Zãa 8
8
Inaabo iyi í ce sakara
1Ŋɔi Jesu í bɔ geete iyi à ya kpe Olivie. 2Amma iju kumáɛ daadaakɔ í sinda í bɔ bantumai kpasɛ̃i Ilaaɔ̃ nɔ inɛ fei wa bɔ bi tɛɛ, nɔ í buba í lɔsi cio ku kɔ ŋa si. 3Ŋɔi woo kɔ inɛ ŋa si wooda ŋa do Farisi ŋa à naaò inaabo gɔ wa bi tɛɛ iyi à muu si sakara ku ce. Ŋɔi à leekĩɛ si aninii zamaau. 4Nɔ à sɔ̃ Jesu à ni, Mɛɛtu, à mu abou ihɛ̃i si sakara ku ce. 5Wee Moizi í fɔ si woodaɛ í ni dimii inaabo bɛ ihɛ̃ ka taa kuta ka kpaa. To, awɔ mɔ, bɛirei ì yɔɔ.
6À fɔ bɛɛbɛi ku ba a cɔ laakaiɛ nɔ a yɛ taaleɛ. Amma Jesu í kɔmba iri ilɛ wa kɔ si ilɛ do amaawɔ. 7Ŋɔi à beeɛ à manteɛ nɔ í dede í tɛ í sɔ̃ ŋa í ni, inɛ iyi kù ce dulum si inɔ nŋɛ ku tako ku ta abou kuta.
8Nɔ í kɔmba má wa kɔ si ilɛ. 9Iyi à gbɔ bɛɛbɛ ŋɔi à fita akã akã hai inɛ ŋa iyi à ce inɛ ngbo à re ŋau hee ku bɔ si inɛi ankãanyi ŋau. Í gbe Jesu nŋu akã do abou si wajuɛ. 10Ŋɔi Jesu í dede í tɛ má nɔ í beeɛ í ni, abooyi, iwoi à wa. Inɛ gɔ kù gbe ihɛ̃ iyi wa yɛ taaleɛ má? 11Ŋɔi abou í ni, Lafɛ̃ɛ, baa akã nŋa kù wa ihɛ̃ má. Jesu í ni, amu takam mɔ n kaa n yɛ taaleɛ. Nɛɛ, amma maà ce dulum má.]
Jesui í jɛ inya kumái andunya
12Si anyii nŋu, Jesu í ba inɛ ŋa ide ku fɔ má í ni, amui ǹ jɛ inya kumái andunya. Inɛ iyi wa toom á nɛ inya kumá iyi á jɔ̀ inɛ ku ba kuwɛɛ, kaa maa nɛ si ilu kuku. 13Ŋɔi Farisi ŋau à sɔ̃ɔ à ni, nsɛi ì waa jɛa araɛ sɛɛda. Sɛɛdaɛ kù jɛ ntɔ.
14Ŋɔi Jesu í jɛ nŋa í ni, baa bii ǹ wa n jɛa aram sɛɛda, ide ŋa iyi ǹ wa n fɔu fei ntɔi, domi ǹ mà hai bii ǹ naa ǹ nɔ ǹ mà bii ǹ wa n bɔ. Amma iŋɛ i kù mà hai bii ǹ naa hee má jɛ bii ǹ wa n bɔ. 15Iŋɛ ì ya maa ce kiiti ŋai bɛi amanɛ ŋa à ya ce, amu n ci ya n kiiti inɛ kãma. 16Amma baa bii í jɛ ǹ wa n kiiti inɛ ŋa, kiitim á jɛ dee dee domi amu akã si an kiiti ŋa, Baaba iyi í bɛm wa í wɛɛ do amu. 17À kɔɔ si tiai wooda nŋɛ ŋa à ni sɛɛdai amanɛ minjii í jɛ ntɔ. 18Ǹ wa n jɛa aram sɛɛda nɔ Baaba iyi í bɛm wa, nŋu mɔ wa jɛa inɛ ŋa sɛɛdam.
19Ŋɔi à beeɛ à ni, iwoi Baaɛu í wa. Ŋɔi Jesu í jɛ nŋa í ni, i kù mà amu takam ŋa mɔm hee má jɛ Baam. Bii í jɛ ì màm ŋa wo aa mà Baam nɔu ŋa.
20Ideu bɛi Jesu í fɔ waati iyi wa kɔ inɛ ŋa si cio bantumai kpasɛ̃i Ilaaɔ̃ bii à ya jilɛ fiai kɔlɛtiu. Nɔ inɛ gɔ kù lesiɛ awɔ si na iyi í jɔ̀ waatiɛ kù to wa titã.
