Zãa 7
7
Ifɔi Jesu ŋa a kù dasiɛ naanɛ
1Si anyii nŋu, Jesu wa dabii si ilɛi Galilee. Kù bi ku bɔ ikpa ilɛi Zudee domi Zuifu ŋau à waa dɛ ku kpaai. 2Nɔ wee jingaui Zuifu ŋa iyi à ya kpe jingaui Kusu ŋa í maai wa. 3Ŋɔi ifɔi Jesu ŋa à sɔ̃ɔ à ni, nɛ hai ihɛ̃ i bɔ Zudee ku ba mɔcɔɛ ŋa iyi à wa ikpa bɛ a yɛ icɛ iyi ì waa ce, 4domi bii amanɛ í bi a mà nŋu bantuma kaa máa ce ngɔgɔ si asii. Bii ì waa ce dimii icɛ bɛɛbɛ, í gbe í nyisi inɛ ŋa araɛ. 5À waa fɔ bɛɛbɛi si na iyi í jɔ̀ baa aŋa taka nŋa a kù dasiɛ naanɛ. 6Ŋɔi Jesu í sɔ̃ ŋa í ni, waatim kù to wa titã, amma iŋɛ waatiu fei í sĩa nŋɛi. 7Inɛi andunya ŋa a kaa yɔkɔ a cé ŋɛ, amma à cé amu domi ǹ ya n ni kookoosu nŋa kù sĩa. 8Iŋɛ i bɔ jingauu, amma amu n kù wa n koo si na iyi í jɔ̀ waatim kù to wa. 9Iyi í sɔ̃ ŋa ideu í tã nɔ í gbe ilɛi Galilee bɛ.
Jesu í bɔ jingau
10Iyi ifɔi Jesu ŋa à bɔ jingauu ŋɔi nŋu mɔ í dede í koo do asii, kù bi a yɔɔ si bantuma. 11Ŋɔi Zuifu ŋau à wasi ku dɛdɛɛ si waatii jingauu à waa ni, iwoi í wa.
12Ŋɔi si zamaau inɛ ŋa à wasi ku fɔ ideɛ do gundu. Inɛ gɔ ŋa à waa ni, inɛ jiidai. Nɔ inɛ gɔ ŋa mɔ à waa ni, iboi, wa dĩ ijui inɛ ŋai. 13Amma kãma nŋa ci ya fɔ ideɛ do wɔɔkɔ domi à waa ce njoi inɛ ngbo ŋau.
14Iyi inɛ ŋa à jɛ jingauu à to anini ŋɔi Jesu í koo í lɔ bantumai kpasɛ̃i Ilaaɔ̃ bɛ wa kɔ inɛ ŋa si cio. 15Ŋɔi Zuifu ŋau à biti nɔ à wasi ku ni, bɛirei inɛ iyi kù bɔ cio í ce í mà kukɔi idei Ilaaɔ̃ bɛ ihɛ̃.
16Ŋɔi Jesu í jɛ nŋa í ni, ciom kù waa naa hai bi tom. Hai bi Ilaaɔ̃i wa naa, nŋu iyi í bɛm wa. 17Inɛ iyi í bi nŋu ku ce idɔɔbii Ilaaɔ̃, lafɛ̃ɛ á mà bii ciom hai bi Ilaaɔ̃i wa naa, walakɔ bii í jɛ ti amu takam nii. 18Inɛ iyi wa fɔ ide do yiikoi irii araɛ bɛɛrɛi nŋu takaɛi wa dɛ. Amma inɛ iyi wa dɛ bɛɛrɛi inɛ iyi í bɔɔ wa, lafɛ̃ɛ ntɔi í ya fɔ, ibo kãma ci ya wa siɛ. 19Moizii í na ŋɛ wooda, mà irei. Amma do nŋu fei, kãma nŋɛ kù waa jirima woodau. To, na mii í ce ì waa dɛ ku kpam ŋa. 20Ŋɔi zamaau í jɛaa í ni, ì nɛ inɛi inɔɔkoi. Yooi wa dɛ ku kpaɛ.
