लूका 24
24
यीशु मुरदै थऊँ जी भुआ
(मत्ती 28:1-10; मरकुस 16:1-8; यूहन्ना 20:1-10)
1हप्तै रै पैहलै दिन जनानी भ्यागा ही छैळ जिनी मुसका बाळी चिजा जो जैड़ी तियैं तैयार करूरी थी, लेई करी यीशु री कब्रा पुर आई। 2तियैं हेरू कि कब्रा रा पत्थर ता कब्रा पुर हाई नियां। 3तियैं कब्रा अन्दर गिचीकरी हेरू ता यीशु री लाहश भी ना थी। 4जैहणैं सो ऐसा गल्ला हेरी करी हैरान भुच्छु करदी थी, ता दोई मणु चमकीलै कपड़ै लऊरै तियां बल्लै ईच्ची खड़ियै। 5सो डरी गैई अतै धरती री कनारी मुँह करीके खड़ी रैई। ता तियैं मणुऐ तियां जनानी सितै बल्लू, “तुसै जिन्दै यीशु जो मरुरै मन्ज कजो तोपू करदी हिन?#प्रका. 1:18; मर. 16:5-6. 6सो ऐठी नियां पर सो ता जी उठुरा। याद करा तिनी गलील मन्ज रैहन्दै तूसु जो कै बल्लुरा थू। 7‘ऐह जरूरी हा कि, मणु रा पुत्र पापी मणु रै हथै पकड़ाया गच्छा, अतै क्रूस पर मारेआ गच्छा, अतै त्रियै दिन मरूरै थऊँ जी उठा।’” 8ता यीशु री गल्ला तियां जो याद आई।
9जनानी फिरी आई अतै, तियैं यीशु रै ग्यारह चेलै जो, अतै होरी मणु जो भी ऐह सब गल्ला हुणाई। 10जियें जे यीशु रै प्रेरिता सितै ऐह सब गल्ला हुणाई तियां सोगी मरियम मगदलीनी, योअन्ना, अतै याकूब री माता मरियम अतै होर भी मती जनानी थी। 11पर तिआंरी गल्ला खास चेलै जो अतै होरी मणु जो झूठी लगी, अतै तियैं ईयां जनानी रा विस्वास ना करू। 12ता पतरस ऊठु अतै कब्र री कनारी खिट लाई दिती। कब्रा पुर गिचीकरी तिनी कफणा री कनारी हेरू अतै जे कुछ भच्छुरा थू, तैत पुर हैरान भूच्ची करी अपणै घरा जो फिरी आ।
इम्माऊस रै रस्तै मन्ज दूँ चेलै जो दर्शन
(मरकुस 16:12,13)
13तैस दिन यीशु रै दोई चेलै इम्माऊस नां रै अक्की ग्राँ जो चलुरै थियै। ऐह ग्राँ यरूशलेम थऊँ कोई सत मील दूर थू। 14सो यीशु रै बारै मन्ज अप्पू माँ कणैदैं चलुरै थियै। 15जैहणै सो अप्पू मन्ज गल-बात करदै, सोच-विचार करदै चलुरै थियै ता तैहणै ही यीशु तियां बलै आ अतै तियां सोगी-सोगी चलना लगू। 16पर तियां चेलै री हाख्री मन्ज ऐसा पढ़दा पेऊरा थू कि सो यीशु जो पछैणी ना सकै।
17यीशुऐ तियां थऊँ पूच्छु, “तुसै चलदै-चलदै कस घटना रै बारै मन्ज गप्प करू करदै हिन?”
18जैहणै तियैं ऐह हुणु ता सो उदास भूच्ची करी खड़ी गै। तियां दूँ मन्ज अक्क क्लियुपास नां रा मणु थू तिनी बल्लू, “कै तू यरूशलेम मन्ज अक्क ऐसा परदेसी हा कि जैसियो ऐह ना पता कि ईयां दिना मन्ज यरूशलेम मन्ज कै घटना घटिआ?”
