PIANPATNAK 11
11
Babel Suangtian
1Nidang laihin, leihummi hempohin, awn pa khat bek nei in, kammal bangtenin mang haw hi. 2Nisuahnak lamah vai haw in, Babilonia phillawn hengin mahlaiah khuasat haw hi. 3Amuh ten pa khat le pa khat lakah, “Hung hem un, ukkhe bawlin, mei ah haal nung,” tin pa khat le pa khat tidun haw hi. Inn saknak tukin ukkhe nei in, a kopnak tukin thung bawl haw hi. 4Mahceng ten, “Eimu ca tukin khuapi bawlin, van tawngkha tiangin, suang tiang tuk hung. Eimu ca in min nei bok hen; mahten leihum khua le ngam hempoh ah khenkhek ngawlin um tuk hung hi,” tin ti haw hi.
5 Topa cu mihing tei bawlmi khuapi le suangtian zo tukin hung hi. 6“Zo hem un, hite hi a venghawng haw in, hinnam nam khat hi haw a, awn pa khat mang haw hi. Hi cu a bawl nuam haw mi a patnak bek hi laih hi. A ngei um ngawlin a bawl nuam haw hempoh bawl thei haw tuk hi. 7Mah hangin hawhsuk nung inna, pa khat le pa khat a awn haw theidun tuk ngawlin, a awn haw cokpolh khawng nung” tin ti hi. 8Mah hangin, Topa in mihingte cu leihum khua le ngam hempoh ah khenkhek khawngin, khuapi cu sa suak haw ma hi. 9Mah khuapi cu Babel#11:9 Babel tihmi cu Babilon tih tuah bangten, Hebru awnin cokpolh khawng tihnak hi tin ti haw hi. Itahim titale, Topa in mahlaiah mihing tei awn cu cokpolh sak khawng hi. Mahlai mun pen Topa in amuh cu leihum khua le ngam hempoh ah khenkhektik khawng hi.
Shem Casuante
(1Khang 1:24-27)
10Shem i casuante cu a nuailam bangin hi haw hi. Tuihautung ceng kum nih ten, Shem cu kum za khat kimin capa pa khat Arpakshad nei hi. 11Mahnung ten kum za nga nungdamin, ca dang vang nei hi. 12Arpakshad cu kum sawm thum le kum nga a kim ten capa Shelah nei hi. 13Mah nungten kum za li le kum thum sung nungin, ca dang vang nei hi.
14Shelah cu kum sawm thum a kim ten capa Eber nei hi. 15Mahnung ten kum sawm li nungin, ca dang vang nei hi. 16Eber cu kum sawm thum le kum li a kim ten capa Peleg nei hi. 17Mah nungten kum za li le sawm thum nungin, ca dang vang nei hi.
18Peleg cu kum sawm thum a kim ten capa Reu nei hi. 19Mah nungten kum za nih le kum kuah nungin, ca dang vang nei hi.
20Reu cu kum sawm thum le kum nih a kim ten capa Serug nei hi. 21Mah nungten kum za nih le kum salih nungin, ca dang vang nei hi. 22Serug cu kum sawm thum a kim ten capa Nahor nei hi. 23Mah nungten kum za nih nungin, ca dang vang nei hi.
24Nahor cu kum sawm nih le kum kuah a kim ten capa Terah nei hi. 25Mah nungten kum za le sawm le kum kuah nungin, ca dang vang nei hi.
26Terah cu kum sawm salih a kim ten capa pa thum Abram, Nahor le Haran nei hi.
Terah Casuante
27Terah i casuante cu Abram, Nahor le Haran hi. Haran cu Lot i pa hi. 28Haran cu a pa Terah a nunlaihin, Khaldea ngam, a piannak Ur khua ah thi hi. 29Abram in Sarah huai in, Nahor in Haran i canu Milkah huai hi. Haran cu Iskah i pa hi. 30Sarai cu ca nei ma hi, itahim titale micing hi.
31Terah in, a capa Abram le Haran tei ca, a tupa Lot le Abram i zi Sarai cu samin, Kanaan ngam hawh tukin Khaldea#11:31 Khaldea hi Babilon tih hei in sam theih hi. ngam Ur khua pen tul hi. Mahnaven Haran khua tian hawh haw in, mahlaiah um haw hi. 32Terah cu kum za nih le kum nga a kim ten Haranah thi hi.
Currently Selected:
PIANPATNAK 11: NBF1
Označeno
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.