GENESIS 29
29
Yakob sampai human Laban
1Yakob marajur pangguete palus manintu akan lewu intu hila timor Kanaan. 2Salenga gitae ije kalin danum hong janah, tuntang tokep hete aton menter telo kawan tabiri je patoh impihop hete. Kalin danum te tatutup awi batu hai. 3Amon uras kawan tabiri jari imumpong hete, kare sakatik manggaling batu te akan balikat, palus tabiri te impihop. Limbah te kare sakatik manutup kalin danum te haluli.
4Palus Yakob misek kare sakatik je aton hete, “O, pahari, bara kueh keton toh?”
“Bara Haran,” tombah ewen.
5Yakob misek tinai, “En keton kasene dengan Laban anak Nahor?”
“Kasene,” tombah ewen.
6“Kilen ampie?” Yakob misek tinai.
“Bahalap ih,” tombah ewen.
“Item, te anake je bawi, arae Rahel. Ie dumah mimbit kawan tabirin bapae.”
7Koan Yakob, “Andau magon ambo tuntang hindai katikae tabiri inamean akan karambange. Mbuhen kare meto te dia keton mampihope, balalu mimbite kuman oru tinai?”
8Tombah ewen, “Ikei haron tau mampihop kare tabiri te amon uras kare kawan tabiri jari hapumpong hetoh tuntang batu je manutupe jari inggaling.”
9Metoh Yakob bapander dengan ewen, Rahel dumah dengan kawan tabirie. 10Sana Yakob mite Rahel hayak kawan tabirie te, Yakob manalih kalin danum te, palus manggaling batu je manutupe akan balikat palus mampihop kawan tabiri te. 11Limbah te ie manyium Rahel, tuntang manangis awi kapaham angat kataharoe. 12Koae dengan Rahel, “Aku anak Rebeka, paharin bapam.”
Balalu Rahel hadari buli akan humae hayak manyarita taloh te akan bapae. 13Sana Laban mahining kabar tahiu Yakob, akee te, ie palus hadari handak manyondaue. Laban mamalok Yakob tuntang manyiume, palus mibite tame huma. Limbah Yakob manyarita kare perkarae akan Laban, 14Laban hamauh, “Toto, ikau puna isi dahangku.”
Yakob melai intu huma te jadi ije bulan katahie.
Yakob bagawi omba Laban mangat mandino Rahel tuntang Lea
15Sinde andau Laban hamauh dengan Yakob, “Dia patut ikau bagawi omba aku kalote bewei, baya awi ikau kolangku. Pire upah je ingahandakm?” 16Laban te aton anake due biti bawi; je bakas arae Lea, tuntang andie arae Rahel. 17Lea bahalap ampin matae,#29:17: bahalap ampin matae atawa dia hasangkowong. tapi Rahel bahalap ampin bitie tuntang baue.
18Yakob sinta Rahel, tagal te ie tombah auh Laban, “Aku nahuang bagawi katahin uju nyelo amon mama maku aku kawin dengan Rahel.”
19Koan Laban, “Labih bahalap aku manenga ie akam bara akan oloh beken; yoh melai ih intu hetoh.” 20Palus Yakob bagawi katahin uju nyelo mangat dinon Rahel. Akae kare nyelo te mahalau kilau pire-pire andau ih, awi sintae dengan oloh bawi te.
21Limbah te Yakob hamauh dengan Laban, “Uju nyelo jari halau; soho aku kawin dengan anak mama.” 22Palus Laban mawi pesta kawin hayak marawei kakare oloh intu lewu te. 23Tapi hong alem te, dia Rahel, tapi Lea je iagah Laban akan Yakob, palus Yakob marantep ie. ( 24Laban manenga reware je bawi akan Lea, akan indu reware). 25Harun andau jewue Yakob katawan je ie ingawin dengan Lea. Palus Yakob manalih Laban tuntang hamauh, “Mbuhen mama mawi aku kilau toh? En dia aku bagawi mangat dinon Rahel? Mbuhen mama manipu aku?”
26Tombah Laban, “Manumon hadat hetoh, andie dia tau kawin helo bara kakae. 27Entai sampai lepah pesta uju andau pangawin toh, aku akan manenga kea Rahel te akam, asal ikau maku bagawi uju nyelo tinai.
28Yakob maku, tuntang limbah pesta te lepah, Laban manenga akae Rahel jadi sawae. ( 29Laban manenga rewar bawi je arae Bilha akan Rahel, mangat jadi reware.) 30Yakob marantep Rahel kea, tuntang ie labih sinta Rahel bara Lea. Limbah te ie bagawi uju nyelo tinai.
Kare anak Yakob
31Metoh Hatalla mite je Lea dia lalau inyinta kilau Rahel, Tuhan mawi Lea manak, tapi Rahel tetep dia dinon anak. 32Lea batihi palus manak ije anak hatue. Koae, “Tuhan jari mite kasusahku, maka toh banangku handak sinta aku.” Balalu ie manenga aran anake te Ruben.#29:32: Ruben: Aran toh auh sewute sama kilau auh kotak Ibrani je rimae “keleh ite, ije biti anak” tuntang “jari mite kasusahku”. 33Lea batihi tinai balalu manak ije anak hatue. Koan Lea, “Tuhan jari manenga akangku anak toh tinai awi hininge je aku dia inyinta.” Palus manenga aran anake te Simeon.#29:33: Simeon: Aran toh sama auh sewute kilau kotak Ibrani je rimae “hining”. 34Lea batihi tinai balalu manak ije anak hatue. Koae “Toh banangku handak labih heret dengangku awi aku manak telo anak hatue.” Palus ie manenga aran anake te Lewi.#29:34: Lewi: Aran toh sama auh sewute kilau kotak Ibrani je rimae “imeteng”. 35Limbah te Lea batihi tinai tuntang manak ije anak hatue. Koae, “Sinde toh aku handak manara Tuhan.” Balalu ie manenga aran anake te Yuda.#29:35: Yuda: Aran toh auh sewute sama kilau auh kotak Ibrani je rimae “tara”. Limbah te Lea dia manak tinai.
Currently Selected:
GENESIS 29: NIJ
Označeno
Deli
Kopiraj
Want to have your highlights saved across all your devices? Sign up or sign in