Génesis 38
38
Judá doi dacaria Tamar nanique uje uaté chãra gu enga Judá jos eti dibéchoquí gu
1Mu chise diri uje Jacob ujnacarode uñai uje i tu Judá cãra daqui nanique ome daguiosode nanique, enga chise jnani uje i tu Híra enga chácariji iguíjnai to. Enga jnani uté idai i tu Adúlam nanique. 2Uje qué déji ore gari nanique iji ta ore idai, enga chise gapua tiji uté enga cananéogose uaté dayé, enga i u Súa. Enga ore chisa ñane enga Judá uté cho dacoté iji uaté. 3Enga uaté icáraque déji ajei nanique enga ica base enga diyoqui, enga ore chĩ́care Er aja to nanique. 4Enga jequepo rĩ iji abi uté quigade enga ica base enga diyoquíapo rĩ enga ore chĩ́care Onán aja. 5Enga e jequepo rĩ enga abi basapo rĩ enga diyoquíapo rĩ enga ore chĩ́care Séla aja uté to, enga base uje ore dai Judá déji ore idai Quezib nanique.
6Ga jé u uje e jnacare Er nanique enga Judá chucué dajnacari acotéraque iji gapúraque ujetiga ujnacari cho dacoté iji. Enga chise gapua nanique uje i tu Tamar, enga Er chóji uaté gari enga cho dacoté iji nanique. 7Mu gajnareque Er adode nanique. Jecute Pangarádejnai que chise Er isocade unétique nanique, enga chujé nanique ga chujépise. 8Enga jé u nanique uje ore dai Judá catecãrápoi dajnacarode uñai rĩ uje i tu Onán enga chojningame:
–Onán, be baya casé acoté jne enga óji gari to jne enga o bacoté iji uaté jne. Jé socaseti jeque uaté ga cho dabíji batígo jne enga jé baya casé cho dabío iji ore jne iji quigáningo. Gajnareque gu ujetiga baya casé ca atique cuse iji quigáningo to jne.–
9Mu Onán doi dayé uruode enga cho dacoté iji daya casé acoté mu chetaque ujetiga jeque uaté enga atique déji gari mu uya casé cho dabíji atíguiji gari to. Jecute gajnaréngome. Enga jé u nanique uje Onán chisa daya casé acoté ejode mu chiraja uje a adode jno enga jé chijnimíji ga doi jnumi. Todo gu jetiga chĩreta jne enga ca cho dabíji datique jne. 10Mu Pangarádejnai chujãpise Onán isocade udore to enga jé u uje chujépo to rĩ enga topísi to. 11Enga jé u nanique rĩ uje Judá catecãrápoi dacaria te rĩ enga chojningame:
–Bo, ga acáji bayé iguíjnai enga ácariji jne, jeta chequé eca ua iji jne, jé aja ujeta yabi Séla jnacare enga a yijnapo ua aja de jne rĩ ujetiga uté chójiapoji bari jne rĩ.–
Mu cachi Judá urúo ome dacaria. Chamáñaje todo gu ujetiga Séla chójiapoji dacaria tuaté gari rĩ enga Pangarádejnai Dupade chujépo uté gaté rĩ. Enga jé u uje Tamar jno ga chicai dayé iguíjnai jeta chácariji to.
12Mu e iyajmánguiji udojo quigade enga Judá acoté toi enga topísi, uje uaté dai i tu Súa nanique. Enga uje e Judá jnusiétigai garósi enga pota jeta qué chajire dachidedie iji ore idai Timnat ejode to, uje qué irógode ore chaquesu gachidode ojode iji gáyode gu. Enga Judá jõrai Híra uje idai i tu Adúlam nóna aja ajesui nanique ga ore nóna ñane. 13Mu Tamar chudute dayoquíjnai ujnomei uje e jnome Timnat ejode ujetiga chaquesu dachidode ojode iji gáyode. 14Enga Tamar chojningame re: "E jnacaripise Séla, mu cáma chóji yari." Enga ajei dotárome Judá. Enga jé u nanique uje Tamar chejñu dáringa chequé eca gajnenie daguidé, enga chécãre daguidedie to. Enga e doi borapeque pei ga jé u uje chaco dabai, enga gusu edodie iji guesi. Gaidi u gu ujetiga ca uñeque chiraja. Enga jé u uje Tamar chicáji ore idai Enaím. Chise ore idai mu chácariji ore idai pijnanai enga chirote dayoquíjnai yui tiji uté.
