Génesis 27
27
Isaac cho darúja dajnacarode Jacob, Esaú ore ome daru iyiejájnane uje qué idógosi itoringai ome gu
1Mu chise diri nanique uje choquíjnapise Isaac enga e edoparique. Enga tibidi dajnacare urẽjai nanique enga chojninga:
–Esaú á, ¡yabi á!–
Enga ape urẽjai chajnai enga chojninga:
–¿Gotique a? ¿Bajegaitique a?–
2Enga dayé chojninga:
–Bamo uje e choquíjnapise yu. Enga que yirajágo dínique jeta e yitopísi. Mu e idógosi jeta yitoi. 3Yipotigádi tu ujetiga ajna boji, bojodie ore enga be dosipéode iji datã, enga yagu betique to jne. 4Ujetiga ajé uñeque ga be basocáringome ujeta apésu enga uneripise ga yagu to. Uje barajapise basocáringome gu. Ujetiga yiya chagu enga jé u jne gajiné jetiga yo yurúja ua ome yuru iyiejájnane uje qué yiqueca.–
5Mu Rebéca tangári ore uruode iji quedéjnai enga chududipise Isaac uruode ome Esaú. Uje Esaú e doi dayé uruode enga e jnome dosipéode enga Rebéca quítequiguíji Jacob. 6Enga catecã́ri dajnacare ejoi uté enga chojninga:
–Quene yudute bayé uruode ome bayai que. 7Ga uruode u udojo ome que: 'Ajé dosipéode uñeque jne, enga be basocáringome jne enga apésu enga uneripise enga yagu to. Ujetiga yiya chagu enga jé u gajiné jeta yo yurúja ua. Enga Pangarádejnai Dupade tangári yuru iyiejájnane udojo ome ua uje qué yiqueca to.' 8Jecute, yabi á, angaripísi yuruode enga apésu yojningane cucha jne. 9Bo ga ayóji yocachidode pié yui enga be erámoro quedéjna choquírigo iji ujetiga gare ore ujetiga ípiso udore ome dajorane. Enga a yípisi Esaú isocai jne ome yãraquegué enga uneripise jne. Enga a bayé irasiguipise jne. 10Mu a ua u jne ujetiga bo yãraqueguéraque údi aja bayé. Enga jé u jne ujetiga cho darúja ua uje qué eca.–
11Mu Jacob chajnai daté uruode enga chojningame:
–Bamo arĩ́e uje que yojórique cuse. Jé basa itigate ojórãque. 12Ja seca chiraja yu jne ujetiga chisárase yijmanecabode. Enga chisa uje que yojórique cuse. Enga chiraja yu jne enga chose eti yujñiequéo ome. Enga jogadi a u jne ujetiga ca yajneque uru uréone jne ome yu, jé basa ga a yajneque uru gajnarétigo jne jeta chiraja yu.–
13Mu daté chajnai uruode enga chojninga:
–Yababi á, mu bayé cho darúja ua mu a yajneque ojningane cucha jne jeta gajnarécho uruode ome ua jne. Mu aguito ga be yojningane erámoro quedéjna choquírigo ome yu.–
14Enga jé u uje Jacob doi erámoro quedéjna choquíode enga chisi ome daté. Enga jé u uje uaté pésu enga uneréjnapise ãraquegué, enga jé chopise Esaú ãraqueguedie isocade uje uneripise ome Isaac uje Esaú pésu ome dayé. 15Enga Rebéca chimate dãraquegué enga jé noñome iji te enga quítequiguíji daguíjnai. Enga chise ga chijnime Esaú iguidedie uñanie uje ueradei ome iguidedie uñanie. Enga nája dape ejoi Jacob. 16Enga e doi ore yugode erámoro quedéjna aode enga chaníraja dabi gai, enga chichai uñai taja aróbabia, jé basa chichai uñane aja jmanecade. 17Enga jé u uje chojninga:
–De dejã yãraquegué. Asi ome bayé enga átaja arurégode to.–
18Enga jé u uje Jacob jno daté ãraquegué údi aja dayé. Ga chacája dayé jogadi enga catecã́ri dayé enga chojninga:
