Génesis 12
12
Ablamö nija Jeobaa a
wa̦ lä fano wei tä a̦
1Ö̦jö däjä, Ablamö nija Jeobaa a wa̦ falayoma.
—Bei. Afä wa tä ulifi tabi fa feicänö, afä wa bä ca̦i fa dacönö, faafänö bä ca̦i lä bälöono wei wa bä ca̦i bluca fa dacönö, a da alufälö. Cafä nija ya tä ulifi nia lä jömöaö wei jamö, wa waloobä. 2Cafä bäfä fa balamalönö, wamacö bälöo fa lojodoonö, wamacö bälöo nia yaio. Bäfä nia bayelibou. Cafä wa wa̦fa nia yai ji̦limou blaucou lä cuaaö wei, bäfä nia tablamaö. Cafä inaja bäfä bayeliblaö cuo ja, cafä nija ai bä nia bayeliblamou mö feduo.
3’Cafä wa lä bayeliblaö wejei bä lä cui, inaja showawä, cama bä ma cui, ya bä nia bayeliblaö cuo mö feduo. Wa nö lä bleaamaö wejei bä lä cui, inaja showawä, cama bä ma cui, ya bä nö nia bleaamaö cuo mö feduo. Cafä bäfä bayelibou fa balöonö, bluca bä bälöjöwä lä yaiblai, afä a nodiwä nija, bä nia bayeliblamou nomöjöo —Jeobaa a cuma.
4Ö̦jö cudeenö, Jeobaa nija Ablamö a fa yömölamolunö, a alayoma. Lodo a ca̦i yaua showalayofälöma, Ablamö a lä ijilumono wei.
Ablamönö lasha 75 a faa fa waiquimalönö, Alana tä ulifi jamö a culanö, a jocälayoma. 5Bei suwäbö Salai a nocamaboma, Lodo a ca̦i, cama a mashi nija a Lodo cuo lä juono wei. Cama bä madofibö bluca lä cuono wei bä ma cui, cama bä nija bä yanowamö bluca lä yädäblaliyono wei bä ma cui, Ablamönö ö̦jö bä bluca ca̦i ayofälöma. Canaana tä ulifi jamö bä waloobä, bä aa showalayofälöma.
Ö̦jö lä tä ulifi nabä fa waloalöjenö, 6bä jayublaliyoma. Siquemöteli bä bälöo lä ajedeono wei jamö bä waloquema, Mole tä a̦fa ulifi lä jilabono wejei jamö.
Ö̦jamö, Canaanateli bä bluca bälöjömou showaoma. Täbä nö bayeli nacaobä, showadi täbä lä yododoblaano wei defi bada lä ublaono wei jamö, Ablamönö cama ebä ca̦i waloquema. 7Ö̦jamö lä Ablamö nija Jeobaa a fa damolalunö, a wa̦ fama.
—Cafä nija bä nia lä nodiblou wei bä lä cui nija, ei ya tä ulifi nia jöböaö —a nowa tama.
Cama nija Jeobaa a damolaliyoma cudeenö, ö̦jamö lä showawä, bä yalo maqueblamobä täcö i̦taquema, Jeobaa nija bä yalo dodobobä.
8Ö̦jamö lä bä shu̦lucua fa co̦lufälönö, bä aa co̦layofälöma. Bä jocäadalou cuaaö fa co̦lufälönö, tä ulifi lä jefubö wei jamö bä waloa nomöjöquema. Bedeleteli, Ayeteli bä lä bälöono wei jamö bä möamolayofälöma.
Motoca a faö lä cuaaimaö wei jamö, Ayeteli bä jilaoma. Tä mö weyaö lä cuaaö wei jamö, Bedeleteli bä jilao mö feduoma. Ö̦jamö a culanö, Ablamönö maa mabä yododamaö fa co̦onö, Jeobaa nija bei a nö bayeli nacaoma. 9Ö̦jö däjä, Ablamönö cama ebä ca̦i shu̦lucua fa co̦lonö, bä ca̦i aa co̦layofälöma. Neque tä ulifi lä cule jamö, bä jocäadalou culayofälöma.
Ejido tä ulifi jamö cäcöbö
lä nowamano wei tä a̦
10Ö̦jamö lä Ablamönö cama ebä ca̦i fa bälöalunö, ofi a cublaliyoma. Tä nö ulifi ofio fe fa balojoonö, Ejido jamö cama ebä ca̦i bälöblaobä, bä ca̦i dömöbaliyofälöma.
11Ejido jamö a nia fa co̦blonö, a ajedobä ja, bei suwäbö Salai a yömölama.
—Bei. Ejidoteli bänö wa nia liyäjäwä dablaöje. Wa malä liyäjei. 12Bäfä ca̦i waloo däjä, wa fa dalalöjenö, wa nia däaöje. “Ö̦jö lä bei fe̦yalobö e”, wale nofi fa tadalöjenö, wale nia shäöje. Cafä wa nia fa tabojenö, wale nabä nia queoje. 13¿Ö̦jö tawä? Camiyä nija wa jole jole a̦imobä. Cafä wa wa̦nö, demi ya cuobä. Cafä wa wa̦ ja, wale shäö mlaobeje —Ablamö a cuma.
14Ejidoteli bä nija, Ablamönö cama ebä ca̦i lä waloqueno wei däjä, Salai a liyäjäwä fe balojowä dalalemaje. 15Ejidoteli bada bänö, a liyäjäwä fa dalalöjenö, bä ca̦i lä cuono wei a bada nija, a wa̦fa wäyämaje. Ö̦jönö a wa̦fa liyäjäwä fa ji̦lilänö, a öböamaö bufima. Cama e yafi jamö a bälaquemaje.
16Ö̦jö a bada lä cuinö, Salai a nowa ja, Ablamö dodijidawä a bälömaboma. Yalo ji̦ima bluca bä ja, a dobälema. Oweja cäbä ma cui ja, baca cäbä ma cui ja, bulo cäbä ma cui ja, cameyo cäbä bada ma cui ja, Ablamö a dobäa dodijilema. Yanowamö täbä ma cui, ö̦jö bä jöböa mö feduquema. Wa̦lo bä ma cui, suwä bä ma cui, Ablamö a nosie juamobä, ebä jöböa cadidiquema.
17Inaja a ma cuaano wei ma cui, Jeobaa a isholayoma. Shawala a wayu nö lä quilijii anö, Ejidoteli bada a nö blemalalema. Ablamö bei suwäbö e nowa ja, bä ca̦i lä cuono wei bä nö bluca bleaamaö fe balojooma. 18Bada a nö bleaama yalo, Ablamö a nacalema.
—¿Wedi tä tabä, camiyä wale nö li bleaamaö bufio dicooma? ¿Wedi tä tabä, “Iba a li suwä”, wa cuu showadao mlai, wale li mojodumabou dicooma? 19“Yaiyä a”, wa jole cuu fa dicoonö, camiyä nija bei wa li däa dicomalema. ¿Ö̦jö tawä? Bei. Suwäböfä wa fa co̦länö, a ca̦i co̦a showadaa da co̦lu —a cuma.
20Ö̦jö däjä, cama ebä fa nosiemanö, bä fa lululäfälöjenö, bä bälamaje. Ablamö a ma cui, bei suwäbö e ma cui, bä bluca lä däleno wei bä ma cui, bä bluca bälaa co̦a showadaquemaje.
Currently Selected:
Génesis 12: GUU
Označeno
Share
Copy
Want to have your highlights saved across all your devices? Sign up or sign in
©2012, All Rights Reserved