लूका 23
23
पिलातुस रै सामणै यीशु
(मत्ती 27:1,2,11-14; मरकुस 15:1-5; यूहन्ना 18:28-38)
1ता धर्म सभा रै सब सदस्य उठै अतै यीशु जो पिलातुस बल्लै लेई आये 2तैठी ईच्ची करी सो यीशु पुर ऐह दोष लाणा लगै कि, “ऐह यीशु मणु जो भकान्दा अतै ऐह महाराजा जो चुंगी दिणै जो ना करदा अतै अपणै आपा जो मसीहा बल्दा।”
3पिलातुस राजै यीशु थऊँ पूछु, “कै तू यहूदी रा राजा हा?” यीशुऐ जवाव दिता, “हाँ जियां कि तू अप्पू ही बल्लू करदा।”
4ता पिलातुसै प्रधान याजका अतै मणु जो बल्लू, “मिन्जो ता ऐस मणु मन्ज कोई दोष नजर ना ईन्दा।”
5पर सो होर भी जोरा सितै बलणा लगै, “ईनी सारै यहूदी इलाकै मन्ज मणु जो अपणै बचना सितै भड़काई दितुरा। ईनी गलील परदेसा थऊँ शुरू करूरा थू अतै हेरा अबै ऐह ऐठी भी ईच्ची पुज्जु हा।”
6ऐह हुणी करी पिलातुसै पूछु, “कै ऐह मणु गलीली हा?” 7पर जैहणै तैस जो पता लगु कि ऐह ता हेरोदेस रै परदेस रा हा ता तिनी यीशु जो यरूशलेम जो भैजी दिता क्ओकि हेरोदेस तैस टैमैं यरुशलेम मन्ज थू।
राजा हेरोदेस रै सामणै यीशु
8राजा हेरोदेस यीशु जो हेरी करी बड़ा खुश भुआ, कओकि सो कईआ दिन थऊँ चाऊ करदा थू कि सो यीशु जो हेरा, तिनी यीशु रै बारै मन्ज हुणुरा थू अतै सो यीशु थऊँ कुछ हैरान करनै बाळै चमत्कार हेरनै री उम्मीद रखदा थू। 9तिनी यीशु थऊँ कैई गल्ला पुछी, पर यीशुऐ कोई उतर ना दिता। 10प्रधान याजक अतै शास्त्री तैठी खड़िऊरै थियै अतै सो यीशु पुर जैतूणै करी दोष लगाई सकदै थियै, लगाऊ करदै थियै। 11फिरी हेरोदेसै अतै तसेरै सपाई यीशु री बेईज्ती करी अतै मजाक उड़ाऊ। हेरोदेसै यीशु जो राजै बाळै कपड़ै लोआई करी बेईज्जती करी अतै फिरी पिलातुस बलै फेरी भैजू। 12ऐस ही दिन पिलातुस अतै हेरोदेस अपणी दुश्मणी जो छड़ी करी अक्की दुऐ रै सजण बणी गै।
यीशु जो मृत्युदण्ड
(मत्ती 27:15-26; मरकुस 15:6-15; यूहन्ना 18:39-19:16)
13पिलातुसै प्रधान याजका, अफसरा अतै मणु जो हैदी करी तियां सितै बल्लू 14“तुसै ऐस मणु पुर मुकदमैं तांई दोष लगाई करी मिन्जो बलै लेई आये हिन कि ऐह मणु जनता जो लड़ाई झगड़ै तांऐ भकान्दा। हेरा मैंई तून्दै सामणै सेरी जाँच पड़ताल करी हा, पर जैड़ै मुकदमैं तांई दोष तुसै ऐस पुर लऊ करदै हिन, सो दोष ता मिन्जो ऐस मन्ज कुछ ना हुज्जु हा। 15हेरोदेस जो भी कोई गुनाह ना हुज्जु हा कजो कि तिनी भी सेरी हुणी करी ऐस जो मिन्जो बल्लै वापस भैजी दिता। हेरा ईनी कुछ भी ईना कम निआं करूरा जैस व्जहा थऊँ ऐस जो मौती री सजा दितिआ गच्छा। 16ऐत तांई मुँ ऐस जो कोड़ै मरवाणै अतै छड़ी दिणा।” 17[रीति रै मुताबक सो फसह रै त्यौहारा रै टैमैं तियां तांई अक्क कैदी कैदा थऊँ छड़ी दिन्दा थू।]#23:17 कुछ हस्तलेख मन्ज ऐह आयत लिखुरी निय्आ।
18ता सब बक्की उठै, “ऐस जो मारी देआ अतै असु तांई बरअब्बा जो छड़ी देआ।”
19बरअब्बा कसी लड़ाई-झगड़ै री व्जहा थऊँ जैडा कि शहरा मन्ज भच्छुरा थू अतै कसी कत्ला रै केस मन्ज कैद कट्टू करदा थू।
