Lubaakico N̰amaakeetee Iisa Masi 14
14
Pol o Barnabas aaye geegar ka Ikoniyom
1Maa ga Pol o Barnabas sarɗe Ikoniyom, guu deeɗe un̰n̰a kulla ger ka giraaniti ka Yawudigeyyo. Iŋaa pa, gu beneyye beneyti Mellayi namma gu giimi maani ma ay Yawudigee o ma ay Yawudigee ɗa duwɗiy galbigeeco oko Iisa. 2Guu gicco daare ma ay Yawudigee ma pooce amanno soopa issiyyooca oko gicco ma ay Yawudigee ɗa ku maa gu niŋgiyyooca mooyico oko seneeta ma dowwiy galbigeeco oko Iisa. 3Gaa ma kaaka aɗe kulla, ga Pol ma giiti Barnabas nuntiɗe gu dummiɗe geegar ka Ikoniyom. Guu beneyɗo bala ɓayaw o ma damanno oko Miltine kee Iisa. Gaa Miltine biriyyoo gudirane gu lewɗo garaawi ku ajjibiti ma garaa kadar ga beneyco ma gaari ku gidaanuwti ay seene. 4Guu giimi ku geegarri darɗe durgee seera. Ku daare ƴa aaye ma Yawudigee, o daare pa aaye ma n̰amaakeetee Iisa.
5Guu Yawudigee o ma ay Yawudigee ɗa, ma taattuweeco, boodiɗe ku maa gu lewɗiyo miɗɗa oko n̰amaakeetee Iisa, o gu boode kulla ma ka diyawco ma dawwo ta dambeyyo. 6Maa ga Pol ma giiti Barnabas giyyiyya beneyyi kaaka, guu gaɗɗiɗe ta gidaane ka Listire o ka Derbe gawaagargee ku kiɗa ta Likayoni o ma helelgeeco ma kadarriy. 7Iŋaa pa gu deeca taasa kabarre ta daana ta gaartee Iisa.
Pol ma giiti Barnabas aaye geegar ka Listire
8Gaa iŋaa Listire pa ga lekkiɗo miiɗi ma ay ruŋguyne ma nowotte. Gata pa gu weewiya saa ruŋguyne. Tan̰n̰e ɗa kaytiŋ. 9Gaa meene kaƴi, ga giyyiya beneyti Pol. Gaa Pol elliyya ƴoy, gaa leeɗe kabarre kadar ga ruŋguyne keeke dowwica galbanti oko Iisa kadar ga rayyaddaa. 10Gaa Pol beneyyiyyee ma raɗɗa gaa: «Wacu! Ki warriɗo uwwa!» Gaa waciɗe partakan̰ ga warriɗe, gaa tan̰n̰iɗe. 11Maa gu giimi ku maani kotti elliyya lattaati Pol maa ga leelo kaaka, guu cayyikiɗe paracco ma raɗɗa, ma beneyyi ka kiɗaaco ta Likayoni goo: «Zorri icce pe zene ku giimo, guu berriɗe aattine!»
12Guu kolowɗiya Barnabas goo Zewus ma ay tattuwco zorro, o Pol pa goo Ermees ma ay beneeya ka zorco asan ga ay Pol ma cemekka beneyyi. 13Girti Zewus ka aabiditi pa, aaye katta ka biiti geegarri. Gaa soƴoowa ka saɗikaŋgeyyo oko Zewus deeɗe bamma koydigee, gaa r̰an̰n̰iɗiy ma buuyumi, gaa asikkiko biiti ger ka sooƴiti saɗikaŋgeyyo asan gu onokkiya beneyco ma giimi paracco ku maa gu sooƴiyyo saɗikane oko Barnabas ma giiti Pol. 14Gaa maa gu n̰amaakeetee Iisa ini Barnabas ma giiti Pol leeɗe kabarre kadar gu aŋka gu sooƴiyyo saɗikane, gu erriy kaɗiŋgeeco, guu un̰n̰iyyo aacco o gu kawwakkayo goo: 15«Kuŋ giimi! Ayme maa ku leewa keeke? Nii kulla ay giimi ka aleŋ kuŋ. Ni tasaatoŋca kabarre ta daana ku maa ku poociɗiy zortoŋ kooko ma gayee ɗa maatiki, kuu ribilɗo oko Mellayi, gata ma ay Miltí hayaatanti o ma kilgiyya samaane o kiɗa o baharre o lawwi paracco#14.15 Elloŋ Oomiti min Masir 20.11 o Soom 146.6.. 16Min tippa ga Mella dowwiyo oko ballee paracco gu joboɗɗo bottolli maa gu aŋka ka. 17Gaa ma kaaka aɗe ga garawɗica diiman samaaniti, gaa n̰akawɗitoŋ ammi min samaani, ku maa ga kulla piɗiwaŋ gi seɗɗitoŋ dewɗo samaane, o ku ayawɗo lawwi ku tiyaawi, o ga beraatoŋ parhane galbigeetoŋ.» 18Gaa ma beneyco kaaka aɗe ga Pol ma giiti Barnabas gederriɗe gu wirriɗiy ma diigane min oko gaari ku sooƴiti saɗikanti oko guta.
