Génesis 26
26
Isaac ore jno ga ore chicáji ore idai Gerar nanique uje chaguhei chejnapise ore gu iji ore uniri tuté enga ore chucué dabosode iji ore idai Gerar uté
1Mu chise diri uje chaguhénique chise ore nanique enga chaguhei chejnapise ore iji ore uniri tuté. Uje suepise cuchade gai jnese uje qué Abraham jé eca nanique, ga que Abraham chimo cuchade udojo to. Ga jé u uje Isaac ore jno nanique enga ore chicáji ore idai uñai uje i tu Gerar, uje ore eduguéjnai u filistéogosi Abimelec iji puniri uté nanique. 2Jé u nanique uje Pangarádejnai Dupade chiqueta raja Isaac nanique. Enga chojninga: "Ácayoji de jne. Ca acáji ore uniri Egípto to. Enga a yingome baquitígo ome ua jne. 3Mu jé ácariji de jne ore uniri udé. Enga a jecucha yijína ua jne aja bajesúode erámio enga a yáta cuchade aja ua jne gatuaque. Bamo uje e yingo yuruode aja bai nanique, enga jé yuruode u to ome ua jeta bajnecho punirone udojo jnese iji Canaán údode jnese. A jé cho bape disi ejórigo, a ore gajnengápo to jne rĩ. Bai Abraham gajneque yuru iyiejájnane nanique enga que toc jeta ca tocade jne. 4Enga a yipésu jne bape disi ejórigo enga a jiépisi ore jne, enga a ore gajnunie u guédodie iji gatajnoquei. Enga a ore gajneque punirone udojo jnese jne. Enga que gusu udojo mu a erámi unirisórone ore agutíyamánone u bape disi ejórigo jne iji erámi údode jnese. 5Enga a yuruode udojo tocadepise jnese jne gu Abraham uje tangaripísi yuruode nanique enga que chó yiroquei uñeque gánique nanique. Enga doi yojningane cucha ore jnese. Enga tangaripísi yuruode quigode to nanique."
6Jecute Isaac chudute Dupade uruode udojo nanique enga chácariji ore idai Gerar nanique enga que jno. 7Uje qué ore déji ore idai nanique enga ore catecã́ri Isaac nanique ome Rebéca ujetiga acoté u. Enga ore chojninga: "¿Jé bacoté uaté?" Enga Isaac chojninga nanique: "Yẽro uaté." Uje omepise Rebéca nanique gu, jecute Isaac todo jnanione nanique ujetiga uñeque chujé enga chóji Rebéca gari.
8Enga iyajmaque ore iji ore idai uté uje ore chácariji nanique. Mu chise diri nanique uje ore eduguéjnai Abimelec chajire guesi iji ore iguíjnai piago ajámami enga chimo Isaac, Rebéca ore uje chujé Rebéca aja jnumi enga e chiraja uje acoté. 9Jecute eduguéjnai Abimelec chiroque darógode uñai aja Isaac jeta nóna iroi aja eduguéjnai ujeta catecã́ri Isaac. Enga e ore chise eduguéjnai. Enga jé u uje eduguéjnai catecã́ri enga chojninga:
–Cachi bacoté u arĩ́e. Jé ũrepise yu uje bacoté. ¿Gotique gu uje bo bẽro iji diríca?–
Enga Isaac chajnai uruode enga chojninga:
–Yitodo gu jeta jnanione uñeque chujé yu diríca jetiga uñeque pota Rebéca.–
10Mu Abimelec chojningame Isaac:
–¿Gotique gu uje bãra yoque diríca ome bacoté? Jé seca yocuñeque pota ga yoco yoquiba uaté ome Dupade ujetiga yocuñeque e moji uaté gari to.–
11Enga jé u nanique uje Abimelec chingo daruode aja ore iji guidai údode jnese enga chojninga:
–Ujetiga uñeque pésu jnani tuté ajei dotáningane, jeoga abai, jeoga acoté ore ga jé u ujetiga yujégo gosi jne.–
12Ga jé u nanique iji sequeré uje Isaac chutãre to nanique enga pésu dejnai tiji ore idai enga acade cucha jiépisi uje ore na. Chamáñaje Pangarádejnai Dupade chatapísaja nanique gu. 13Enga jé u uje Isaac ugúchade chõrepise re nanique, ga jiépisi. 14Mu chise diri uje ugúcharanguipíse enga filistéogosode ore charatáyime ugúchade udojo, uje aquirájnanie jiei iji gu, jé aja áyasadie, irógode, iróguedie ore rĩ, jiépisi ore to. 15Uje Isaac dayé Abraham qué eca nanique enga ore chijócha yodi yui iji ore uniri uté nanique enga yodi tṍraji ore erugode nanique. Mu uje filistéogosode ore charatáyime Isaac ugúchade ome nanique, enga jé u uje ore chicosája ore erugode udore nanique. 16Enga jé u nanique uje ore ajei dotáningane jiépisi ome ore nanique. Jecute Abimelec catecã́ri Isaac nanique enga chojninga:
–Boyo iji yocari jne uje jiépisi bagúchade gu, ga suépise yocugúchade gáyode iji de, bagúchade udore.–
17Enga jé u uje Isaac jnoji ore idai Gerar uté enga ore chicáji cucarani ijnerai uje i tu "Gerar Gaté" nanique. Enga ore pésu darengúi iji cucarani ijnerai. 18Enga Isaac chiroque darógode aja dayé irógode eru casodica enga ore chijnime ucasedie iji ore erugode ujetiga ore gachidode chójiapo yodi tiji rĩ. Chamáñaje filistéogosode ore chicosája yodi gai ica gu. Uje Abraham qué chijócha derugode iji taningai ica, enga pésu derugode íode. Jecute Isaac jnusina dayé uruode enga chĩ́care dayé ĩcaránaja to.