20पिलातुसै यीशु जो छड़णै री मनसा सितै मणु जो फिरी समझऊ। 21पर तियैं जोरा-जोरा सितै डडी करी बल्लू, “ऐस जो क्रूसा पुर टुन्गी देआ, ऐस जो क्रूसा पुर टुन्गी देआ।”
22तिनी तियां थऊँ त्रीं बारी पूछु, “कजो, ईनी कुण जिन्ना गुनाह करूरा? मैंई ऐस मन्ज मौती री सजा बाळा कोई भी गुनाह ना हेरूआ ऐत तांई मुँ ऐस जो कोड़ै मरवाई करी छड़ी दिणा।”
23पर मणुऐ बड़ी हलो-हलि पाई अतै सो तसेरी पिचो पैई गै कि “ऐस जो क्रूसा पुर टुन्गी देआ” इन्नी साभै तंयारा हल्ला पाणा होर बधी गो। 24पिलातुसै सपाई जो हूक्म दिता कि जियां मणु चाहन्दै हिन तियां ही कम्मा। 25ता तिनी तैस मणु जो तियां मणु री इच्छा रै मुताबक जैडा कि लड़ाई-झगड़ै अतै कत्ला रै केस मन्ज सजा कट्टू करदा थू, छड़ी दिता अतै यीशु जो तिआंरी इच्छा री मुताबक क्रूसा पुर टुंगणै तांई सपाई जो दी दिता।
यीशु जो क्रूस पुर चढ़ाणा
(मत्ती 27:32-44; मरकुस 15:21-32; यूहन्ना 19:17-27)
26जैहणै सपाई यीशु जो लेई चलुरै थियै ता चलदै चलदै तियां जो रस्तै मन्ज कुरैनी नगर रा अक्क मणु मुळु जैसेरा नां शिमौन थू, तियैं तैसिओ पकड़ी करी क्रूस तैस पुर लदी दिता अतै सो यीशु पिचो चली पैऊ।
27मणु री बड़ी भारी भीड़ यीशु रै पिचो चलुरी थी। ऐसा भिड़ा मन्ज मती भारी जनानी रून्दी पिटिन्दी चलुरी थी 28यीशु तंयारी कनारी फिरी करी बलणा लगा, “ओ यरुशलेम री कुळियों मिन्जो तांई मत रोआ, पर अप्पू तांई अतै अपणै बच्चै तांई रोआ। 29हेरा, सो दिन ईच्छु करदै हिन, जैहणै मणु बलणा, धन्य हिन सो बे औलादी जनानी! धन हा सो पेट जिन्नी बच्चै पैदा ना करै! धन्य हा सो छाती जठेरा दुध बच्चै ना पियू।”
30तैस टैमैं मणु पहाड़ा सितै बलणा,
“असु पुर ढैई पेआ, अतै
हपड़ा सितै बलणा कि असु जो ढक्की लेआ।”
31“कजो कि जैहणै मणु सैलै रूखा सितै तूणा बुरा करी सकदै हिन ता हुक्कै रूखा सितै कतूणा बुरा करलै।”
32सपाई दूँ होरी अपराधी जो यीशु सोगी क्रूसा पुर मारनै तांई लेई गै।
33जैहणै सो खोपड़ी नां री जगहा पुजै ता तियैं यीशु अतै तियां दूँ अपराधी जो क्रूसा पुर टुन्गी दिता। अक्क अपराधी सज्जै कनारी टुन्गू अतै दुआ खब्बै कनारी टुन्गू। 34ता यीशुऐ बल्लू, “हे पिता, ईयां जो माफ करै, कजो कि ऐह ना जाणदै कि ऐह कै करू करदै हिन?” तियैं कपड़ै तांयें चिट्ठी पाई की कसिओ कै कै मुळदा, अतै अप्पू मन्ज बन्डी लै।
35मणु अक्क नजर करीके ऐह सब हेरू करदै थियै। यहूदी रै सभागार रै अफसर यीशु रा मजाक ऊड़ारी करी बल्लू करदै थियै, “ऐह ता दुऐ जो बचान्दा थू अबै जे ऐह प्रमात्मां रा मसीहा हा अतै तसेरा चुणुरा हा ता अपणै आपा जो बचाई करी दसा।” 36सपाई भी यीशु रै नेड़ै आये अतै तसेरा मजाक उड़ाणा लगै। तियैं यीशु जो सिरका पिआऊ, अतै बलणा लगै, 37“जे तू यहूदी रा राजा हा ता अपणै आपा जो बचा।” 38यीशु रै क्रूसा पुर अक्की तख्ती पुर लिखीकरी लगाई दिता कि, “ऐह यहूदी रा राजा हा।”
