Lubaakico N̰amaakeetee Iisa Masi 15
15
Meela ma gaari ku taharriti
1Guu giimi daare waciɗe min kiɗa ta Yudee, guu asiɗe geegar ka Antiyos. Guu diiliɗe gu garkayɗiy seneeta ma ay Yawudigee ɗa ma dowwiy galbigeeco oko Iisa goo: «Kuu taharra ɗa aleŋ maa gi Kitamniti Muusa beneyye, ga Mella najjayyatoŋ ɗa.» 2Pol o Barnabas pa oyye ɗa ma beneyco kaaka. Guu meelikkoo ta tirta teete giimi kotti. Guu boodiɗe goo gu ini Pol ma giiti Barnabas addo Zerizalem ma gicco daare ku Antiyos gu deeɗo beneyya ma gaari kooko ma n̰amaakeetee Iisa o ajaawaŋgeeco giimi ma temekka saananti Iisa Masi.
3Guu giimi ma temekka saananti Iisa Masi ku geegar ka Antiyos biriyyoo maatiki ka turguwwi, guu kaatiɗe. Maa gu tappiɗiy kiɗaayee ku Pinisi o ku Samaari, gu beneyyiyyoo oko seneeta ma dowwiy galbigeeco oko Iisa ma gaarco giimi ma ay Yawudigee ɗa baŋ gu ribile goo me oko Miltine kee Iisa. Maa gu seneeta paracco giyyiyya beneyco kaaka, gii deeɗiyo daanayo ta tirta teete. 4Gaa maa gu giimi maa gu n̰akamme guta sarɗe Zerizalem, guu giimi ma temekka saananti Iisa Masi iŋaa o n̰amaakeetee Iisa o ajaawaŋgee joobiɗiy. Guu jeppiyyoogu gaari paracco maa ga Mella leelo ma guta.
5Guu giimi daare min Pariziyennigeyyo ma dowwiy galbigeeco oko Iisa Masi waciɗe gu beneyyiɗe goo: «Ay tirta appe gu giimi kooko ma ay Yawudigee ɗa guu dowɗiy galbigeeco oko Iisa Masi ku taharriyo, o ku beneyyaniyo gu baamiɗiy talta hukumnigeetee Muusa.»
6Guu n̰amaakeetee Iisa o ajaawaŋgeeco giimi ma temekka saananti Iisa Masi timmiɗe paracco ku maa gu elliyya beneyyi keeke. 7Maa gu meeliɗe gu dummiɗe, gaa Piyer waciɗe ga beneyyiɗe gaa: «Seneeta, ku lekka kabarre kadar ga min tippa, ga Mella aparrinoo min aattoŋ, ku maa na tasawɗica kabarre ta daana oko giimi ma ay Yawudigee ɗa, ku maa gu guta kulla giyyiɗo guu duwɗiy galbigeeco oko Iisa. 8Mella pa ma ibinya ka galbigeeco giimo gaare kadar ga oyyiy giimi ma ay Yawudigee ɗa asan ga biryooca Ruuhanti aleŋ tantine kulla. 9Gata pa jaginee ɗa, leenee sawa ka. Gaa supiriyyoogu galbigeeco asan gu dowwiy galbigeeco oko Iisa. 10Gaa haŋka pa ayme ku aŋkiɗo ku kesiyya Mella ku gagiyyo suuruwe maa ga kee o kookuweetine gederre ɗa ke icciyya. 11Ay tirta ɗa ke leeɗiya keeke. Ke amanne soo kadar ga Mella najjiynee ma gidaanuwti Miltine kee Iisa, kee Yawudigee aleŋ tanco.»
12Guu giimi paracco ƴaapiɗe, gu gewɗiy ini Barnabas ma giiti Pol ma beneyyayo ma garaawi ku ajjibiti paracco maa ga Mella leelo ma guta unco giimi ma ay Yawudigee ɗa. 13Maa gu gaamiyya beneyco kaaka, gaa Zak waciɗe ga beneyyiɗe gaa: «Seneeta giyyino ƴa! 14Simo beneyyine appe kadar ga min diiliti ga Mella ecekke niyyane, gaa apirɗe min aacco giimi ma ay Yawudigee ɗa ku maa gu deeɗo gimtee. 15Beneyco nabiinigeyyo pa waage pe aɗe ma keeke maa gu ketepeyye goo:
16“Wikinne maa guu gaari kooko ƴiile, ga naa Mella Miltoŋ,
akkiya geewa payya girti sultan Dawud ma gale,
o na akkiya cipila durdurriti maa ga leelo
ga deeɗo marawta.
17Ku maa gu giimi paracco ma ay Yawudigee ɗa
asinno diyya naa ma ay Mella Milco,
o ballee paracco maa na kolee gu asiɗo dee kunni.
Ay Mella saa ma kayaati beneyyiya keeke,
18o ga gata ma beneyyiyoo aɗe
min tippa ma gaari kooko#15.18 Elloŋ Amos 9.11-12..”»
19Gaa Zak beneyyiɗe payya gaa: «Ay ɗakko appe, ga oko kanni ka, na alɗo aŋka ɗa ke gaayiyyo gaari oko giimi ma ay Yawudigee ɗa ma ribile oko Mellayi. 20Innasoopa, ke kitipiyaniyo maktup kee gu addo ayamma ɗa suuɗu ka saɗikiyenta oko zorro ma negekkay unti Mellayi, o gu addo diyya ɗa daati e baŋ pa miɗi bala paate, o gu addo ayamma ɗa suuɗu ka gaaruwwi ma daɓisiyenta ɗa, o gu addo teewa ɗa baara#15.20 Hukumnigee kooko pa ku gasakkay Soƴoowee ku Saɗikaŋgeyyo 18.6-18, 17.10-16., 21asan ga min tippa gu giimi garaa hukumnigeetee Muusa kulla geegar aɗe o gu garkayyay kulla meene ta nambiti aɗe gerraco Yawudigeyyo ku giraaniti.»
