Génesis 37
37
1Mu Jacob qué chácariji ore dai ore irengúi uje jecucha ga ore apáringaméque iji ore uniri Canaán. 2Enga a qué yatataba Jacob jogasui ore adode ome uaque jne enga u udojo.
José chatata darigode quigode ome dayé, dayade ore nanique
Jacob acoté daróguedie Bílha, Zílpa ore, ore ujnacarode isai cucha pisaque u dayé gachidedie gatuaque nanique. Mu uje José chise dejnanie sequerei nanique uje sequeredie chise 17 años nanique enga jé u uje cháta raja dayade ore isagode cucha pisacho to uje chirote dayé gachidedie. Mu jecucha ga ore isocade gajnarécho gatuac, tuaque iji deréjnane jnese, enga José jecucha ga chatata ore isocade ome dayé.
3Israel ijnorai upúsu José ome dajnacarode uñane ore jnese. Chamáñaje basíji úringai choquíjna nanique gu. Enga chise diri nanique uje dayé pésu José iguidé ueradéjna ujetiga aparagate ga dujnúji gai. 4Enga José uyade ore chimo desai uje dayé ijnorai tu, enga jé u uje ore charatáyime dayé ome José, enga ore chetaguipise enga ore chimo aja ajesúode mu que ore catecã́ri ga ore chedu dedodie ome.
5Mu dire uñai enga José urigode cuse iji dejai que, enga jé u uje chingome dayade ore to, enga ore chetaguipise gaté gu urigode. 6Enga José chatata darigode quigode enga chojninga:
–Angachobi yuruode ome uaque enga yatataba yurigode ome uaque jne. 7Yĩ́cara ga yugúcoji yoquejnai údode jnese uje yaquesúgo yocacade cucha guidode enga yigacója ñane iji yurigode. Mu yĩ́cara ga yamatade cucha pacade guidode chaguepo rĩ iji gaté, jé basa ga uacamatade ore doi jnumone iji yamatade iquei enga cho ujetiga ore eduguéjna tu yamatade.–
8Uje José uyade ore chudute atatagode enga ájningaránguipíse ore enga ore catecã́ri údode enga ore chojninga:
–¿Ama barigode udojo u a ujetiga ese báringárique yoqueduguéjna jne? ¿Ama bajéode u ujetiga ajnué yoquibai jnese a?–
9Udojo quigade enga José e urigode cusapo gaté rĩ. Enga jé isoca uje chingome dayade. Enga chojningame ore:
–E yurigode cusapo rĩ. Enga yĩ́cara ga yimo guedé, jé aja guedoside, jé aja guédodie rĩ uje chojmára iji yirídai. Enga ore doi jnumone iji yiquei jnese, enga cho jetiga ore eduguéjna tu yu jnese.–
10Mu uje José chingo darigode aja dayé, dayade ore enga jé u uje dayé ájningarángome enga uruode gajnarécho aja, enga chojningame:
–¿Ama o ringome barigode udore a? ¿Ama qui turásu ome ua ya jetiga bayade, baté uyoque yoco yoqueduguéjnai iji ua ya? Cachi gajnarécho barigode quigode arĩ́e.–
11Mu jé ate uje dayé chijnorapise José enga jecucha ga áyipie que chiramurase José uri casodica iji dajei. Mu José uyade ore chiraja dayé ijnoraquei ome uraque dayai enga ore charatáyipísome dayé irasitigai tome uraque desai José.
José uyade ore tẽrame uté nanique, enga oredie u pláta guebetique uje 20 u nanique
12Enga udojo quigade enga José uyade ore chucué dayé gachidedie áyasai potígo jnacaracho iji datã iji ore idai Siquem dosadode. 13Enga Israel tibidi José enga chojninga:
–Bayade ore déji Siquem dosadode uje qué ore chirote yachidedie áyasai iji uté. Bo ga abágui ore ga a yangácoi bojñáringo ome ore jne ujetiga uajate ore iji ta.–
Enga José chajnai dayé uruode enga chojninga:
–Ueradéjna ome yu, Iapá, baruode. A yiji baroquei uté jne.–
14Enga Israel chojningame:
–José, bo ga acáji ore enga adójnangama ore, yachidedie ore rĩ, mu jĩraque ãriápo jne rĩ enga a yangácoi bojñáringo jne iji ore.–
Enga José chajna tuijnai Hebrón nanique uje chicáji Siquem yui. Enga jé u uje chise ore idai Siquem nanique. 15Mu e chise ore idai, mu jnopo rĩ enga chucué dayade iji ejode, mu idája iji ore idai enga que chiraja erámi quitique. Mu jnanírique chimo iji ta enga chojninga:
–¿Bacuetíguiji dore a?–
16Ga José chajnai uruode ga chojninga:
–Yucuegode u yuyade iji udojo arĩ́e. Jetiga araja ore jogatique enga angome ore jogatique ome yu uje ore chirote yocai gachidedie áyasai iji udojoñeque.–
17Mu jnani tuté chajnai José uruode enga chojninga:
–A e ore jno arĩ́e. Uje yudute ore uruode diríca uje ore qui tu Dotán jne.–
Jecute José chicáji garáijnane udore uje ore erugode déji uje ore chĩ́care Dotán aja enga chise dayade iji uté. 18Mu ore chimo desai José iji garani iji ti, enga ore catecã́ri ñane bajac ujetiga ore chimate dáyipiedie bajaque ujetiga ore ajéo enga ore chujé.
