Luka 9
9
Yesu atuma abatumwa ikumi na babili
(Mat. 10.5-15; Mk. 6.7-13)
1Yesu ayitile pamo abakusambila bakwe ikumi na babili. Abapele ifiso nensambu ishakutamfya imipashi iibi nokuposha amalwele. 2Elo abatumine mukubilisha ubufumu bwaku Lesa nokuposha abalwele. 3Asosele kuli bo ati, “Mwipintapo akantu pabulwendo bwenu, umusako, itumba, ifilyo nendalama. Nakambi mwipintapo nangu amalaya abili-abili. 4Konse uko bakumupokelela ikaleni muli njilya nanda ukufikila apo mwakufuminamo muli ngulya mushi. 5Konse uko bantu bakana ukumupokelela, fumenimo muli ngo mushi, mukakunte nolukungu kumakasa enu chibe ichakubachenjeshako.”
6Abakusambila balimine nokuya kumishi yonse, bakobilisha Ubutumi Bwawama nokuposha abantu konse-konse.
Ukufulungana kwamano yamfumu Helodi
(Mat. 14.1-12; Mk. 6.14-29)
7Ulo imfumu Helodi, kateka wakuchalo cha Galili, aumfwile fyonse ifyalikuchitika, amano akwe alifulungene, pantu abantu bambi balikusosa ati, Yohane Mubatishi abuka kubafwa. 8Nomba bambi balikusosa ati, Eliya alibukile kubafwa, nakambi bambi ati, umo uwabasoseshi bakale eubukile kubafwa. 9Helodi asosele ati, “Yohane nalimuputwileko umutwi. Nga uyu muntu nkoumfwila mfi fintu ninani?” Echo alikufwayisha ukubona Yesu.
Yesu alisha abantu amakana asano
(Mat. 14.13-21; Mk. 6.30-44; Yoh. 6.1-14)
10Ulo abatumwa babwelele, baebele Yesu fyonse ifyo bachitile. Ye alibapintile apabenka kumushi uukoyitwa Betesaida. 11Ulo amabumba aumfwile uko ali, alimukonkele. Elo Yesu alibapokelele nokubasambisha ifyabufumu bwaku Lesa. Elo aposeshe abo abalikufwaya ukuposhewa.
12Ulo akasuba kali mukuwa, abakusambila ikumi na babili bayishile kuli Yesu nokuti, “Batumeni abantu baye mumishi namufifulo fyashinguluka nkuno ukuti bafwaye ifyakulya napakulala pakuti nkuno niku mpanga.”
13Nomba Yesu asosele kuli bo ati, “Mwebo mwenka bapeleni ifyakulya!”
Nabo basosele ati, “Ifyo tukwete mifuba isano bwaka nenswi shibili. Napo mukofwaya fwebo tukabashitile mba bantu bonse ifyakulya?” ( 14Impendwa yabo abalalume bali nangula amakana asano.)
Yesu asosele kubakusambila bakwe ati, “Ebeni abantu bekale mumabumba aamakumi asano.”
15Ulo abakusambila bachitile mfi, nabantu bonse bayikele panshi. 16Elo Yesu abulile imifuba isano njilya nenswi shibili. Aliloleshe kumulu nokutotela kuli Lesa. Ulo ashilile ukutotela, alisunawile imifuba nji nokupela kubakusambila bakwe ukuti balumbe abantu. 17Abantu bonse balilile nokwikuta nabakusambila batolele notwabufumfwa. Bayiwishe imiseke ikumi na ibili.
Petulo asosa ati Yesu e Wasubwa waku Lesa
(Mat. 16.13-19; Mk. 8.27-29)
18Akasuba kamo ulo Yesu ali mukulomba apaenka, abakusambila bayishile kuli Ye. Elo abafumbile ati, “Nga abantu basosa ati nine nani?”
19Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati uli umo uwabasoseshi abakale eubukile ukufuma kubafwa.”
20Elo Yesu abafumbile ati, “Mba mwe mweba ati nine nani?”
Petulo alyasukile ati, “Niwe Uwasubwa waku Lesa.”
