Mattaayo 6
6
Yeesso saggi ꞌdooꞌdi miskiine liigargaaro kaayyeeda
1Yeesso toro wihi us ꞌdooꞌd iyidah, “Chirri atin ꞌdooꞌd haag iyeessaan, wahaas saggoo ꞌdee enenyet atin ikoolicho iiyeelina. Chirri atin iꞌdaas yeessaan Aabbahiinki serey jiro kalaꞌd us atin guto mele.
2“Maantaka kolbaaw at etoo miskiine wohoo siisso, enenyet iistuttusin iꞌdi orran ꞌdooꞌdi iskaayyeelo minassi weysiite Yaꞌhuud ichoow jitat ka yeelo ꞌdee ꞌdooꞌd iinkaanyituu. Rume atin icheeka, icho kalaꞌddicho tuum a ꞌheleen. 3Iꞌdaasenyi geedda at etoo miskiine wohoo siisso, uus etoo kalday laka saggi at isiisse garanne, 4ꞌdee wihi at siisso dagsi on a eheetti. ꞌDeerka Aabbahaahki wihi dagsi ka layeelo argo, kalaꞌd a kiguta.
Yeesso saggi liiweesti ꞌdooꞌd abcha
(Luuka 11:2-4)
5“Kolbaaw atin weysattaan, iꞌdi ꞌdooꞌdi iskaayyeelo iitaahana. Iꞌdi tahe icho wihi icho ꞌdoonaan, a ichohi minassi weysiite Yaꞌhuud ichoow inti enenyet tuumman kaargo ka tolossati weestaane, ꞌdee ꞌdooꞌd tuumman saaꞌdo. Rume atin icheeka, icho kalaꞌddicho tuum a ꞌheleen. 6Iꞌdaasenyi kolbaaw at weysatti, meessi liikaargin gele, Aabbahaahki indo ka liiargin waho, ꞌdee Aabbahaahki wihi at dagsi ka yeesso argo kalaꞌd a kiguto. 7Kolbaaw atin weysattaan la iꞌdi ꞌdooꞌdi Waakh igaran yeeluu, yeedassi ittaawenye indigir laa eelanna. Wihi tahe icho kol waakkhassicho jeenteti yeedassaas ittaawe u weysihicho daagaane koogyahiin. 8Saggi icho iweestaan iiweysanna, wihi tahe, Aabbahaah wihi at ꞌdoonto geeddi at isooidaahan laka a garta.
9“Chaꞌatin weysattaan, sagga iweesda,
“‘Aabbaheenyoki serey jiro,
magahaahki munyee a liinkaanyito.
10At ba enenyet tuumman dakhatta.
Saggi goobaah ka in at ꞌdoonto liiyeeluu,
harrata ka laka in at ꞌdoonto a layeelo.
11Gololeenyoki maan dakkhan nah sii.
12Uskeeli nah yeelle nah ikakut,
saggi nah laka ꞌdooꞌdi uskeel nah iyeele uskeel ikakunnuu.
13Kajmeti uskeel nah kaluguꞌddo nah kajeyiche,
iꞌdaasenyi Seytaanki uskeel leh nah karib!’#6:13 Chiirnaanneti Yeedi Waakhe uumacchee gaasoo chiirnaanka a kakhayte. “Iꞌdi tahe jirtuu dakkhamba dakh a kaahha, miige la a taahha, inkaanyit la a kaahha. Aamiin.”
14A mehe chaꞌatin ꞌdooꞌdi uskeel atin iyeele uskeel ikakuttaan, Aabbahiinki serey jiro laka uskeeliin a atin ikakuta. 15Iꞌdaasenyi chirri atin ꞌdooꞌdi uskeel atin iyeele uskeelaas ikakutin, Aabbahiin uskeeliin ma atin ikakuto.
