Génesis 28
28
1Enga jé u nanique uje Isaac tibidi dajnacari Jacob enga chojninga: "Uneréjna bei ome yu uje bacáji de. Mu yibidi ua gu ujeta yoco baquique. Enga ca óji uñeque uróraque gari iji yocuniri Canaán udé. 2Mu bo enga acáji báqui casica Betuél uniri Padan-áram, enga ácariji bẽrate Labán gari iji uté jne, enga óji uté urodie uñáraque gari jne. 3Enga yipésupú enga Dupa Pujnuéngaisṍri chatapísaja ua jne jõ. Enga bape disi ejórigo jiépisi ore jne, enga punirone jogosórone a jiépisi uje a ore cho daji ua jnese jne. 4Enga yipésupú ga Dupa Pujnuéngaisṍri cho darúja ua to jõ, jé aja bape disi ejórigo. Enga bajnéone uru iyiejájna chopise yai Abraham gajné cásodicáite uje Dupade cho darúja nanique. Enga jogadi a u jne ujeta araja to uje yocajneque uniri uné údode jnese. Bamo uje qué purása quedéjna yóguiji puniri udé ujade, mu a chise diri jne ujetiga yocajneque. Chamáñaje Dupade jé urúo nanique gu ome Abraham nanique."
5Yojñane udojo quigode u uje Isaac chiroque dajnacari Jacob aja puniri Padan-áram nanique ujetiga chácariji Esaú, Jacob ore daté Rebéca dajai gari iji uté. Uje araméogosi Betuel casicaite ujnacari tu Rebéca dajai Labán uté nanique.
Esaú chicáji jnani bajai Ismael urasade ujetiga chisa dacotéraguiji ore ujade
6Enga Esaú chimópo rĩ uje Isaac chopo darúja Jacob rĩ ome daru iyiejájnane. Enga chudúdapo dayé uruode rĩ uje chirógaja Padan-áram ujetiga chucué dacotéraque iji uté. Enga chudute to uje dayé chijócha Jacob ajei údi ujetiga ca chóji cananéagotóraque gari iji ore uniri uté. 7Enga Esaú chirajapise Jacob uje dopísi dayé, daté ore ojningane cucha, enga jĩraque chicáji ore ojningai punire Padan-áram. 8Enga jé u uje Esaú chirajapise dayé uje chetaque cananéagotodie ore ome dajnacarode ore jnese. 9Enga Esaú uje e chiraja uje dayé chetaque acotedie ome ore úringanie cananéagoto gu quítequiguíji Ismael urasade ujetiga chisa dacotéraguiji ore ujade. Chamáñaje chiraja gu uje dayé Isaac, Ismael ore dai jé chojmarápise nanique gu, enga dáqui casicaite Abraham u ore dai nanique. Enga jé u uje chójiji Ismael uro Mahalat gari nanique uje Nebaiót nero uaté to nanique. Enga cháta uaté aja dacoté cananéagoto ore gari to nanique.
Dupade chiqueta raja Jacob nanique iji dajeque pajei uje chicáji ore idai Harán nanique
10Enga Jacob jnoji Beerséba nanique enga chajna dajei uje chicáji ore idai Harán. 11Mu dejágome iji dajei enga moji guedé eruei iji dajeque pajei. Mu chisa cucarané enga cho dagutádi iji cucarané tuaté enga jé u uje terẽta, enga e mopise. 12Mu urigode cuse uje mo. Ga chĩ́cara uje ore uchiejnane déji uje tṍraji jnumi enga chicáji gatajnoquei. Enga chimo uje Dupade irógode gaté unirísoño ore chuchiéjna aja jnumi yui, enga ore chuchiéjnapo aja gaté rĩ. 13Enga chimópo Pangarádejnai Dupade to uje cháguena ejoi. Enga chudúdapo uruode to rĩ uje catecã́ri. Enga chojninga: "Pangarádejnai uyu, báqui casicaite Abraham angureni Dupa. Jé chopo bayé Isaac rĩ. Angureni upo yu to rĩ. A baniri udé jne uje bamóji pei, enga a yisi ome ua jne, enga a bape disi ejórigo ore gajnengápo jne rĩ iji baquigáningo.