Yesu asosa pakuchula nemfwa yakwe
(Mat. 16.20-28; Mk. 8.30—9.1)
21Elo Yesu alibakonkobeshe nokubasosha ukuti, “Tekwesha ukubushako umuntu.” 22Nakambi alibebele ati, “Umwana wa Muntu ali nokuchula ukwinekantu. Elo akusulwa kubakulu Babayuda kuntungulushi shabachipupila, bafilolo nabasambishi ba Mafunde. Bakumwipaya, kuntu mukasuba kalenga shitatu akwisa kubuka kubafwa.”
23Yesu aebele nakambi bonse ati, “Umuntu kati akofwaya ukunkonka, ayikane umwine nokupinta umutashi wakwe lonse, elo ankonke. 24Pakuti umuntu onse ukofwaya ukupulusha ubumi bwakwe, akwisa kubuposa, kuntu uyo onse uwakuposa ubumi bwakwe pamulandu waku nebo, ewakubupulusha. 25Mba bune ndo chingamuletela umuntu nga anonka ichalo chonse, nomba alufya nangu aposa bumi bwakwe? 26Kati umuntu akukwata insoni pamulandu waku nebo namashiwi anji, Umwana wa Muntu naye akwisa kumukwatila insoni ulo akwisa mubuleme bwakwe nobwaku Bawishi pamo nabangelo ababuta. 27Nachine nkomweba ati, epobali bambi abemakanine mpano abatakafwepo kuntu abakabale ukubona ubufumu bwaku Lesa.”
Yesu asanguka pabakusambila bakwe
(Mat. 17.1-8; Mk. 9.2-8)
28Papitile umulungu umo apo Yesu asosele mfi fintu, epo Yesu abulile Petulo, Yohane na Yemusi, nokunina nabo palupili mukulomba. 29Penkapo ali mukulomba, ichinso chakwe chalisangukile, amalaya akwe alikubeka nokubutisha tuutu. 30Bwangu-bwangu, kwabwenekele abalalume babili balikusoshanya nakwe. Abalalume mbalya niba Mosesi na Eliya. 31Babonekele mumuchinshi wakumulu, balikusoshanya na Yesu pafyo ali nokufwila mu Yelusalemu. 32Elo Petulo nabanakwe bali mutulo twamfwa. Ulo babukile babwene umuchinshi waku Yesu nabalalume babili abayimakene nakwe. 33Ulo mbalya bali mukuya, Petulo aebele Yesu ati, “Bashikulu, chingawama kuli fwebo ukwikala mpano. Katwimake imisasa itatu: umo ube wenu, umbi nawo ube wakwa Mosesi, umbi ube wakwa Eliya.” (Nachine tayishibilepo ifyo alikusosa.)
34Ulo ali mukusosa, kwayishile ikumbi ilitubile tuutu nokubafimba. Abakusambila bali nomwenso uukulu ulo ikumbi lyayishile kubafimba. 35Elo mwafumine ishiwi mukati kekumbi ilyasosele ati, “Ngu Mwana wanji uwatemwekwa, uwo nasala, mumfweni!”
36Ulo ishiwi lyalekele, Yesu ashele enka. Abakusambila bayikele chelele pali mfi fyonse. Tabaebelepo nangu umo pafintu babwene pali njilya nshita.
Yesu aposha umulumbwana uwali nomupashi uubi
(Mat. 17.14-18; Mk. 9.14-27)
37Ubushiku bwakonkelepo, Yesu nabakusambila bakwe batatu batentemukile ulupili, nebumba lyabantu ilikulu lyalimukumenye. 38Elo umuntu umo mwibumba alibilikishe ati, “We musambishi! Nakupapata, ba nenkumbu pamwana wanji umwalalume umo enka nakwata. 39Umupashi uubi ulamwikata nokutatika ukwaula nokumupama panshi kafumya nepofu mukanwa. Ulamuchenaula, elo taumulekapo, yii. 40Nalombele abakusambila benu ukuti baufumyemo, kuntu chalibakangile.”
41Yesu alibasukile ati, “Mama wesu ee, mwe nkulo iitachetekela neyakulufyanya? Nakwikala nenu ukufika lwisa? Nkoshipikisha nenu ukufika lwisa? Temulandupo, leteni umulumbwana kuli nebo!”
