Lubaakico N̰amaakeetee Iisa Masi 9
9
Sol botol ka Damas
1Sol pa gata dowwe ɗa missa diigiyco o diyawco oko giimi ma jobokka ka Miltine kee Iisa. Gaa kaatiɗe ga deeɗiya gassa tattuwco oko taattuweeco soƴoowee ku saɗikaŋgeyyo. 2Gaa deeɗiya inna ga biriyee makaatapgee ku maa ga deeɗiyoogu gaara oko taattuwee ku gerraco Yawudigeyyo ku giraaniti ku geegar ka Damas. Makaatapgee kotti pa beree botol ku maa ga deeɗiy bamakko miɗi o daatti ma jobokka butulti Miltine kee Iisa ga katawɗikiko Zerizalem, ga deeɗiy esekko daŋayi.
3Gaa Sol ma gittee daare jepewɗiya botol gu katawɗo Damas. Maa gu sarɗe katta soopa geegarri, gaa kaytiŋ ka gi bahaarane ma beree min samaani beeriɗe gi kadiriyya. 4Gaa galɗe karɗawal kiɗaati gaa giyyiɗe ur̰e ma kolaa gee: «Sol, Sol, giyyu samaane! Ayme ki deegeyɗino?» 5Gaa Sol inniɗe gaa: «Miltu gata kii ay we?» Gii ur̰e taata tiiliyee gee: «Ay naa Iisa maa ki deegeyye. 6Haŋka soopa, ki wacu! Ki un̰n̰iɗo Damas. Iŋaa pa, ga gimu kaƴi aɗe deeɗamgu gaara ka pe gaari maa na aŋka ki lewɗo.»
7Gittee Sol ma ezekkiya turguwwi pa, waraɗɗe ka pe bala beneyyi. Ur̰e ƴa gu geewaca o gimu pa gu ella ɗa. 8Gaa waciɗe min kiɗaati, gaa maa ga iyyiɗiy iɗiitee, gaa alɗe ella ɗa ya maatiki. Guu gittee ɗan̰n̰iyya gu kaatikkiki Damas. 9Gaa meeni subba ga Sol alɗo ella ɗa o ga nunte bala tiyaw o bala aar̰o.
10Gaa aatti geegar ka Damas, ga lekkiɗo pe pa gimu kaƴi aɗe ma jobokkaa ka Iisa maa gu semeetee goo Ananiyas. Gaa Miltine kee Iisa beneyyiyyee aleŋ ma waano, gaa kolliyya gaa: «Ananiyas!» Gaa Ananiyas tiiliyee gaa: «Ay naa gata aɗe keeke, Miltu, na geewam.» 11Gaa Miltine kee Iisa beneyyiyee gaa: «Wacu haŋka aɗe addo botol maa gu kolaa goo Cur. Kii deeɗo un̰n̰a girti gimu kaƴi aɗe maa gu semeetee goo Yudas. Kii deeɗo inna gimu kaƴi aɗe ma goo Sol ka geegar ka Tarse. Gata pa enaa Mella haŋka. 12Wikinne maa ga enewɗo Mella kaaka pa, ga Mella gaariyee aleŋ ma waano miiɗi kaƴi aɗe maa gu semeetee goo Ananiyas ma un̰n̰e ger maa ga nowoɗɗe gaa deeɗeegu gaga pittee kayaati ku maa ga elliɗo payya.» 13Gaa Ananiyas tiiliyyee gaa: «Miltu, giimi maani beneyyawgu gaartee ku miɗɗa paracco maa ga leyyoo oko gimcam ku Zerizalem, 14o gu taattuweeco soƴoowee ku saɗikaŋgeyyo berewwiyee botol ku maa ga asiɗo iŋee Damas ga asiɗiy bamma giimi paracco ma lollokka ma semeecam, Miltu.» 15Gaa Miltine kee Iisa soopa tiiliyyee gaa: «Addo kancum ki deeɗiya gassa, asan ga ay naata ma aparriya gimu kaaka ga deeɗo lubaakatu, ga beneyɗo gaartaw oko giimi ma ay Yawudigee ɗa o oko salaataŋgeeco, o oko giimi ku Isirayel kulla. 16Ay naa saa ma akkee gaara baŋ ga akka diigiya gaa me saanantu.»
