TAUNET 43
43
Koweektoigei tupchosyegap Joseph Misiri
1King'wanit rubeet miising' eng' emet. 2Ak ye kingo kagotar peek che ki ibune Misiri, koleenji kwandanywa, “Oweektegei kogeny, oalwech amitwogik tutigin.” 3Ago ki leenji Judah, “Ki igimgimech chiichooto koleenjech, ‘Momuuchi ogeera togoch ngot ko mobwane ak weeriit ne otupche.’ 4Ngot iyooktech kobooto tupchennyo kechoortegei anyun kealun amitwogik. 5Ago ngot ko mechamji kwo, koma kichoortoigei, amu kileenjech chiichooto, ‘Ma koi ogeer togeennyu ngot ko mobwa ak weeriit ne otupche.’ ” 6Ki le Israel, “Amu nee si oyaiywo yaityoni tee ni kot ong'aang'ji chiichooto oleenji ki tinyei weeriit age ne kitupche?” 7Ki le icheek, “Ki kinenech miising' chiichooto atebosyekyok ak ole ki kisikyinech koleen, ‘Ta kosabei kwandang'wong'? Ak otinye weeriit age ne otupche?’ Ki kiwolji ko uu ye kiteep. Tos ki kimuuch kenai keele, mwaiwech koleenjinech, ‘Omutu weeriit ne otupche kochoorgei?’ ” 8Ki leenji `Judah kwandanyi Israel, “Iyogu weeriito keebe tuwai, si keng'eetye keebe, si kobiit kesapchee, ama kibegu, acheek ak inyee, ak lagokyok ak icheek. 9Ingobunjo atononji ineendet; ak image ineendet eunnyu. Ngot koma mutuun ineendet inyoo ande taing'ung', kobunjino chalwogoto peetuusyek tugul. 10Amu nda ki ma kigagei, ta kigaa keweigei iman ne po aeng' nguno.”
11Yeityo koleenji `kwandanywa Israel icheek, “Ngo uu nooto anyun, oyai ko uu ni: oip tuguuk che myachen miising' che po emet eng' lolotinwekwok, oipchi chiichooto kagoochinoik ko uu mwanik tutigin che kinyaise, kobooto kumyat kitigin, tuguuk che ng'uu ne anyiny, tuguuk che uu igomoik, kobooto tuguuk che uu njuguk ak logoek che kiguure almond. 12Oip eng' eunekwok robiinik otes che yamegei ak kamunutyonooto konyil aeng', ak che kiga kiweech eng' kutusweegap lolotinwekwok. Oweekte chooto ak icheek; abeere ki ma nai piik che ki indoi. 13Omut weeriit ne otupche agine, ong'eetyee oba kogeny ye mi chiichooto. 14Ingorireenak Kamuktaindet Ne po Kamuktaet, eng' taitap chiichooto, si kobiit kotyakwok weeriit ne otupche nin linda, ak Benjamin. Ak ngo peteno lagokyuk ko kagobetyo.” 15Ki ip anyun pichooto kagoochinoichooto, ak ki ip robiinik che yamegei ak kamanuutyonooto konyil aeng', ak king'eetyo kobooto Benjamin koba Misiri, ki it anyun olooto ak kitononso eng' taitap Joseph.
16Ye kingo keer `Joseph Benjamin komi kobooto icheek, koleenji ne tononjin koonnyi, “Imutu pichoo kobwa ko, ak oeeng'ji ak ochop kiy tugul, amu ki amisyei tugul ak pichooto peet kween.” 17Ki yai chiichooto ko uu ye ki kamwachi Joseph; ak ki imut anyun `chiichooto pichooto kobwa kootap Joseph. 18Ak ki iyweis pichooto, amu ki kimut koba kootap Joseph. Ki ile, “Kagimutwech kebwa ko amu chepkondok che ki kiweekte eng' lolotinwekyok yu kiga kibwa tai, si kobiit konyoor ng'olyoot ne igikyinenech, ak kogerchech ko, yeityo koyaech keegu otwogik, kobooto sigirokyok.” 19Kiriikta ye mi chiito ne tononjin kootap Joseph, ak kong'alaalji ineendet eng' ole neegitee kurgeet, 20koleenji, “Ee kiptaiyandennyu, ki kichooruge iman eng' panda ne po tai, keal amitwogik, 21ak ye ki ngeit anyun kootap toek, kityaach lolotinwekyok, ki mi chepkondogap chii tugul kutitap lolennyi. Ara kagiibu anyun chooto kogeny, ak 22kagiibu kora robiinik alak che ki ale amitwogik. Ma kingen chiito ne ki inde silingisyekyok lolotinwekyok.” 23Ki leenji, “Ingotep kaalyeet eng' okweek; amoiyweisye. Ki koonok Kamuktaindeng'wong', Kamuktaindet ne po kwandang'wong', konorwet ne myee ne ung'aat eng' lolotinwekwok, ki ataach silingisyekwok.” Ak ki imutyi Simion komong'. 24Ki imut anyun `chiichooto pichooto koba kootap Joseph, ak konaga peek, ak kiuun pichooto keelyekwak, ak ki pae sigirokwak amitwogik che ki konorotiin. 25Kichopchi `icheek Joseph kagoochinoik eng' sait ne itune, peet kween, amu ki kas keele tagoi koamisyei eng' olooto.
26Ye kingo it Joseph kaa, koipchi `pichooto ineendet kagoochinoik che ki ibu, kobwa ko, ak ki ing'uruuk eng' tainnyi agoi ng'wony. 27Ak kiteebe icheeget chametapkei, koleenji, “Chamegei kwandang'wong', poiyondonooto ne ki komwaiwo? Tos ta kosabei?” 28Ki leenji, “Chamegei otwogindeng'ung' kwandanyo. Ta kosabei.” Ak ki ing'uruukyi. 29Ak kitabendo Joseph, ak ki keer tupchennyi Benjamin, ng'eetap kamet, ak ki le, “Tupcheng'wong' ne ming'in ni, ni ki komwaiwo?” Ak ki leenji, “Ingorirenen Kamuktaindet, weeri!” 30Ak kichirchiren Joseph, amu kieet emosto eng' muguleldanyi amu ng'eetap kamet, ak ki cheeng' ole wendi koriiree. Ki manda anyun koonnyi ne po oriit, kwo koriir. 31Yeityo koun togeennyi ak komong', ak kimuita si ma riir, ak ki le, “Oibu amitwogik.” 32Ki kinde chechiik oldanyi ineegei, ak ki kinde oldanywa chechwaak icheegei, ak che po Misiriik oldanywa icheegei, che ki cham koamisyei kobooto ineendet: amu ki ma kochamei Misiriik koamis tugul ak Yahudik, amu king'wan eng' Misiriik koamjin. 33Ki tebee tainnyi weeriit ne po tai ko uu sigennyi, ak ne ming'in ko uu ming'inatennyi, ak ki kwong'yo pichooto. 34Ki igoochi pichooto kererutigap amitwogik che ki mi tainnyi, ago kieet kererutyetap Benjamin kosiir che po alak konyil muut. Ak kieeiso ak koboiboitu kobooto ineendet.
Currently Selected:
TAUNET 43: KAPR
Označeno
Deli
Kopiraj
Want to have your highlights saved across all your devices? Sign up or sign in
©Bible Society of Kenya, 2019