Génesis 33
33
Esaú cha detétigade ome Jacob nanique
1Enga Jacob chimo Esaú iji denominone eruei uje irógode jiépisi iji ejode, enga ore chise 400 iji ejode. Enga doi dabode enga chimáta ore enga chijna ore aja ore datedie jeta ore chajire ore yui iji ore uáguedie. 2Enga Jacob catecã́ri dacotedie:
–Zílpa, Bílha bajé uaque jne, jé aja uacabode ore to, ga acayóji yoquiquei to. Léa, boyo to, jé aja yocabode ore to, ga acayóji ore quigade. Raquel, bo to ga ejopise José, uaque enga acayopísi ore quigade jne. A yimate uacayoyai jne enga jé u uje bajaque yu aja uacaquei.–
3Enga uje Jacob e idógosiji Esaú enga chichaga dacuruté aja jnumi ga gare iji ti yijmanuñai. 4Mu Esaú chimo desai Jacob enga cugujnáji enga chisa etabi aja re enga jé u uje tagu uredie. Enga ore po ñane ejode jnese. 5Enga Esaú chimo chequebui ga chimopo disibujnai enga chojninga:
–¿Enga udire gotodie a? ¿Enga udore gosode rĩ a, disiode udore a?–
Enga Jacob chajnai dayai enga chojningame:
–Yabode u arĩ́e. Chamáñaje Pangarádejnai Dupade caniranguipísome yu gu.–
6-7Enga jé u uje Jacob acotedie, abode ore chose Esaú yui jnese ga ore chichaga dacurutedie aja jnumone jnese iji uraque daquei. Enga bajedie u Jacob acoté uñanie uje irogue ore uje abode déji ore gari to; mu Léa, abode ore doi iji ore quigade; enga ejopísode u Raquel, José ore. 8Enga Esaú catecã́ri Jacob ome gachidedie uáguedie enga chojningame:
–Bachidedie uáguedie uje jecucha ga ore di, ore di ¿ama o ringome ore jne?–
Enga Jacob chajnai uruode enga chojninga:
–Yigaidi tu gu jeta yisi ome ua enga ca etaque yu to jne.–
9Mu Esaú chojninga:
–Isábi á, jiei yachidedie to arĩ́e. Ajnapója ua arĩ́e bamátadie bachidei uáguedatédie enga opo bachidé iji rĩ.–
10Mu Jacob jé chajo raja dayai úringai picatecãraite enga chojninga:
–Jé dóji bari yeranenie, ga gajnui tu yoquijnoraquei ome ñane. Uje yimo ua que, ga yajire ua ga pirasitigai déji yógome ñane, enga gajnui tu jeta Dupade u ua. 11Yijócha bajei údi arĩ́e jetiga be enga jé achia yeranenie. Chamáñaje yẽrame ua gu uje ugúcharanguipíse yu gu, ga que cuchárique chona yu mu cuchade déji yu jnese. Uje Dupade caniranguipísome yu gu.–
Uje Jacob iyajmaque uje catecã́ri dayai údode enga jé u uje Esaú chijna gachidedie udire to. 12Mu Esaú dejéna ore aja daquigade enga chojninga:
–¿Gotique gu a uje e iyajmaque yóguiji de? Yico ga ajnacho yu jne aja yoquidai yui jne.–
13Enga Jacob chajnai Esaú uruode enga chojninga:
–Bamo uje yabode cáma uajadipis ore aja jnumi, qué serẽrája ore guichade aja jnumi. Ga jé upome yachidedie áyasai to, jé aja aquirájnanie to uje yarengu ababidie gu. Bamo áyasadie ore isocade ga quĩrique ore dique; ujetiga ore chayo ga ore toi ome dajñarone. 14Mu gajnareque jeta ajína yógaja dajei, mu bo ga bajaque ua aja yoquiquéode jne uje yarengu yachidedie gu áyasadie, yabode ore, jé aja aquirájnanie ore. A yijoco baquigade jne aja baniri Seir yui.–
15Enga Esaú chajnai Jacob uruode enga chojninga:
–Jé areque. A yiji bajaque jne. Mu a qué yirógode uñéngo chácariji bari iji dé iji yoquiquigade, ujetiga ore chátaja ua ome bagúchade.–
Mu Jacob chajnai uruode ga chojninga:
–Úngare, que yipota. Omi tu jeta barógode nóna ua, uje yirógode cuse to arĩ́e.–
16Enga jé u uje Esaú, ore jno jnese, irógode ore, enga ore chajnésaru daniri jé aja dedai Seir. 17Mu Jacob ore chácare iji dayai quigade enga ore jno. Uje ore chise ta enga Jacob chiro daguíjnai iji jogadi uté nanique, enga pésapo dachidedie piedie iji to rĩ. Enga ore chĩ́care Sucot aja ore apáringaméi, uje urui qui tu gu uje ore gachidedie piedie piéjna iji gu.
18Dupade jé urúo ome Jacob nanique gu uje jnoji Padan-áram, ujetiga chátapísaja ore aja ore ajesúode nanique. Jecute uje ore di iji ore qui ore uniri Canaán nanique, enga etoguipise ore aja uje ore chise daqui punire. Enga pésu darengúone iji guidáidatéi Siquem ejode nanique. 19Enga jé u uje Jacob chicáji ore idáidatéi enga catecã́ri Hamor ujnacarode, Siquem ore, ujeta doi oré tome ore uniri petique iji ore idai ejórique. Enga jé u uje ore chisi ome Jacob ipotigádi jnupe pei ome enga jé u uje cho oré ome daplátadie guebeque, enga chise 100. Uje ore ipláta guebeque chojmára mu oredie jiépisi nanique. Enga jé u nanique uje ore apáji Jacob gaidi jnupe pei uté. 20Enga jé u nanique uje Jacob jé doi cucaranenie enga pésu daserani tiji dagaidi tuté jnupe ome Dupade iji. Enga pésu daserani i nanique enga i u El-Elohé-Israel.
Currently Selected:
Génesis 33: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360