–¡Iapá! Yicáji bari iji te á.–
Enga Isaac chajnai dajnacari uruode enga chojninga:
–Jé á. Yugúsi de é. Aca ajei to. Yiraja uje yabode jõra ua, mu que yiraja uáguiji ñane a. ¿Jé ua gosi iji yujnacarode uaque a?–
19Enga Jacob chojningame dayé:
–Cachi bajnacare urẽjai Esaú uyu. E yĩri que, enga yujé dosipéode uñai que ome ua. Enga ãriji enga ácariji ti, enga agu yãraquegué to. Jetiga aya chagu jne ga jé u gajiné jeta o barúja yu gajiné.–
20Enga Jacob chajuque dayé aguté uje jĩraque diapo dei dosipeque údi rĩ. Enga jé u uje Isaac chojninga:
–Mu yabi á, ¿jé o ringome que a uje jĩraque bãriápo bei dosipeque údi rĩ, uje qué upo ua mu?–
Enga Jacob chajnai dayé uruode enga chojninga:
–Bangureni Dupa u uje chátaja yu que. Jecute jĩraque yĩri yi dosipeque údi que.–
21Mu dayé chojninga:
–Ajose yi ga yisa babai, jé aja bajmanecade jetiga yisa bojode, jetiga jé Esaú upúsu ua.–
22Ga jé u uje Jacob chose dayé yui ujetiga dayé chisa ojode ujetiga Esaú jé upúsu. Enga Isaac chisa dajnacari gai enga chojningame re: "Yiraja uruode uje Jacob u. Jé basa ga Esaú u ojode iji gai." 23Enga que toc ujetiga chotigase uruode, chamáñaje ojórãque enga chopise Esaú ojode iji gai gu. Mu que cho darúja míraque gotique. 24Enga catecãrápoi rĩ enga chojninga:
–¿Jé ũrepise ua uje Esaú u ua ya?–
Enga Jacob chajnai dayé uruode enga chojninga:
–Ejẽ́, Esaú u yu.–
25Enga jé u uje dayé catecã́ri enga chojninga:
–Yujnacari á, be bãraquegué ga yagu to. Enga jé u ujetiga yiya chagu ga yo yurúja ua jne.–
Enga jé u uje Jacob jno daté ãraquegué údi aja dayé. Enga chátaja víno jetiga chóji to. Enga jé u uje Isaac taque enga chójiapo víno to rĩ. 26Ga jé u uje catecã́ri dajnacari ga chojninga:
–Be, yujnacari, enga acu yuredie.–
27Mu uje Jacob e idógosiji dayé jetiga chucu uredie enga dayé jĩraque chojare iguidedie ujetiga jé ũré enga Esaú u, ga chiraja jetiga Esaú jé upúsu. Mu chojare mu Esaú iguidedie jé ai tupúsu. Enga jé u uje cho darúja dajnacari Jacob, mu jos eti Esaú gajnecho uru iyiejájnane jne. Enga chojninga:
"Ejẽ́, yujnacare bajai ai tu ua uje yojare babai.
Enga bai tuté chopise dosipéode ayode iji erámi uje Pangarádejnai Dupade ichajapicho iji yoquiquéode.
28Yipésupú ga Dupade chisi ome gue jururudie ome ua jõ, enga bacade cucha a jiépisi jne, enga suépise bojode ayoré acadie cucha gai jnese jne.
Enga trígo a jiépisi jne iji bejnai, enga jé cho úvadie jne iji bejnai to rĩ.
29Yipésupú enga pidaisórone a jiei ore jne iji erámi jeta ore doi baroquéode jõ.
Enga a chise diri jetiga erámi unirisórone ore chichaga dagataidie iji jnumi iji baquei jnese jne.
Jé cho to baté ujnacarode uñane, a ore cho deduguéjna cuchábi iji ua to jne enga a ore chichaga dagataidie iji baquei jnese to jne.
Mu jetiga ore áyipiedie gajnaréngome ua jne, enga jé basa ga Dupade áyipiedie gajnaréngome betésoningo ore to jne.
Jé basa ga ujetiga ore áyipiedie omei ome ua enga a Pangarádejnai Dupade áyipiedie omei ome ore to jne."
30Isaac chejna daruode aja guesi ome Jacob uje cho darúja, enga Jacob e jnoji dayé gari, mu Esaú quene di dei dosipeque údi.