19Iji dire uñeque nanique enga Isaac irógode chijóchapo derutique uñeque rĩ iji cucarani ijnerai, enga yodi tṍraji enga cho uoo aja guesi. 20Mu filistéogosode ore charatáyime ore ijnimi yote ome ore nanique enga ore chojninga: "A yocajneque yodi jne arĩ́e." Enga jé u uje Isaac irógode, filistéogosode ore botaripise ñane. Udojo quigade enga Isaac pésu ore erui i enga chĩ́care "Pajei Dotáningane Ijnimingóri" taja. 21Enga jé u uje Isaac irógode ore jnopo rĩ ujetiga ore pésapo deruc uñénguiji sañeque. Mu jé isoca uje filistéogosode ore charatáyime ore ijnimique ejoi uté ome ore rĩ. Jecute Isaac pésu i ome ore erui uté to ga i tu "Pujuredie Gajnengore."
22Jec u uje Isaac ore jnopise ga ore chicai ti ga idájapise ore iji ore. Ga jé upo uje ore chijóchapo deruque uñai iji ti rĩ. Ga jé u uje ore cha ore charatáyime ore erui tuté ome ore. Enga Isaac pésapo uté i rĩ enga i tu "Pajéchietaringuéone Gajnengore". Enga Isaac chojninga: "Yipésu udé i uje Pangarádejnai chisi ome pajéchietaringuéone ome yoque iji de enga a ca cuchárique chósi ti iji yoque iji de jne, mu gusu yoquisagode cucha uje a ueracho jnese iji de jne."
23Mu udojo quigade enga Isaac ore jnopo rĩ enga ore chicapóji ore irengúmei Beerséba rĩ. 24Enga e ore chise uté daqui enga jé u nanique enga e dejaque enga Pangarádejnai chiqueta raja Isaac iji dejai. Enga chojningame:
"Bayé Abraham angureni Dupa u yu.
Ca atodo cucha dacatique uje a yijína ua aja quedéjnane jne.
Enga a yátaja ua jne enga a yipésu ua enga bape disi ejórigo jiépisi jne.
Chamáñaje jé yurúo ome bai casicaite Abraham nanique gu."
25Enga Isaac jé u uje doi cucaranenie ujeta pésu daserãtique ome Pangarádejnai Dupade ujetiga tẽra cuchisórique ome Dupade iji gaserani uté. Enga catecãripísi Dupade iji daserani gai. Enga jé u nanique uje ore chácare iji te, enga irógode ore chijóchapo derutique uñeque tiji rĩ.
Isaac, Abimelec ore chisi ome daru iyiejájnane ome ñane nanique
26Mu chise diri nanique uje eduguéjna cuchábi Abimelec jnoji dedai Gerar enga chicáji Isaac irengúi ujetiga catecã́ri. Enga uté jorámei Ahuzat nóna to, jé aja iroguipísi Ficol rĩ, uje uté u uje soldádode ore eduguéjnai tu iji ore jocaningáringo. 27Enga Isaac catecã́ri ore iji quedéjnai enga chojninga:
–¿Gotique gu uje uacabáchopoi yu rĩ? Uje uaquetácho yu nanique enga uacarócho yu aja doi ica.–
28Enga ore chajnai Isaac uruode enga ore chojninga:
–Yimóngopise arĩ́e uje Dupade jõrai tu ua. Jecute yipéco yocáyipiedie ome ua diríca ujetiga yisígo yocuru iyiejájnane ome ñane. 29Yocajéode u arĩ́e jeta ca apésu pocaningárique ome yoque jne. Uje que yujégo uaque gotígo diríca. Baraja uje que yujuséjo uaque diríca enga uacaboyo diríca enga que yujégo uaque. Enga e yirajágo uje Dupade chatapísaja uaque. Jecute be ga yisígo yocuru iyiejájnane jne ome ñane ujetiga pijnoraquei déji yógome ñane.–
30Enga jé u uje Isaac chimesẽre ore áyipiedie ome re. Enga jé u uje ore pésu daninaquei enga ore taguíji ñane gari. Enga Isaac chisi ome dajotai ome ore ga ore chójiapo rĩ. 31Ga ore moji ore irengúi iji dejai, enga uje e dire enga Abimelec, Isaac ore catecã́ri ñane ome daru iyiejájnane. Enga udojo quigade uje Isaac, ore chisi ome daru ũrepísode ome ñane enga ore chajniapója daniri te rĩ. Mu e ore irasique ñane, Isaac urasade, ore urasade ore.
32Enga e ore jno, mu Isaac irógode ore di to iji ore quigade enga ore di yodi ujnomei údi uje ore chijnime yodi iji ore erui. 33Enga Isaac pésu ore erui uté i nanique enga i tu Séba uje ore chisi ome daru uréone ome ñane iji gu, ga Séba urui qui tu gu ome ore nanique. Ga sequeredie jiei iji quigade nanique uje Isaac ape disi ejode ore pésu dedai tiji ore irengúmei casica enga ore chĩ́care Beerséba aja ore idai uté to.
34Uje Isaac ujnacarode uñai Esaú guejnanie sequerei e chise 40 nanique, ga uté chisa dacoté Judit. Enga hitítagose uaté dai nanique enga i tu Beéri. Mu Esaú e chisa dacoté uña nanique rĩ iji dacoté Judit ejode. Enga acoté ejo i tu Basemat. Enga hitítagose uaté dai to enga i tu Elón. 35Mu gajnareque Esaú acotedie ore adode nanique ome Isaac, Rebéca ore uje ore pésu ore ujuredie nanique.
Currently Selected:
Génesis 26: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360