Luka 10
10
Yesu atuma abakusambila 72
1Panuma yaku nchi, Bashikulu basalile abalalume bambi amakumi asano na abili nabantupo babili,#10.1 amakumi asano na abili nabantu babili: Pambi bakoti amakumi asano na abili. nokuti batanjile babili-babili kumisumba nakufifulo fyonse umo umwine ali nokuya. 2Elo Yesu abebele ati, “Ubulobololo bukulu, kuntu abakulobolola bache. Echo lombeni kumwine wabulobololo ukuti atume abakulobolola nabambi abakumulobolwelako. 3Kamuyeni! Nkomutuma mwebo kubati bana bambelele pakati kamimbulu. 4Mwipintapo chikwama chandalama, itumba lyakupulilamo nangula inkwabilo. Nakambi mulokuposa inshita mukuposhanya umutende#10.4 ukuposhanya umutende: Abasunga akafuto ka Chiyuda akakuposhanya umutende panshila, nga balichelelwe ukwinekantu (2 Ishamf. 4.29). panshila. 5Elo munanda yonse iyo mwayinjilamo musose ati, ‘Umutende ube muli njino nanda.’ 6Kati muli njilya nanda mwayikala umuntu uwatemwa umutende, lekeni umutende wenu ube pali ye, kati tefyopo umutende ubwelele kuli mwebo. 7Ikaleni muli iyo nanda yenka, mulye nokunwa fyonse ifyo bamupela pantu umubomfi alinga ukulipilwa. Mwilokwendauka mumananda. 8Lonse ulo mwayinjila mumusumba nabantu bamupokelela, lyeni fyonse ifyo bamupela. 9Posheni abalwele abali muli uyo musumba. Elo soseni kuli bo ati, ‘Ubufumu bwaku Lesa buli apepi namwe.’ 10Ulo mwayinjila mumusumba nga tabamupokelelepo, kamuyeni mumisebo nokusosa ati, 11‘Nolukungu lwamumusumba wenu ululi kumakasa esu, twalukuntila kuli mwebo. Nomba ibukileni ukuti ubufumu bwaku Lesa buli apepi namwe.’ 12Nachine nkomweba ati pakasuba kabupingushi, Lesa akupa umulandu uukulu kuli ngulya mushi ukuchila uwo apele kumushi wa Sodomu.#10.12 Sodomu: Boneni pa Ukut. 19.24-25.
Imishi iyambula chichetekelo
(Mat. 11.20-24)
13“Yangwee, ubulanda kuli webo Kolasine! Yangwee ubulanda nakuli we Betesaida?#10.13 Kolasine… na Betesaida: Nji mishi yaku Galili uko Yesu achitile ifyafiso ifikulu. Nomba abantu bankulya tabapilibwike imitima yabo nokuchetekela Yesu Klistu. Nga chakwebati imilimo iyafiso ifikulu iyachitilwe muli mwebo yachitilwe muli Tule na Sidoni,#10.13 Tule na Sidoni: Mishi yabenafyalo iili kumutule-suba, ukutali na Galili. Tayakwetepo ishuko lyakumfwako kumashiwi aku Yesu nokubona ifyafiso fyakwe ifyo alikuchita kubati nimfilya babwene abaku Kolasine na Betesaida. abantu bankulya, kale-kale nga balifwite amasaka#10.13 balifwite amasaka: Ukufwala amasaka nokuyitila imitoyi chalikulanga ifyo baebelele kumabifyo abo nokupilibuka kwamitima yabo (2 Ishamf. 19.1; Neh. 9.1; Esit. 4.1; Yob. 2.8; Dan. 9.3; Yon. 3.5-6). nokuyitila imitoyi ukulanga ukuti balapila kumabifyo abo! 14Nachine nkomweba ati, Lesa akukwatila inkumbu abena Tule na Sidoni pakasuba kabupingushi ukuchila mwebo! 15Nawebo Kapenaumu,#10.15 Kapenaumu: Pali Mat. 9.1 umushi ngu ukoyitwa ati, Kumwabo Yesu (Boneni pali Yoh. 2.12). Kwenka nkulya Yesu aposeshe abantu abenji (Mk. 1.21,29; 2,3. 5.41; Luk. 6.6; Mat. 8.5; Yoh. 4.46). napo wasumbulwa ukufika nakumulu? Iyowo, wakwisa kuposwa mumulilo uutashimapo!”
16Nakambi Yesu asosele kubakusambila bakwe ati, “Uyo onse uwakumfwa kuli mwebo, ekwebati nikuli nebo akoumfwa, nangulya onse uwakumukana mwebo, ekwebati ninebo akokana. Epo onse uwakunkana nebo, ekwebati akana na uyo uwantumine.”
Abakusambila 72 babwela
17Elo abatumwa mbalya amakumi asano na abili nabantupo babili babwelele abasekelela. Basosele kuli Yesu ati, “Mwe Bashikulu, imipashi iibi yalikutumfwila ulo twayikalipile mwishina lyenu.”
