Yohane 2
2
Ubwinga mumushi wa Kana
1Ulo papitile inshiku shibili kwali ubwinga mumushi wa Kana, mu Galili. Banyina baku Yesu nabo eko bali. 2Yesu nabakusambila bakwe balitilwe kubwinga mbu. 3Ulo waini ashilile, banyina Yesu bamwebele ati, “Tabakwetepo waini.”
4Elo Yesu ayasukile banyina ati, “Nga nchite shani? Inshita yanji tayilafika!”
5Nangu chali mfilya, banyina Yesu basosele kubapyungi ati, “Chonse icho akomweba muchite.”
6Abayuda baliba nakafuto kakusamba ukuti babe abasangululwa.#2.6 nakafuto kakusamba ukuti babe abasangululwa: Boneni muli Mk.7.3-5. Echo kwali imitondo iikulu yamabwe isano na umo iyamenshi, ubukulu bwayiko muli umo nangula kuti mwayinjila amatepe asano, nangula ukuchilapo. 7Yesu asosele kubapyungi ati, “Iwusheni nji mitondo namenshi.” Nachine yaliwile sululu. 8Elo abebele ati, “Nomba tapuleni amenshi mutwale kumukulu wamutebeto.” Balimutwalile amenshi 9ngalya, nomba aalukile waini. Elo asondele. Nomba tayishibilepo nokwafumine ngu waini. (Lelo abapyungi abatapile amenshi ebayishibilepo.) Elo ayitile nshibwinga 10nokuti kuli Ye, “Abantu bonse batatika ukupela waini uuweme pakwamba, panuma elo bapela waini uutawamishe. Nomba webo ulisungile waini uuweme ukufikila nanomba!” 11Yesu achitile nchi ichafiso ifikulu ichakwamba mu Kana, muchalo cha Galili. Uko aafisulwile ubuleme bwakwe, nabakusambila bakwe balimuchetekele.
12Panuma yaku mfi, Yesu nabanyina, bawakwe nabakusambila bakwe bayile ku Kapenaumu nokwikalako nkulya inshiku shinini bwaka.
Yesu aya kunanda yaku Lesa
(Mat. 21.12-13; Mk. 11.15-17; Luk. 19.45-46)
13Inshita yakulya Chakulya Chakuchilila yalifikile, epo Yesu ayile ku Yelusalemu. 14Mulya munanda yaku Lesa, asangilemo abantu bakoshitisha ing’ombe, imbelele, nenkunda. Bambi nabo balikushintushanya indalama,#2.14 balikushintushanya indalama: Palubali lumbi munanda yaku Lesa, abantu balikushitisha ifyakupupila ifyo bantu bali nokupela kuli Lesa. Elo balikushintushanya indalama isha Chiloma nendalama isha Chiyuda pakuti kunanda yaku Lesa tabalikusuminishapo ifyabupe ifyandalama isha Chiloma iyowo. balikele pamatebulu abo. 15Elo Yesu apyatile umwando nokubafumisha panse pamo neng’ombe nembelele shabo. Alipenawile amatebulu yaku bo abalikushintushanya indalama. 16Elo asosele kuli bo abalikushitisha inkunda ati, “Fifumisheni panse! Lekeni ukwalula Inanda yaku Bata ichifulo chamakwebo!” 17Abakusambila bakwe balibukishe ifyo Amalembo Apatulika asosa ati, “Ukuyipela kwanji kunanda yenu, mwe Lesa, kwaaka muli ne kubati mulilo.”#Amal. 69.9
18Nomba intungulushi sha Bayuda shalifumbile ati, “Fiso ndo ifikulu wingachita ukutulanga ukuti uli nensambu shakuchita mfi?”
19Yesu abasukile ati, “Tobauleni nji nanda yaku Lesa, epo nebo nakwimaka munshiku shitatu bwaka.”
20Abayuda bamufumbile ati, “Nji nanda yayimekwe mumyaka amakumi ane na isano naumo. Napo webo uungayimaka nakambi munshiku shitatu bwaka?”
21Nomba inanda yaku Lesa iyo Yesu alikusosapo mubili wakwe. 22Ulo abukile kumfwa, abakusambila bakwe balibukishe ati mfi efyo alikusosa. Epo balichetekele ifya Mumalembo nefyasosele Yesu fyonse.
Yesu alishiba mano abuntu
23Inshita Yesu ali mu Yelusalemu, munshiku sha Chakulya Chakuchilila abantu abenji balichetekele muli Ye pakubona ifyafiso ifikulu ifyo Ye achitile. 24Nangu chali mfilya, Yesu tabachetekelepo iyowo pantu alishibile ifyamumitima yabo. 25Elo tachafwayilwe umuntu uuli onse ukumubushako ifyakwikala kwabantu, pantu umwine alishibile ifyali mumitima yabo.
Currently Selected:
Yohane 2: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.