Lubaakico N̰amaakeetee Iisa Masi 8
8
Sol o giimi ma temekka saananti Iisa
1Sol pa ga mutti Etiyen daanee. Gaa oko meene taata aɗe saa gu giimi diiliɗe gu deegeyɗiy giimi ku geegar ka Zerizalem ma temekka saananti Iisa Masi. Guu ma dowwiy galbigeeco oko Iisa tacilɗe kiɗa ta Yudee o tee ta Samaari, illa ay n̰amaakeetee Iisa ka ma mare Zerizalem. 2Giimi ma bakammiy samaane hukumnigeetee Mellayi pa saayiya Etiyen, o gu erciya ta tirta teete.
3Sol pa, gata kaaka aŋakke misilco giimi ma temekka saananti Iisa Masi, o ga on̰aa ger ma ger ga bamaɗɗiy giimi ma dowwiy galbigeeco oko Iisa, daatti o miɗi ga eseɗɗiy daŋayi.
Pilip tasaaca kabarre ta daana kiɗa ta Samaari
4Guu giimi maa gu ticile koo pa amalɗo darre ma darre gu tasawɗica kabarre ta daana oko giimo. 5Gaa Pilip kaatiɗe geegar ka tatta ƴiila ka Samaari, ga tasawɗiyoogu oko giimo gaartee Iisa kadar ga ay Masi, gata maa ga Mella aparre. 6Maa gu giyyiyya beneyti Pilip kaaka o gu elliy garaawi ku ajjibiti kotti maa ga leelo, guu giimi paracco giyyiɗiy samaane beneyyiŋgeetee. 7Ay seene appe ga Pilip pittiy awaaradgee, guu ommiɗe ma kawwiko o ga rayyidiy giimi maani ma roŋgoyye o ma ay mugulee. 8Gaa ma lubbiti kaaka gu giimi maani ku geegar kaaka gi parhanco deeɗe yaata.
9Gaa lekkiɗo gimu ma aaye geegar kaaka min tippa maa gu semeetee goo Simo. Gata kaaka pa leewa ambulla maa gu giimi ku kiɗa ta Samaari ajjabɗo maani. Gaa cepellicca kayaati aleŋ gimu ka tatta. 10Guu giimi paracco min ku rootta ya baabaŋgeeco giyyiɗiy samaane beneyyiŋgeetee. Guu beneyɗo goo: «Mella maa gu kolaa goo Gudirane Ta Yaata aaye ma gimu keeke.» 11Gata pa domokke paaɗe maa gu giimi ajjabɗiyee oko ambullati taata. Ay ɗakko appe gu gewɗiy samaane beneyyiŋgeetee. 12Maa ga Pilip soopa asicca taasa kabarre ta daana ta mulunniti Mellayi, o ta gaartee Iisa Masi, guu giimi maani, miɗi o daati, amanniɗe oko beneyti gaa batisiyɗiy. 13Gaa Simo gata saa kulla duwicca galbanti oko Iisa Masi, guu batisiyiyya, gaa joboɗɗiya Pilip asin ma asin. Gaa maa ga elelɗiy garaawi ku ajjibiti maa gaa Pilip leewa, gaa ajjibiɗe maani ta kaw.
14Guu n̰amaakeetee Iisa ma aaye Zerizalem giyyiɗe goo gu giimi ku kiɗa ta Samaari amanne oko beneyti Mellayi ma gaartee Iisa, guu n̰aamiyyoogu ini Piyer ma giiti Yaaya. 15Gaa maa gu asiɗe kiɗa ta Samaari pa, gu asiyo inna Mella oko ma dowwiy galbigeeco oko Iisa Masi ku maa ga Mella biriyyo Ruuhanti. 16Ruuhanti Mellayi pa beree ɗa missa ya oko gimu kaƴi min aacco asan gu batisiyiy ma semeetee Miltine kee Iisa ka. 17Gaa Piyer ma giiti Yaaya gagiyyoogu picco kayyeeco, guu gassicca Ruuhanti Mellayi.
18Maa ga Simo ma leewa ambulla elliɗe gi Ruuhanti Mellayi beeriyo oko giimo wikinne maa gu n̰amaakeetee Iisa gagiyyoogu picco kayyeeco kaaka pa, ga cimme gurus unco Piyer ma giiti Yaaya. 19Gaa beneyyiyyoo gaa: «Birnawca ɗe kulla gudirane teete, ku maa na gagaɗɗo kulla pittaw oko giimo gu gasaɗɗo Ruuhanti Mellayi.» 20Gaa Piyer tiiliyyee gaa: «Ga Mella iggum ma guruscum, asan ki moyaa kii ki gederra ki giɗicca birawti Mellayi ma gurus. 21Oko lubbitini keeke ki ɗakko ɗa asan gi galbancum ɗayaŋ ɗa unti Mellayi. 22Kaaka pa, ki meelica mooyicum ta miɗɗa taata, kii lollikiyya Miltine walaŋ pe ga oyya ga saamiyiyyamca mooyicum ta miɗɗa taata. 23Naa ellam goŋŋa, gi galbancum tee ta miɗɗa wacakkam, o ki ay lawwico zunubgeyyo.» 24Gaa Simo beneyyiyyoo oko Piyer ma giiti Yaaya gaa: «Lollikinawga saa Miltine ga kuŋ aɗe ku maa ga maa ku beneyyanaw keeke alɗaw asaa ɗa.»
