Génesis 11
11
Bluca täbä caficö a̦
lä yaiblamono wei tä a̦
1Jaba däjä, täbä jödödöwä lä bälöjono wei täbä lä cui, moli caficö a̦ showawä ja, täbä a̦ faö balöoma. Ai täbä a̦ shomionomi. 2Tä mö weyaö lä cuaaö wei jamö, yanowamö täbä jocäa fa culunö, Sinala tä ulifi jamö bä waloquema. Tä lä yalöi tä fa dalalöjenö, bä bälöa yanöcödaliyoma.
3Bä fa yanöcöblalunö, bä a̦ wayolayoma.
—Bei. Mashita bäma bä da ta, bämacö yafimobä. Cowa wacö ja, bäma bä fa jifumalönö, cofibö bä cublobä —bä nowa tayoma.
Inaja bä fa cuaanö, maa mabä mlai ja, mashita bä li jifuwä shömomamaje. Maa anö bä jou mlaobä, bä lä sudimaö wejei toubä ca̦i bluca ajedemabou yädäo showaomaje.
4Abinaja bä cuu nomöjöoma.
—Bei. Eja bämacö bälödiobä, yafi bluca bäma bä da ta. Yafi ösöwä dodijiwä bäma a ca̦i i̦tamaö showadaobä. Judu mösö jamö, a yafi ola fe wädöodayobä. Bämacö nö wa̦lojoablalou dodijio ja, bämacö a̦fa wayoamou blaucobä. Jödödöwä tä ulifi jamö, bämacö shelelou dicoo mlaobä —bä cuma.
5Bä lä yafimono wei jamö, Jeobaanö bä yafibö möbä a itolayoma. Yafi ösöwä a ca̦i nia fa möönö, yanowamö täbä nija a waloqueyoluma. 6Tä fa dalalöfälönö, abinaja Jeobaa a cuu co̦joloma.
—¿Ö̦jö tawä? Moli bä li cudeenö, moli caficö a̦ ja bä a̦ li wayomayou cudeenö, bä jäomi waiquiwä. Bä a̦ fa ji̦liayonö, cama bä cuaaö bufi lä doblao wei tä ja, bä nö nia ca̦i wa̦lojaö fe yadio. 7Bei. Bämacö itou da co̦fälö. Bäma bä caficö a̦ fa shomiblamalönö, bä a̦ ji̦liayou mladobä —Jeobaa a cuma.
8¿Ö̦jö tawä? Jeobaa a lä cuinö, inaja showawä bä caficö a̦ fa tablamalönö, yafi bluca bä nia ma i̦tamano wejei ma cui, bä waiquidou showalayoma. Ö̦jamö culanö bä fa shedequeblalunö, jödödöwä tä ulifi jamö bä bälöjöolaliyoma. 9Ö̦jamö lä Jeobaanö jödödöwä bä lä bälöono wei, bä caficö a̦ bluca shomiblamalema yalo, Babele tä ulifi a̦fa jilaa showadaquemaje. Ö̦jamö culanö, Jeobaanö bä bluca shedequeamabodayoma.
Semö nija, bä bluca yanöcö wawäö lä nodiano wei tä a̦
10Semö bei ijilubö ebä nija, bä bluca cublou lä nodiablalono wei, ei bei tä a̦ li nomöjöwä.
Semönö lasha 100 a fa famalönö, bei ijilubö Afasada a wawäa nomöjömalema. Canawä ajamö bä faa lä co̦maleno wei däjä, lasha bolacabö a mladou waiquilayono wei ja, Afasada bei a oshe wawälayoma. 11Ö̦jö a fa cublalunö, bä fö̦ö e bälöo nö dedeaö showaoma. Lasha 500 a faa co̦malema. Bei ijilubö ai ebä cublaliyoma, bä tää ebä ca̦i.
12Afasadanö lasha 35 a fa famalönö, bei ijilubö Sala a wawäa nomöjömalema. 13Sala a oshe fa cublalunö, bä fö̦ö e bälöo nö dedeaö showaoma. Lasha 403 a faa co̦malema. Bei ijilubö ai ebä cublaliyoma, bä tää ebä ca̦i.
