GENESIS 26
26
Isaak melai hong Gerar
1Intu tanah te lembut tinai lau kilau je manjadi hong jaman Abraham. Isaak manaharep Abimelekh, rajan oloh Pilistin intu Gerar. Ie balaku uka tau melai intu hete. 2Taloh te ilakue awi Tuhan jari mamparahan arepe dengae tuntang hamauh, “Ela haguet akan Misir; keleh melai hong lewu toh, kilau je jari irentah-Ku akam. 3#Gen. 22:16-18 Aku handak mangalindong tuntang mamberkat ikau. Hapus tanah toh inenga-Ku akam tuntang akan turonam. Aku handak malalus janjing-Ku je jari inenga-Ku akan Abraham bapam. 4Aku handak manenga akam anak eso kilau bintang intu langit, tuntang hapus tanah toh handak inenga-Ku akan ewen. Salepah bangsa hong kalunen kareh balaku dengang-Ku mangat Aku mamberkat ewen kilau Aku jari mamberkat turonam. 5Aku handak mamberkat ikau, awi Abraham jari manumon auh-Ku tuntang mahaga kare tukas tuntang parentah-Ku.”
6Kalote Isaak melai hong Gerar. 7#Gen. 12:13, 20:2 Metoh kare oloh hete misek tahiu Rebeka, Isaak tombah je ie te andie, dia ia sawae. Isaak mikeh kare oloh te kareh mampatei ie hapan mandino Rebeka je paham bahalap te. 8Limbah Isaak melai hete pire-pire katahie, sinde andau raja Abimelekh nampayah bara baunsengoke, palus gitae Isaak kanjerae hureh dengan Rebeka. 9Palus ie mantehau Isaak tuntang hamauh, “Diakah oloh bawi te puna sawam? Mbuhen ikau mansanan ie andim?”
Tombah Isaak, “Tiroku, aku kareh impatei amon mansanan je ie te sawangku.”
10“Narai je jari iawim dengan ikei,” koan Abimelekh. “Ije biti bara oloh ayungku tau ih marantep sawam. Amon taloh te manjadi, ikau je mananggong kare kasalan ikei te.” 11Palus Abimelekh mampingat hapus oloh ayue, koae, “Ewe-eweh je mangapehe oloh toh atawa sawae, kareh ihukum matei.”
12Isaak manawor paung hapa nguan taloh imbul hong lewu te. Hong nyelo te ie mandino hasil seratus lipet bara je inawore, awi Tuhan mamberkat ie. 13Panataue sasar mandahang, palus ie paham tatau. 14Oloh Pilistin bahiri dengae, awi ie aton kare reware, kare tabiri tuntang sapi. 15Balalu ewen manawon hapan petak uras kare kalin danum je jari ingali awi kare rewar Abraham metoh ie magon belom.
16Palus Abimelekh hamauh dengan Isaak, “Keleh haguet bara lewun ikei. Ikau jari labih kuasa bara ikei.” 17Balalu Isaak haguet tuntang mampendeng kemah intu janah Gerar. Hete ie melai pire-pire katahie. 18Ie mangali haluli kare kalin danum je jari ingali hong jaman Abraham tuntang je jari inawon awi oloh Pilistin limbah Abraham. Kare kalin danum te inampa arae sama dengan aran je inenga bapae.
19Kare rewar Isaak manampa kalin danum hong janah Gerar te, palus sondau danum malabien karee. 20Tapi kare sakatik hong Gerar hakaridu dengan kare sakatik ain Isaak. Koan ewen, “Danum toh ayun ikei.” Awi te Isaak manampa aran kalin danum te “Karidu.”
21Kare rewar Isaak manampa kare kalin danum je beken tinai, palus ewen manakian kalin danum te kea. Awi te, Isaak manggare kalin danum te “Kamusoh”. 22Limbah te ewen bindah bara hete tuntang mangali kalin danum je kateloe. Sinde toh jaton karidu. Awi te Isaak manampa aran kalin danum te “Kamardeka”. Koae, “Toh Tuhan jari manenga akan itah kamardeka melai hong lewu toh, itah kareh sanang intu hetoh.”
23Limbah te Isaak haguet palus sampai intu Berseba. 24Hong alem te Tuhan mamparahan arepe dengae hayak hamauh, “Aku toh Hatallan bapam Abraham. Ela mikeh; aku mangalindong ikau. Aku handak mamberkat tuntang manenga akam turonan je are tagal janjing-Ku akan rewar-Ku Abraham.” 25Palus Isaak mampendeng mesbeh tuntang manyembah Tuhan intu eka te. Ie mampendeng kemah hete tuntang kare reware manampa kalin danum je beken.
Janjin Isaak tuntang Abimelekh
26 #
Gen. 21:22
Sinde andau Abimelekh dumah bara Gerar, dengan Ahusat, panasehat ayue, tuntang Pikhol, kapala tantarae, handak manyondau Isaak. 27Isaak misek, “Mbuhen keton dumah manyondau aku toh, padahal bihin keton malawan tuntang maharak aku bara lewun keton?”
28Palus ewen tombah, “Toh ikei katawan je Tuhan mangalindong ikau tuntang toh ikei manirok keleh ikei mampendeng janji. Keleh sumpah 29je ikau dia handak mawi kapapa dengan ikei, kilau ikei kea dia puji mawi kapapa dengam. Ikei tetep bahalap dengam tuntang nalua ikau haguet dengan kasanang. Jadi tarang akan ikei je Tuhan mamberkat ikau.” 30Limbah te Isaak manyarongan ewen, palus ewen kuman tuntang mihop. 31Hanjewu jewue genep biti manyewut janji je jari indehen hapan sumpah. Palus Isaak manyewut selamat jalan akan ewen tuntang ewen hapisah kilau sobat.
32Andau te kea kare rewar Isaak dumah tuntang mansanan akae tahiu kalin danum je jari inampa ewen. Koan ewen, “Ikei jari dinon danum.” 33Balalu Isaak manampa aran kalin danum te “Sumpah”. Jete tamparae lewu te inyewut Berseba. #26:33: Berseba: Riman aran toh huang basa Ibrani ieta “Kalin Danum Sumpah” atawa “Kalin Danum Uju” (Ite 21:31).
Kare sawan Esau bara bangsa beken
34Metoh Esau epat puluh nyelo umure, ie kawin dengan due oloh bawi bara bangsa oloh Het, iete Yudit anak Beri, tuntang Basmat anak Elon. 35Kadadue oloh bawi te mawi kasusah pambelom Isaak tuntang Rebeka.
Currently Selected:
GENESIS 26: NIJ
Označeno
Deli
Kopiraj
Want to have your highlights saved across all your devices? Sign up or sign in