TAUNET 44
44
Kotyemei `Joseph tupchosyekyik
1Ki ng'at anyun chiito ne kitononjin koonnyi, koleenji, “Inyiit amitwogik lolotinwegap pichu, ko uu che imuuch koip, ak inde chepkondogap chii tugul kutitap lolennyi. 2Yeityo inde kigombennyu, nooto po fedha, eng' kutitap loletap toweet, kobooto silingisyekyik che po peek.” Ak ki yai ko uu ng'olyoot ne ki kamwa Joseph. 3Ye kingo eech kota ko karon, kounda pichooto koba ak sigirokwak. 4Ye kingo kagomanda eng' nganaseet, ye kitom kolooegitu, koleenji `Joseph chiito ne kitononjin koonnyi, “Ng'eet, isup pichooto, ye inyooru ileenji, ‘Amu nee si ogeere yaityet ne myee? 5Tos ma kigombani ne eeise kiptaiyandennyu, ak kong'orse? Koyai ne leluut ngo yai ko uu ni.’ ”
6Ye kingo nyoor anyun icheek, komwachi ng'aleechooto. 7Ki leenji icheek, “Amu nee si komwa kiptaiyandennyu ng'aleek che uu chooto? Ingolooit eng' otwogiguk si ma yai kiy ne uu nooto! 8Ogeero, robiinik, che ki kinyoorchi kutusweegap lolotinwekyok, kogiweekwok kogeny eng' emetap Kanaan. Kimuktoi ano anyun kechoore kootap kiptaindeng'ung' fedha anan ko thahabu? 9Ingome age tugul eng' acheek otwogiguk ne kenyoorchin kioto, ak keegu acheek otwogigap kiptaiyandennyo.”
10Ak ki le, “Ingotebi ko uu ng'aleeguk. Egu ineendet ne kenyoorchin kioto otwogindennyu, ak ma ki ityinok okweek yaityo.” 11Ki itu chii tugul lolennyi kochokyi, ak kotyach chii tugul nenyi. 12Ak ki cheeng', kotaune ne oo, agoi kogesune ne ming'in. Ki kinyoorchi kigombanooto loletap Benjamin. 13Kigereer anyun ngoroikwak, ak kiratyi chii tugul tuguukyik sigiryennyi ak koweektagei koba nganaseet.
14Ki it anyun Judah ak tupchosyekyik kootap Joseph amu kitom kwo ui, ak ki ibutyi icheek ng'wony eng' tainnyi. 15Ki leenji `Joseph icheek, “Nee ni koyai? Tos mongen ole imuuchi kong'orso chiito ne uu anee?” 16Ak ki le Judah, “Tos kimwaun nee anyun, kiptaiyandennyu? Ki ng'alaali keleen nee? Anan tos ki ityindoitech ano imanda? Kagonai Kamuktaindet tengektap otwogiguk, ara kimi yu anyun acheeget, ki otwogigap kiptaiyandennyo, ak ineendet ne kaginyoorchi kigombet agine.” 17Ago ki le, “Ingolooit eng' anee ama yai ko uu nooto! Egu otwogindennyu ineendet ne kaginyoorchi kigombet, ago okweek, ko myee obe eng' kaalyeet kapkwandang'wong'.”
18Yeityo koriikyi anyun `Judah Joseph ak koleenji, “Kaigai kiptaiyandennyu, asoomin ale, chamwo anee otwogindeng'ung' amwaun ng'olyoo, amenereekyo anee, otwogindeng'ung', amu i uu aginye Pharaoh. 19Ki iteebenech acheek otwogiguk, kiptaiyandennyu, ile, ‘Otinye kwandang'wong', ak komi weeriit age ne otupche?’ 20Ak ki kimwaun inyee, kiptaiyandennyo, keleenjin, ‘Ki tinyei abba, poiyot ne oos, ak kotinyei lakweet ne po osindanyi, neta koming'in. Ki kome ng'eetap kamet, ak mi nooto ineegei ne po kamennywa, ak kochamei `kwandanyi ineendet.’ 21Ak ki ileenjech acheek otwogiguk, ‘Omutwaa, kochoorgei ole ami, si kobiit ageer ineendet eng' konyekyuk.’ 22Ki kimwaun inyee, kiptaiyandennyo, keele, ‘Ma imuuchi koobeesyo weerooto ak kwandanyi, amu ngot kometo ineendet kwandanyi, ko tos me kwandanyi.’ 23Ak ki ileenjech acheek otwogiguk, ‘Ngot ko mobwa ochooruge kobooto weeriit ne otupche ne ming'in ko momuuchi ogeera togoch kogeny.’ 24Ye ki ngeit anyun kapotwogindeng'ung' kwandanyu, kemwachi ineendet ng'aleeguk. 25Ak kileenjech abba, ‘Oba kogeny oalwech amitwogik tutigin,’ 26ki kileenji, ‘Ma kimuuchi kechoortegei, ago ngo mi tupchennyo ne ming'in kobootech kechoortegei anyun keebe, amu ma kimuuchi kegeer chiichooto togoch kobatee kemi ak tupchennyo ne ming'in.’ 27Ak kileenjech otwogindeng'ung', kwandanyo, ‘Ongen ole kisikwo kwondonyu weeriik aeng'; 28ak kibetena age, ak ki ale, Angen komyee ale kigetonaton, ak kobooch yooto, ko mata tuun ageer. 29Ngot omutena niito agine, ak konyoor kiy ne ya, ko kogoono ariirat agoi tuun amei.’ 30Nooto anyun, ye ait kapotwogindeng'ung' abba, ama mi weeri kobootech, amu ki namgei saboondanyi ak saboondap weeriito, 31komeei anyun abba ye keer kole ma mi lakweet, ak kigoochini `acheek otwogiguk abba, otwogindeng'ung', koriirat agoi tuun kome. 32Amu kibunjo anee otwogindeng'ung' lakwaniito, atononjinechi abba, aleenji, ‘Ngot koma mutuun ineendet, ko kabunjo chalwogoto peetuusyek tugul eng' taitap abba.’ 33Eng' nooto anyun, asaain ale chamwo atebi aek otwogindeng'ung', inyee kiptaiyandennyu, ageeregei weeri. Ago ingwo weeri kotogosta kobooto tupchosyekyik. 34Amu amuktoi ano anyun awo atogosta ye mi abba, ama kimi ak lakweet? Si ma keer yaityet ne tuun nyooru abba.”
Currently Selected:
TAUNET 44: KAPR
Označeno
Deli
Kopiraj
Want to have your highlights saved across all your devices? Sign up or sign in
©Bible Society of Kenya, 2019