پیدایش ۱۴
۱۴
ابرام لوطَ نجات دهه
۱ وختی کی اَمرافِل، شِنعارٚ پادشاه، اَریوک، اِلاسارٚ پادشاه و کَدُرلاعُمَر، عیلامٚ پادشاه و تِدعال، گوُییمٚ پادشاه بید، ۲ اَ پادشایأن بوشوییدی به جنگٚ بارَع، سدومٚ پادشاه، بِرشاع، عموره پادشاه، شِنعاب، ادما پادشاه، شِمیبِر، صِبوییم پادشاه و بالعٚ پادشاه. بالع هو صوغر ایسه.
۳ اَ پادشایأن، خوشأنٚ لشکریأنَ دره‌یٚ سِدّیمٚ دورون متفق بوکودیدی، منطقه‌یی کی اَ روزأن «دریایٚ نمک» نام دأره.#۱۴:۳ دریایٚ نمک، بحرالمیتٚ امروزی ۴ اَشأن، دوازده سال کَدُرلاعُمَرٚ جَا فرمان بردیدی ولی سیزدهمی سالٚ ره شورش بوکودیدی.
۵ چهاردهمی سال، کَدُرلاعُمَر و پادشایأنی کی اونٚ اَمرأ هم پیمان بید، بَموییدی و رفائیأنَ عشتروتٚ قرنینٚ دورون، و زوزیأنَ هامٚ دورون، و ایمیأنَ شاوه‌یٚ قیریتایمٚ میأن ۶ و حوریأنَ اوشأنٚ کوهستانٚ میأن کی سعیر نام دأشتی، تا ایل‌فارانٚ بیابانٚ نزدیکی شکست بدَییدی. ۷ بَزین وأگردستیدی بوشوییدی به عین‌مشفاط، کی اونٚ نام قادش ایسه، و تومامٚ سرزیمینٚ عمالیقیأنَ بدس بأوردیدی و اموریأنَ کی در حَصّونٚ تامار زندگی کودیدی شکست بدَییدی.
۸ پس پادشایأنٚ سدوم، عموره، ادما، صِبوییم و بالع، یَنی صوغر، بَموییدی دره‌یٚ سدیمٚ دورون جنگٚ وسی صف بکشه‌ییدی ۹ کی بر ضدٚ کَدُرلاعُمَر، عیلامٚ پادشاه، تِدعال، گوُییمٚ پادشاه و اَمرافِل، شِنعارٚ پادشاه و اَریوک، اِلاسارٚ پادشاه بجنگید، یَنی چارتأ پادشاه بر ضدٚ پنج‌تأ پادشاه. ۱۰ دره‌یٚ سدیمٚ دورون ایتأ عالمه قیرٚ چاه نهَه‌بو. وختی کی سدوم و عموره پادشایأن فرار کودن دیبید، دکفیدی او چاهأنٚ دورون و بقیه فرار بوکودیدی بوشوییدی کویأنٚ جور. ۱۱ او چارتأ پادشاه سدوم و عموره تومامٚ مال و منال و خوراکی‌یَ اوسَدیدی بوشوییدی. ۱۲ اوشأن لوط، ابرامٚ برأرزایَ، کی سدومٚ دورون زندگی کودی، و اونٚ اموالَ اوسَدیدی خوشأنٚ اَمرأ ببردیدی. ۱۳ ایتأ جٚه کسأنی کی بتأنسته‌بو دوشمنٚ دسٚ جَا فرار بوکونه بَمو ابرامٚ عبرانی ورجه و همه چی‌یَ اونَ خبر بدَه. زمانی بو کی ابرام مَمری اموری پیله بلوطٚ درختأنٚ نزدیکی زندگی کودی. مَمری، اِشکول و عانرٚ برأر بو و اوشأن ابرامٚ اَمرأ هم پیمان بید.
۱۴ وختی ابرام بیشنَوسته کی اونٚ فامیلأن اسیرَ بوستید، ۳۱۸ نفر جٚه خو خانه‌زاده جنگجو مردأکأنَ اوسَده، اوشأنَ تا نزدیکی‌یٚ دان دونبالَ کوده. ۱۵ وختی شب دکفته، اون خو آدمأنَ دسته دسته بوکوده دوشمنَ حمله بوکوده و اوشأنَ شکست بدَه و تا حوبه کی طرفٚ شومالٚ دمشق نهَه، اوشأنَ دونبالَ کوده. ۱۶ تومامٚ اموالَ پسَ گیفته، خو برأرزا لوطَ و اونٚ اموال، هَطویم تومامٚ زنأکأن و بقیه‌یٚ اسیرأن خو اَمرأ بأورده.
ملکیصدق ابرامَ برکت دهه
۱۷ وختی کی ابرام، کَدُرلاعُمَر و پادشایأنی کی اونٚ مره بید شکست بدَه، وأگردسته. بَزین سدومٚ پادشاه بَمو ابرامٚ پیشواز، دره‌یٚ شاوه دورون، کی دره‌یٚ پادشاه نام دأره. ۱۸ او وخت ملکیصدق، سالیمٚ پادشاه،#۱۴:۱۸ نام قدیمی ایسه از شهری مقدّس نان و شراب بأورده. اون، کاهنٚ خودایٚ متعال بو، ۱۹ ابرامَ برکت بدَه بوگفته:
«موبارک ببه ابرام جٚه طرفٚ خودایٚ متعال
آفریننده‌یٚ آسمان و زیمین.
۲۰ متبارک ببه خودایٚ متعال،
کی تی دوشمنأنَ به تی دس تسلیم بوکوده.»
بَزین ابرام جٚه هرچی کی جنگٚ میأن به دس بأورده‌بو، اونَ ده‌یک فدَه.
۲۱ سدومٚ پادشاه ابرامَ بوگفته: «مردومَ مرَ فدن و اموالَ تِره بدأر.»
۲۲ ولی ابرام، سدومٚ پادشایَ بوگفته: «می دسَ خوداوند، خودایٚ متعالٚ طرف، کی آسمان و زیمینَ خلق بوکوده، درازَ کودم#۱۴:۲۲ او زمان اوشأنٚ فرهنگٚ دورون وختی کسی اَطویی خو دسَ درازَ کودی به معنی قسم خوردن بو. ۲۳ کی تی مال و منالٚ جَا ایتأ نخ یا ایتأ کفشٚ بندم اونسَنم، کی نیگی، ‹من ابرامَ پولدارَ کودم.› ۲۴ غیرٚ هرچی کی جوانأن بوخوردیدی و عانر و اشکول و مَمری سهم، کی می اَمرأ بَموییدی.»
Currently Selected:
پیدایش ۱۴: گیلکی (رشتی)
Označeno
Share
Copy
Want to have your highlights saved across all your devices? Sign up or sign in
© 2010-2019 Gilak Media