Maktup oko ma ay Yawudigee ɗa ma amanne oko Iisa
22Guu n̰amaakeetee Iisa o ajaawaŋgee o giimi ma temekka saananti Iisa Masi paracco boodiɗe. Guu apirɗe giimi min aacco, guu n̰aamiɗiy ma Pol o Barnabas geegar ka Antiyos kiɗa ta Siiri. Guu apiriyya Yud maa gu kolaa kulla goo Barsabas, o Silas, guta ma ay miɗi ku karmiyenta min oko seneeta ma dowwiy galbigeeco oko Iisa. 23Guu biriyyooca maktup picco. Aattí maktup taata pa gu ketepeyye goo:
«Nii n̰amaakeetee Iisa o ajaawaŋgee ma ay seneetoŋ salammitoŋ kuŋ seneeta ma ay Yawudigee ɗa ku Antiyos o ku Sirii o ku Silisi. 24Ni giyye kadar gu giimi daare min aattini kaatitoŋ, guu deeɗitoŋgu kuɗisa galbigeetoŋ o gu eeɗitoŋ ma beneyyi ma raɗakka. Guta pa, ay nii ɗa ma n̰akammiy nii gu aɗaatoŋ beneyya goŋŋa. 25Ay ɗakko appe, ni boodiɗe parattini nii apirɗe giimi ni n̰aamittoŋgu. Guta pa ezekkay seneetini ku ƴekkenta ini Barnabas ma giiti Pol. 26Guta birca hayaatanco oko lubbiti Miltine kee Iisa Masi. 27Ay ɗakko appe ni n̰aamittoŋgu ini Yud ma giiti Silas. Guta pa deeɗitoŋga jeppa beneyyi maa ni ketepeyyitoŋ aattí maktupti. 28Oko keeke pa, gi Ruuhanti Mellayi o niita icce niyyane maa ni alɗitoŋ gaga ɗa ya suuruwe kaƴi bala min oko beneyyiŋgee kotti maa ku dee jobokko: 29Nii ku aɗoŋ ayamma ɗa suuɗu ka saɗikiyenta oko zorro, o ku aɗoŋ teewa ɗa baara, o ku aɗoŋ ayamma ɗa suuɗu ka gaaruwwi ma daɓisiyenta ɗa, o ku aɗoŋ diyya ɗa daati e baŋ pa miɗi bala paate. Kuu gederre ku leeɗiya keeke, ku leelo samaane. Gassoŋca salammitini ta seneetuwwi.»
30Maa gu giimi ma temekka saananti Iisa Masi damiyyooca maktup, guu duwiyyo gu kaatiɗe Antiyos. Maa gu sarɗe pa Antiyos, guu deeɗiy timma giimi paracco ma dowwiy galbigeeco oko Iisa, guu biriyyooca maktup gita. 31Guu garkiyicca gii deeɗiyo daanayo ta tirta oko wasaane maa gu itiriyoo. 32Yud o Silas pa, ma ay nabiinigee beneyyiyoo diiman oko seneeta ma dowwiy galbigeeco oko Iisa. Guu wassiyɗiy maa gu baamicca amannico talta. 33-34Guu nuntiɗe iŋaa wikinne paalta, guu seneeta leeɗiyoo goo: «Ga Mella arkitoŋ ma aapiya oko giimi ma n̰akammitoŋ.» 35Guu ini Pol ma giiti Barnabas soopa marɗe Antiyos. Gaa ma gicco daare maani gu garawɗiyooga o gu tasawɗiyooga beneyti Mellayi oko giimi ma temekka saananti Iisa Masi.
Pol ma giiti Barnabas jagakka
36Maa gu leeɗe meeni, gaa Pol beneyyiyyee oko Barnabas gaa: «Yookeŋ ƴa ke deeɗiy siwwa seneeta ma aaye gawaagargee paracco wereeriyee maa ke taasiyya beneyti Miltine kee Iisa, baŋ gu leewe pe goo me.»
37Gaa Barnabas aŋkiɗo ga kaatikkiki ma guta Yaaya maa gu kolaa kulla goo Mark. 38Gaa Pol soopa alɗe oyya ɗa, asan ga oko turguwco ka omma ga cappiyo Pampili, ga alɗiy iza ɗa namma ya gaamiti lubbico. 39Gaa Pol ma giiti Barnabas kaltiyɗe ta tirta namma gu jagiɗe. Barnabas ƴa kaatiki Mark guu deeɗe kalpa markaba gu kaatiɗe ta Sipire, 40Pol pa apirya Silas. Guu seneeta ma dowwiy galbigeeco oko Iisa inniyyooga Mella ga leeɗiyooga gidaanuwti, gaa Pol ma giiti Silas ƴiiliɗe. 41Gaa Pol tan̰n̰iyyoo oko kiɗaayee ku Sirii o ku Silisi ga beneyɗiyo oko giimi ma temekka saananti Iisa Masi maa gu baamicca amannico talta.
Currently Selected:
Lubaakico N̰amaakeetee Iisa Masi 15: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.