Lubaakico N̰amaakeetee Iisa Masi 16
16
Pol aparraa Timote ga kaatiɗo ma guta
1Gaa Pol sarɗe Derbe, gaa ƴiiliɗe Listire. Iŋaa pa, ga lekka miiɗi kaƴi aɗe ma jobokkaa ka Iisa Masi maa gu semeetee goo Timote. Gata kaaka pa, gi yaati ay Yawudiŋga ma dowwica galbantí oko Iisa. Tatti pa, ay Gireknice. 2Seneeta ma dowwiy galbigeeco oko Iisa koo ku geegar ka Listire o kee ka Ikoniyom pa beneyya maani ma gaartee ku samaane. 3Gaa Pol aŋkiɗo ga kaatikki ma gata. Gaa taharriyyee saananco Yawudigee ma aaye kiɗa taata, asan gu ibinya kadar ga tatti ay Gireknice#16.3 Gireknigee pa taharra ɗa. Pol pa moyaa gaa guu taharriyee ɗa oko Timote, gu Yawudigee pocaa.. 4Guu tan̰awɗo paaɗe geegar ma geegar, gu tasawɗiyooga oko giimi ma dowwiy galbigeeco oko Iisa beneyyi maa gu n̰amaakeetee Iisa o ajaawaŋgeeco giimi ma temekka saananti Iisa Masi koo ku geegar ka Zerizalem bodowwiko. Guu beneyyiyyoo goo gu addo paala ɗa min oko beneyco kaaka. 5Guu giimi ma temekke saananti Iisa Masi gassiɗe gudirane amannico, o gu selaa ka gu selewɗo kulla meene.
Waaniti Pol
6Gii Ruuhanti Mellayi toɗɗiyyoo taaso ta beneyti Mellayi kiɗa ta Aazi. Ay ɗakko appe gu tappicca kiɗa ta Pirizi o ta Galasi. 7Gaa maa gu sarɗe katta kiɗa ta Misi, guu cokkiɗe kaato kiɗa ta Bitini. Innasoopa gi Ruuhane ta Iisa toɗɗiyoo kaato Bitini. 8Ay ɗakko appe gu tappicca kiɗa ta Misi, guu icciyya botol gu kaatiɗe geegar ka Torowas ma aaye biití baharre ta yaata. 9Gaa ma aandoŋ ga Pol waaniɗe gaa ga miiɗi kaƴi min kiɗa ta Maseduwan asiyee warra unti, gaa inniyya gaa: «Asaani kiɗa ta Maseduwan ki asinni gaaya!» 10Maa ga Pol waciɗe min waaniti taata, gaa koɗok ni#16.10 Lik ma ay daktor pa ay gata ma kitipiyca kitamne teete. Ay ɗakko appe ga kitipiyɗe gaa ‘ni’, asan ga aaye ma Pol o Silas. yayyimɗe kaato Maseduwan, asan ni lekka kabarre kadar ga ma seene pe ga Mella jorowwinii ni deeɗica taasa kabarre ta daana oko giimi ku gonek kutik.
Lidiya dowwaca galbantí oko Iisa geegar ka Pilip
11Nii kalpiɗe markaba min Torowas, nii aaniyɗe saa cur ta kiɗa ta Somotoras ma aaye ɗaɗɗakkico ammo. Gaa ma ta sokkonta pa, min Somotoras ni sarɗe geegar ka Neyapolis. 12Gaa min Neyapolis ni ƴiiliɗe ma tan̰n̰o namma ya geegar ka Pilip ma tatta ƴiila min kiɗa ta Maseduwan maa gu Roomennigee hekemeyye. Iŋaa pa ni leelo meeni maani. 13Gaa ma meene ta nambiti, ni oomiɗe min geegarri, nii kaatiɗe biití ƴirti. Iŋaa pa ni leewe nii walaŋ pe ni gasakka were maa gu Yawudigee enewɗiya Mella. Guu lekkiɗo daati ma temekke were kaaka. Nii deeɗe nunta ma guta ni beneyyiɗe. 14Gii lekkiɗo kaƴi min oko daati kotti maa gu semeeti goo Lidiya. Gita pa asaa min geegar ka Tiyatir o gi saawagga tiibaŋgee ku binta o gu samaane ta tirta o gi ay gima ma bakammiya ka Mellayi. Gaa maa ni beneyɗo kaaka gi yereɗɗiya beneytini samaane. Gaa Mella Miltine iyyittiica galbantí gi amanniɗe oko beneyti Pol, 15nii batisiyicca. Gaa maa ni batisiyicca ma gimti paracco ku giiri, gii beneyyinni gee ni addo girtí gee: «Mileŋ ku lekka paaɗe kabarre kadar na dowwica galbantu ta kaw oko Miltine kee Iisa, ku asoŋ nunta girtu.» Gii kuddiyinni ni oyyiɗe.
