PIANPATNAK 15
15
Pathian le Abram Thutepdunnak
1Mahnung ten Abraham in muhnak nei in, Topa in, “Abram, lau hihim pahsun. Keimah in lauhuainak sung pen nangmah hup tung a, na thaman ngengzet tuk hi,” tin hilh hi.
2Mahnaven Abram in, “Topa, Ka Pathian, i pia tuk nge cim? Ca le nei mang. Ka thaman cu i hi tuk nen tim? Ka lo le lam luahtu cu Damaskas khua a, Eliezer bek hi. 3Ca pa khatno hei pia ma ci, mah hangin ka lo le lam cu ka salpa pa khatin, a luah kul,” ti hi.
4 Topa in, Abram lakah a hilh lehnak a zakmi cu, “Hi na salpa hi na lo le lam luahtu hi tukma hi; na lo le lam luahtu cu nangma capa ngangai hi tuk hi,” tin hilh hi. 5Topa in, Abram cu pualamah tulpihin, “Van khi zo inna, aksi khi sial hemin, na sial thei tale, mah aksi zah tamin casuan nei tuk ci,” ti hi.#Rom 4:18; Heb 11:12;
6Abram in, Topa cu umin, mah a upnak cu Topa in, a dikcangnakin sang hi.#Rom 4:3; Gal 3:6; James 2:23;
7 Topa in, Abram lakah, “Keimah cu Topa ing. Hi ngam hi nata hi tukin Babilon ngam Ur khua pen a puitultu ing.”
8Mahnaven Abram in, “Topa aw, itin kaw kata hi, tih ka theihtheih tuk?” tin dong hi.
9Pathian in, “Ka lakah kum thum khui la, kum thum keel la, kum thum tuu cang, khulo pa khat le laileng pa khat hunpihin,” ti hi. 10Abram in, Pathian nelah a venghawngin hunpihin, a laizang pepan khen nihin khen a, khenkhat cu a dang khenkhat maiah a zawkdunin thuang nihin koih hi; vano cu khen ma hi. 11Musia ten a cik cu tan haw naven Abram in hawlvawk hi.
12Taklam ni tum susul ten Abram cu a hihbu cizet laihin, a humah a lauhuai, mulling hah na heng hi.#Job 4:13-14; 13Topa in, a lakah, “Na casuante cu ngamdangah mi vakvai in suak haw tuk hi. Mah ngamah sal hi haw tuk a, kum za li sung bawlsiatmi hi haw tuk hi.#Suah 1:1-14; Nung 7:6; 14Mahnaven na casuan a siatsuahtu ngam cu bawlsia tung; thil tamzet tuahin, mahlai mun pen tul haw tuk hi.#Suah 12:40-41; Nung 7:7; 15Nang cu cangkimno in, khukludual tian nungca tuk ci a, lungmuang zetin thi in, na pu le na pa i lakah heng tuk ci. 16Na casuante cu khang li nungten hi ngamah kikleh haw tuk hi; itahim titale hilai a, Amor mite hi mipha ngawl zetin suak haw tuk a, bawlsiatnak a tawh haw bek ten hi ngam pen hawlvawkleh tung hi.”
17Ni tumin, khua a thim nungten, thakhatin khu to in, a khu limi beel le meilah alhte langin cik thuang nih a koihmi laklawh pen meialh cu hawhvawk hi. 18Mah ni-in, Topa in, Abram lakah thutepnak bawlin, “Hi ngam hempoh hi, na casuan tei lakah pia tung, tin tiam ing. Izipt ngamngi lui pen Eufrates ngun tian hi tuk hi.#Nung 7:5; 19Ken ngam, Kenis ngam, Kadmon ngam, 20Hit ngam, Periz ngam, Refaim ngam, 21Amor ngam, Kanaan ngam, Girgash ngam le Jebus ngam tel tuk hi.”
Currently Selected:
PIANPATNAK 15: NBF1
Označeno
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.