21Jesu í jɛ nŋa í ni, maamaake akãi ǹ ce nɔ iŋɛ fei ì biti. 22Amma i lasabu ŋa. Moizii í na ŋɛ woodai bango ku dasi. Nŋui í jɔ̀ baa bii í jɛ ajɔi kusĩmii ì ya maa dasi ama nŋɛ ŋa bango ŋa. Nɔ mɔm idei bango ku dasiu kù jɛ hai bi Moizii wa naa, hai bi bala nŋɛ ŋai. 23Debɛi, bii ì waa dasi ama nŋɛ ŋa bango si ajɔi kusĩmiu ku ba i maà bɛjɛ woodai Moizi ŋa, na mii í ce ì ya maa mum do idɔɔkɔ̃ ŋa waati iyi ǹ faaba arai inɛ gɔ fei mam mam si ajɔi kusĩmiu. 24I maà ya kiiti ngɔgɔ si bɛi ì waa yɔɔ do iju nŋu akã ŋa, amma i ce kiitiu dee dee ŋa.
Jesui í jɛ inɛ iyi Ilaaɔ̃ í cicau?
25Ŋɔi inɛi Zeruzalɛmu gɔ ŋa, iyi à gbɔ Jesu í fɔ bɛɛbɛ à waa ni, kù jɛ inɛɛu ihɛ̃i à waa dɛ ku kpau ya. 26Nɔ wee wa fɔ ide si bantuma nɔ inɛ gɔ kù ni ide gɔ mɛɛ. Mà inɛ ngbo nwa ŋa à mà bɛbɛi iyi nŋui í jɛ inɛ iyi Ilaaɔ̃ í cicau do ntɔ de. 27Amma bii í jɛ inɛ iyi Ilaaɔ̃ í cicau wa naa inɛ gɔ kaa mà hai bii á naaò wa, nɔ wee awa à mà hai bii inɛɛu ihɛ̃ í naa.
28Si bɛi Jesu wa kɔ ŋa si cio bantumai kpasɛ̃i Ilaaɔ̃ bɛ í la wa ni, ì waa tamaa bɛi ì màm ŋai, ì nɔ ì mà hai bii ǹ wa n naa ŋa. Do nŋu fei, n kù naa do yiikoi aram, amma ilu ntɔ iyi iŋɛ i kù mà, nŋui í bɛm wa. 29Amu ǹ màa, domi hai bi tɛɛi ǹ wa n naa, nŋu mɔi í nɔ í bɛm wa.
30Ŋɔi à waa dɛ ku muu, amma inɛ gɔ kù lesiɛ awɔ domi waatiɛ kù to wa titã. 31Si zamaau inɛ nkpɔ í dasiɛ naanɛ ŋɔi à ni, bii inɛ ihɛ̃ kù jɛ inɛ iyi Ilaaɔ̃ í cicau, inɛ mmu iyi á na ku naa á yɔkɔ ku ce maamaake ŋa ku re bɛi inɛɛu ihɛ̃ wa ce?
À bɛ woo degbe kpasɛ̃i Ilaaɔ̃* ŋa a koo a mu Jesu
32 Farisi ŋau à gbɔ bɛi inɛ ŋau à waa fɔ idei Jesu do gundu. Na nŋu, inɛ ngboi woo weei Ilaaɔ̃ ŋa do Farisi ŋa à bɛ woo degbe kpasɛ̃i Ilaaɔ̃ ŋa a koo a muu wa. 33Ŋɔi Jesu í sɔ̃ ŋa í ni, waati keekei í gbe iyi an wɛɛ do iŋɛ. Si anyiɛ an nyi bi inɛ iyi í bɛm wa. 34Aa na i maa dɛdɛɛm ŋa amma i kaa yɛm ŋa, domi i kaa yɔkɔ i bɔ bii an wa ŋa.
35Ŋɔi Zuifu ŋau à bee njɛ ide à waa ni, iwoi á bɔ iyi a kaa ka yɔɔ. Mà bi inɛ nwa ŋa iyi à fangaa si ilɛi dimi mmu ŋaui á bɔ ya. Á koo kɔ dimi mmu ŋau si cioi? 36Yoomai í jɛ yaasei ide iyi í fɔu bɛ si bɛi í ni aa ka dɛ nŋu amma a kaa ka yɛ nŋu, domi bii nŋu á wa a kaa ka yɔkɔ ka bɔ bɛ.
