Yohane 3
3
Yesu na Nikodemasi
1Kwali intungulushi ya Bayuda iyali kwitwa Nikodemasi, yali iyamwibumba lya Bafalisi. 2Ayile kuli Yesu ubushiku nokumweba ati, “We musambishi, twalishiba ukuti uli musambishi uwatumwa na Lesa. Takupo nangu umo uwingachita nji milimo iyafiso ifikulu iyo ukochita, sembi Lesa ali pamo nakwe.”
3Yesu alimwasukile ati, “Nachine nkokweba ati, nga muntu tafyelwepo libili tekuti enjilepo mu Bufumu bwaku Lesa.”
4Nikodemasi alimufumbile ati, “Mba muntu umukulu kuti afyalwa shani libili? Nachine tekuti enjilepo mwifumo lyakubanyina nokufyalwa nakambi!”
5Yesu alimwasukile ati, “Nachine nkokweba ati, nga muntu tafyelwepo kumenshi naku Mupashi Wabuta tekuti enjilepo mu Bufumu bwaku Lesa. 6Uufyalwa kumuntu muntu, kuntu uufyalwa ku Mupashi Wabuta wamupashi. 7Wishimbwa pakuti nakweba ati ulingile ukufyalwa libili. 8Chili munshila imo yenka kuli bo abakofyalwa ku Mupashi Wabuta.” Umwela ulapupa nokuya uko ufwaya. Mwebo mulomfwa ichiunda chauko bwaka, kuntu tamwishibapo uko ufuma noko uya.
9Nikodemasi alimufumbile ati, “Nga nchi kuti chaba shani?”
10Yesu alimwasukile ati, “Webo uli musambishi mukulu muba Isilaeli, epo nchi kanshi tauchishibilepo? 11Nachine nkokweba ati, fwebo tusosa icho twayishiba nokweba abantu icho twabona. Nomba takupo nangu umo muli mwe uukofwaya ukupokelela amashiwi esu. 12Mwebo tamukochetekelapo ulo nkomweba fintu fyamuchalo, nga mwakuchetekela shani ulo ningamubusha ifintu fyakumulu? 13Elo takupo umuntu uwanina kumulu, kuntu Umwana wa Muntu, uyo uwafumineko.”
14Chili ukubati nimfilya Mosesi asumbwile insoka yamukuba pachiti muchiswebebe. Munshila imo yenka Umwana wa Muntu akowamina ukusumbulwa 15ukuti onse uwamuchetekela abe nobumi butapwa. 16Pakuti Lesa atemenwe abantu bonse muchalo. Echo apele Umwana wakwe uwafyalwa enka, ukuti onse uwamuchetekela efwa iyowo, kuntu abe nobumi butapwa. 17Pakuti Lesa tatuminepo Umwana wakwe muchalo ukuti apingule abantu, kuntu ukuti abapulushe.
18Uyo onse uwakuchetekela mu Mwana takopingulwapo, kuntu uyo onse uutachetekela ye apingulwa kale, pantu tachetekelapo mu Mwana umo enka waku Lesa. 19Ubupingushi ifyo bwaba nimfi, ukusanika kulishile muchalo, kuntu abantu batemwa imfinshi ukuchila ukusanika, pantu imilimo yabo iibi. 20Muntu onse uuchita ububi ewapata ukusanika, pantu tafwayapo imilimo yakwe iibi ukuti iboneke kubantu. 21Nomba muntu onse uuchita ifintu ifyakwebesha, ewisa kukusanika ukulanga ukuti imilimo yakwe yakumfwila Lesa.
Yesu na Yohane
22Panuma yaku mfi, Yesu nabakusambila bakwe bayile kuchalo cha Yudeya uko ayikele nabo nokubatisha. 23Yohane naye alikubatisha ku Enoni, apepi naku Salimu, pantu nkulya kwali amenshi ayenji. Abantu balikuya kuli ye, elo alikubabatisha. ( 24Nji yali ninshita ulo Yohane tabalamuposa muchifungo.)
25Bamo abakusambila baku Yohane batatikile ukutalikishanya no Muyuda umo pafyamulandu wakafuto kakusangululwa. 26Elo bayile kuli Yohane nokumweba ati, “We musambishi, napo ukomwibukisha ngulya muntu uwali nawebo kumutule-suba wa Yodani, ngulya uwo mwasoselepo? Naye nomba akobatisha, nakambi abantu abenji bakoya kuli ye.”
27Yohane alyasukile ati, “Takupo umuntu uwingakwatapo akantu, sembi Lesa amupela. 28Mwebo muli bakamboni banji, mulishibile ifyo nasosele ati, ‘Nebo tanshilipo Uwasubwa waku Lesa, kuntu natuminwe ukuba pantanshi yakwe.’#Yoh. 1.20,23,27 29Uyo uukoupa emwine wabwinga, kuntu chibusa wabwinga emakanina bwaka nokukutika, nokusekela pakumfwa ishiwi lyawabwinga. Kanshi nku ekusekela kwanji ukwakufikapo. 30Ye alingile ukuba umukulu, elo nebo mbe uwachepako.”
Yesu afuma kumulu
31Uyo uwafuma kumulu emukulu ukuchila bonse. Uyo uwafuma muno chalo, epela wamuno chalo nakambi asosa nefyamuno chalo. Nomba uyo uwafuma kumulu ewaba uwapamulu pali fyonse. 32Asosa ifyo abwene nokumfwa, kuntu takupo umuntu nangu umo upokelela amashiwi akwe. 33Nomba muntu onse uupokelela amashiwi akwe, ashininkisha ukwebati Lesa wakwebesha. 34Uyo uwatumwa na Lesa eusosa amashiwi aku Lesa, pakuba Lesa alimupela Umupashi Wabuta ukufikapo. 35Bawishi balimutemwesha Umwana wabo. Echo balibika ifintu fyonse mufiso fyakwe. 36Uyo onse uuchetekela mu Mwana aliba nobumi ubutapwa, kuntu onse uutachetekelapo Umwana tayise kuba nobumi, kuntu ubukali bwaku Lesa bwakwikalililapo pali ye.
Currently Selected:
Yohane 3: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.