19Enga ore chojningame ñane:
–¡Cajicho to ga uritáguebei e di!–
20Enga ore chojninga:
–Ujetiga chise yoque ga yujégo jne, enga yórangoja ore erugode uñeque ajénique jne. Ga a yojnijome yocai jne: "Cuchiso sijnátique a tagu iji sañeque arĩ́e uje que yimóngo iji udojo." ¡Enga jé u jne ujetiga yajico jeta urigode tocade ome re jetiga yoqueduguéjnai tu jne!–
21Mu uje Rubén chudute dajorane uruode ome uraque desai enga chaquĩ́ra ore enga chojninga:
–Jé dóji jne enga ca yujégo jne. 22Gajnareque jeta yujégo ga iyórique déji de. Omi tu jetiga ca yujégo mu yórango aja ore erui ajei bisideque iji erãpetarei uté.–
Mu Rubén ajéode u nanique gu ujetiga chijnime uraque desai enga chirógaja doi ujetiga chajnésarapoja darani rĩ, enga diapóji dayé ome dáringai ueca. 23Mu José chise dayade ore ga ore cugujnáji enga ore chejñu dayé guerané iguidé ueradéjna iji gai. 24Ga jé u uje ore chisa ga ore jno údi aja erui ga ore tṍra desai taja ajei uje e iyajmaque enga íjnoque yodi tiji ajei. 25Ga jé u uje ore noñome iji te, enga ore chajni aja darengúi enga jé ore taguíji.
Enga ore chimo ore jochai iji ta uje tṍraji ore idai Galaad yui, enga jiépisi ore. Enga ismaélgosode u ore. Enga ore jno deranone cucha údi aja ore uniri Egípto jetiga ore tẽrame egíptogosode. Enga ore gachidode burica quedéjna caméllo chijnoque ore gueranone cucha iji ore quigade. Enga cucha ai unérone u ore jnungone jetiga ore tẽra iji Egípto, uje cucha ai unérone udore ore íode u bálsamo, mírra ore. 26-27Mu Judá catecã́ri dajorane ome uraque desai enga chojninga:
–Yicobi, ga yẽco yoquesai ome ismaélgosode ore. Uje a yujégo enga que cuchárique tṍraji ome yoque ujetiga yujégo bisideque. Chamáñaje ujetiga yujégo enga ¿yoco ringome jne jetiga yipójo? Ise ga omi tu ujetiga yẽco ga ca yoquibárique cuse jne ome yoquesai. Chamáñaje yoquesaque gu.–
Enga jé u uje jorane ore chojningame:
–Jé ũrepise ua arĩ́e. Yicoi enga yẽco jne.–
28Ga jé u uje cuchade jnungórone ore chise ore irengúi enga jé u uje ore chijnime José iji erui ajei enga ore tẽrame ismaélgosode ore, uje ore chĩ́care madiángosode aja ore to. Ga José oredie chise pláta guebetique uje 20 u, uje guebeque chojmarai oredie jiépisi nanique. Enga jé u uje ore jno ga José nóna ore aja ore ajesui, ujetiga ore tẽrapo gaté rĩ iji Egípto.
29Mu Rubén que déji to uje ujode desaque ore tẽra desai José to. Mu uje di iji ore irengu casé ga quítequiguíji ore ejopié uje ore tṍra desai taja diríca, mu chajire ga titame desa casé enga chajuque aguté. Enga doi orisocai uje ore isocai tu nanique uje jnusiétaque ore ga ore isocai tu nanique uje ore chajningarase daguidé tiji dabai aja dejode. 30Enga jé u uje chicáji desade ore enga catecã́ri ore enga chojninga:
–Yoquesa casé tita ore ejopié tome. ¿Ama yo ringome jne uje que yiraja yisocáringome uté yúrique?–
31Jé u uje chudute desai ujnomei to, enga e ore catecãrápoi ñane gaté rĩ ome dáyipieraque ujetiga ore chãra dayé. Enga jé u uje ore chimate dáyipiedie ome ñane enga ore doi erámoro quedéjnarique enga ore chujé. Enga ore chaguñéra iyojna taja José iguidé údode uje dayé ipesudé ome ica. 32Ga jé u nanique uje ore chisi ome daróquegatéi José iguidé, enga ore chojningame:
–Bo údi ome yocai jne. Enga ojninga jne: "¡Cajire to, jeta José iguidé udac, jeoga ca u, jeta araja jetiga iguidé jé u, jeoga ca u! Chamáñaje yico iji yoquisoránenie diríca gu."–
33Enga jé u uje Jacob chimo uaté enga chojninga: "¡Ejẽ́, José iguidé tu uaté arĩ́e! Enga ise mu cuchisórique e tagu yujnacari uté, enga a e chimánaja jnutíguiji sañeque." 34Enga Jacob jĩraque chisa daguidedie enga chajningarase iji dabai, enga chigui daguidé dañorenie uje gajnui tu uje jnusiétaguipíse ore enga dirode jiépisi uje popise dajnacari quigade. 35Mu uje que tiógara dajnusiétigai enga jé u uje ujnacarode uñane, urodie ore chaquĩ́ra ga ore chojninga: "Aya bu bajnusiétigai to." Mu chojninga: "Úngare, a ca yiya jne, enga yujnusiétigai udé a chuságaja yigachotique jne ujetiga yitoi enga yajna yujnacari casé aja jnaropié enga jé u jne ujetiga yugúcopoji ñane gari jne iji jnaropié enga yimóngopo ñane jne iji uté."
36Enga jé u uje cuchade jnungórone ore chise egíptogosode nanique enga ore tẽra José ome ore eduguéjna cuchábi Faraón iróquegatéi uje i tu Potifar nanique. Enga soldádode ore eduguéjnai tu uté nanique uje ore chirote Faraón ejode nanique.
Currently Selected:
Génesis 37: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360