A kaa yɔkɔ a bɔ bii Jesu wa bɔ
21Ŋɔi Jesu í sɔ̃ inɛ ŋa má í ni, an nɛ nɔ aa na i dɛdɛɛm ŋa, amma aa ku ŋai si dulum du ŋɛ. I kaa yɔkɔ i bɔ bii ǹ wa n bɔ ŋa. 22Si bɛi í ni bii nŋu wa bɔ a kaa yɔkɔ a bɔ bɛ nŋui í jɔ̀ Zuifu ŋau à bee njɛ à waa ni, debɛi á kpa araɛi? 23Nɔ Jesu í ni, hai ilɛ ihɛ̃i iŋɛ ì naa ŋa, amma amu hai lelei Aɔ̃i ǹ naa. Iŋɛ inɛi andunya ŋai, amma amu n kù jɛ inɛi andunya. 24Na ŋɔi í ce ǹ ni aa ku si dulum du ŋɛ ŋa. Ntɔ ntɔ, bii i kù dasi naanɛ ŋa iyi amui ǹ jɛ inɛ iyi Ilaaɔ̃ í cicau aa ku si dulum du ŋɛ ŋai. 25Ŋɔi à beeɛ à ni, awɔi yoo. Ŋɔi Jesu í jɛ nŋa í ni, ǹ sɔ̃ ŋɛ tã hai sinteɛ. 26Ide iyi ǹ nɛ ku fɔ na iri nŋɛ n yɛò taale nŋɛ í kpɔ. Amma inɛ iyi í bɛm wa ilu ntɔi, nɔ ide iyi ǹ gbɔ hai bi tɛɛ, nŋui ǹ wa n sisia inɛ ŋa titã.
27Amma waati iyi Jesu wa fɔ bɛɛbɛ a kù mà hee mà idei Ilaaɔ̃ Baabai wa sɔ̃ ŋa. 28Ŋɔi Jesu í ni, ajɔ iyi aa so Amai Amanɛ i kɔaɛ lele ŋa, ajɔ nŋui aa mà ŋa iyi amui ǹ jɛ inɛ iyi Ilaaɔ̃ í cica. Nɔ ajɔ nŋui aa mà ŋa má iyi n kù wa n ce ngɔgɔ do aram. Ide iyi Baaba í sɔ̃m nŋu akãi ǹ wa n sɔ̃ iŋɛ mɔ. 29Nŋu iyi í bɛm wa í wɛɛ do amu. Kù jɔ̀m amu akã domi waati kãma fei iyi á dɔ̃a sii ǹ ya n ce. 30Iyi Jesu í fɔ bɛɛbɛ inɛ nkpɔi í dasiɛ naanɛ.
Aru ŋa do inɛ ŋa iyi à nɛ ara nŋa
31Ŋɔi Jesu í sɔ̃ Zuifu ŋa iyi à dasiɛ naanɛ í ni, bii ì waa jirima idem ŋa ì jɛ mɔcɔm ŋai ntɔ ntɔ. 32Aa mà ntɔ ŋa nɔ ntɔu á jɔ̀ i nɛ ara nŋɛ.
33Ŋɔi à jɛaa à ni, awa tɔkui Aburahamu ŋai a kù nɔ a kù jɛ arui inɛ gɔ ajɔ kãma. Bɛirei í ce ì waa sɔ̃ wa ì ni aa ka nɛ ara nwa. 34Ŋɔi Jesu í jɛ nŋa í ni, ntɔ ntɔ ǹ wa n sɔ̃ ŋɛi, inɛ iyi í ya ce dulum fei arui dulum nii í jɛ. 35Aru ci ya nɔ ku wa kpasɛ̃i lafɛ̃ɛ do ajɔ fei, amaabíɛi í ya wa bɛ do ajɔ fei. 36Na ŋɔi í ce, bii amu Amai Ilaaɔ̃ ǹ jɔ̀ ì nɛ araɛ, aa nɛ araɛi ntɔ ntɔ. 37Ǹ mà iyi iŋɛ tɔkui Aburahamu ŋai. Amma ì waa dɛ ku kpam ŋa si na iyi í jɔ̀ i ci ya jɔ̀ idem ku buba si idɔ nŋɛ. 38Mii iyi ǹ yɛ bi Baam nŋui ǹ wa n sɔ̃ ŋɛ, bɛɛbɛi iŋɛ mɔ ì waa ce mii iyi baa nŋɛ í sɔ̃ ŋɛ.
39Ŋɔi à jɛaa à ni, Aburahamui í jɛ baa nwa. Ŋɔi Jesu í jɛ nŋa í ni, bii í jɛ iŋɛ amai Aburahamu ŋai ntɔ ntɔ, mii iyi Aburahamu í ce nŋui aa ya ce ŋa wo. 40Amma wee nsɛi í ya maa dɛ ku kpam ŋai, amu iyi ǹ wa n sɔ̃ ŋɛ ide ntɔ iyi ǹ gbɔ hai bi Ilaaɔ̃. Aburahamu kù nɔ kù ce dimiɛ ajɔ kãma. 41Do nŋu fei, ǹ wa n sɔ̃ ŋɛi, kookoosu ŋa iyi baa nŋɛ í ya ce nŋui iŋɛ mɔ ì waa ce.
