Mattaayo 7
7
Wihi at enenyet igoosso iche ati laka lakigoocha
(Luuka 6:37-38, 41-42)
1“Taba uurassiin goyaka enenyet ahukkumina, ommos atin laka Waakh a atin hukkumaa. 2A mehe saggaas atin enenyet ihukkuntaan saggaase atin laka Waakh atin ihukkuma. Geeddi atin ꞌdooꞌdi addan iyeessaan, geeddaase atin liiyeela.
3“A iꞌdoh urufti il walaalaah kijirto iagarta, gurtunki issaah goya kijiro la iargin? 4At saggoh walaalaah, ‘Alley uruftaas il kaajirto a kaabahcho,’ ikatadeeh, alla kol tuumman gurtume issaah goya kaajiraa? 5Iskaayyeessooy! Koloo gurtunki issaah goya kajiro bihiche, ꞌdee urufti il walaalaah goya kajirto mujjum agare, bihi.
6“Wihi munyee ꞌdooꞌdi Waakh ꞌdiiꞌddan asiinna. ꞌDooꞌda a iꞌdi kararreti yibaate kisoonokhatti, kitaham. Wihi weyti haaggan la, ꞌdooꞌdi haaggicho ꞌdiiꞌddan asiinna. ꞌDooꞌda iꞌdi golchuu wahaas haaggan a yabta.
Eti walah daaho a lasiicha
(Luuka 11:9-13)
7“Waakh wihi at ꞌdoonto daddaahe, a kisiicho. Wihi at ꞌdoonto Waakh kayoyyowo, a kaꞌhessaa. Waakh, arit ifah idahe, ulla a kifaho. 8Iꞌdi tahe eti tuummane walah daahe, Waakh wihi us daahe a siicha, ki walah yowti la, Waakh a kaꞌhela, ki ifaha yidah la, Waakh arit a ifaha.
9“Atinhi ooyenyee, etiinkoh chirri weeliis golol daahe dagah siicha? 10Ommos chirri weeliis bahag daahe toof siicha? 11Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye ꞌdooꞌdi usu walah daahe siinti haaggan siicha! 12Walah tuumman ka, wihi kootte incheenka atinhi atin liiyeelo ꞌdoontaan, ꞌdooꞌdi addan iyeela. Wihi tahe, waha a wihi Chiirnaanneti Amurre ichoow Chiirnaanneti ꞌdooꞌdi Waákh íyeyyeedo enenyet abchaan.
Aritti goobi Waakh lakagelo a juukh
(Luuka 13:24)
13“Aritti juukhe kagel, a mehe aritti ꞌdabi armaanjireen lakagelo, a ballaaddantahe, jiti baabaa isohti la a ꞌdabakhe, ꞌdooꞌdi tabo la a buur. 14Iꞌdaasenyi aritti jiroti armaanjireen lakagelo a juukhe, jiti jiroti jirtuu imassan isohti la a miige, toro la ꞌdooꞌdi jita ꞌhelo a koo rucchul.
ꞌDooꞌdi beenaate ꞌdooꞌdi Waákh íyeyyeedo iskaayyeelo yuubsada
(Luuka 6:43-44)
15“Taba ꞌdooꞌdi ꞌdooꞌdi Waákh íyeyyeedo iskaayyeelo yuubsada, iꞌdi tahe icho uummanki iiyyaate atin ikayamiitiine, ugoka uurassicho ka a yaayti weyti sussuuje. 16Gurnaanki icho delaane kaabattaan. Geeyi bilhil medeer ma kaguratti, toro la geeyi khasah dommog ma kaguratti gon. 17Saggaas on u geeyi haaggan tuumman gurnaanki haaggane dela, iꞌdaasenyi geeyi suuje gurnaanki suuje on dela. 18Geeyi haaggan gurnaanki suuje delin ma yabuuꞌde, geeyi suuje la gurnaanki haaggan delin ma yabuuꞌd. 19Geeyi tuummane gurnaanki haaggan idelin, a lagoocha ꞌdab lakalugꞌda. 20Iꞌdaakka ꞌdooꞌdi ꞌdooꞌdi Waákh iyeyyeedo iskaayyeelo, gurnaanki icho delaane kaabaattaan.
Enenyet tuumman mee dakhi goobi Waakh gelo
(Luuka 13:25-27)
21“Eti tuummane af ka, ‘Kamuraayaaw,’ idowo mee dakhi goobi Waakh gelo. Iꞌdaasenyi eti gelo a ki wihi Aabbaheeyki serey kajiro ꞌdoono yeelo kalday on. 22Maanti Waakh enenyet hukkumo, ꞌdooꞌdi buure mehe ani iyadeeh ya, ‘Kamur, Kamur, magahaah ka a kiyeyyeene, toro magahaah ka ginnayyo ꞌdooꞌd a kabihinne, wihi ittaawenye weeli enenyet yeelin iubaaꞌdan laka yeelle.’ 23Anna ꞌdow ka mehe icheeka ya, ‘An injire ma atin garan. Atinha hugunꞌdarri kaassohattaan nyaama ikataba.’
ꞌDooꞌdi lammeenye minassicho diste
(Luuka 6:47-49)
24“Maantaka eti tuummane wihi an idowo daago toro la raaho, a iꞌdi eti khareenye minkiis inti ngꞌaajjee kadise. 25Saahka hir ꞌdeye, ꞌduley il khaate, hafari buure laka sookahe min guꞌdde. Iꞌdaasenyi minkaas ma reyin. Iꞌdi tahe mujjume il katoolla. 26Iꞌdaasenyi eti tuummane yeedeeyka daago toro iraahin, a iꞌdi eti ꞌdalamenye minkiis yooh goya kadise. 27Saahka hir ꞌdeye, ꞌduley il khaate, hafari buure laka sookahe min guꞌdde, min tuumman iskareye iskaambase.”
Yeesso anto ꞌdooꞌd walah kaabche
28Inkoo Yeesso waha tuumman cheeke ka, urur saggi us ꞌdooꞌd walah iabcho kagirmeeste. 29Yeesso iꞌdi tagaammetichoti amurre mee, us saggi etoo anto khabo iche enenyet walah iabcha.
Currently Selected:
Mattaayo 7: rel
Označeno
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.