Génesis 32
32
Esaú chachai Jacob nanique uje Jacob ore chajniapója daniri rĩ
1Enga Jacob e ore jno ga ore chajna dajei aja dai uniri. Mu Dupade irógode gaté unirísõre uñane chachai iji garani. 2Enga Jacob chojninga: "Jiépisi ore iji yiquei enga ore cho jõcaratade uje ore pésu dajochai tiji yiquei, enga ore tṍraji Dupade idai iji gaté ome yu." Uje gaté unirisórone chisíji enga Jacob pésu jogadi uté i enga chĩ́care Mahanaim aja. Uje jé uru qui tu gu "Jõcaratade Jochade."
3Enga e ore chirõre daqui guidai yui enga Jacob chiroque datocaidode aja puniri Seir, uje déji puniri Edom ajei, ujetiga ore chatatame dayai Esaú uje a di jne. 4Enga Jacob catecã́ri datocaidode enga chojninga: "Jetiga eso yuyai Esaú to jne enga ojnichome jne: 'Besai Jacob a di jne enga pésu bojningane cucha jnese iji de.' Ojningame jne uje e iyajmaque yu iji yoquẽri gari iji uniri. 5Enga angome uje yiji iroquéode ga e ugúcharã́que yu enga jiépisi yachidedie ore rĩ: áyasadie, aquirájnanie, burica quedéjnane, ore. Enga angome uje yirógode, yiróguedie jiépisi ore to. Enga angome uje yatata yiríringai tome enga yigaidi tu gu jeta ca chetaque uje yajniápo ore gai te rĩ."
6Enga jé u uje utocaidode ore chise Esaú enga ore chajniápo Jacob gai te rĩ jetiga ore chingo dojñane ome. Enga ore chojninga:
–Enga yico bayai diríca enga chojninga: "A yachai jne." Enga a jiei Esaú jõráringo jne jeta ore chachai uaque uje jnanío ore. A ore chise 400.–
7Mu uje Jacob chudute darógode ore ojñane enga todo dayai, jorane ore yui. Enga chucué dasocáringome re. Enga jé u uje chajuque darógode ore enga cãra ore jogadode ome ñane; jé aja ugúchade, gachidode, cãra ore jogadode ome ñane to rĩ enga e gare ore uáguedie. 8Enga chojningame re: "Ujetiga Esaú chise yocuague uñáraque enga ore chuquéjnai yocuague uñáraque enga jé basa ga yocuague uñáraque ore chayo jne." 9Enga jé u uje catecã́ri Dupade údode ome re enga chojninga: "Yangarádejná, yáqui casica Abraham angureni tu ua. Enga jé chopo yai Isaac te rĩ, angureni tupo ua rĩ. Ua u ica uje bojningame yu ica: 'Bo ga ajnésaru baniri to jne, enga a bajõrai tu yu jne aja baniri yui jetiga ese baguiosode ore iji baniri tuté ome báringárique etoguipise.' 10Jecucha ga babé baruode ome yu, enga bosõripise yu. Mu que yiraja gotique uje bosõre yu uje cucha bisideque yu ga gajnareque yadode. Iji taningai nanique uje yayome yuyai nanique, enga bamo uje gusu yugutadé iji yijmanai nanique uje yaquesu tié udaque Jordán nanique. Mu bamo uje e yṍraji yẽri ore enga bosõre yu iji uté, jecute basi ome yugúchade ome yu enga e yipésu yugúchade uague gáredie enga cuchadaté. 11Mu qué yijócha bajei údi. Yuyai Esaú e di enga ãraque yoque ome uté. Bamo uje yitodópisa uté jetiga chise yoque, enga chuquéjnai yoque enga chejna yacotedie, yabode ore. 12Que yotigasipise baruode ica ome yu uje bojninga: 'A yátapísaja ua jne, enga bape disi ejórigo a jiépisi ore jne enga ore gajnui tu yote quedéjnai arĩ jne iji pijnanai uje quenguerapise, uje que toc jeta ayorérique doi enga chisecãru quenguerachúringai.'"
