Lubaakico N̰amaakeetee Iisa Masi 13
13
N̰aamico Barnabas ma giiti Sol
1Gaa oko wikinne kaaka, gu lekkiɗo min aacco giimi ma temekka saananti Iisa Masi geegar ka Antiyos nabiinigee o giimi ma garaa beneyti Mellayi. Guta pa ay ini Barnabas, o Simeyon miiɗi maa gu kolaa goo ‘ka namta’, o Lisiyuus ma ay ka geegar ka Siren, o Manayen ma maɗee ma Erod ma ay tattuwe ka kiɗa ta Galilee#13.1 Erod keeke pa ay Erod Antipas. Elloŋ Lik 3.1., o Sol. 2Gaa meene kaƴi maa gu samkayɗe o gu lollokka Mella Miltine, gi Ruuhanti Mellayi beneyyiyyoo gee: «Barnabas o Sol, ku apirnawgu oko lubbi maa na jorowɗiy.» 3Gaa maa gu samkiyɗe o gu inniya Mella, guu gagiyyoogu picco kayyeeco, guu duwiyyo paaɗe gu kaatiɗe.
Barnabas ma giiti Sol kataa Sipire
4A mileŋ gi Ruuhanti Mellayi n̰akammiy ini Sol ma giiti Barnabas pa, gu kaate geegar ka Silisi ma aaye biití baharre ta yaata. Iŋaa pa gu dee kalpa markaba kaƴi aɗe yaata. Guu kaatiɗe kiɗa ta kadirenta ma ammi ma gu kolaa goo Sipire. 5Guu sarɗe geegar ka Salamin, guu diiliɗe paaɗe gu tasawɗiya beneyti Mellayi gerraco Yawudigeyyo ku giraaniti. Gaa Yaaya Mark alɗo ma guta ga gayawɗiy.
6Guu tappica kiɗa ta Sipire parattí, guu sarɗe geegar ka Papos. Gaa iŋaa, gu waagikkiki Yawudince ma leewa ambulla maa gu semeetee goo Baar Iisa. Gata pa leewe gaa ga ay nabiinice. 7Baar Iisa pa ay gayaawati oko guberner ka kiɗa taata maa gu kolaa goo Sergiyus Polus. Guberner kaaka pa, gi kayaati ecekka gaari. Gaa meene kaƴi, ga kolliɗiy ini Barnabas ma giiti Sol asan ga aŋka gu deeɗe gaara beneyti Mellayi. 8Gaa milti ambullati kee maa gu kolaa kulla ma beneyyi ka Gireknigeyyo goo Elimas kaltiyikkikoo, asan ga aŋka ɗa ga guberner icciɗo botol ka amanniti oko Iisa. 9Gaa Sol maa gu kolaa kulla goo Pol#13.9 Seme ku Sol ay ma beneyyi ka Ebireenigeyyo, o Pol pa ay ma beneyyi ka Roomennigeyyo. unenta ma Ruuhanti Mellayi elliyya ƴoy Elimas. 10Gaa beneyyiyyee gaa: «Kii keeke ay gimu borolta, o ki ay gimu ka gaartee miɗɗa. Kii ay runti Seetanni o ki ay kasiiminco gaari paracco ku ɗayaŋ. Ki aŋka diiman ki negeɗɗiy gaartee Mella Miltine ku tirta. 11Haŋka pa ki giyyu samaane. Mella deegeyyam. Ki daa pe koor̰, o ga oko wikinne paalta ki ellaca ɗa payya bahaarane.»
Gaa ma haŋka kaaka saa ga were raamiyyee zippit ga alɗo ella ɗa payya, gaa dandamɗo pe gonek ka ga deyeɗɗo gimu ma ɗan̰akka. 12Maa ga guberner elliɗiy gaari kooko ma asiyee oko Elimas, gaa duwicca galbanti oko Iisa o ga ajjibe ta kaw oko beneyti Mella Miltine kaaka.
