:
30—Ja mandaranum b'a Egipto jel k'ak' sk'umanotikon, cho slokowotikon ab'al yuj kechan wax waj k'eltikon jastal ay ja schonab'ili. 31Ja ke'ntikoni, kalatikon yab' mi yuj ay ja swa'ntikon k'ot sk'eljel, cho lek ja jmodotikoni, —xkutajtikon. 32Cho kaltikon yab'i, aytikon lajchawe ja junxta jtatikoni, ja janek' aytikoni, chamta june, jaxa kijts'intikoni, kalatikon yab'i, ti kanel a mok il b'a Canaan.
33—Jaxa mandaranumi, ti yala kab'tikona: —Ya'n oj kil ta meran ja jel lek wa modo'exi: A'wik kan il junuk wa mojexi, jaxa tuki a yi' ochyi jas oj yab' wa moj alijelex jumasa, b'ob'ta wa'ne'xa chamel wa'in. 34Jel t'ilan oj ja wi'ex jan ki wa wijts'inexi. Jach' oj na' ta mi yuj ay jas wa'nukex jul sk'eljel, yujni lek meran wa modo'exa, jaxa ke'n ojni ka kumxuk wa moj alijelexa. Oj cho b'ob' b'olmananik ja ili—.
35Yajni waj sjam'e ja sbolsa'e'i, ti sta'awe ja stak'ine sts'akol ja strigo'e'i. Yajni yilawe ja tak'in jawi, spetsanile man b'a state jel och ja sxiwele'i. 36Ja'yuj ti alji yabye yuj ja state'i:
—Ja we'nlexi, mixani jun kuntikil oj ja wa'wex kan jmoka— Ja Jose mixa tey jmoktika; mixani ja Simeoni, —jaxa ya'n ja' waxa k'ana oj ja wi'ex ja Benjamini. Sok ja iti, ti'xa oj ja mil'onex ela—
37Ja Rubeni, ti yal yab' ja stati:
—Ja we'n jeka jmok ja Benjamini, ke'n oj ka kumxuk jan a wi. Yuj k'a mix b'ob' ka kumxuk a wi'i, —A'nima ti'xa mila schab'il ja kuntikil ke'n—
38Jachuk, ti yala ja stati:
—Ja kunin jawi, mi oj wajuk a mokex. Ja sb'ankil Jose, chamta kechanxta ye'n wax kan jmok. Jaxa ta ay jas waj ek' sb'aj b'a, tojxa cham k'ujol oj ajyukon ja janek'to ay jsak'anili.
Currently Selected:
Genesis 42: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021