19यीशुऐ पूच्छु, “कजो कै भुआ? किनी घटना, अऊँ ना जाणदा?” तियैं बल्लू, “कै तू यीशु नासरी रै बारै मन्ज ना जाणदा सो प्रमात्मैं अतै सबी मणु री नजरा मन्ज कमां अतै बचना मन्ज ताकतवर भविष्यवक्ता थू। 20इन्दै प्रधान याजक अतै इन्दै सरदारै तैसिओ पकड़वाई दिता ताकि तैसिओ मौती रा हूक्म दितआ गच्छा अतै सो क्रूस पुर चढाया गच्छा। 21पर असिओ ऐसा गल्ला री उम्मीद थी कि, ऐस ही इस्त्राएल जो रोमी राज्य थऊँ छुटकारा दिणा अतै ऐसा गल्ला जो भच्छुरै अज त्राई दिन भुएै हिन। 22असु सोगी कुछ जनानी भी थी जियें असिओ भी चक्करा मन्ज पाई दितुरा, जैड़ी भ्यागा हि यीशु री कब्रा पुर गच्छुरी थी। 23पर तियां जो कब्रा मन्ज यीशु री लाहश ना हुजुरीआ। अतै तियैं फिरी करी असु सितै बल्लू कि अहै स्वर्गदूता रा दर्शन हेरूआ अतै स्वर्गदूतै बल्लूआ कि यीशु जिन्दा भूच्ची गच्छुरा। 24ता फिरी इन्दै कुछ साथी कब्रा पुर गिचीकरी हेरू कि जनानी सच कणैऊ करदी हिन।”
25ता यीशुऐ तियां दूँ चेलै सितै बल्लू, “ओ बुदुओ! तुसै भविष्यवक्ता री गल्ला पुर विस्वास करनै तांई कतूणैं नासमझ हिन! 26कै ऐह जरूरी ना थू कि मसीह ऐह दुख चुक्कदा अतै तां फिरी अपणी महिमा मन्ज दाखल भुन्दा?” 27ता फिरी यीशुऐ अपणै बारै मन्ज मूसै थऊँ शुरू करीके सबी भविष्यवक्ता अतै सब पवित्रग्रन्थ मन्ज लिखुरी गल्ला रा अर्थ तियां जो समझाई दिता।#यूह. 1:45; लूका 24:44; व्य. 18:15.
28गल्ला करदै-करदै सो तैस ग्राँ रै नेड़ै पुजी गै जैठिओ सो चलुरै थियै। पर तियां मणु जो ईयां लगु कि यीशु अगलै ग्राँ जो चलूरा हा। 29पर तियैं तैसिओ बल्लू कि सन्ज लगुरीआ भूणा अतै दिन भी घरही गच्छुरा ता अज असु सोगी ही रेआ, ता यीशु मन्नी गो अतै तियां सोगी रैहणा अन्दरा जो चली गो।
30जैहणै यीशु तियां सोगी खाण-खाणा बैहु ता यीशुऐ रोटी लेई करी प्रमात्मैं रा धन्यवाद करू, अतै रोटी तियां जो दिणा लगू। 31ता चेलै री हाख्री खुली गई, अतै तियैं यीशु पछैणी पैऊ पर यीशु तिंआरी हाख्री थऊँ छिप्पी गो। 32अतै सो चेलै अप्पू मन्ज बलणा लगै, “जैहणै जे यीशु बत्ता मन्ज असु सितै गल्ला करू करदा थू, अतै पवित्रग्रन्था रा मतलब समझाऊ करदा थू, ता इन्दै मन उत्साह अतै उम्मीद सोगी भरू करदै थियै।”
33सो तैस ही टैमैं उूठी भुएै अतै यरूशलेम जो चली गै। तैठी तियैं ग्यारह चेलै जो अतै तंयारै साथिओ सोगी हेरू। 34सो अप्पू मन्ज गल्ला करू करदै थियै कि “यीशु जी भच्छुरा, अतै पतरस जो हुजुरा।” 35ता तियैं दूनी बत्ता मन्ज यीशु सितै भच्छुरी गल्ला तियां चेलै जो हुणाई। तियैं ऐह भी दसु कि रोटी तोड़दै अहै यीशु जो कियां पछैणु।
होर चेलै जो यीशु रै दर्शन
(मत्ती 28:16-20; मरकुस 16:14-18; यूहन्ना 20:19-23; चेलै रै कम 1:6-8)
36चेलै ईयां गल्ला री चर्चा करू ही करदै थियै कि यीशु तियां मन्झै ईच्ची खडू अतै यीशुऐ बल्लू, “तूसु जो शान्ती मुळा!”