Pol ma giiti Barnabas aaye Antiyos kiɗa ta Pisidi
13Gaa Pol ma gittee oomiɗe min Papos, guu deeɗe kalpa markaba gu kaatiɗe geegar ka Perge, biití baharre ta yaata ma aaye kiɗa ta Pampili. Maa gu sarɗe iŋaa, gaa Yaaya Mark cappiyyoo, gaa yookiɗe Zerizalem. 14Gaa Pol ma giiti Barnabas waciɗe min Perge, guu kaatiɗe geegar ka Antiyos kiɗa ta Pisidi. Gaa ma meene ta nambiti, gu deeɗe un̰n̰a girco Yawudigeyyo ka giraaniti gu nuntiɗe. 15Gaa gimu kaƴi waciɗe unco giimo ga garkiyɗe aayaŋgee ku Kitamniti Muusa o ku kutubgeeco nabiinigeyyo. Guu taattuweetee ger ka giraaniti ka Yawudigeyyo n̰aamiyyoo goo gu aɗaayo beneyya goo: «Seneeta, kuu lekkiyo beneyyiŋgee oko giimo ku maa gu baamicca talta amannico, ku ban̰n̰oŋ beneyyani.» 16Gaa Pol waciɗe ga cipiliyya pitti, gaa beneyyiyyoo gaa: «Kuŋ giimi ku Isirayel o kuŋ ma ay Yawudigee ɗa kuu ɓayaɗɗo kulla Mella, giyyino ƴa! 17Mella Milco gimtine ku Isirayel, apiriy kookuweetine, gaa oyyiyyoo gu weeɗe gu deeɗe maani wikinne maa gu alɗo turi kiɗa ta Masir. Gaa ma gudiranti ga cimmiɗiy min iŋaa. 18Gaa latta ka orooruwee pooɗi ƴila ga biriyyoo tiyaw kayni maa gu tan̰awɗo goosigeyyo. 19Gaa bittiɗiy ballee ku paysara ku kiɗa ta Kanaan. Gaa biriyyooca kiɗa taata oko gimtee ku Isirayel gi deeɗe tanco halaalanco. 20Maa gu gaari kooko paracco ƴiiliɗe, gu lekka latta ka miyaŋgee pooɗi o orooruwee beeƴa ƴila.
«Gaa min oko kaaka, ga Mella gagiyyoo oko kookuweetine taattuwee ma caɗaayo parlane namma ya oko wikinniti nabiinice Samiyel. 21Guu kookuweetine inniyya Mella ga gagiyyoo sultan. Gaa Mella gagiyyooga Sawul ma ay runti Kis, gaa deeɗe sultanco. Gata pa ay ka balti Benjamin, gaa hikimiyɗe orooruwee pooɗi ƴila.
22«Gaa min oko kaaka appe ga Mella poociyya Sawul. Gaa apiriyya Dawud ga deeɗe sultan gaddanti Sawul. Gaa Mella beneyyiɗe ma gaartee Dawud gaa: “Na gassiya gimu ma daanaw. Ay Dawud runti Zesee. Gata akkiya lee paratti maa na aŋka#13.22 Elloŋ Soom 89.12 o 1 Samiyel 13.14 o Esaya 44.28..” 23Min oko balti Dawud ga Mella n̰aamiyoo oko gimtee ku Isirayel, gimu maa gu kolaa goo Iisa ga asiɗiy najjiya. Ay goŋŋa appe ga beneyti Mellayi kee maa ga beneyyiyoo oko kookuweetine deeɗe. 24Maa ga Iisa alɗe asaa ɗa missa pa, ga Yaaya beneyyayo oko giimi ku Isirayel gaa gu meeliy gaarco ku miɗɗa guu batisiyɗiy. 25Gaa katta maa ga Yaaya gaamiyya lubbiti ka batisiyti, ga beneyyiɗe gaa: “Oko kantoŋ ka kuu na ay we? Naa ay gata ɗa maa ku ocokke. Innasoopa ku giyyoŋ samaane! Gata kaaka asaa taartu oko naa o ga tatta ƴiila min oko naa, na arakke ɗa kulla na settiyyeegu n̰uurtee#13.25 Elloŋ Yaaya 1.20,27..”