15Mu Judá chise gapua tiji ore idai pijnanai uje chaco borapei dedodie gai enga gapua ajéngome ga chajire namuc. Enga chojningame re: "A dibéchoquí uaté jõ, uje chirote ore idai eruei ome jnanírique." 16Enga jé u nanique uje Judá cãra daqui enga catecã́ri uaté enga chojningame:
–¿Ajuéga jeta yiabi ua ya?–
Mu uaté chajnai uruode enga chojninga:
–¿Cho rique oredie jne jeta be yu?–
17Mu Judá chajnai uruode enga chojninga:
–Oré u yachidode erámoro quedéjna choquírique jne, uje qué ichájnapise. A yirótique choréji ua jne.–
Mu uaté chajnai uruode mu chojninga:
–Jé areque, mu ajíñomome bagúcharique iji yari bajaque. Mu a yatire jne jetiga erámoro quedéjna choquírique e chise yu.–
18Enga Judá catecã́ri enga chojninga:
–¿Ama bajegaitique déji rique a iji yugúchade jetiga yijíñome iji bari jne?–
Enga uaté chajnai uruode enga chojninga:
–Ajíñome bajṹtique iji yari, ga átaja bajunéraque uje bapijógome bajuné tuaté. Átapója boguéraque rĩ uje bagutadé u gu.–
Enga jé u uje Judá doi uaté nanique enga jeque nanique. 19Mu uje Judá e doi nanique enga que Tamar chajirape cuchárique. Jĩraque chajni aja dayé iguíjnai to enga chiguiápo dáringa chequé eca gajnenie daguidei rĩ.
20Udojo quigade nanique, uje e ore chise daqui enga Judá chiroque dajõrai adúlamgosi aja dachidi erámoro quedéjna choqui enga chojninga: "Bo yachidi erámoro quedéjna choqui údi aja chequé dibéchoquía enga asi ome jne ujetiga chatire yujúni casodé yibai, jé aja yujuné, yogué ore to jne rĩ." Ga jé u uje jõrai jno údi aja uaté mu que chisíji ore idai. 21Enga Judá jõrai uté catecã́ri jnanione ore iji ore idai ome uaté enga chojninga:
–¿Déji rique chequé dibéchoquía jogatique uje chácariji uaquedai Enaím udé pijnanai que?–
Mu ore chajnai uruode enga ore chojninga:
–Cachi que gapu dibéchoquíraque déji yoquidai udé arĩ́e.–
22Enga jé u uje Judá jõrai chajniápo Judá gai rĩ enga chojningame Judá:
–Que yise bojninga chequé dibéchoquí gotóraque. Mu yicatecã́ri ore iji ore idai, mu ome ore ga que gapu dibéchoquíraque déji ore idai údode gotique.–
23Mu Judá chojningame dajõrai uté:
–E bacué, e babo yachidi erámoro quedéjna choqui údi, mu que ese chequé dibéchoquía uaté. Enga jé dóji ga ca acuepóji rĩ. A yujúnenie jé dóji gari iji sañeque. Cachi ore chiraja yoque gu enga ore chujñieta yógome gapu dibéchoquía tuaté ujetiga yucuegoi gatuac.–
24Enga guedosíode gadioque iji uté quigade enga Judá chudute uje jeque dacaria. Enga ore chojningame:
–Bacaria Tamar uaté jeque. A moji jnani quedéjnaringo gari jõ.–
Enga Judá ájningarãque enga chojninga:
–Boyo údi enga aquetáyo piotique enga óraño uaté taja ¡jmuc!–
25Mu uje e ore doi uaté ujetiga ore tṍraja pioi, mu narare enga chojninga:
"Ajnócho pujuné tudé, jé aja pujúni carobi udé, jé aja ogué tuaté enga asíñome yiyoquíjnai jne. Enga a chiraja udojo gajnengónique jne, enga a chiraja jne uje ĩreta yu to." 26Mu uje e ore chise Judá enga ore chisi ome ujúni ome, jé aja ujuné, ogué ore jetiga chiraja quigode to uje ĩreta dacaria. Enga Judá jĩraque chiraja uje gajné casodé u. Enga jé u uje chojninga: "Ca ajéyo uaté jne. Uje que bárique cuse gu. Uje yichaga yujnacari Séla aja ica mu que yi yuruode ga yetágome rĩ. Enga gajnareque yadode ome uaté." Mu Judá que chisapo uaté ejode rĩ. Mu e cha.
27Mu chise diri nanique uje Tamar ica base enga garaja guesi. 28-29Mu uje uñai e basirase enga chijñaque dajmanéro chojmara aja guesi. Enga irodito doi ga chadia borapeque caratai aja jmanegatadé enga chojninga: "Yiraja jne uje bajai tu uté aja guesi." Mu chicapóji daté ajei rĩ, enga quigade jõrai basapo rĩ, mu titame irodito igaripídi tuqué uje chigaru jmanegatadé que enga ore chiraja uje unejángome igari uqué. Enga irodito catecãrósi ejábi enga chojninga: "Mu ¿o ringome que uje bajaque ua aja guesi?" Jecute ore chĩ́care Fáres aja uté, uje urui qui tu uje tṍra bajai taja daquigade, ga bajaque quigaminóri aja guesi. 30Mu bajai tuqué uje pigarique, uje irodito chadíja borapeque caratai aja jmanegatadé, enga ejopise aja guesi uje base to. Enga ore chĩ́care Zára aja uté.
Currently Selected:
Génesis 38: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360