13Enga Jacob cha dacatecãraitigade enga jé moji dacatecãraitigade jogadi. Mu dire uñai enga jé u uje Jacob chase dagúchade ome dajegaidode dagúcha ujetiga chisi ome dayai. 14Enga gueranone cucha u udojo: gachidedie erámoro quedéjna chequedíe chise 200 uje chichaga dayai yui, jé basa ga erámoro quedéjna choquíode chejna ayoré chojmarai. Jé basa áyasa chequedíe chisápo 200 to rĩ, jé basa ga áyasa choquíode chejnapo ayoré chojmarai te rĩ. 15Jé basa ga burica quedéjna caméllo chequedíe chise 30 enga ore nónasia dababidie to. Jé basa ga aquirájna chequedíe guejnanie ayoré gare, jé basa ga aquirájna choquíode chejna yijmanáyone. Jé basa ga burica quedéjna búrro chequedíe chejna ayoré chojmarai to rĩ, jé basa ga burica quedéjna búrro choquíode chejna yijmanáyone. 16Enga doi ga chiroque darógode aja ujetiga ore chimáta deranone udore gachicho enga chojninga:
–Angaráño ore jogatígo ome ñane jetiga ca yimeco ore iji ñane, enga boyo udore údi iji itigate yui, enga ca amecho ore iji ñane jne, enga idája ore jogadode ome ñane jne aja yuyai yui.–
17Enga Jacob catecã́ri daroque bajai enga chojninga:
–Bo barodedie údi bajaque. A ese itigate jne enga a catecã́ri ua ome yu jne enga a chojninga jne: '¿Barósõri írique a? ¿Acai rique a? ¿Gosi gachidei barodedie a?' a chojningame uacuñeque jne. 18Mu achajnai uruode enga ojningame jne: 'Yangarádejná Esaú, bajnei yoquirodedie udire. Mu yoquirósõri Jacob pota jeta bajnei enga a araja uje irasique bei gu, jecute chisi ome ua. Mu yoquirósõri qué sase mu a ejo jne jeta di iji yoquiquigade.'–
19Enga Jacob catecã́ri darógode uñane enga chojninga:
–Uacarajáyo yuruode ome yiroque bajai uté que. Ga jé uacaruode u jnese yuru bajade ucode ome yuyai. Enga ajnicho ñane aja jne jetiga asíñome itigate iji uacarodedie. 20Enga ca acadíchoi jne jeta ojnichome jne: 'Jacob irasiguipise bei, enga a doi bojningane cucha jnese jne. Enga a uté di to jne, mu qué sase.'–
Enga Jacob chojningame re: "Jé soca ájningai doi jnumi jne ujetiga chimo yeranone cucha ome re. Jecute a yiroque ore aja yiquei bajaque jne, enga jé u jetiga ore chimo yeranone cucha bajaque, enga jé u uje ejo yu jne jeta yimo ore. Ja seca jé u jne jeta irasique yi to." 21Enga jé u uje Jacob irógode ore jno uté gueranenie dachidei údi aja dayai yui. Mu Jacob cáma jno to. Jé moji darengúi.
Dupade iroi gaté unirísõre, Jacob ore cho cojñúngu ñane nanique
22Mu Jacob e niji uje qué dejaque enga tibidi dacotedie, dabode ore enga chojninga:
–Boyo, enga acayóji tié Jaboc, enga aquesúyosiji tuijnámi jne.–
23Enga chiroque darógode aja ore quigade ujetiga ore chijnoque ugúchade jnese aja dacotedie quigade to, jé aja gachidode jnese to rĩ. 24Mu Jacob qué chácare enga gusu iji ore quigade. Mu ayorérique chisa enga ore cho cojñúngu ñane jé aja direjnímei. 25Mu ayoré uté gosi chimo uje que chinguíra Jacob aja jnumi, jecute chujé ógoro cosocorodé. Enga Jacob ógoro cosocorodé chécãre dajogadi uje qué ore cho cojñúngu ñane. 26Mu ayoré tuté narárome Jacob enga chojninga:
–Arame yu. E iyajmaque uje yoco cojñúngu ñane. E dirapome yógome uñane gai te rĩ.–
Mu Jacob chajnai dócojñungúi uruode enga chojninga:
–Ujetiga ca o barúja yu jne enga a ca yirame ua jne.–
27Enga Jacob ócojñungúi chojningame:
–¿Bérique a?–
Enga Jacob chajnai uruode enga chojninga:
–Yi tu Jacob arĩ́e.–
28Enga Jacob isasṍri uté chojningame:
–A yécãre bérique jne. Enga a yĩ́care bei ichárigaja ua jne enga a bei tu Israel jne. Jecucha ga bate uje bo cojñúngu bayé, bayai, bẽri ore enga bechome ore, cuchiyi tupúsu Dupade uje bo cojñúngu to enga bechome to.–
29Mu Jacob catecã́ri dócojñungúi enga chojninga:
–¿Ua gosi te? Atata bei ome yu.–
Mu Jacob ócojñungúi chojninga:
–¿Gotique gu a uje bapota jeta araja yírique?–
Enga jé u uje ayoré tuté cho darúja to ome cucha omone jé iji ore jogadi tuté nanique.
30Mu iji uté uje Jacob ore cho cojñúngu ñane iji enga Jacob pésu i enga chĩ́care Penuel aja uje chojninga: "Enga uyu, Dupade yimóngo ñane edodie iji de mu yiquecáji."
31Uje guedé e tocade enga Jacob jnoji Penuel mu cho tatoc, tatoc aja dajesui. Chamáñaje ógoro chẽcare dajogadi gu.
32Jecute Israel ape disi ejode, jé aja deréjnane udojo to, que ore tagu degode dosipeque ógoro cosocorodé arione iji gáyode to. Chamáñaje ore dai jnani bajai Jacob isasṍri ócojñungúi yugué u Jacob ógoro nanique gu.
Currently Selected:
Génesis 32: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360