Pol ma giiti Silas gu bamakkay daŋayi
16Gaa meene kaƴi maa ni katawɗo were ka inniti Mellayi, gi lekkiɗo lawwa ma waagikinii. Gita pa ay jannaniŋga ma beneyya ma gaari ma asaa. Guu melleeti gasaɗɗo gurus maani ma beneyyiŋgeeti kotti. 17Gii jobbinnii ma giitini Pol o gi cayyakka ma raɗɗa gee: «Giimi kooko ay lubaakeetee Mella ka Uwwa ta kaw! Guta kooko pa garaatoŋga botol ka najjiyti!» 18Gii joboɗɗini meeni maani o gi cayyakka. Gaa Pol raawiɗe, gaa boŋsiɗe ga ribilitti, gaa beneyyiyyee oko jintí ma kalappica gaa: «Ma semeetee Iisa Masi ki oomu min oko gita!» Gaa oko wikinne kaaka saa ga jintí oomiɗe min oko gita.
19Maa gu melleeti elliɗe kadar gu gasakka ɗa payya gurus minnantí, guu bammiɗiy ini Pol ma giiti Silas. Guu kaatikkikoo ɗaɗɗakiti geegarri, unco taattuweyyo gu deeɗiyo caaɗa parlane. 20Guu deeɗiy wirra unco taattuwee ku Rooma ma caɗaa parlane. Guu beneyɗo goo: «Giimi kooko ay Yawudigee guu keseɗɗo gaari aatti geegartine. 21Guta garaa aadaŋgee ma ay kuntine ɗa, maa gi aadantine toɗokkine oko kee giimi ku Rooma. Ke oyay ɗa o ke leeway ɗa.»
22Guu giimi ku maani kulla waciyyoo oko ini Pol ma giiti Silas. Guu taattuwee ku Rooma ma caɗaa parlane leeɗiyo goo gu giimi settayoogu kaɗiŋgeeco, guu beneyyiyyoo gu tammiɗiy ma morgooye. 23Maa gu tammiɗiy maani, guu issiɗiy daŋayi. Guu taattuwee beneyyiyyee oko tattuwe ka taraakeyyo goo ga tariy samaane. 24Maa ga taraaka giyyiyya beneyco kaaka, gaa issiɗiy ɗakko suluuluyyi gaamiti daŋayi. Gaa issiyyoogu asinco aacco bonna ku duulu ma ay aleŋ tukur̰uc#16.24 Tukur̰uc pa ay duulu maa gu Migaami tippa papawɗiy asinco daatti ma pocay miɗicco.. Guu onniɗiy talta.
