Senesi 23
23
Mate mo le tanu o Sala
1Ko le mauli o Sala na fetuu kau lelau kau lua tupu fitu : ko le lasi a ia o fetuu o le mauli o Sala.
2Na mate loa a Sala i Kiliate-Alepa, leia ko Epelone, i le fenua o Kanaane ; ti na fai loa e Apalaamo le putu o Sala, ti na tagi loa a ia kiate ia. 3Na tuu ake loa Apalaamo i mua o lona mate, o masau feneeki ki vosa o Eti : 4Ko au ko se matapule leia e nofo i lotolotoga o koutou ; kotou soli mai kiate au se tanuma i lokoutou kele, ke kau tanu ai loku mate, ti ke kau too a ia mei oku mua. 5Na tali loa a vosa o Eti kia Apalaamo, o pati : 6Aliki ! fakalogo mai kia matou : Ko se aliki a koe a le Atua i loto malie o matou ; ke ke faitalisa o tanu lou mate i se tanuma fua leia e ke loto ki ai i omatou tanuma ; e leaise tasi o matou e fakafiti atu loa kiate koe lona tanuma ke tanu ai lou mate. 7Na tuu ake loa Apalaamo o punou i mua o le kakai o le fenua, i mua o vosa o Eti. 8Ti na masau loa a ia kia latou, o pati : Kapau e kotou fakataga mai ke kau tanu loku mate, ti ke kau too a ia i oku mata, ke kotou fakalogo mai kiate au ti ke kotou kole kia Efelone, vosa o Tesokale, 9ke tuku mai e ia kiate au le ana o Makepela, leia e maua e ia, i le potupotu o lana faisaga, ke soli mai e ia kiate au ke kau totogi paaga a ia, ti ke liliu a ia ko loku tanuma i loto malie o koutou. 10Na tonatona loa Efelone mo vosa o Eti. Ti na tali loa Efelone, ko le tagata Eti, kia Apalaamo, i mua o vosa o Eti mo latou fuli ala na ulu i le matapa o lona kolo : 11Aliki, fakalogo mai kiate au, e leaise kau tali ke ke totogi. E kau tuku atu le faisaga, ti e kau tuku atu mo le ana leia e tuu i ai. E kau soli noa atu a nea ana kiate koe, i mua o vosa o loku kakai : ke ke tanu i ai lou mate. 12Na punou loa Apalaamo i mua o le kakai o le fenua. 13Ti na masau loa a ia kia Efelone i mua o le kakai o le fenua, o pati : E kau kole atu kiate koe ke ke fakalogo mai kiate au : E kau soli atu le totogi o le faisaga, ke ke tali a ia, ti e kau tanu loa i ai loku mate. 14Ti na tali loa Efelone kia Apalaamo : 15Ei loku Aliki, fakalogo mai kiate au ! Ko se kele e kau lelau fa paaga siliva, kolea le uiga o le nea lena i loku vasaa mo koe ? Koia, ke ke tanu i ai lau mate. 16Na matala loa Apalaamo kia Efelone ; ti na fua loa e Apalaamo kia Efelone le lasi o le paaga leia na fakasa e ia i mua o vosa o Eti, ko fa paaga siliva e kau lelau fa, i le paaga leia na fakaaoga e le kau.
17Ko le faisaga a Efelone i Makepela, i le potu esite o Mamele, le faisaga mo le ana leia na tuu i ai, ti mo laakau fuli ala na tuu i loto o le faisaga, 18na maua fuli loa latou e Apalaamo, o fakamaoki ki ai a vosa o Eti mo latou fuli ala na ulu i le matapa o le kolo. 19I le oki o le nea lena, na tanu loa e Apalaamo a Sala, lana avaga, i le ana lena na tuu i le faisaga o Makepela, i le potu esite o Mamele leia ko Epelone, i le fenua o Kanaane. 20Na fakalaka loa le faisaga mo le ana leia na tuu i ai mei lima o vosa o Eti, o liliu loa ko le kele o Apalaamo ke tanu ai ona mate.
Currently Selected:
Senesi 23: FB2000
Označeno
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020