18Yesu alibasukile ati, “Nabwene Satana akowa ukufuma kumulu kubati kampeshi-mpeshi. 19Umfweni, namupela ifiso ifyakunyantilapo pansoka napatumini, nokuchila pafiso fyakapondo. Tapali akantu akakumuchenesha nangu panini. 20Nomba mwisekelela nanchi ichakuti imipashi iibi ikomumfwila, kuntu sekeleleni pakuti amashina enu alilembwa kumulu.”
Yesu asekelela
(Mat. 11.25-27; 13.16-17)
21Pali njilya nshita, Yesu asekelele mu Mupashi Wabuta nokuti, “Bata, mwe Shikulu wakumulu nechalo! Nkomutotela pantu mwalanga mfi ifintu kubatasambilila ifyo mufishile kubamano nabasambilila. Ina, Bata, nchi echo mwatemenwe ukuti chichitikwe mukufwaya kwenu.
22“Bata balimpela nebo ifintu fyonse. Takupo nangu umo uwayishiba Umwana sembi Bata benka, nakambi takupo uwayishiba Bata, sembi Umwana enka nambalya Umwana asala ukubafisulwilako.”
23Elo Yesu ayalukile kubakusambila bakwe ulo bali apabenka nokubeba ati, “Mwaliba abashuka pakubona ifintu ifyo mukobona. 24Nebo nkomweba nati, nangu basoseshi nabakalonga abenji bafwayile ukubona mfi mukobona mwebo, kuntu tabafibwenepo, nangula ukumfwa kubati mwebo, kuntu tabafyumfwilepo.”
Ichelusho chamwina Samaliya uuweme
25Umusambishi wa Mafunde ayishile kuli Yesu nokumwesha ati, “We musambishi, nakuchita shani pakuti nkapyane ubumi butapwa?”
26Yesu alimwasukile ati, “Nga Amalembo Apatulika asosa shani? Nga we uyalondolola shani?”
27Amwasukile ati, “‘Ulokutemwa Bashikulu Lesa obe nomutima obe onse, nobumi bobe bonse, nefiso fyobe fyonse, namano obe onse.’ Nakambi, ‘Ulokutemwa umunobe kubati nimfilya wayitemwa wemwine.’”#Deut. 6.5
28Elo Yesu amwasukile ati, “Wayasuka bwino, ulokuchita fyenka mfi, elo wakupoka ubumi butapwa.”
29Nomba umusambishi wa Mafunde ngulya alikufwaya ukuyilungamika, elo afumba Yesu ati, “Nga mwinamupalamano wanji ninani?”
30Yesu amwasukile ati, “Umuntu umo afumine ku Yelusalemu nokuya ku Yeliko. Munshila utupondo twalimuwilile, twamupokolola fyonse ifyo akwete. Elo twamupamine nokumusha akopesha bwaka. 31Elo kwabonekele chipupila naye alimukupita muli njilya nshila. Ulo afikile apalele umuntu, amubona, asasawila namumbali, aya nokuya. 32Umwina Lefi naye apitile munshila imo yenka, alishile kupita pachifulo nchilya. Watile ukumubona alilele, naye alisasawilile nokupita mumbali. 33Nomba umwina Samaliya umo uwali palwendo mwenka muli njilya nshila, afikile pali ye. Ulo amubwene, umutima wakwe wayiwile nenkumbu. 34Ayile apo alele, aayitile amafuta nawaini mufibenga fyakwe nokumukakapo insalu. Elo amutekele pali punda wakwe, amutwala nakunanda yabalwendo uko alikumutensha. 35Ubushiku bwakonkelepo, Musamaliya ngulya abulile indalama shibili apela kumubomfi wananda iyabalwendo nokumweba ati, ‘Ulokumutensha bwino, shonse isho wakuposa pakumutensha, nakwisa kukubwesesha ulo nakubwela.’”
36Ulo Yesu ashilile ukusosa nchi chelusho, amufumbile ati, “Mukulanguluka kobe, ninani uwaku mba batatu uwapyungile nga mwina mupalamano waku ngu muntu uwo utupondo twawililepo?”
37Umusambishi wa Mafunde alyasukile ati, “Ningulya uwamukwatile inkumbu.”
Yesu amwasukile ati, “Koya nawebo efyo ulokuchita.”
Yesu atandalila Maliya na Malita
38Ulo Yesu nabakusambila bakwe bali palwendo lwabo, bayishile kumushi umo uko umwanakashi uwalikwitwa Malita alikwikala. Elo umwanakashi ngu amupokelele munanda yakwe. 39Malita naye akwete inkashi inakwe iyalikwitwa Maliya. Eye wayikele apepi kumakasa aku Bashikulu nokumfwa kukusambisha kwabo. 40Panshita nji Malita alisakamikilwe kumulimo alikupyunga, elo ayishile nokusosa kuli Yesu ati, “Bashikulu, napo tamusakamikilwepo ukuti inkashi inanji yandekelesha nenka ukubomba fyonse? Mwebeni ese angafweko!”
41Bashikulu bamwasukile ati, “Webo Malita wasakamikwa nokufito umutima pafintu ifinji, 42kuntu ichikofwayikwa chimo bwaka. Pakuba Maliya asala ichintu chimo ichiweme, icho ichitayise kupokwa kuli ye.”
Currently Selected:
Luka 10: LalaNT
Označeno
Deli
Kopiraj
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.