अपणै पापा थऊँ मना फेराणै बाळा अपराधी
39जैड़ै दुई अपराधी सोगी क्रूसा पुर लटकऊरै थियै, तैत मन्ज अक्क यीशु री निन्दा करीके बलणा लगा, “कै तू मसीहा निआं? जे तू हा ता अप्पू जो अतै असु जो भी बचा।” 40पर दुआ तैस जो फटकारी करी बलणा लगा, “कै तू प्रमात्मैं थऊँ भी ना डरदा? तू भी मरनै बाळा। 41असु जो ता कानून रै मुताबक सजा मुळु करदी हा। कजो कि अहै ता कम ही इन्ना करूरा, पर इन्नी ता कोई ऐसी सजा बाळा कम नियां करूरा।”
42ता फिरी सो यीशु सितै बलणा लगा, “यीशु जी जैहणै तुसै अपणै राज्य मन्ज इल्लै ता मेरी सुध जरूर लैं।”
43यीशुऐ तैस जो बल्लू, “अऊँ तिजो सितै सच बलदा कि, अज ही तुद मिन्जो सोगी स्वर्गलोक मन्ज भूणा।”
यीशु री मौत
(मत्ती 27:45-56; मरकुस 15:33-41; यूहन्ना 19:28-30)
44कोई दिन रै त्रियै पैहरा तिकर सारै देशा मन्ज घोर नैहरा भूच्ची गो। 45अतै सूरज नैहरा भूच्ची गो। यहूदी मन्दरा मन्ज पवित्र जगह रा पर्दा मन्जा थऊँ फटी करी दुई हिस्सै भुच्ची गो। 46यीशुऐ जोरा सितै हक्क पाई करी बल्लू, “हे पिता प्रमात्मां, अऊँ अपणी आत्मा तेरै हत्था मन्ज दिन्दा।” अतै तूणा बलदै ही प्राण निकळी गै।
47ऐह हेरी करी फौजा रा अफसर प्रमात्मां री जय-जयकार करीके बलणा लगा, “जरूर ऐह मणु धर्मी थू।” 48अतै जैड़ी भीड़ तैड़ी ऐह हेरनै जो किठूरै थी, सो ऐसा घटना जो हेरी करी हिक्का जकदै अतै रून्दै तैठी थऊँ अपणै-अपणै घरा जो फिरी गै। 49पर यीशु रै सब जान-पहचान बाळै मणु, अतै जनानी जो कि गलील थऊँ यीशु सोगी छुरी थी, दूर खड़ी करी ऐह सब कुछ हेरदै रैह।#भज. 38:11; भज. 88:8.
यीशु रा दाह-संस्कार
(मत्ती 27:57-61; मरकुस 15:42-47; यूहन्ना 19:38-42)
50तैस टैमैं यहूदी धर्म मण्ड़ळी रा अक्क मणु जैसेरा नां यूसुफ थू बड़ा ही धर्मी अतै सज्जन मणु थू। 51सो यहूदी मणु रै ऐस कम्मा अतै तंयारै विचारा थऊँ खुश ना थू। सो यहूदी मणु रै शहर अरिमतिया रा रैहणै बाळा थू। सो प्रमात्मैं रै राज्य री भाळ करू करदा थू। 52सो पिलातुस बल्लै गो अतै तैस थऊँ यीशु री लाहश मन्गी 53तिनी क्रूसा थऊँ यीशु री लाहश उतारी अतै मलमल री चादरा मन्ज लपेटी करी अक्की हपड़ा मन्ज कूड्डा सांईं कोरूरी कब्रा मन्ज रखी दिती। ऐसा कब्रा मन्ज अजा तिकर कोई भी लाहश ना रखुरी थी। 54ऐह विश्रामदिन री तैयारी रा दिन थू अतै विश्राम रा दिन शुरू भूणै बाळा थू।
55जैड़ी जनानी यीशु सोगी गलीला थऊँ छुरी थी सो भी यूसुफ रै पिचो-पिचो गैई अतै तियैं भी तैसा कब्रा जो हेरू। तियैं ऐह भी हेरू कि यीशु री लाहश कियां रखी हा। 56जनानी अपणै घरा जो फिरी करी आई अतै ईच्ची करी तियैं यीशु रै शरीरा पुर पाणै तांयें खुश्बुदार चिजा अतै इत्र तैयार करू। फिरी तियैं मूसा री व्यवस्था रै मुताबक विश्रामदिन मन्ज विश्राम करू।#निर्ग. 20:10; व्य. 5:14.
Currently Selected:
लूका 23: GBKNT
Označeno
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.