25Gaa maa gu ini Piyer ma giiti Yaaya beneyyiyyooga oko giimo beneyti Mellayi, kaaka ma gaartee Miltine kee Iisa, guu yookiɗe Zerizalem. Maa gu yokowɗo kaaka pa, gu taasica kabarre ta daana oko giimi ku gawaagargee maani ku kiɗa ta Samaari.
Pilip ma lubaaka ka tatta ka kiɗa ta Etiyoppi
26Gaa malaykatti Mella Miltine asiyyee beneyya oko Pilip gaa ga wacu ga icciɗo botol ka goosigeyyo ma kataa ta watuuni. Botol kaaka pa on̰aa min Zerizalem namma ya geegar ka Gazaa. 27Gaa koɗokka saa ga Pilip waciɗe ga kaatiɗe. Gaa butuuli ga deeɗe gassa gimu ma ay tattuwe#8.27 Taattuwee ku kiɗa ta Etiyoppi gu kolay ma beneyco nassarigeyyo goo Enik. Guta pa ga sultan doolowway. Mileŋ gu dooluwenta pa, gu enaa ɗa payya ooƴo ma daati. Ay kaaka appe gu bakamɗiko gu loboɗɗo ma daati ma aaye kaariti sultanni. kee ka kiɗa ta Etiyoppi#8.27 Oko wikinnico n̰amaakeetee Iisa pa, gi kiɗa taata maa gu kolaa goo Etiyoppi aaye tee ta watuunití kiɗa ta Suudaan haŋka.. Gata pa ay lubaaka ka tatta maa gi yaatuwa ta Etiyoppi maa gu kolaa goo Kandas kapakkeega ayaawuwtí paratti. Gata pa katee Zerizalem aabiditi Mellayi, 28gaa yokowɗo paaɗe. Gaa nowoɗɗe saaretti, ga garkayɗo beneyti Mellayi min oko kitamniti nabiinice Esaya. 29Gii Ruuhanti Mellayi beneyyiyyee oko Pilip gee: «Yokku ki tappitti oko saaret taata.»
30Gaa Pilip gaɗɗiɗe ga tappitti oko saaretti. Gaa gewɗiya gimu kaaka maa ga garkayɗo beneyti Mellayi kitamniti nabiinice Esaya. Gaa Pilip inniyya gaa: «Ki ibinya aɗe beneyti kitamniti keeke maa ki garkayya?» 31Gaa gata pa tiiliyyee gaa: «Kaw! Na ebenna ɗa gaa gimu gaarawga ɗa.» Gaa beneyyiyyee oko Pilip gaa ga kalpu ga nuntiɗo saripti aatti saaretti. Gaa Pilip kalpiɗe. 32Were ka kitamniti maa ga garkayya kaaka pa beneyya gaa:
«Gata pa ay aleŋ tamaw maa gu katawki daɓisiyti,
o ga ay aleŋ tamaw ma erecca ɗa
maa guu giimi repekkeegu laawtee,
o ga iyye ɗa biiti.
33Guu giimi issiyyee jaalo,
guu taattuwee alɗiyee caaɗa ɗa cur parlane.
Lekka ɗa gimu kaƴi
ma gederra ga asiɗo beneyya ma ka ronco rontee,
asan gu giimi deyya, duwiyee ɗa ga nuntiɗe kiɗaati#8.33 Elloŋ Esaya 53.7-8..»
34Gaa lubaaka ka tatta kaaka inniyya Pilip gaa: «Ban̰n̰u beneyyaw ƴa. Baŋ ga nabiinice beneyya ma gaari ku kayaati ka e, e o baŋ ga beneyya ma gaari ku gimu kaƴi?»
35Gaa Pilip diiliɗe ma beneyyi kaaka ga tasawɗeeca kabarre ta daana ta Iisa. 36Gaa maa gu katawɗo gu gassiɗe ammi. Gaa lubaaka kaaka gaariyyeegu ammi oko Pilip, gaa beneyyiyee gaa: «Ay ini me ma toɗokkaw na deeɗo batisiyenta?» 37Gaa Pilip pa tiiliyee gaa: «Kii dowwica aɗe galbancum parattí oko Iisa, ki deewa batisiyenta.» Gaa tiiliyyee gaa: «Na amanne kadar ga Iisa Masi ay Runti Mellayi.»
38Gaa lubaaka wirricca saaret. Guu berriɗe serco gu deeɗe un̰n̰a ammo. Gaa Pilip batisiyiyya. 39Gaa maa gu oomiɗe min ammo, gii Ruuhanti Mella Miltine misiliyyeega Pilip. Gaa lubaaka kaaka alɗiya ella ɗa payya. Gaa deeɗe kalpa ga ƴiiliɗe o were daanee ta kaw. 40Maa ga Pilip elliɗe, gaa aaye geegar ka Azot. Gaa min iŋaa, ga ƴiiliɗe geegar ma geegar ga tasawɗica kabarre ta daana ta Iisa namma ga sarɗe geegar ka Sezaree.
Currently Selected:
Lubaakico N̰amaakeetee Iisa Masi 8: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.