19Maa ga keeke ƴiiliɗe, guu Yawudigee waciɗe min geegar ka Antiyos ka kiɗa ta Pisidi o daare pa min Ikoniyom gu asiɗe pe Listire. Guu asiyyooca issa oko giimo guu bulɗe dambee gu dawwiyya Pol namma gu ɗeeriyya. Guu yebbiyya renta min geegarri goo walaŋ ga maate paaɗe. 20Gaa maa gu giimi ma jobokkaa ka Iisa Masi asiyya kadira, gaa waciɗe ga yookiɗe geegarri. Gaa ma ta sokkonta kaƴi, ga Pol kaatiɗe geegar ka Derbe ma giiti Barnabas.
Pol ma giiti Barnabas yokaa Antiyos kiɗa ta Sirii
21Gaa aatti geegar ka Derbe, ga Pol ma giiti Barnabas taasicca kabarre ta daana. Guu giimi maani jobbiyya ka Iisa. Gaa min iŋaa gu yookiɗe gawaagargee ku Listire, o ku Ikoniyom, o ku Antiyos ta Pisidi. 22Gaa kulla geegar aɗe maa guu kaate, gu beneyyayo oko giimi ma jobokkaa ka Iisa Masi beneyyiŋgee ku maa gu baamicca amannico talta goo: «Ay tirta appe ke diigiyɗo maani hatta kee gassicca nunto mulunniti Mellayi.» 23Gaa Pol ma gitti Barnabas apiriyyo min oko giimi paracco ma temekka saananti Iisa Masi wereeriyee pay pay ajaawaŋgee. Guu samkayɗiyo o gu enaayo Mella, guu kappiyyeegu oko Miltine kee Iisa maa gu duwɗiy galbigeeco.
24Maa gu tappicca kiɗa ta Pisidi, guu sarɗe kiɗa ta Pampili. 25Gaa iŋaa geegar ka Perge, gu taasiyya beneyti Mellayi. Gaa min iŋaa, gu ƴiiliɗe geegar ka Attaliya ma aaye biití baharre ta yaata. 26Gaa min Attaliya kaaka gu kalpiɗe markaba gu yookiɗe geegar ka Antiyos kiɗa ta Sirii. Ay iŋaa appe Antiyos tippa maa gu giimi ma temekka saananti Iisa Masi inniyoo Mella ga leeɗiyo gidaanuwe oko lubbi maa gu deeɗo lee, guu tattipiyya paaɗe.
27Maa ga Pol ma giiti Barnabas sarɗe Antiyos kiɗa ta Sirii, guu timmiɗiy giimi ma temekka saananti Iisa Masi. Guu gemmiyyoogu gaari paracco maa ga Mella leelo ma guta, o baŋ ga iyyiyyo gaa me botol ka amanniti oko giimi ma ay Yawudigee ɗa. 28Gaa iŋaa Antiyos gu nuntiɗe gu dummiɗe ma giimi kotti ma jobokkaa ka Iisa Masi.
Currently Selected:
Lubaakico N̰amaakeetee Iisa Masi 14: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.