GENESIS 25
25
Turonan Abraham bara sawae je beken
(1 Kro. 1:32-33)
1Abraham kawin tinai dengan ije biti oloh bawi je arae Ketura. 2Sawae te manak kare anak je arae: Simran, Yeksan, Medan, Midian, Isbak tuntang Suah. 3Yoksan bapa Seba tuntang Dedan. Turonan Dedan iete oloh Asur, oloh Letus tuntang oloh Leum. 4Kare anak Midian iete: Epa, Eper, Henokh, Abida tuntang Eldaa. Ewen uras turonan Ketura.
5Aloh Abraham mawaris kare ramoe akan Isaak, 6katahin pambelome ie manenga are panenga akan kare anak je dinoe bara kare sawae je beken. Limbah te inyohoe kare anake te bindah akan tanah hila timor Kanaan, mangat mangejau ewen bara anake Isaak.
Abraham matei tuntang ingubur
7-8Abraham matei metoh umure jari bakas, iete 175 nyelo. 9Ie ingubur awi kare anake, iete Isaak tuntang Ismael, intu goha Makhpela je intu tana hila timor Mamre. Bihin tana te ayun Epron anak Sohar, oloh Het, 10#Gen. 23:3-16 tahi jari imili Abraham bara olon Het te. Sarah sawan Abraham kea ingubur hete. 11Limbah Abraham matei, Hatalla mamberkat Isaak, anak Abraham. Metoh te Isaak melai tokep kalin danum je bagare “Ie Je Manantuani Aku.”
Turonan Ismael
(1 Kro. 1:28-31)
12Ismael iete anak Abraham ewendue Hagar, bawin oloh Misir, jipen Sarah te. 13-16Ismael aton anake due walas biti. Kare anake te manumon gilire inakan: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Napis tuntang Kedma. Kare anake te jadi tato hiang due walas bangsa. Kampung tuntang kemah eka ewen bapodok inampa arae manumon kare aran ewen. 17Umur Ismael 137 nyelo metoh ie matei. 18Turonae melai hong tanah helat Hawila dengan Sur intu hila timor Misir manintu Asur. Ewen belom hapisah bara turonan Abraham je beken.
Esau tuntang Yakob inakan
19Toh rinting Isaak, anak Abraham. 20Isaak epat puluh nyelo umure metoh ie kawin dengan Rebeka, andi Laban, anak Betuel, ije biti oloh bara Mesopotamia. 21Awi Rebeka jaton dinon anak, Isaak balakudoa intu Tuhan tagal sawae. Tuhan manarima lakudoan Isaak, palus Rebeka batihi. 22Ie manihi anak tatop due. Helo bara kare anak te inakan, ewen hagian huang kanaie. Koan Rebeka, “Mbuhen taloh toh balalu manjadi akangku?” palus ie balaku pansanan bara Tuhan.
23 #
Rm. 9:12
Tuhan hamauh dengae,
“Due bangsa aton huang kanaim;
ikau kareh manak due bangsa je hamusoh;
andie labih gancang bara kakae,
je bakas mamenda je busu.”
24Te sampai katikae Rebeka luas, ie manak tatop due iete due biti anak hatue. 25Je bakas bahanda-handang ampin pupuse, upake kilau jubah je habulu. Awi te ie inampa arae Esau.#25:25: Esau: Oloh mangira aran toh tege hubungae dengan Seir, iete daerah je rahian andau ielai awi turonan Esau; Seir te sama auh sewute kilau kotak Ibrani je rimae “habulo”. 26Metoh anak je kadue inakan, lenge mimbing takir Esau. Awi sabab te ie inampa arae Yakob.#25:26: Yakob: Aran toh auh sewute sama kilau auh kotak Ibrani je rimae “takir”. Umur Isaak 60 nyelo metoh ewen inakan.
Esau manjual pangkat kabakase
27Kadue-due anak te sasar hai, Esau jadi oloh pamandop je pintar tuntang mangumbang hapus janah. Tapi Yakob oloh je suni-suni tuntang rajin melai intu huma. 28Isaak labih sayang dengan Esau, awi Isaak rajin kuman isin meto dinon Esau mandop. Tapi Rebeka labih sayang dengan Yakob.
29Sinde andau metoh Yakob kanjerae mampakasak johon kacang bahandang, te Esau dumah bara janah. Ie balau. 30Kuae dengan Yakob, “Aku balau toto laku isut johon kacang bahandang te.” (Awi te ie inyewut Edom.)#25:30: Edom: Aran toh sama auh sewute kilau kotak Ibrani je rimae “bahandang”.
31Tombah Yakob, “Yoh, asal ikau manenga helo pangkat kabakasm.”
32Koan Esau, “Aku dia paduli pangkat te. Aku balau bakamatei!”
33 #
Ibr. 12:16
Koan Yakob tinai, “Keleh sumpah helo je ikau manenga pangkat kabakasm te akangku.”
Esau sumpah tuntang manenga pangkat kabakase akan Yakob. 34Limbah te Yakob manenga akae rote tuntang belahe bara johon kacang bahandang te. Esau kuman tuntang mihop. Kalote Esau dia paduli pangkat kabakase.
Currently Selected:
GENESIS 25: NIJ
Označeno
Deli
Kopiraj
Want to have your highlights saved across all your devices? Sign up or sign in