26«Seneeta! Kuŋ ma ay giimi ka balti Biraayim, o kuŋ ma ay Yawudigee ɗa kuu ɓayaɗɗo Mella, ay oko kee appe ga Mella n̰aamiyya beneyyi keeke ma ay ka najjiytine. 27Maa ga Iisa asiɗe aattine gu giimi ku Zerizalem ma taattuweeco ibinya ɗa kadar ga ay Najjaaya, o gu ibinya ɗa beneyco nabiinigeyyo maa gu garkayya kulla meene ta nambiti. Gaa maa gu nabiinigee soopa taase ma ka misilti Iisa maa gu caaɗiyyee parlane ma ka muuti asiɗe butulti. 28Giimi kotti pa gassiyee ɗa ya er̰n̰e ma arakke diyaw. Gaa ma kaaka aɗe gu inniyya guberner kee Pilat goo ga deyya. 29Gaa maa gu giimi ma taattuweeco leeɗiya latta paratti maa gi Kitamniti Mellayi beneyye ma gaartee Iisa, guu daare min jobookeetee beeriyya min kuruwayi, guu deeɗiya issa mooniti. 30Gaa Mella soopa naɗiyya min muuti. 31Gaa meeni maani ga okomɗiyo oko gittee ma iziya min kiɗa ta Galilee namma ya geegar ka Zerizalem. Haŋka pa ay guta appe ma ay suyuudigeetee unco giimo. 32Gaa nii kulla tasawɗitoŋca haŋka kabarre ta daana teete maa ga Mella beneyyiyoo min tippa oko kookuweetine gaa ga akkiyooca lee. 33Mella pa leene ga lattaati paratti oko kee ma ay ronco, maa ga naɗiyya Iisa min muuti aleŋ maa gi Soom beneyye oko suurane ta seera. Gita pa gee: “Kii ay runtu, o ga min meente na ay taccum#13.33 Elloŋ Soom 2.7..”
34«Mella pa beneyye gaa ga akkiya naɗa Iisa min muuti o ga ziiti akka ɗupa ɗa mooniti. Ay keeke appe maa ga beneyye gaa: “Na beraatoŋgu barkaŋgeetaw ku tirta maa na beneyye naa na akkeegu bira oko Dawud#13.34 Elloŋ Esaya 55.3..” 35Ay ɗakko appe ga Dawud beneyyiɗe kulla oko Mellayi were kaƴi Kitamne ta Soomnigeyyo gaa: “Ki oyaa ɗa ga gimu ma duwenta oko kii ɗupiɗo mooniti#13.35 Elloŋ Soom 16.10..” 36Dawud soopa oko wikinniti ga leyyiy gaari maa ga Mella aŋakke, gaa maatiɗe, guu saayiyya ma kookuweetee ku mattenta, gaa ɗupiɗe. 37Gata soopa maa ga Mella naɗiya min muuti, ɗupe ɗa mooniti. 38Seneeta, ibinoŋga keeke! Ay ma gata appe gi saamiyo ka zunubgeyyo deeɗitoŋ taasenta. Hukumnigeetee Muusa gederre ɗa gu pirittoŋ min zunubgeyyo ku deeɗe ɗayaŋ unti Mellayi. 39Giimi paracco ma akkiy duwa galbigeeco oko Iisa gasakka saamiyo ta zunubgeeco paracco gu deeɗo ɗayaŋ unti Mellayi. 40Kaaka pa, ku warroŋ maaƴi. Aɗoŋga pooca ɗa beneyyi keeke, ku maa gu beneyyiŋgeeco nabiinigeyyo maa gu beneyye alɗitoŋ asa ɗa. Guta pa beneyye goo:
41“Giyyoŋ, kuŋ ma dakkannaa Mella!
