GENESIS 28
28
1Limbah te Isaak mantehau Yakob, palus mamberkat ie hayak hamauh, “Ela ikau kawin dengan bawin oloh Kanaan. 2Lius haguet akan Mesopotamia, akan human buem Betuel. Palus keleh ikau kawin dengan ije bara kare anak mamam Laban. 3Keleh Hatalla, Je Jaton Tikas Kuasae mamberkat pangawim, tuntang manenga akam anak eso je are, sampai ikau jadi tato hiang kare bangsa! 4#Gen. 17:4-8 Keleh Tuhan mamberkat ikau tuntang turonam, kilau Ie jari mamberkat Abraham. Tuntang keleh ikau jadi tempon tanah je ekam melai toh, je jari inenga Hatalla akan Abraham!” 5Kalote Isaak malapas Yakob haguet akan Mesopotamia, akan Laban, anak Betuel oloh Aram te. Laban te kaka Rebeka indu Yakob tuntang Esau.
Esau kawin tinai
6Esau mahining je Isaak jari mamberkat Yakob tuntang malapas ie haguet akan Mesopotamia uka manggau oloh bawi hete akan indu kabalie. Tinai hong katika Isaak mamberkat Yakob, ie mangahana Yakob kawin dengan bawin oloh Kanaan. 7Beken bara te Esau katawan je Yakob manumon auh indu bapae tuntang jari haguet akan Mesopotamia. 8Palus haratin Esau je Isaak, bapae, dia rajin dengan bawin oloh Kanaan. 9Tagal te Esau haguet manalih Ismael, anak Abraham, tuntang kawin dengan anak Ismael je bagare Mahalat andi Nebayot.
Nupin Yakob intu Betel
10Yakob malihi Berseba tuntang haguet akan Haran. 11Metoh matanandau belep ie sampai intu ije eka,#28:11: ije eka … atawa eka … ije barasih. palus baramalem intu hete. Ie menter handak batiroh; takoloke habantal ije batu. 12#Yoh. 1:51 Palus ie nupi je ie mite ije tangga mendeng intu petak tuntang lawie sampai akan langit tuntang kare malekat mohon mandai intu tangga te. 13#Gen. 13:14-15 Intu balikate#28:13: intu balikate atawa intu hunjun tangga te. mendeng Tuhan tuntang hamauh, “Aku Tuhan, Hatalla je inyembah Abraham tuntang Isaak. Aku handak manenga akam tuntang akan turonam tanah je ekam menter toh. 14#Gen. 12:3, 22:18 Turonam kareh karee kilau kawo hong petak. Ewen kareh mampalombah eka ewen akan hete-hete. Hajamban ikau tuntang turonam, Aku handak mamberkat kakare bangsa#28:14: Aku … kakare bangsa atawa kakare bangsa akan balaku dengangku mangat Aku mamberkat ewen kilau Aku jari mamberkat ikau tuntang turonam. hong hunjun petak. 15Ingat, Aku handak mandohop tuntang mangalindong ikau, akan kueh bewei ikau haguet tuntang Aku akan mimbit ikau haluli akan tanah toh. Aku dia akan malihi ikau sampai Aku jari malalus kakare taloh je injanji-Ku akam.”
16Balalu Yakob misik bara tirohe tuntang hamauh, “Tuhan aton intu eka toh, tapi haroe katika toh aku mangatawae!” 17Ie lembut kikehe balalu hamauh, “Eka toh bakaike-ikeh! Batantu jetoh human Hatalla, bauntonggang sorga.”
18Hanjewu jewue, Yakob harikas palus manduan batu je hapae akan bantale tuntang mampendenge jadi batu pampingat. Ie manusoh undus hong hunjun batu te uka imbaris akan Hatalla. 19Eka te inggare Betel.#28:19: Betel: Riman aran toh huang basa Ibrani iete “human Hatalla”. (Solake arae Lus). 20Palus Yakob sumpah, “Amon Tuhan mandohop tuntang mangalindong aku hong jalanangku toh hayak manenga akangku panginan tuntang pakaian, 21sampai aku buli akan human bapaku dengan salamat, Tuhan kareh manjadi Hatallangku. 22Palus aku kareh manenga akan Tuhan sapersapuluh taloh je inenga Tuhan akangku. Batu pampingat je impendengku toh kareh jadi eka manyembah Tuhan.”
Currently Selected:
GENESIS 28: NIJ
Označeno
Deli
Kopiraj
Want to have your highlights saved across all your devices? Sign up or sign in