14Salanö lasha 30 bä fa famalönö, cama bei ijilubö Ebelo a wawäa nomöjömalema. 15Ebelo a oshe fa cublalunö, bä fö̦ö e bälöo nö dedeaö showaoma. Lasha 403 a faa co̦malema. Bei ijilubö ai ebä cublaliyoma, bä tää ebä ca̦i.
16Ebelonö lasha 34 a fa famalönö, cama bei ijilubö Beleque a wawäa nomöjömalema. 17Beleque a oshe fa cublalunö, bä fö̦ö e bälöo nö dedeaö showaoma. Lasha 430 a faa co̦malema. Bei ijilubö ai ebä cublaliyoma, bä tää ebä ca̦i.
18Belequenö lasha 30 a fa famalönö, bei ijilubö Leu a wawäa nomöjömalema. 19Leu a oshe fa cublalunö, bä fö̦ö e bälöo nö dedeaö showaoma. Lasha 209 a faa co̦malema. Bei ijilubö ai ebä cublaliyoma, bä tää ebä ca̦i.
20Leunö lasha 32 a fa famalönö, bei ijilubö Selucu a wawäa nomöjömalema. 21Selucu a oshe fa cublalunö, bä fö̦ö e bälöo nö dedeaö showaoma. Lasha 207 a faa co̦malema. Bei ijilubö ai ebä cublaliyoma, bä tää ebä ca̦i.
22Selucunö lasha 30 a fa famalönö, bei ijilubö Nacolo a wawäa nomöjömalema. 23Nacolo a oshe fa cublalunö, bä fö̦ö e bälöo nö dedeaö showaoma. Lasha 200 a faa co̦malema. Bei ijilubö ai ebä cublaliyoma, bä tää ebä ca̦i.
24Nacolonö lasha 29 a fa famalönö, bei ijilubö Dalei a wawäa nomöjömalema. 25Dalei a oshe fa cublalunö, bä fö̦ö e bälöo nö dedeaö showaoma. Lasha 119 a faa co̦malema. Bei ijilubö ai ebä cublaliyoma, bä tää ebä ca̦i.
26Daleinö lasha 70 a fa famalönö, bei ijilubö 3 ebä wawäa nomöjömalema. Ö̦jö 3 ebä lä cui, Ablamö, Nacolo, Alana ebä a̦fa cuoma.
Dalei nodiwä ebä bluca
lä cuono wei tä a̦
27-29Dalei bei ijilubö ebä nija, bä bluca wawäö lä nodiablalono wei, ei bei tä a̦ nomöjöwä. Dalei nija, bei ijilubö Ablamö, Nacolo, Alana ebä cublou fa nodiblalunö, Alana a lä cuinö, bei ijilubö Lodo a wawäa nomöjömalema. Ö̦jö bä tää bolacabö ecöbö ca̦i cuoma. Bä tää ai e lä cui, Micla e a̦fa cuoma. Ai e mö feduwä lä cui, Isica e a̦fa li cuo mö feduoma. Alana bä fö̦ö e cuo ma showao däjä ma cui, cama a nomaa balöblaliyoma. Ulu tä ulifi ja, cama a oshe lä cublaliyono wei tä ulifi showawä ja, a bufi mlaquema, cadeo bä lä bälöono wei jamö.
Nacolo a lä cuinö, bei suwäbö Micla a dälema. Ablamö a lä cuinö, bei suwäbö Salai a däa mö fedulema. 30Ö̦jö Salai a lä cui, a ijilubö cublonomi. Moli e ma cui, e ca̦i cuonomi bädawä.
31Ulu tä ulifi jamö, cadeo bä lä bälöono wei jamö culanö, Daleinö cama ebä ca̦i jocälayofälöma. Bei ijilubö Ablamö e nocamaboma, Ablamö bei suwäbö Salai e ca̦i. Bei fääshä Lodo e ca̦i, Alana bei ijilubö e lä feiblaliyono wei. Canaana tä ulifi jamö bä bälöo nomöjöobä, bä ma jocälayono ma cui, Alana tä ulifi jamö bä fa waloicunö, ö̦jamö bä yanöcöquema.
32Dalei a demi bälöo showao däjä, lasha 205 a fa famalönö, Alana tä ulifi showawä ja, a bufi mlaquema.
Currently Selected:
Génesis 11: GUU
Označeno
Share
Copy
Want to have your highlights saved across all your devices? Sign up or sign in
©2012, All Rights Reserved