42Ulo umulumbwana ali mukuya kuli Yesu, umupashi uubi walimupamine panshi nokumufulunganya. Elo Yesu aliukalipile umupashi ngulya nokuposha umulumbwana. Nomba elo amubweseshe kuli bawishi. 43Abantu bonse balishimbilwe pafiso fyaku Lesa ifikulu ifyakuposha.
Yesu asosa nakambi pamfwa yakwe
(Mat. 17.22-23; Mk. 9.30-32)
Abantu bonse balikushimbwa pali fyonse ifyo Yesu alikuchita. Elo Yesu aebele abakusambila bakwe ati, 44“Mulokulabukilapo nga mashiwi nkososa kuli mwebo! Umwana wa Muntu akoyembulwa kubantu.” 45Nomba tabayishibilepo umo nchi chalolele. Chali ichafisama kuli bo ukuti bangachumfwa, nakambi balikutina ukufumba Yesu pali nchi.
Ninani umukulu mubufumu bwakumulu
(Mat. 18.1-5; Mk. 9.33-37)
46Mwabukile ichitala mukati kabakusambila baku Yesu pakufwaya ukwishiba nga umukulu pali bo ninani. 47Nomba Yesu alishibile ukulanguluka kwabo, elo abulile akayiche, akemanikile apo ali. 48Elo asosele ati, “Umuntu onse uupokelela akana kanini mwishina lyanji, akopokelela nebo, nakambi na onse uwapokelela nebo, apokelela nowantumine. Pakuti uukoyichefya muli mwebo, emukulu pali bonse.”
Uutali mulwani wenu muntu wenu
(Mk. 9.38-40)
49Yohane asosele ati, “Bashikulu, twabwene umuntu akofumya imipashi iibi mwishina lyenu, kuntu twalimukenye pakuba taba mwibumba lyesu.”
50Elo Yesu aebele Yohane nabakusambila bambi ati, “Mwimukanyapo iyowo, pakuti uutali mulwani wenu muntu wenu.”
Bakana Yesu mu Samaliya
51Ulo inshita yapalamine iyakuti Yesu apintilwemo ukuya kumulu, alangulukile ukuya kumusumba wa Yelusalemu. 52Elo atumine intumi pantanshi yakwe. Bayile mumushi wabena Samaliya ukuti bakamuwamishe ifintu fyonse. 53Nomba abantu bamumushi ngu tabamupokelelepo pantu chalishibilwe ati alikuya ku Yelusalemu. 54Ulo abakusambila bakwe, Yemusi na Yohane, babwene nchi, basosele ati, “Bashikulu, tamukofwayapo ukuti twite umulilo ukufuma kumulu wise uboche?”
55Yesu alyalukile nokubakalipila. 56Elo Yesu nabakusambila bakwe bayile kumushi umbi.
Abo abangaba abakukonka Yesu
(Mat. 8.19-22)
57Ulo balikuya munshila, umuntu umo aebele Yesu ati, “We musambishi nakukukonka konse uko walikuya.”
58Elo Yesu amwasukile ati, “Bamumbwe balikwata imimba, nefyuni nafyo fyaliba nefinsa, kuntu Umwana wa Muntu takwatapo napakusamina umutwi.”
59Nakambi Yesu aebele umuntu umbi ati, “Nkonka!”
Nomba naye aasukile ati, “Bashikulu nsuminisheni mbale nje nkashike bata.”
60Nomba Yesu alimwasukile ati, “Leka abafwa balokushika abafwa banabo. Nomba webo koya bwaka mukubila imbila ya bufumu bwaku Lesa.”
61Umbi naye asosele ati, “Nkoyisa kumukonka mwe Mfumu, pali nomba lekeni nje nkalaye abantu banji.”
62Yesu amwebele ati, “Umuntu uyo uwatatika ukulima noluse nakambi akocheba kunuma, talingilepo mu bufumu bwaku Lesa.”
Currently Selected:
Luka 9: LalaNT
Označeno
Deli
Kopiraj
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.