Ajjiboŋ asan ku akka batta!
Na leewaa latta ma kakaatoŋgu kayyeetoŋ
maa ku gewɗo missa,
o guu giimi beneyyatoŋ kulla,
ku amanna ɗa#13.41 Elloŋ Abakuuk 1.5.!”»
42Gaa maa ga Pol ma giiti Barnabas okomɗo min ger ka giraaniti ka Yawudigeyyo, guu giimi inniɗiy goo gu yookayo payya ma meene ta nambiti kaƴi gu asiyyo beneyya ma gaari kooko payya. 43Gaa maa gu giimi tacilɗe min timmico taata, guu Yawudigee maani o daare ma ribile gu deeɗe Yawudigee o gu aabaddaa Mella jobbiɗiy ini Pol ma giiti Barnabas. Guu guta pa beneyyiyyoo o gu wassiyyiy goo gu baamiya talta gidaanuwti Mellayi.
Pol beneyyayo oko giimi ma ay Yawudigee ɗa
44Gii ma meene ta nambiti ma asaa, gu giimi paracco ku geegar ka Antiyos ma aaye kiɗa ta Pisidi timmiɗe ku maa gu giyyiyya maa ga Pol ma giiti Barnabas beneyyayo ma beneyti Mella Miltine. 45Maa gu Yawudigee elliɗiy giimi ku maani kotti, guu leeɗiyo galbigee koo ku namta. Guu melewɗiki Pol o gu n̰elekkaa. 46Gaa Pol ma giiti Barnabas beneyyiyyoo ma gudirane goo: «Ay oko kuŋ ƴa omma ma ay Yawudigee ni tasaa beneyti Mellayi keeke. A maa ku poociyya soopa, ku gaare kadar ku arakke ɗa ku gassicca hayaatane ma gakamma ɗa ta kaw. Kaaka pa, ni kataa pe haŋka oko giimi ma ay Yawudigee ɗa. 47Keeke pa, ay maa ga Mella beneyyini gaa:
“Na leyyum aleŋ bahaarane oko ballee paracco
ku maa ki beneyyiyyoo oko giimi ku dunuuniti paracco
baŋ na najjayyay naa me#13.47 Elloŋ Esaya 49.6.!”»
48Maa gu giimi ma ay Yawudigee ɗa giyyiyya beneyyi keeke, gii deeɗiyo daanayo o gu diile gu logoɗɗiya Mella oko beneyti ka daana keeke. Guu giimi paracco maa ga Mella aparre gu gassiɗo hayaatane ma gakamma ɗa ta kaw duwɗiy galbigeeco oko Iisa. 49Gaa beneyti Mellayi ma gaartee Iisa tacilɗe kiɗa taata parattí. 50Guu Yawudigee issiyyooca oko daati ma ay ku karmiyenta o ma bakammiya ka Mellayi, o taattuwee ku geegar kaaka, ku maa gu leeɗiyo miɗɗa oko Pol ma giiti Barnabas. Guu pittiɗiy maaƴi min oko kiɗaaco. 51Gaa Pol ma giiti Barnabas pa kokkiyya buruntulle ka asinco#13.51 Kokko ta buruntulli pa garaa kadar ga gimu cimmica kayaati maaƴi min oko kiita, gaa Mella pe asiyyam caaɗa parlane suura., guu ƴiiliɗe pe kanco ta Ikoniyom. 52Guu giimi pa ma jobokkaa ka Iisa Masi koo ku Antiyos alɗo parhaŋgee o gu unenta ma Ruuhanti Mellayi.
Currently Selected:
Lubaakico N̰amaakeetee Iisa Masi 13: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.