17Gaa Ananiyas waciɗe ga kaatiɗe. Maa ga sarɗe girti Yudas, gaa un̰n̰iɗe ga deeɗiya gassa Sol. Gaa gagiyyeegu pittee kayaati. Gaa beneyyiyyee gaa: «Sol, sintu, Miltine kee Iisa ma oomiyam butuuli maa ki asawɗo, ay gata ma n̰akamminoo maa ki elliɗo payya, kii deeɗo unenta ma Ruuhanti Mellayi.» 18Gaa ma haŋka keeke saa, gu lekkiɗo lawwi ma ay aleŋ tukuur̰i ma suube min iɗiitee. Guu iɗiitee iyyiɗe, gu elelɗe payya, gaa Ananiyas batisiyiyya. 19Gaa Sol teeɗe, gaa gassiɗe gudirane.
Sol tasaaca kabarre ta daana geegar ka Damas
Gaa Sol nuntiɗe Damas meeni paalta ma giimi ma jobokkaa ka Iisa Masi. 20Gaa min iŋaa, ga waciɗe koɗok ga beneyɗo gerraco Yawudigeyyo ku giraaniti gaa ga Iisa ay Runti Mellayi. 21Guu giimi paracco ma geewaa beneyti kaaka ajjibiɗe ta tirta, guu beneyɗo paaɗe aacco goo: «Ay keeke ɗa aɗe ay gimu kee ma deegeyyiy ta tirta teete giimi ku Zerizalem ma lollokka ma semeetee Iisa e? Asawti teete, ga asee ɗa ka ɗeɗe ga asiɗiy bamma ku iŋee kooko ga itiriyyoogu oko taattuweeco soƴoowee ku saɗikaŋgeyyo?» 22Beneyti Sol pa galaa ƴiila, guu giimi amanɗo. Guu Yawudigee soopa ma aaye Damas alɗe ibina ɗa payya beneyyi ku maa gu tiiliyyee oko Sol maa ga garawɗiyo gaa ga Iisa ay Masi gata maa ga Mella aparre.
23Maa gu meeni maani ƴiiliɗe, guu taattuweeco Yawudigeyyo boodiɗe ma ka diyawti Sol. 24Gaa gata Sol soopa giyyiɗe ma ka boodico taata. Guu Yawudigee ocoɗɗiya iiɗoŋ o aandoŋ beneeco burgaggi ku geegarri asan gu aŋka diyawti. 25Gaa ma aandoŋ gu giimi daare maa ga Sol garkiye guu jobbiyya ka Iisa icciyya Sol, guu ɗooliyya gitili#9.25 Gitilu ay aleŋ laaŋe yaata panenta ma n̰aalu., o gu onokkiya ma donni, guu ɗaamiyya ma buule ta durdurri, gu beeriyya surr ma taaro.
Sol aaye geegar ka Zerizalem
26Gaa min Damas, ga Sol kaatiɗe Zerizalem. Maa ga sarɗe, gaa leeɗe ka timmiti ma giimi ma jobokkaa ka Iisa. Guu guta soopa ɓayaɗɗee asan gu amanne ɗa kadar ga jobokkaa ma seene ka Iisa. 27Gaa Barnabas kaatikkiki wikirco n̰amaakeetee Iisa. Gaa gemmiyyoo baŋ ga Sol elliyya gaa me Miltine kee Iisa botol ka Damas, o baŋ ga Iisa beneyyiyee gaa me, o ga beneyyiyoo kulla baŋ ga Sol beneyyiyoo gaa me bala ɓayaw oko giimi ku Damas ma semeetee Iisa. 28Ay min oko kaaka appe ga Sol tappiɗe ma giimi ma jobokkaa ka Iisa, guu tan̰awɗo paaɗe sawa Zerizalem o ga beneyyiyoo oko giimo bala ɓayaw ma semeetee Miltine kee Iisa. 29Sol pa, beneyyayo kulla oko Yawudigee ma beneyya beneyyi ka Gireknigeyyo o ga icce meela ma guta. Guta soopa, aŋka diyawti. 30Maa gu seneetee ma dowwiy galbigeeco oko Iisa Masi giyyiɗiy gaari kotti, guu kaatikkiki Sol geegar ka Sezaree#9.30 Sezaree pa aaye biití baharre ta yaata., guu n̰aamiyya ma markaba geegar ka Tarse.