14Enga a jiépisi bape disi ejórigo jne enga a ore gajnui tu jnumi urúrigo jne uje que toque jeta pisecarãte. A bape disi ejórigo ore gajneque puniri udé dosadode jnese, jé iji umusoi garani, jé aja guedé cacadi, jé aja casaque garani, jé aja guedé garani udore ore ujai tudé jnese. Enga a erámi unirisórone, iji erámi údode jnese, a ore chagutíyame ua, bape disi ejode ore jnese jne. 15A jecucha ga yugúsi bejode jne. Enga a yañurupúsu beo jne iji bajesúrigo erámio jnese. Enga yorepoi ua iji puniri udé jne rĩ. Que toc jeta yijíñome ua iji te jmete. Chamáñaje bajneque yuru iyiejájnane jnese gu. Enga que toc ujetiga ca yuru uréone udore tocade ome ua."
16Enga Jacob tṍra re ome darigode enga chojningame re: "Ũré enga Pangarádejnai dépisiji yari iji de, ga quene yirajapise." 17Enga todópisa enga chojninga: "A Pangarádejnai gajneque yimochádi udé jõ, enga puyaguipise. Dupade iguíjnai piagoi a u udé jõ, enga gosi a chacája ga chise gatajnoquei jne."
18Uje qué durasepise enga Jacob niji. Enga Jacob doi dagutadé cucarané enga chisingare enga e cháguena gaté. Enga chijnime aceite iji dagúchade ajei enga chojne cucarané gai, uje gajnui tu gu uje Dupade e gajneque. 19Enga ore pésu dedai tiji Jacob mochádi uté nanique, mu ore cha ga que ayorérique dépoji rĩ. Enga i tu Luz nanique. Mu Jacob chécãre i nanique enga i uñai tu Betel. Chamáñaje Jacob cho Dupade iguíjnai piagoi iji jogadi uté nanique gu. Enga Betel uruode qui jé upúsu ome ore.
20-21Enga Jacob chisi ome daru iyiejájnane ome Dupade to iji cuchade udojo jogadi nanique enga chojninga: "Ujetiga yicatecãraisṍri tuté Dupa dopísi yuruode enga jé u jne ujetiga yopise yangureni iji Pangarádejnai uté jne. Uje yajéode u gu ujeta nóna yu aja quedéjnane jnese, enga chañurupúsu yio iji yiquigode erámio. Enga jé chopome yibotique rĩ ujeta ca chona yu, jé aja yiguidedie ujeta ca chonapo yu rĩ. Enga ujetiga yĩriápo iji yai iguíjnai rĩ tome yúringai uajate jne, enga piquetaque yu ome yajnéone cucha dacate gajnarécho jnese, enga jé u jne uje yirajapise Yangarádejnai uje charanguipise yu enga jé u jne ujetiga yopise yangureni iji uté. 22Dupade á, bamo cucarané uje yisingare que enga obiréjna iji gaté uje cháguena gaté. Uaté u uje chusẽre baguíjnai iji jogadi udé jne. Enga yuru iyiejájnai u udé ome ua: uje a yisi ome yugúcha péode, péode ome ua jne jeta chejna yijmanáyone enga yisi ome chojmarai ome ua gatuaque, jé aja yeruénique. Chamáñaje yiraja gu uje yugúchade jnese garani tupúsu ua to gu, ga jé tiógara jeta yisi ome pei ome ua gatuaque.
Currently Selected:
Génesis 28: Ayore
Označeno
Deli
Kopiraj
Want to have your highlights saved across all your devices? Sign up or sign in
© 2021 Ethnos360