Luka 11
11
Yesu asambisha ukulomba
(Mat. 6.9-13; 7.7-11)
1Ubushiku bumo Yesu alimukulomba muchifulo chimo. Ulo ashilile, umo uwabakusambila bakwe aebele Yesu ati, “Bashikulu, tusambisheniko ukulomba kubati nimfilya Yohane asambishe abakusambila bakwe.”
2Yesu asosele kuli bo ati, “Ulo mukolomba, mulokusosa ati,
‘Bata,
ishina lyenu lichinshikwe,
Ubufumu bwenu bwise.
3Mutupele lelo ichakulya chesu ichanshiku shonse,
4Mutunakilileko amabifyo esu,
ukubati nimfilya tunakilila bonse abatubifisha.
Mwitulekelesha mukwesheka!’”
5Nakambi Yesu asosele kubakusambila bakwe ati, “Kati umo uwaku mwebo aya kunanda yakuchibusa wakwe pakati kabushiku nokuti kuli ye, ‘Nkongolako imifuba itatu. 6Chibusa wanji uuli palwendo afika bwangu kunanda yanji, tanshikwetepo chakumupela!’ 7Napo uuli mukati kananda nga alyasukile ati, ‘Winsunsha! Pakuti ndiseleko. Elo nebo nabana banji tulilele akale. Tekuti mbuke nokukupela ifyo ukolomba.’ 8Chiweme, mukotipo shani? Nangu kati takoyisa kubuka nokukupela webo imifuba pakuti nichibusa obe, wakubuka nokukupela fyonse ifyo akofwaya pantu tauli nansoni shakutwalilila ukumulomba.
9“Echo nkomweba ati, lombeni, elo mwakupelwa. Fwayeni, elo mwakusanga, konkonsheni, elo mwakwiswilwa. 10Pakuti onse uulomba alapelwa, uufwaya alasanga, nangulya uukonkonsha aleswilwa. 11Napo ninani pali mwebo ulo umwana wakwe amulomba inswi angamupa insoka? 12Nangu nga amulomba ilini, elo amupela akamini? 13Nomba nga mwebo mwe babi mfi mwalishiba ukopela abana benu ifiweme, mba Bawishinwe aba mumulu kuti bafilwa shani kupela Umupashi Wabuta kuli bo abakomulomba!”
Yesu na Belesebule
(Mat. 12.22-30; Mk. 3.20-27)
14Yesu alikufumya umupashi uubi mumuntu uwali chibulu. Ulo umupashi ngulya wafuminemo, umuntu atatikile ukusosa. Echo namabumba abantu alishimbilwe ukwinekantu. 15Nomba bambi abamwibumba baebele ati, “Ni Belesebule, umukulu wa mipashi iibi, ewamupela Yesu ifiso fyakutamfishako ifibanda.”
16Bambi bafwayile umwakwikatilamo Yesu, kanshi bafumbile Yesu ukuti achitepo ichafiso ifikulu ichakulanga ukuti afuma kuli Lesa. 17Nomba Yesu alishibile ifyo balikulanguluka, elo asosele kuli bo ati, “Ichalo chonse ichabanika mumabumba nokutatika ukulwa abene benka tachikokolapo. Ulupwa ulwabukilana lulapatukana. 18Echo ubufumu bwakwa Satana bwayimina, kuti bwakokola shani? Mwebo mwanjeba ati ntamfya imipashi iibi pantu Belesebule, imfumu yamipashi iibi, eumpela ifiso fyakuchita mfi. 19Kati ntamfya mipashi iibi nefiso fyaku Belesebule, mba abakusambila benu bafitamfya nefiso fyaku nani? Abakusambila benu balishininkisha ukuti mwaliluba! 20Iyowo, nimunshila yafiso fyaku Lesa emo ntamfishamo imipashi iibi. Nku ekushininkisha ukuti Ubufumu bwaku Lesa bulifikile pali mwe.
21“Kati umuntu uwafiso, uuli nefyakulwila akochingilila inanda yakwe, ekwebati ifintu fyakwe filichingililwe bwino. 22Nomba umuntu uwamuchilapo ifiso nga ayisa kumulwisha nokumuchimfya, kuti apinta ifyanso fyonse mfilya abikamo umutima alumbako nabantu bakwe ifyo ebile.
23“Umuntu uutasuminishanyapo nandibo mulwani wanji, noutangafwako ukulonganya, alasalanganya.
Ukubwela kwamupashi uubi
(Mat. 12.43-45)
24“Ulo umupashi uubi wafuma mumuntu, uya ulo wendauka kumulundu ukofwaya ichifulo chakutushishapo. Nga tausangilepo ichifulo, ulayisosha uwine wenka ati, ‘Nkobwelela kunanda yanji uko nafumine.’ 25Ulo wabwelela, wasanga tamupo ichilimo, muliweme nokusungwa bwino. 26Elo ulafuma nokuya kuleta imipashi inakwe isano na ibili iibipile ukuchila wo. Elo ikoyisa kwinjila nokwikalamo. Kumupwilo, ngulya muntu aba uubipile ukuchila ifyo ali pakwamba.”
Ishuko linenene ifyo lyaba
27Ulo Yesu asosele nchi, umwanakashi umo uwali mwibumba asosele kuli Ye ati, “Alishuka umwanakashi uwakufyele nokukonsha!”
28Nomba Yesu alimwasukile ati, “Ina, ukuchilapo abashuka nimbalya abakoumfwa amashiwi aku Lesa nokuasunga!”