Yeesso wori afi lahiiti kaayyeeda
16“Kolbaaw at af hidatti, iꞌdi ꞌdooꞌdi iskaayyeeluu fool ariboon. A mehe icho fool a dakhnaata, ꞌdee saggi icho af ihiiteen tusaan. Rume atin icheeka, icho kalaꞌddicho tuum a ꞌheleen. 17Iꞌdaasenyi geedda at af hidatti subakki geeyi oolif matah kasubho, foolaah dikho, 18ꞌdee ꞌdooꞌdi addan menye, Aabbahaahki indo ka liiargin kalday on saggi at af ihidatte a abti, ꞌdee Aabbahaahki wihi dagsi ka layeelo argo, kalaꞌd a kiguto.
Yeesso wori kamurroonki goobi Waakh kaayyeeda
(Luuka 12:33-34)
19“Kamurroonkiin harrata ka meel iisigelinna. A mehe inta ka gubaal ichoow kuuttu a suujaachaane ꞌdooꞌdi walah hato la min a jebcha hata. 20Iꞌdaasenyi goobi Waakh ka kamurroonkiin meel isigessa. Intaas ka gubaal ichoow kuuttu ma suujaachaane, toro la ꞌdooꞌdi walah hato min ma jebchaane ma hataan. 21A mehe inti kamurroonkaah kajiro, iche uuraah laka kajira.
Yeesso wori banayhi sareet kaayyeeda
(Luuka 11:34-36)
22“Ile iꞌdi taa u sar banaye ikeenta. Chirri indohaah haagganyahiin sartaah tuumman banaye buuha. 23Iꞌdaasenyi chirri indohaah suujyahiin sartaah mugꞌdi buuha. ꞌDeerka chirri banayhi at khabto lajicche at mugꞌdihi reebenye goya kijirta.
Koloo dakhi Waakh ꞌdonꞌdoon
24“Et kamur lamma ifalo mele. A mehe koo a ꞌdiiꞌdda ki addan la ꞌdoonta, toro la koo inkaanyitta ki addan la ꞌdarraawta. Waakh ichoow chilimme ba koloo kalday ma ifasso.
25“Maantaka wihi an atin iadeeh, jirotiin akawaꞌdwaaꞌdina, wihi atin tamhiin ommos wihi atin dantaan, ommos sartiin ka wihi atin gessattaan. Jiro golol ma kussan a? Sare la gaad ma kussan a? 26Chimbirohi saraat kamalda bal. Ilmo icho gos kachibaan mele, gurnaan bissaate icho meel gessataan la mele. Iꞌdaasenyi Aabbahiinki serey jiro on goollicha! Atin icho weyti kussantahiin gon. 27Etiinkoo maanta waꞌdwaaꞌdi us waꞌdwaaꞌdo ka jirotiis sahaꞌddoo kalday kakhayaayi?
28“A iꞌdoh jeenteti gaadeet u waꞌdwaaꞌd ikhabtaan? Bal fiikhti bahto yeya. Hil iche haaggisso gaad isikayowatti mele. 29Iꞌdaasenyi wihi an atin iadeeh, karnati goorat Soolomon layadeeh laka, kamurroonkiis tuumman khabaayi, gaaddiis geeddi fiikhta ma haaggan. 30Chirri Waakh hoosi keley baho, toolla jiro saahta ꞌdab lakalugꞌdo gaado, atin geeddaas ꞌdirihiis weyti ma atin gaado? Atin eenna geeddoo rucchul on Waakh kakhuuftaane! 31ꞌDeerka awaꞌdwaaꞌdina, ‘Mehe numhe?’ eelanna, ommos, ‘Mehe nubhaabe?’ eelanna, ommos ‘Mehe gessanni?’ eelanna. 32Iꞌdi tahe ꞌdooꞌdi Waakh igaranne wahanyeyyohaas kaallooꞌda. Aabbahiinki serey jiro saggi atin waha dakkhan iꞌdoontaan a garta. 33Iꞌdaasenyi koloo dakhi Waakh ichoow fissanoonki Waakh ꞌdonꞌdoon, ulla wahanyeyyoha dakkhan a ikaasookhayaa. 34Maantaka wihi at saahta ꞌdoonto akawaꞌdwaaꞌdin. Iꞌdi tahe maane ba wihicheki lakawaꞌdwaaꞌdo a khabta. Walah at sinati ibeen ba keeno sinatoo addan ikakhayto mele.
Currently Selected:
Mattaayo 6: rel
Označeno
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.