31Guu giimi ma temekka saananti Iisa Masi pa nowoɗɗe ma aapiya bala diigane aattí kiɗa ta Yudee parattí, o ta Galilee o ta Samaari. Guu maaɗiɗe aattí amannico oko Miltine kee Iisa o gu karmiyiyya. Gaa ma gaayo ta Ruuhanti Mellayi gu dewɗo ka maani ta ƴiila.
Piyer rayyaddaa Enee
32Gaa Piyer tan̰awɗo darre ma darre kiɗaayeeco paracco. Gaa meene kaƴi, ga kaatiyyoo oko gimtee Mellayi ma aaye geegar ka Lidda. 33Gaa iŋaa ga gassiyya miiɗi kaƴi aɗe maa gu semeetee goo Enee. Gata pa ay ruŋguyne, gaa oƴowɗe daŋgilo ƴilaakee poppoɗi. 34Gaa beneyyiyyee gaa: «Enee, Iisa Masi rayyidum! Wacu ki kutumicca birisancum.» Gaa koɗok saa, ga Enee waciɗe parat ga kutumicca birsanti. 35Guu giimi maani ku Lidda o ku parsaye ta Saaron elliyya, guu gagiɗiy galbigeeco oko Miltine kee Iisa.
Tabita naɗakka
36Gii lekkiɗo daate kaƴi aɗe ma jobokkaa ka Iisa Masi ma aaye geegar ka Jappa#9.36 Jappa gu kolaaca kulla goo Joppee. Jappa pa aaye biití baharre ta yaata.. Semeeti pa goo Tabita ma beneyco Ebireenigeyyo, o goo Dorkas ma beneyco Gireknigeyyo#9.36 Seme kooko pa, Tabita o Dorkas goo ‘otilo’.. Gita pa laayo diiman samaane oko giimo o gi beraayo lawwi oko saamuweyyo. 37Gaa oko wikinne kaaka gi Tabita gita galɗe paraayi, gii maatiɗe. Guu accicca guu deeɗica gaga ger ka uwwa maa gu gekee kayaati giiti. 38Guu giimi ku Joppee ma jobokkaa ka Iisa Masi giyyiɗe kadar ga Piyer aaye Lidda ma aaye ɗa arro min Jappa. Guu n̰aamiyyee miɗi seera gu ɗeeɗiyee beneyya goo: «Ban̰n̰u ki asinni koɗok Jappa!» 39Gaa Piyer waciɗe koɗok ga kaatiɗe ma guta Jappa. Gaa maa ga sarɗe iŋaa, guu giimi kaatikkiki ger ka uwwa kee ma gu ɗerewɗica. Guu daatti maa gu miɗicco matakke paracco asiɗe saripti Piyer ma ercico. Guu gaariyyeegu oko Piyer kaɗiŋgee maa gi Tabita ƴemekke wikinne maa gi alɗo missa ma guta gi alɗe mataa ɗa. 40Gaa Piyer cimmiɗiy giimi paracco min ger ka uwwa kaaka. Maa gu oomiɗe, gaa darsiɗe ga inniyya Mella. Gaa jigiricca ma matee gita, gaa beneyyiɗe gaa: «Tabita, wacu!»
Gii iyyiɗiy iɗiiti. Maa gi elliyya Piyer, gii waciɗe gi nuntiɗe. 41Gaa Piyer baamicca min pitti ga cipilicca. Gaa kolliɗiy daati maa gu miɗicco matakke o gimtee Mellayi daare ma aaye iŋaa, gaa gaariyyooca giyyenta. 42Guu giimi paracco ku Jappa giyyicca kabarre ta naɗawtí taata. Guu giimi maani duwɗiy galbigeeco oko Miltine Iisa. 43Gaa iŋaa Jappa, ga Piyer nuntiɗe ga dummiɗe wikirti gimu kaƴi aɗe ma ay lubaaka ka tukko maa gu kolaa goo Simo.
Currently Selected:
Lubaakico N̰amaakeetee Iisa Masi 9: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.