37पर सो चकराई गै अतै डरना लगै। तियैं समझू कि सो ता कसी भूता-परेता जो हेरू करदै हिन। 38यीशुऐ तियां जो बल्लू “तुसै कजो डरू करदै हिन? तून्दै मनां मन्ज शक कजो भूच्छु करदा? 39मेरै हथा पैरा हेरा अऊँ सो ही यीशु हा। मिंजो हत्थ लाई करी हेरा, आत्मा री हड्डी-मांस ना भुन्दा जियां कि तुसै मिन्जो मन्ज हेरू करदै हिन।”
40ऐह बली करी यीशुऐ तियां जो अपणै हत्थ पैर दसै। 41पर अपणी खुशी री वजह थऊँ सो ऐसा गल्ला पुर हल्ली तिकर भी विस्वास ना करी पाऐ। सो हैरान थियै, ता यीशुऐ तियां जो बल्लू, “कै तूसु बलै कुछ खाणै जो हा?” 42चेलै यीशु जो भुज्जुरी मच्छी रा टुकड़ा दिता। 43यीशुऐ सो भुज्जुरी मच्छी लेई अतै तियां चेलै रै सामणै खाई।
44फिरी यीशुऐ तियां सितै बल्लू, “ऐह सो गल्ला हिन जैड़ी कि मैंई तूसु सितै तैहणै बल्ली थी, जैहणै अऊँ तूसु सोगी थू। सो सारी गल्ला जैड़ी कि मेरै बारै मन्ज मूसै री व्यवस्था मन्ज भविष्यवक्ता अतै भजनां री कताबा मन्ज लिखुरी सो पूरी भून।”
45ता यीशुऐ पवित्रग्रन्था जो समझणै तांई तिआंरी अक्ल खोली दिती। 46अतै बल्लू, “पवित्र शास्त्रा मन्ज ईयां लिखुरा कि मसीह दुख झेलना अतै मरनै थऊँ बाद त्रिऐ दिन जी भूणा।#यशा. 53:5; लूका 24:7. 47अतै यरुशलेम थऊँ लेई करी सारै देशा मन्ज पापा थऊँ मन फेरनै अतै पापा री माफी रा संदेश रा सुसमाचार तसेरै ही नां लेई करी हुणाया गाहणा। 48तुसै सब ईयां गल्ला रै गवाह हिन। 49हेरा, जैसा गल्ला री सौगन्द मेरै पितै खऊरीआ, अऊँ तैतिओ तूसु जो दिन्दा। तुसै तैहणै तिकर ऐस नगरा थऊँ मत गान्दै जैहणै तिकर कि तुसै स्वर्गा थऊँ सामर्थ सितै ना भरी गाहन।”
यीशु स्वर्गा जो चुक्की लैऊ
(मरकुस 16:19,20; चेलै रै कम 1:9-11)
50फिरी यीशु चेलै जो बैतनिय्याह ग्राँ तक लेई गो अतै अपणा हत्थ चुकी करी तियां जो अशीर्वाद दिता। 51यीशु अशीर्वाद दिन्दा-दिन्दा ही तियां थऊँ दूर भुच्ची गो अतै स्वर्गा जो चुक्की लैऊ।#चेलै. 1:9; भज. 47:5. 52ता चेलै यीशु रा स्तुतिगान करदै अतै खुशी-खुशी यरूशलेम जो फिरी आये; 53अतै सो रोजा रा रोज मन्दरा मन्ज गिचीकरी प्रमात्मैं री भक्ति करदै रैह।
Currently Selected:
लूका 24: GBKNT
Označeno
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.