پیدایش ۱۵
۱۵
خودا ابرامٚ اَمرأ عهد دَوده
۱ بعدٚ اَ ایتفاقأن، خوداوندٚ کلام رویا دورون ابرامَ نازلَ بوسته: «ابرام، نَوأ ترسئن. من تی سپر و تی پیله پاداشم.»
۲ ولی ابرام بوگفته: «ای خوداوند کی می سروری، مرَ چی فدی؟ زأی کی نأرم، می خانه وارثم اِلعاذارٚ دمشقی‌یه. ۳ نسلی‌یم کی مرَ فَندَیی؛ می نوکره کی می خانه وارثه.»
۴ هو لحظه خوداوندٚ کلامَ ایشنَوه کی فرمایه: «تی نوکر تی وارث نیبه، بلکی پسری کی تی جَا به دونیا اَیه، تی وارث به.» ۵ خوداوند ابرامَ ببرده بیرون بوگفته: «تی سرَ بوجورَ گیر آسمانَ فَندر، ستاره‌یأنَ بیشمأر، بیدین تأنی اوشأنَ بیشمأری!» بَزین بفرمأسته: «تی نسل هوطویی فراوانَ به.»
۶ ابرام، خوداوندَ ایمأن بأورده و خوداوند هَه ایمأن ابرامٚ ره پارسایی به حیساب بأورده ۷ و اونَ بوگفته: «من هو خوداوندی ایسم کی ترَ اورٚ کلدانیأنٚ جَا بیرون بأوردم تا اَ سرزیمینٚ ترَ ببخشم کی تی‌شین ببه.»
۸ ولی ابرام بوگفته: «ای خوداوند کی می سروری، جٚه کویه بدأنم کی اَ سرزیمین می‌شین به؟»
۹ پس خوداوند اونَ بوگفته: «ایتأ سه ساله مأنده#۱۵:۹ یَنی ماده گوساله، ایتأ سه ساله بوز، ایتأ سه ساله قوچ، ایتأ یاکریم و ایتأ کبوتر مِره بأور.» ۱۰ ابرام همه‌یَ اوشأنَ بأورده، همه‌تأنَ دو نیمه بوکوده و هر نیمه‌یَ، رو در رویٚ خودشٚ نیمه بنَه ولی پرنده‌یأنَ دو نیمه نوکوده. ۱۱ لاشخورأنی کی اَموییدی لاشه‌یأنٚ سر بینیشینید، ابرام اوشأنَ فورادی#۱۵:۱۱ فورادن یَنی کیش کردن یا راندن. اَ کلمه حیوانأنٚ هدایت کودنٚ وسی بکار شه.. ۱۲ خورشید کی غروب کودن دوبو ابرامَ خوابٚ سنگینی بیگیفته، بوخوفته و تاریکی‌یٚ عظیم و وحشتناکی اونَ دورَ کوده.
۱۳ خوداوند ابرامَ بوگفته: «یقین بدأن تی نسل سرزیمینی دورون کی اوشأنٚ‌شین نی‌یه غریب بیدی. اویه چهارصد سال برده بیدی و مظلومأنه زندگی کونیدی ۱۴ ولی من میلتی‌یَ کی تی زأکأن اوشأنٚ‌ره بردگی کونیدی موجازات کونم. بَزین اوشأن مال و منالٚ فراوانی اَمرأ جٚه اویه بیرون اَییدی. ۱۵ تونم سلامتی اَمرأ پیرَ بی و وختی کی بمَردی ترَ شایستگی مره دفن کونیدی. ۱۶ چار پوشتٚ بعدٚ تو، تی زأکأن وأگردید اَییدی اَیه، چونکی اَموریأنٚ شرارت هنوز به آخر فَنرسه.»
۱۷ وختی کی خورشید غروب بوکوده و هوا تاریکَ بوسته، ایتأ آتشدان کی دود کودی و ایتأ مشعلٚ سوزان آشکارَ بوسته کی جٚه لاشه‌یأنٚ میأن گوذر بوکوده. ۱۸ هو روز خوداوند ابرامٚ اَمرأ عهد و پیمان دَوسته و بوگفته: «اَ سرزیمینَ تی زأکأنَ بخشم، جٚه مصرٚ روخان تا پیله روخان کی فرات ببه. ۱۹ یَنی اَ قومأنٚ سرزیمین: قینیأن و قنزیأن و قدمونیأن ۲۰ و حیتّیأن و فرزیأن و رفائیأن ۲۱ و اموریأن و کنعانیأن و جرجاشیأن و یبوسیأن.»
Currently Selected:
پیدایش ۱۵: گیلکی (رشتی)
Označeno
Share
Copy
Want to have your highlights saved across all your devices? Sign up or sign in
© 2010-2019 Gilak Media