Gimtee taraakayi dowway galbigeeco oko Iisa
25Gaa ma ɗaɗɗakiti aandoŋŋi gu ini Pol ma giiti Silas enewɗiya Mella o gu reewa riyaawiŋgee ku logawti. Guu giimi daare maa gu bamakke kulla gewɗiy. 26Gaa kaytiŋ ka gi kiɗa azirɗe raɗɗa namma ga daŋaye min kiɗaati yaagiɗe. Guu burgaggi paracco ku daŋayi iyyiɗe waŋ kaytiŋ ka. Guu janaazargee maa gu onoɗɗiy giimi paracco maa gu bamakke daŋayi ipirɗe. 27Maa ga tattuwco taraakee ku daŋayi gata pa idirɗe, gaa elliɗe guu burgaggi ku daŋayi eyee. Gaa lewɗe gaa walaŋ pe gu giimi ku daŋayi gaɗɗe paaɗe. Ay ɗakko appe ga jooticca seepanti ga aŋkiɗo ga deeɗo ziiti. 28Gaa Pol cayyikiyyee ma raɗɗa gaa: «Addo awarra ɗa ziicum, ni aaye aɗe parattini!»
29Gaa tattuwco taraakee ku daŋayi inniɗe gaa gu itiree okko ga elliɗiy ƴa giimi ku daŋayi. Gaa un̰n̰iɗe koɗok suluulu maa ga Pol alɗo. Gaa ɓayɗe namma ga azarɗo ta cim cim. Gaa galɗe asinco Pol ma giiti Silas. 30Gaa cimmiɗiy min daŋayi, gaa inniɗiy gaa: «Taattuweetaw, na lee pe soo naa me ku maa na deeɗo najjiyenta?» 31Guu tiiliyyee goo: «Duwca galbancum oko Miltine kee Iisa, kii gassiɗo najjiyo, kiita o gimcam ku giiri paracco.» 32Guu beneyyiyyee ma gaartee Miltine kee Iisa oko gata o oko gimtee paracco ku giiri. 33Gaa ma aandoŋ oko saha taata aɗe, ga taraaka kaatikkiko ini Pol ma giiti Silas ga deeɗiyoogu apila motticco. Gaa ma haŋka keeke aɗe gu batisiyya gata o gimtee ku giiri paracco. 34Gaa min iŋaa, ga kaatikko girti ga deeɗiyoo bira tiyaw. Gii deeɗiyee daanee ta tirta ma gimtee ku giiri paracco asan gu duwiy galbigeeco oko Mellayi.
35Maa ga were walɗe, guu taattuwee ku Rooma n̰aamiyyee asaakargee oko tattuwco taraakee ku daŋayi goo ga cappayo paaɗe oko Pol ma giiti Silas. 36Gaa tattuwco taraakee ku daŋayi taasiyyee oko Pol gaa: «Taattuwee n̰aame goo na cappatoŋ paaɗe min daŋayi. Haŋka pa ku oomoŋ! Aɗoŋ appe ma aapiya.» 37Gaa Pol beneyyiyyoo oko asaakargeyyo gaa: «Taattuwee ku Rooma tamminii unco giimo bala parlane. Nii kulla maa ni ay giimi ku Rooma aɗe o gu issini daŋayi! Gaa haŋka gu aŋkiɗo gu cimminni ma kiilo ka. Kaw, kaaka daa ɗa. Gu guta saa ma kayyeeco asaani cappa#16.37 Roomennigee pa gederra ɗa gu tammiɗo gimu ka Rooma ma baamenta daŋayi bala caaɗo ta parlanti.!»
38Guu asaakargee itiriyyooga beneyti Pol oko taattuwee ku Rooma. Gaa maa gu giyyiɗe kadar ga Pol ma giiti Silas ay giimi ku Rooma kulla, guu kellemco oomiɗe ta tirta teete. 39Guu taattuwee guta asiyyoo saamiya o gu uttiyoo min daŋayi. Guu malmilɗiy goo gu oomu min geegarri. 40Gaa maa gu ini Pol ma giiti Silas oomiɗe min daŋayi, guu kaatiɗe girtí Lidiya. Iŋaa pa, gu beneyyiyyoo oko seneeta ma dowwiy galbigeeco oko Iisa goo gu baamica talta amannico oko Iisa Masi. Guu oomiɗe min geegarri.
Currently Selected:
Lubaakico N̰amaakeetee Iisa Masi 16: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.