Ŋɔi à jɛaa à ni, awa a kù jɛ seege ŋa. Ilaaɔ̃ nŋu akãi í jɛ baa nwa. 42Ŋɔi Jesu í sɔ̃ ŋa í ni, bii í jɛ Ilaaɔ̃i í jɛ baa nŋɛ aa bim ŋa, domi hai bi Ilaaɔ̃i ǹ fita wa ǹ naa ihɛ̃. N kù naa do aram, nŋui í bɛm wa. 43Na mii í ce i ci ya gbɔ yaasei idem ŋa. I ci ya gbɔ yaaseɛ ŋai si na iyi í jɔ̀ i kaa yɔkɔ ŋa. 44Seetam nii í jɛ baa nŋɛ, nɔ ì waa bi i ce idɔɔbii baa nŋɛu. Hai sinte woo kpa inɛi. Kù waa leekĩ si kpãai ntɔ domi ntɔ kù wa siɛ. Bii wa sɔ ibo, í ya maa fɔi bɛi nŋu takaɛ í yɛ domi ilu iboi, nɔ baai ilu ibo feii. 45Amma si na iyi í jɔ̀ amu ǹ ya n sɔ̃ ŋɛ ntɔ, nŋui í jɔ̀ i kù waa dasim naanɛ ŋa. 46Yoo nŋɛi á yɔkɔ ku ni nŋu í yɛ ǹ ce dulum. Kù wɛɛ. Debɛi, na mii í ce i ci ya dasim naanɛ ŋa bii ǹ wa n sɔ̃ ŋɛ ntɔ. 47Inɛ iyi í jɛ ti Ilaaɔ̃ nŋui í ya gbɔ idei Ilaaɔ̃. Si bɛi iŋɛ i kù jɛ tɛɛ ŋai í jɔ̀ i ci ya gbɔ ideɛ ŋa.
Jesu do Aburahamu*
48Ŋɔi Zuifu ŋau à sɔ̃ Jesu à ni, debɛi awa à nɛ ntɔ si bɛi à ni awɔ inɛi Samarii, nɔ ì nɛ inɛi inɔɔko. 49Ŋɔi Jesu í jɛ nŋa í ni, n kù nɛ inɛi inɔɔko. Baam nii ǹ wa n saalu, amma iŋɛ i kù waa saalum ŋa. 50N kù wa n dɛ bɛɛrɛi aram. Inɛ gɔi wa dɛdɛ bɛɛrɛm, nŋui í nɔ í jɛ woo kiiti. 51Ntɔ ntɔ ǹ wa n sɔ̃ ŋɛi, inɛ iyi wa jirima idem lafɛ̃ɛ kaa ku pai.
52Ŋɔi Zuifu ŋau à sɔ̃ɔ à ni, bɛbɛi à mà iyi ntɔ ntɔ ì nɛ inɛi inɔɔkoi, domi Aburahamu í ku nɔ walii ŋau mɔ à ku, nɔ awɔ ì ni inɛ iyi wa jirima ideɛ kaa ku pai. 53Bala nwa Aburahamu í ku. Mà ì tamaa awɔ ì la ì rooi? Nɔ walii ŋau mɔ à ku. To, yooi awɔ ì waa tamaa ì jɛ.
54Ŋɔi Jesu í jɛ nŋa í ni, bii amui ǹ wa n dɛ bɛɛrɛi aram, bɛɛrɛ ngbɛi. Inɛ iyi wa dɛ bɛɛrɛm, nŋui í jɛ Baam iyi iŋɛ ì ni í jɛ Aɔ̃ Lafɛ̃ɛ nŋɛ. 55Do nŋu fei, i kù màa ŋa, amma amu ǹ màa. Bii ǹ ni n kù màa, ǹ jɛ ilu iboi bɛi iŋɛ mɔ. Amma amu ǹ màa nɔ ǹ wa n jirima ideɛ. 56Aburahamu, bala nŋɛu, í wɛɛò inɔ didɔ̃ nla nla si bɛi á na ku yɛ kunaam. Í nɔ í yɔɔ. Iyi í yɔɔ nɔ inɔɛ í dɔ̃. 57Ŋɔi Zuifu ŋau à sɔ̃ɔ à ni, i kù to adɔ̃ ciitaa titã, nɔ bɛirei ì ce ì yɛ Aburahamu. 58Ŋɔi Jesu í ni, ntɔ ntɔ ǹ wa n sɔ̃ ŋɛ, ǹ wɛɛ mɔm wo hai waati iyi a kù bí Aburahamu. 59Ŋɔi à tasi kuta à waa bi a taa, amma Jesu í manji í fita hai kpasɛ̃i Ilaaɔ̃u í nɛ.
Currently Selected:
Zãa 8: MKL
Označeno
Share
Copy
Want to have your highlights saved across all your devices? Sign up or sign in
2021, SIM International et UEEB