Inyii kuwɛɛ
37Ajɔi ankãanyii jingaui í ya nɛ bɛɛrɛ ku re. Ajɔ nŋuu, ŋɔi Jesu í dede í leekĩ wa fɔ ide hee lele wa ni, inɛ iyi agbɛ wa kpa ku naa ku mɔ inyi bi tom. 38Inɛ iyi í dasim naanɛ fei á yɛi bɛi inyii kuwɛɛ á maa cãi hai si idɔi lafɛ̃ɛ. Bɛɛbɛi kukɔi idei Ilaaɔ̃ í ni.
39Wee idei Hundei Ilaaɔ̃i Jesu wa fãa. Inɛ iyi í dasi Jesu naanɛ fei á ba Hundeu. Amma waati iyi wa fɔ bɛɛbɛu Ilaaɔ̃ kù na Hundeɛ titã si na iyi í jɔ̀ Jesu kù nyisi amboeɛ waati bɛɛbɛ.
Inɛ ŋa à waa kpɛ̃ njɛ na irii Jesu
40Inɛ gɔ ŋa si inɔi zamaau, iyi à gbɔ ideu ŋɔi à ni, inɛɛu ihɛ̃ walii nlaui ntɔ ntɔ. 41Inɛ gɔ ŋa mɔ à ni, inɛ iyi Ilaaɔ̃ í cicaui. Amma inɛ gɔ ŋa à ni, bɛirei inɛ iyi Ilaaɔ̃ í cicau á ce ku naa hai ilɛi Galilee. 42Kukɔi idei Ilaaɔ̃ kù ni inɛ iyi Ilaaɔ̃ í cicau á fita wai hai si dimii Davidi? Hai Betelehɛmu ilui Davidi takaɛi á naa. 43Nɔ inɛ ŋau à waa kpɛ̃ njɛ na iriɛ. 44Inɛ gɔ ŋa à bi a muu, amma inɛ kãma kù lesiɛ awɔ.
Naanɛ hai dasii inɛ ngboi Zuifu* ŋa
45Ŋɔi woo degbe kpasɛ̃i Ilaaɔ̃ ŋau à nyi bi inɛ ngboi woo weei Ilaaɔ̃ ŋa do Farisi ŋau. Ŋɔi à bee ŋa à ni, na mii í ce i kù mu Jesuu wa ŋa. 46Ŋɔi woo degbe kpasɛ̃i Ilaaɔ̃ ŋau à jɛ à ni, inɛ kãma kù wɛɛ iyi í fɔ ide bɛi inɛɛu bɛ. 47Ŋɔi Farisi ŋau à bee ŋa à waa ni, to, iŋɛ mɔ ì jɔ̀ inɛɛu í dĩ iju nŋɛ ŋa ya. 48Ì gbɔ bii inɛ ngbo gɔ walakɔ Farisi ŋau baa inɛ akã nŋa í dasiɛ naanɛ ŋai? 49Amma zamaau kù mà woodai Moizi. Inɛ ŋai iyi à ceekpe.
50Amma si inɔi Farisi ŋau inɛ gɔ í wa bɛ à ya kpoo Nikodɛmu. Nŋui í bɔ bi Jesu idũu wo. Iyi í gbɔ à waa fɔ bɛɛbɛ ŋɔi í bee ŋa í ni, 51wooda nwa í yɔɔda nwa ka yɛ taalei amanɛ hai a kù gbɔ ideɛ nɔ a kù mà mii iyi í ce? 52Ŋɔi à beeɛ à ni, asee awɔ takaɛ mɔ inɛi Galileei? Cɔ si kukɔi idei Ilaaɔ̃ sãa sãa, i kaa yɛ walii gɔ iyi í fita wa hai Galilee. [ 53Nɔ inɛ fei í nɛ kpasɛ̃ɛ.
Currently Selected:
Zãa 7: MKL
Označeno
Share
Copy
Want to have your highlights saved across all your devices? Sign up or sign in
2021, SIM International et UEEB