31Enga Esaú deréjnarique quéa ome dayé uru iyiejájnane ujetiga gajnecho. Mu qué chãrei dei dosipeque ome dayé, enga jno údi ome dayé. Enga chicáji dayé enga catecã́ri ga chojninga:
–Iapa yá. Ãriji. Uje bajnacari u yu enga yujé dosipei te que, enga agu yãraquegué enga jé u jeta o barúja yu.–
32Enga jé u uje Isaac catecã́ri dajnacari uté enga chojninga:
–¿Jé ua gosi a iji yujnacarode uaque?–
Mu Esaú chojningame dayé uruode:
–Bajnacare urẽjai u yu arĩ́e, Esaú.–
33Enga Esaú chajuguipise dayé aguté. Enga dayé uruode tãrarapise uje chojninga:
–Cachi e yagu ore ãraquegué arĩ́e ga yo yurúja uté gosi que. Enga e yisi ome yuru iyiejájnane ome uté gosi que, enga e gajnecho que, enga e que toc ujetiga qué noñapóji rĩ yuruode ucode.–
34Enga jogadi tu uje Esaú chudute dayé uruode enga popise dejode. Enga chijócha dayé ajei údi enga chojninga:
–¡Iapá! ¡Iapá! ¡Be ga asi ome baru iyiejájnane ome yu to!–
35Mu Isaac chajnai dajnacare urẽjai uruode enga chojninga:
–Besai e chise yu que enga chãra yu que, enga chiese ua u que. Enga uté e jno bajnéone yuru iyiejájnane údi que ome re. Uje yo yurúja ga bajnenguíraso yuru iyiejájnane, mu chijna udore iji bari enga gajnecho jne.–
36Enga Esaú chugúa ujeta dayé cho darúja enga chojninga:
–Yesai Jacob urui qui tu ome yoque uje chisa yujadia aja guesi nanique uje yibaco nanique iji taningai. Enga jé tiógara uje yĩ́caco "Pujadia Isasṍri" taja. Chamáñaje gajnui tupo ujetiga e chisapo yujadia gajiné rĩ, enga chisi ome dãraquegué ome ua bajaque, enga bajagája baru iyiejájnane. Enga e iji yúringai jnacare nanique enga chijnapo yúringai urẽja iji yari to, enga e chijna baru iyiejájnane iji yari to rĩ, uje yajnenguíraso múñi.–
Enga jé u uje Esaú chijóchapíse dayé ajei údi enga chojninga:
–Iapá, ¿ama ca baru iyiejájnaringo uñéngo déji ome yu a?–
37Enga Isaac chajnai Esaú uruode enga chojninga:
–Que toc arĩ́e ujetiga cucha uñeque déji ome ua. Uje jé yingome besai que ujetiga bajneque iroquéode, jé aja bape disi ejórigo ore jnese. Enga yojningame que: "Yipésupú ga bacatígo cucha jiépisi jne jõ: trígo, úvadie ore jnese."–
38Mu jé Esaú chajo raja dayé uje catecã́ri enga chojninga:
–Iapá, asi ome baru chojmarápitique ome yu enga yajneque. Be ga o barúja yu to.–
Enga Esaú e popise enga popise iji dejode.
39Enga jé u uje Isaac cho darúja to rĩ enga chojninga:
"A ca toque jnumi omitigárigo ome ua jne, uje a jecucha idája ua ome jne.
Ga jé cho gue jururudie to rĩ, a ca chisápo ua to jne rĩ.
40Enga a bamajosórone ore chise ua gatuaque jne, enga a jecucha baquesei déji bajmanai jne jetiga adota ua aja ome ore to.
Enga a jecucha ga bepoi besai iroquéode jne rĩ.
Mu a chise diri jne jeta bape disi ejórigo jiépisi ore jne, enga a oyo jmíti, jmíti jne ome Jacob ape disi ejode ore to jne, enga e que toc eti beyopoi ore iroquéode to jne rĩ."
Jacob chayome datigate Esaú nanique enga chicáji ore uniri Harán
41Enga Esaú chetaguipise Jacob uje chijna dayé uru iyiejájnane iji gari gu. Enga chojningame re: "A qué yidotape yu aja jne uje que yajirape jne jetiga iapade topísi, enga jé u jne jetiga e yijóchago ome iapade, enga jé u jne ujetiga jnutaque yu enga a yujépise Jacob jne."
42Chise diri uje ore daté Rebéca chiraja dape urẽjai áyipiedie enga jĩraque tibidi dajnacare ejoi, Esaú desai. Enga chojningame:
–Yudute que uje jnutaque batigate enga pota chujé ua jne. 43Yujnacari á, angaripísi yuruode, enga ayome batigate jne. Enga acáji yajai Labán jne iji ore uniri Harán. 44Enga ácare iji yajábi ore gari jne jé aja ujeta batigate ájningai e íjnoque. 45Ujetiga e iyajmaque ua iji ta enga a ca Esaú jnusinápo jne rĩ uje bajneque bayé uru iyiejájnane. Ujetiga e cha dajé noñaringuéone jne enga jé u jne ujetiga yibicopoi ua jne rĩ. Bamo ujetiga jé ácariji de enga a bayai chujépise ua jne enga a ore chujé uté to jne, enga a íjnonguipíse yujnacarode uaque jne. ¡A bijna uágome yu jnese jne iji dire chojmarárique jne ujetiga ca bo!–
46Enga Rebéca catecã́ri Isaac enga chojninga:
–Yocujnacari Esaú acotedie ore, hitítagotodie udire, ore pésu yujuredie gatuaque iji de. Que yipotapísa jeta Jacob chisa hitítagotóraque to iji puniri Canaán udé. Jetiga Jacob chisa udire uñáraque enga yipota jeta yitoi to enga yachopise uje ore chĩ́care yu gu.–
Currently Selected:
Génesis 27: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360