PIANPATNAK 10
10
Noah Casuante
(1Khang 1:5-23)
1Tuihautung nung, Noah i capa Shem, Ham le Jafet tei hinmi casuante cu a nuailam bangin na hi haw hi. 2Jafet i capate cu Gomer, Magog, Madai, Javan, Tubal, Meshek le Tiras hi. 3Gomer i capate cu Ashkenaz, Rifath le Togarmah hi. 4Javan i capate cu Elishah; Spain, Cyprus le Dodamin mite na hi haw hi. 5Amuh cu tuipi mawk le tuikulh hum a ummi, hinnam tei cikhaihtu haw hi. Jafet i casuante hi haw a, amu hinnam le awn tek mangin ngam dadangah um haw hi.
6Ham i capate cu Kush, Izipt, Libya le Kanaan hi. 7Kush i capate cu Seba, Havilah, Sabtah, Raamah le Sabteka hi. Raamah i capate cu Sheba le Dedan haw hi. 8Kush i capa pa khat cu Nimrod hi, amah cu leihumah a masabel mi nehtu minthang hi. 9Topa i bopnakin amah cu sakap minthangin cang a, miten, “Nimrod bangin Topa in sakap minthangin, bawl tahen,” timek haw hi. 10Nimrod i ukmi ngam masabelte cu Babilonia ngamsung a ummi Babilon, Erek le Akkad ngam thum hi. 11Mahlai ngam pen Assiria ngamah hawhin, Nineveh Rehoboth Ir, Kalah, 12Nineveh le Kalah khuapi laklawh a ummi Reson khuapi toh hi.
13Izipt cu Lydia mi, Anam mi, Lehab mi, Naftuh mi, 14Patrus mi, Kasluh mi le Kaftor mitei pa hi. Filistin mite cu Kaftor i cikhaihmi na hi haw hi.
15Kanaan cu a capa upabel Sidon le a nau Heth le 16Jebus mi, Amor mi, Girgash mi, 17Hiv mi le Arka mi, Sin mi, 18Arvad mi, Zemar mi le Hamath mitei pa hi. Mah nungten Kanaan i casuante cu pungzai haw in, 19a ngam haw cu Gerar lamah Sidon pen Gaza tian, mahten Sodom, Gomorrah, Admah le Zeboiim lamah Lasha tian zal hi. 20A hite hi, Ham i casuante haw a, ngam dadangah amu hinnam le awn tek mangin um haw hi.
21Jafet i u Shem cu ca dang vang nei in, Hebru mi hempoh cikhaihtu hi. 22Shem i capate cu Elam, Asshur, Arpakshad, Lud le Aram hi. 23Aram i capate cu Uz, Hul, Gether, le Meshek hi. 24Arpakshad cu Shelah i pa hi, Shelah cu Eber i pa hi. 25Eber in capa pa nih nei hi. Pa khat cu Peleg tin sam haw hi, itahim titale Peleg khan laihin leihum mihingte cu khenkhek khawng haw hi. A nau pa i min cu Joktan hi. 26Joktan i cate cu Almodad, Shelef, Hazarmaveth, Jerah, 27Hadoram, Uzal, Diklah, 28Obal, Abimael, Sheba, 29Ofir, Havilah le Jobab hi. Hite hi a venghawng haw in Joktan i capate hi haw hi. 30A umnak haw ngam cu Mesha pen Sefar lamah nisuahnak lam mualhum ngam tian hi. 31A hum a, hinnamte cu Shem i casuante hi haw a, ngam dadangah amu hinnam le awn tek mangin um haw hi.
32Hite hi Noah i casuante na hi haw a, amu hinnam tekin, hinnam tampi suak haw hi. Tuihautung nungten leihum hinnam hempoh cu Noah capa tei cikhaihmi haw hi.
Currently Selected:
PIANPATNAK 10: NBF1
Označeno
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.