Ukufwaya ichafiso ifikulu
(Mat. 12.38-42)
29Ulo abantu balongene nokumushinguluka, Yesu abebele ati, “Amba banjino nkulo babipile! Bafwaya ukubona ifyafiso ifikulu. Nomba tabakafibonepo, sembi ichachitikile kuli Yona musoseshi.#Yon. 1.17 30Munshila yenka iyo Yona abelelelemo ichishibilo chabantu baku Ninive, efyo no Mwana wa Muntu akuba ichishibilo chabantu abanomba. 31Pakasuba kakupingulwa, nyina-mfumu waku Sheba akwisa kwimakana nokumupela umulandu, pantu afumine kumpela yachalo ukwisa mukumfwa ukusambisha ukwamulangwe kumfumu Solomoni. Nomba nkomweba nati, epo ali mpano uuchilile Solomoni.#1 Ishamf. 11.1-13 32Pakasuba kakupingulwa abantu baku Ninive bakwisa kumupela umulandu pakuti balilekele ukuchita ifibi ulo baumfwile ukusambisha kwakwa Yona. Nomba nkomweba nati, epo ali mpano uuchilile Yona!#Yon. 3.5
Inyali yamubili
(Mat. 5.15; 6.22-23)
33“Takupo umuntu uusanika inyali nokuyifisa nangula ukwifunikapo imbale, kuntu akoyibika pachakwikatila chayiko ukuti bonse abakoyinjilamo babone ukusanika kwayiko. 34Amenso enu enyali yamubili wenu. Nga amenso enu alibwino, nomubili wenu wakuwama. Nga amenso enu taali bwino, nomubili onse wakuba mumfinshi. 35Chenjeleni ukuti ukusanika ukuli muli mwebo kwibamo imfinshi. 36Kati umubili obe uliwilemo ukusanika, takupo ichili mumfinshi, wakuba bwaka mukusanika. Wakuba ati ninyali ikolanga umubili obe ulo ikosanika pali webo.”
Yesu akalipila Abafalisi na basambishi ba Mafunde
(Mat. 23.1-36; Mk. 12.38-40)
37Ulo Yesu ashilile ukusosa, Umufalisi umo alimwitile mukulya kunanda yakwe. Yesu ayile nokwinjila munanda ukuti balye. 38Umufalisi umo alishimbilwe pakubona Yesu tasambilepo kuminwe pakulya. 39Elo Yesu asosele ku Mufalisi ngulya ati, “Mwebo mwe Bafalisi, musamfya kunse yankombo nembale, nomba mukati kenu mwayiula bwaka ubuchenjeshi nobusali. 40Mwe fipuba mwe! Napo Lesa uwabumbile ichakunse teyepo enka uwabumbile nechamukati? 41Nomba peleni ifili munkombo namumbale kubachula, epo nefintu fyonse fyakuba ifiweme kuli mwe.
42“Ishamo kuli mwebo, mwe Bafalisi! Mupela kuli Lesa ichekumi afyamumabala yamusalu, ifilinga minte, luwe nafimbi ifyamusalu, kuntu mulasula ubulungami nokutemwa kwaku Lesa. Mfi efyo mulingile ukuchita ukwambula ukusulapo fimbi.
43“Ishamo kuli mwebo, mwe Bafalisi! Mwatemwa ifipuna fyakuntanshi munanda yakulombelamo Lesa, nokupelwa umutende uwamuchinshi mufifulo fyamakwebo. 44Ishamo kuli mwe! Mwebo muli kubati nimanda ishitabikwapo#11.44 nimanda ishitayishibikwapo: Boneni pa Impend. 19.16. ifishibilo, isho abantu bendapo ukwambula ukwishiba.”
45Umusambishi wa Mafunde umo asosele ati, “We musambishi, pakusosa mfi watusalula nafwebo.”
46Elo Yesu alyasukile ati, “Ishamo kuli mwebo, mwe basambishi ba Mafunde! Mutwika abantu ifipe pamabeya ifyalema ukupinta, kuntu mwebo tamwimyapo nakanantengelesha mukwafwilishako ukupinta mfi fipe. 47Ishamo kuli mwebo, mwe mwimaka imanda ishelele, ishabasoseshi abo ifikolwe fyenu fyayipeye. 48Ekwebati mwebo mukosuminisha nokushininkisha ifyachitile ifikolwe fyenu, fyayipeye abasoseshi elo mwebo mulemaka inshinshi shabo? 49Pali ngu mulandu, Lesa mumulangwe wakwe, asosele ati, ‘Nkoyisa kubatumina abasoseshi nabatumwa bambi bakubepaya, elo bambi nabo bakubachusha.’#Yel. 7.25-26 50Echo abantu bamuli njino nshita bakwisa kupelwa umulandu pamulandu wabasoseshi bonse mwayipeye, ukufuma kukutatika kwachalo. 51Ukutula apo bayipayile Abeli ukufika kuli Sekaliya,#11.51 bayipayile Abele ukufika kuli Sekaliya: Boneni pa Ukut. 4.8: 2 Imil. 24.20-21 uwo bayipeya pakati kachipupililo chananda yaku Lesa iyapatulika. Nkomweba nati, abantu bamuli njino nkulo bakwisa kupelwa umulandu pali mfi fyonse!
52“Ishamo kuli mwebo, mwe basambishi ba Mafunde! Mwalifisa imfungulo yananda yamano. Mwe bene tamwakenjilemo nakambi, kuntu mulakanya nabafwaya ukwinjilamo!”
53Ulo Yesu afumine pali nchilya chifulo, abasambishi ba Mafunde na Bafalisi batatikile ukumulengulula ukwinekantu nokufumba amafumbo pafintu ifinji. 54Balikufwaya inshila yakumwikatilamo kati Ye akusosapo ichintu ichitalungeme.
Currently Selected:
Luka 11: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.